الاثنين، 10 نوفمبر 2008

هذي أولها ؟!

على الغداء إجتمعت الأسرة الصغيرة وسألت الأم اصغر أطفالها ( في الصف الثاني ابتدائي ) : شنو سويت في إمتحان اليوم ؟
عبد الله : الأبله تقول وايد زين ... عندي بس ست غلطات !
الأب يبتسم لسذاجة ابنه والأم تتكدر والإخوان يضحكون .
يحاول الطفل استرضاء أمه وتخفيف غضبها عليه وتحويل مسار الحديث لحدث آخر أقوى من مستوى تقديمه للامتحان .
عبد الله : يمه ... الأبله اليوم قالت لنا يا جزمة ! ... تعرفين شنو معناها بالعربي ؟
الأم وهي تحاول إخفاء صدمتها : لا ... ما أعرف .
عبد الله : يعني جوتي .
عبد الله : يمه ... أبلة الدين الحامل فيها بنت !
الأم : إشدراكم ؟
عبد الله : سمعنا الأبلات يقولون لها شنو شريتي حق الصغيرة ؟
الأم لازالت غير راضية
عبد الله : يمه ... تدرين زين إني مو متفوق ؟
الأم باستغراب : ليش زين ؟
عبد الله : لأن يطلعونهم بالساحة ويسلم عليهم الناظر بالشمس !
انسدت نفس الأم عن الأكل وغادرت المائدة
التفت الصغير لإخوانه مستفسرا : أمي ليش زعلانه ؟

هناك 19 تعليقًا:

sinfuleye يقول...

انا انقهرت من هالياهل ودي اطقه
فيه شويه من " عفويه " اخوي الصغير اللي يبط الجبد نفس الطريقه هم بعد !
تسلم ايدك ^_^

daggero يقول...

Nikon8

والناس تسأل وزراؤنا من أين أتوا

هذا الولد الله يحفظه له مستقبل باهر لأن له نظرة فى الأمور مغايرة لنظرة أقرانه الذين فى سنه

على الأم أن لاتبتأس وأذا هى مصممة على تعليمه بصورة مغايرة فمالها الأ أن تحوله الى مدرسة أجنبية وتحمل
Yeah
و I dunn know

nikon 8 يقول...

sinfuleye
اهلا بك بدار عزيزة ... والله يسلمك

nikon 8 يقول...

daggero
كلها كم سنة وبنشوف مستقبل هالولد إذا إحنا من الحيين :)
ما دام إنه لوتي أكيد له مستقبل متميز :)

um_alzain يقول...

nikon8 الله يخليه لامه والله عندي مثله ومجننيني ذكائهم يطلع باللغابه ,مايطوفهم شي في المدرسه المدرسه فلانه مخطوبه لفلان ,المدرسه اليوم زعلانه لانها متهاوشه مع الاستاذ,المس اليوم بنتها مريضه , المدرسات يستخدمون الموبايل في الصف والاخبار الخاصه والعامه كل في اذاني اعيالنا وتقولون مدارس خاصه خلونا في الحكومه احسن امور المفروض تكون بعيده عن الطلبه ايتابعونها من حب واعجاب بين المدرسين الاجانب والمدارس الخاصه يفظلون المدرس مع زوجته مدرسه في المدرسه وشوفو اعيالنا مايطوفهم شي اليوم متزاعلين لا تراضو شنو تغدو شنو قالو وين راحو اشرايهم بالبلد منو مزعلهم ويييييييي ماعندنا شغل غير التقرير اليومي واخبار العنجريز مع اعيالنا, الله يعين قلوبنا مادري انلحق على شنو ولاشنو,ماطول عليكم.

nikon 8 يقول...

um alzain
كأني ودي أصادق عيالك ...! شكلهم عندهم قصص عن مدرستهم تصلح حق دار عزيزة لوووول :)

um_alzain يقول...

عزيزتي nikon8 والله ارتفع ضغطي وصدع راسي للحين فيني حجي عن المدرسه والمدرسات فياليت تنسينا الموضوع بسوالف غنيمه وام بزيع ياحليلهم قصيصهم وسوالفهم حلوه اينسونا هم المدارس .

um_alzain يقول...

الله لوتشوفين فرحتهم لانك بتصاحبينهم وبيصيرون مصدر اخبارك في المدارس الخاصه اطلعت شطارتهم بنقل الاخبار ,الله جنهم انقلبو لام بزايع!!!

nikon 8 يقول...

um alzain
على قولتك هم المدارس ما يخلص ... خلينا على غنيمة وأم بزيع أبرك :)
والعيال قولي لهم هونا ما نبي أخبار وركزوا هلى دراستكم .. لووول ... يكفينا أم بزيع واحده وعسانا نقدر عليها وعلى قولتك ( نأهلها ).

كويتيه بحرينيه يقول...

يحليله هالياهل والله ان عندي اخو بنفس سوالفه لما كان صغير... بس الحمدلله كبر وصار خوش ريال واب لبنوتين... يعني اطمنكم عبدالله بيصير خوووش ريال ان شاء الله ... بس الفرق بينه وبين اخوي ان وقتها الابله تقول "شو كوليت" (باللهجه الفلسطينيه بدل المصريه).. لوووووووووووول

nikon 8 يقول...

كويتية بحرينية
الله يطمنك مع إن الدلائل لحد الحين ما تطمن .... الريال مستانس إنه مو متفوق ..قانع روحه إن هو الصح !

um_alzain يقول...

اوووووو ذكرتيني على طاري التركيز في الدراسه في هببببه جديده في المدارس كل طالب مشاغب الهايبر طلعو فيه الف عذروب ايقولون بطيء تعلم بط الله روسهم صرقعو عيالنا ولا الطالب الخجول يبون يفتحون له ملف عند المرشده الاجتماعيه ويحطونه تحت الملاحظه عقدوهم يامالهم العقد من راسهم لي كرياسهم :)))والله حاله, ياحلو ايامنا مافي عقد نتفنن في الشطانه وشزينا

nikon 8 يقول...

um alzain
ما عليك منهم ... فالهم ما قبلناه .. وكل أم أدرى بأطباع عيالها ومن طالعين عليه ... وما ردهم بكبرون ويتعدلون ... آآآمييين

Shaima'a Alkandari يقول...

الله يعين

لازم الاهل يشدون على عيالهم شوي والمدرسات مايقولون جذي ولايتكلمون جدام الطلبه بمواضيع نفس هذي

nikon 8 يقول...

Shaima'a Alkandari
كلامك صحيح ، وأهلا بك عزيزة في دار عزيزة.
وعلى فكرة مبروك والله يثيتك على الطاعة .

Deema يقول...

و الله صاج ما عندها سالفة تزعل
كافي خف طينته، ما حاجة يتفوق :)

nikon 8 يقول...

deema
راح ننقل تعليقك حق عبدالله وأكيد أهو راح يفرح وأمه بتزعل زيادة .

حقوقيه يقول...

http://7i8oo8iya.blogspot.com/

nikon 8 يقول...

حقوقية
أهلا بك عزيزة في دار عزيزة ... ومبروك المدونة :)