الخميس، 25 ديسمبر 2008

راجو ... بياع أفلام السي دي

مع إن راجو ممنون لكل واحد يطلبه لو سي دي واحد ...ومستعد يوصله له لآخر الكويت !
ولكن لا أعلم لماذا لا تحلو فكرة استدعاءه إلا مع التجمع في زوارة أو ديوانية أو مخيم ؟؟؟
عادة ما تبدأ الحكاية بتذمر أحدى الأمهات خلال التجمع العائلي من لوية اليهال أو المراهقات أو تذمر المراهقين ... ما في شي يونس ؟ ... أو الكلمة اللي هابين فيها بنات وأولاد ( ملاقة ) !!!
المهم يكون الحل بالاتصال براجو لعرض أفلامه واختيار ثلاث أو خمس أفلام على أكثر تقدير ولازم يكون من بينهم فيلم أكشن للشباب ( بدال ما طقني وأطقك بين بعضهم بعض ) وأفلام هانا مونتانا وهاي سكول ميوزيكال للشابات ( يتدربون على الرقص وحفظ الأغاني ) وفيلم رسوم متحركة يطخخ اليهال ويقعدهم ساكتين ( بدال ما يفتنون على بعض .. هذا دزني .. وهاذي قالت لنا كلمة عيب ... وهذاك طلع لنا لسانه ... وهذيك عيبت علينا ) .
وين أو وين يشوفون بعض ... يا الله بالأسبوع مرة ...وبدال ما يستانسون بشوفة بعض .. يتكرر نفس السيناريو كل زوارة بين الصغار ... وناسة ولعب أول ما يشوفون بعض ... بعدين شكاوي من بعض ... وفي الأخير لازم مفاككين صبيان ... أو بنات متحاربين !
وإذا حان موعد رجعتهم للبيت ... بكي وصياح .. تو الناس !... ما نبي نرجع البيت!... ما كملنا لعب وشوفة أفلام ؟
صرخات التهليل والاستبشار والفرحة بحضور راجو تصك على فرحة إستقبال فريق منتخبنا فايز وحامل كأس الخليج .... أشك إنهم بيشوفون هالمنظر ...فخلهم يفرحون براجو وبقشة أفلامه!
راجو صار من أهل البيت وعارف مكان بسطته زين ... في الحوش ... قريبا من مدخل البيت ... مكان استراتيجي ... مكشوف للرايح والجاي ....وأي زاير لنا لا بد يوقف وسط هالضبة .. ويصوت حاله حال الباقين ... كم هذا ؟ عندك هالفيلم ؟... ويختار له كم فيلم ويدفع حسابهم قبل لا يدخل لأهل البيت ويسلم عليهم !!!
من الضجة ما يثبت راجو كل واحد أخذ شنو ؟ وكم فيلم ؟ الصيحة مستجلة ... إلحاح عيال ... وأمهات ترفض .... بسكم .... كل واحد فيلمين ... وعيال يصرون على الشراء ... بنشتري بفلوسنا !
ولأن راجو ضامن أهل البيت وأمانتهم ... فما يدقق وايد ... ويحمد ربه لأنه منادينه على كم فيلم ما يزيد حسابهم عن عشرة دنانير ويطلع بمبلغ وقدره ؟؟؟ ... وفوق حسابه يحصل على ضيافة من خدام البيت شاي وحليب هندي أصلي خلال البيع ( يحوفونه أكثر من ضيوفنا )... وإذا لم أفلامه وربط بقشته يدل دربه صوب المطبخ ويتعشى معاهم عيش جاول ومرق كاري أصلي مع إيدام ... وإذا خلص عشا عطوه كم ماعون قصدير فيه وجبات تكفيه كم يوم !!
عليه بالعافية راجو .... خطر على بالي وجبت طاريه لأني طحت على خوش موقع للأفلام
http://myegy.com/ تهقون راح يطيح سكة راجو ؟؟
عليكم بالعافية بالموقع ...
تنويه : أقر بأنني غير مسؤولة إذا كان محتوى الموقع فيه ما يتعارض مع أفكاركم أو أخلاقكم أو معتقداتكم .
قصدي الترفيه ... مو باكر تسوون لنا سالفة ... وطلب استجواب لوزير الأعلام أو المواصلات هالأيام النواب يدورون على الشاره ... ترا راح ننحرم كلنا من الإنترنت ... وبنصير على قولة القايل بغيناها طرب وصارت نشب !

هناك 19 تعليقًا:

enter-q8 يقول...

لا ابشرك مازال راجوا اهو المسيطر
الموقع هذا يعتبر متاخر بالنسبة للمواقع الثانية
بس ميزته الافلام العربية فقط
انا عندي موقع مفضل
بس عيبه شي واحد انه خليط
مع انه ترتيبه متقدم حيل
و الزين فيهم اعرفوا ان فيه رواد مسلمين
و حط كنترول اذا كنت منتسب و مسجل فيه و طبعا مجاناً
انك تغلق اعلانات الافلام الاباحية

غير معرف يقول...

أين نحن من حقوق الملكية الفكرية ؟

um.alzain يقول...

ياحلات السهاله توصيل للبيت بلا فراره بالشوارع بالزحمه والله احلا فتره بالنسبه للابناء يقضونها بمتابع الافلام ,اتصدقين ان الفلم ينعاد مره ومرتين وثلاث وهم مسبهين وعيونهم مافارقت الشاشه محولين الغرفه لسينما والنفيش منثر بكبر الغرفه والكسل والرباده زايده طول النهاروالليل بهل شاشه خايفه على عيونهم لاتنبط لدرجه اني اساحلهم عشان اشوفهم اواتكلم وياهم,كل مره اتهدد مافي افلام..... بس الحنه واللويه تبتدي اقول مسموح بدل الفلم لكل واحد منكم اربعه :)))

daggero يقول...

Nikon8

راجوالظاهر مشهور على مستوى الدولة كان فيه بلوجر من مدة كانت كاتبه عنه وعن خدمات توصيل السى دى وحطت رقم نقاله

Unknown يقول...

مهما اطلعت مواقع يظل راجو الاهم!!!

nikon 8 يقول...

Enter-Q8
شكرا على المعلومة ويا ريت تفيدنا بعنوان الموقع أو المواقع المتقدمة في الأفلام .

nikon 8 يقول...

غير معرف
ونحن نساءل بدورنا .. أين ؟؟؟
وأهلا بكم بدار عزيزة :)

nikon 8 يقول...

um_alzain
عليهم بالعافية ... بس عساهم يحافظون عليهم ؟

nikon 8 يقول...

daggero
الظاهر العيال ماخذين رقمة من النت ... من صار الكمبيوتر ما قام ينخش عنهم شي ؟؟
صاروا هم اللي يعلمونا !

nikon 8 يقول...

كويتيه بحرينيه
إذا جاب سي دي طبخ بعلمك ... حق الوالده الله يحفظها تغير عن قناة فتافيت شوي :)

um.alzain يقول...

عزيزتي nikon8 هذا بعض مواقع طلبات الdvd وطبعا ماخذتها من الزين واخوانها انشالله تعجبكم!!؟ ولا مجمعين كل مواقع التوصيل من مطاعم ومعارض وفاشن ومن مجاميعه حتى الصيدليات في خدمة توصيل حتى الانتيبايتك من غير وصفه :))) **سهالات** DVDS :
www.i2dvd.com
www.macdvds.com
www.dvdmuscle.com
www.q8dvds.com

nikon 8 يقول...

um_alzain
شكرا على المعلومات المفيدة .. وإنشاء الله تعم الفايدة للجميع :)

جنة الحواس يقول...

أنا مستغربة من شي ! تفاصيل زوارتكم نفس تفاصيل زوارتنا بالضبط ..خاصة لوية اليهال ...

مع إختلاف سبب إتصالنا بـ راجو !

nikon 8 يقول...

Broke
السر في الجينات الكويتية اللى نتوارثها ... وتصدقين أعرف اليهال الكويتيين بالسفر من هذي التصرفات :)

Unknown يقول...

nikon8 اقول بعد احنا تطورنا في زوارتنا قمنا نتصل على كومار مال المكياج لوووووووووووووووووووووووووول

nikon 8 يقول...

كويتيه بحرينيه
لوووول
هذه معلومة جديدة ... حتى المكياج صار ينعرض عند الباب :)
لا عزاء لديور وشيسيدو :)

غير معرف يقول...

Nikon8

boxing day is the day after christmas

nikon 8 يقول...

daggero
شكرا على المعلومة أول مرة أتعرف عليها ... ليش سموه كذي ... يلعبون ملاكمة بعد الكريسماس ؟

daggero يقول...

Nikon8

السبب غير معروف في هذه التسمية بس أغلب التفسيرات تقول بأن المعازيب كانوا يعطفون على اللى يشتغلون عندهم فيعطونهم فلوس وهدايا فى اليوم اللى بعد الكريسماس لأن تبادل الهدايا مع الأقران والأهل يكون فى يوم الكريسماس فقط