الأربعاء، 28 يناير 2009

كاس عمان

كنت في زيارة قصيرة لبيت الله الحرام كمرافقة لأمي عزيزة وعدد من القريبات ..... ومحرم واحد متعلقين كلنا فيه ومدليلنه آخر دلال ليوافق على إعادة التجربة معنا مستقبلا !!!
محرمنا ذو ميول رياضية وبخاصة في كرة القدم .... عند وصولنا للفندق وعند قيامه بإجراءات الدخول تبادل كلام عام مع خليجيي معتمر ولما عرف إن محدثه عماني صافحه بقوة وحياه مودعا : مبروك عليكم الكاس .
وكان يقصد كاس دورة الخليج الأخيرة لكرة القدم
ضحك الشاب العماني من كل قلبه وهو يرد بسرور وإبتسامته ترس وجهه : الله يبارك فيك :))
أعجبت أمي عزيزة ببادرة محرمنا فقالت بإعجاب : إسم الله عليك ما يطوفك شي ... ذرب .
وساندناها جميعا بتشكيله من الدعوات المختلفه مرددين : يا عل الله يفتحها عليك .... يا الله تكبر بخته وحظه... الله يحفظ شبابك .....
ومحرمنا يمشي أمامنا مزهوا بالأدعية ونحن جميعا خلفه متجهين لغرفنا .
مبروك عليكم الكاس !
جملة رنت برأسي !!!
ببساطة وبدون لف ولا دوران ولا من إنت ؟ ... ومنو أبوك ؟ ومنهي أمك ؟ قدر محرمنا أن يكسب مودة رجل آخر بدون تلطلط ولا هذره زايدة مثلنا معشر الحريم !
في اليوم التالي تصادف وجود امرأة خليجية في المصعد معنا .... سلمنا عليها وسألت : من الكويت صح ؟
أمي عزيزة : إي نعم وإنتي ؟ من الإمارات ؟
الخليجية : أنا من عمان .
ابتسمت أمي عزيزة وقالت لها : مبروك عليكم الكاس .
ابتسمت المرأة العمانية بلطف وردت : الله يبارك فيكم ... والفال لكم المرة الجاية :)
أمي عزيزة أيضا عاجبتها الجملة السحرية مو بس أنا !.... هذا ما اكتشفته !!
بعدما صلينا صلاتي المغرب والعشاء بالحرم ( مرافقاتي الحريم صلوا جلوسا على الكراسي ) انطلقنا للسوق القريب مشيا على الأقدام وقد تأبطت كل واحد منهن كرسيها بعد أن طوته !!!
كنت أقلب سجاجيد الصلاة وأسال البائع عن الجديد منها عندما سألتني امرأة خليجية عن الأفضل .... فسألتها : الأخت من عمان ؟
ردت : نعم ... وإنتي واضح من اللهجة إنك من الكويت .
هزيت رأسي بنعم وأنا أقول لها بإبتسامة : مبروك عليكم الكاس :)
بخاطري الجملة وما صدقت إني شفت عمانية حتى أقولها لها ... وبردت قلبي وحسيت بالرضا عن نفسي .... وأنا أنتظر فرحة المرأة العمانية على اللفتة اللطيفة ..
لم أصدق أذني عندما أتاني صوت العمانية معاتبا بكلمات متتابعة وقد اكتسى وجهها بملامح الجد : إحنا الحين في بيت الله وتونا خالصين صلاة ما نطلب غير الفوز بالآخرة ... والفايز يكون بالعمل الصالح وتقبل العبادة والمغفرة من رب العالمين موب بالكرة .... الكرة لعبة إبليس فرقت شعوب وإخوان ... باركي لجيتي لبيت الله أفضل ...
كان آخر شي كنت أتوقع سماعه هذا اللي سمعته .... خجلتني بكلامها ....وفتحت فمي وإحترت شقول .... كلامها صحيح ....سكت وما عرفت إشلون أرقع الموقف .... ونزلت عيني للأرض وإعتذرت مرة أخرى .
ما سوت علي جملة عاجبتي !

هناك 22 تعليقًا:

نون النساء يقول...

انا قاعده اقرا انحرجت
شلون انتي عيل ..

:$

جان صارت لينة اشوي
خو ماراح تُجرم او تكسب سيئات اذا قالت كلمة طيبة ...

مع ان كلمتها طيبة بس يمكن الطريقة تو متش كرول

لو انا جان بجيت من الحرج .. كل ما تذكرت


X_X

مش انا يقول...

looooooooooool
l000000000000000000l

موقف محرج فعلا
صادف وجود ناس روحهم رياضية بالموقفين الاول والثاني

وعلى حظك صادفتك امرأة متشددة شوي
على الرغم من ان كلامها صحيح

فـ Hard Luck وخيرها بغيرها D:

غير معرف يقول...

ترى منتي غلطانه

شكو الكره تفرق شعوب

هذي من ربع الداعيه الرفاعي

كل شي حرموه

الكره تجمع قلوب عيال البلد بعز الفرقه

enter-q8 يقول...

لعبة أبليس
خلاص صكت الباب
لو ريال كان رديت عليه
وقلت له يعني انتم مسوين تجمع له
المفروض ردها يكون افضل
و تقول جزاك الله خير و نتمنى الفوز بالاخرة انا وياك و الفوز برضى ربنا اكبر و اسعد ان شاء الله
اهني الكلام اللي يكون معاتب و لكن يدخل القلب

اشفيني كأني تقمصت الدور لابس ملفع و قاعد اهذر

عثماني يقول...

اعتقد يا اخيتي انج ما غلطتي

واضح ان كان قصدت شي وايد حلو .. وقمة في الذوق

بس في ناس وايد محبكينها .. بدون داعي

:)

Mamloo7a Q8ia يقول...

بعد عمري
يوم صار دورج تقولينها
ادقرتج ؟؟
:(
الله يهداها الملافظ سعد
ومثل ما قال وخيي بو وليد
كان تقدر توصل لج الكلمه
بطريقه الطف

الله يهداهم هالنوعيات
يكرهون الناس بالدين

وديننا يالله من فضلك
دين تسامح ومحبه

ما يخالف ياوخيتي
الحياه تجارب
:)

غير معرف يقول...

Nikon8

مبروك العمرة

وبعدين
ماعليج منها زين

جان رديتى عليها بالرد الكويتى البتار "ياكرهى" وأنتى ماشية
:)

Unknown يقول...

افا عليج لو انا منج احط علامه على عبايتها ومن ابعد عن الحرم رايحه ومكوفنتها ورادتها في بطن امها... استغفر الله... في ناس جافييييييين ... لو انا منج اقولها " اي مبروك غصبا عليج ببارك لج على الكاس كيفي مزاج صج ماتستحين على ويهج اشقايلة لج ماستحيتي تزفيني"
جني اندمجت وصار فلم اكشن؟؟!!!!!!

Unknown يقول...

اي نسيت عمره مقبوله... وشي ثاني نبي نقرا عن المرشحه غنيمه ترى ولهنا عليها ونبي نبعد عن السياسه
مشكوووورهnikon8

Unknown يقول...

اي نسيت ... لما اخلص هوشتي معاها جان قلت لها "هفه تهفج وطاح نصج"

nikon 8 يقول...

نون النساء
تصدقين هذي أول مرة أكون عاجزة عن الرد :)

nikon 8 يقول...

المجهوول ..!
شكرا على المآزرة النفسية :))
يفترض أن أتمتع بالفراسة لأختار من يتقبل المباركة ... على حظي المرأة طلعت ديانتها زايده :)

nikon 8 يقول...

غير معرف
ما أظن إنها تعرف الداعية الرفاعي أصلا ... هذا جزا اللي يغش جمل غيره :))
ترى أتغشمر حتى أخفف على نفسي :)

nikon 8 يقول...

Enter-Q8
ههههههه
لووووول
أشوة منت صاحب الموقف ... كان صكت الهوشة :))
شكرا على المساندة المعنوية

nikon 8 يقول...

عثماني
حظي أقشر شسوي :))
المرة الجاية أقولها حق رجل !
الرجال أسمح مع الحريم :)

nikon 8 يقول...

Mamloo7a Q8ia
والله صدقتي ... يوم صار دوري ... إندقرت !!!
الله كريم :)

nikon 8 يقول...

Daggero
هههههه
لووووول
لو إنها كويتية كان قلت لها الرد البتار على قولتك .... كويتيين ونمون على بعض :))
والله يبارك فيك .... الفال لك :)

nikon 8 يقول...

كويتيه بحرينيه
ههههههه
زين إنك منتي صاحبة الموقف .... كذي إشتطيتي ؟؟؟!!!
ههههههههاي
الظروف تفرض البوستات السياسية أحيانا ... ما نقدر ننعزل عن العالم اللي حوالينا ....ولا يمهمك راح نقلل منها .
المرشحة غنيمة : الحلقات كنت كاتبتها وراحت على لما إحتاج الكوبيوتر فورماتنك .... وسكت لما شفت محد سأل عنها ... خنت حيلي !
عموما من مدة قصيرة إكتشفت إن المصلح حافظهم لي ... وفرحت .
غنيمة راجعة بإذن الله إذا تبونها :)
أهم شي جمهورها الثلاثي يكون موجود ... شكلكم إنشغلتوا ؟

غير معرف يقول...

Nikon8

أشلون ما ولهنا عليها مرشحة الجميع لكن صاحبة الدار غيرت الموجة فسكت لحد ما يخلص الأتجاه الجبرى للمواضيع وترجعين لها

ونحن فى الأنتظار

nikon 8 يقول...

daggero
طمنتوني :)
إذا جذيه راح نكمل مسلسلها :)

um.alzain يقول...

الحمدلله على السلامه وتقبل الله طاعتك , الله ياردها شنو اقشر!!!! خلف الله عليها ماتفهم بالذرابه ..... هذا وانتي تباركيلها بالفوز,!!!!! هذي مو ديانه هذي عساره الله يعين اهلها عليها , الظاهر هذي من النوع المكتأب والمتغلدم وذوي الطاقه السلبيه الي اييبون الغامت والبعد عنهم غنيمه , ييييييييييبا ساعه لربك وساعه لقلبك

nikon 8 يقول...

um_alzain
صاجة والله ساعة لربك وساعة لقلبك :)