الخميس، 12 فبراير 2009

هدية الفالنتين

من العشرة إكتشفت أن زوجي محترم وأخلاقه عاليه .... أول ما تزوجته إكتشفت إنه مدلل من والدته جدا لدرجة إنه بحياته ما قشر برتقاله أو أفندية .... دايما أمه تقشر له البرتقال وتخليه جاهز له بالثلاجة ..... حتى أظافره أمه اللي تقصهم له !
في البداية إسنتكرت ( بيني وبين نفسي طبعا ) دلال أمه له لهذه الدرجة ... ولكن من شفت إحترامه لي وأخلاقة العالية تغاضيت عن هالعيبين وصرت أسويلة مثل تسويله أمه عن طيب خاطر ... أمتنانا له على هالعشرة الحلوة .
وفوق هذا طلع زوجي من النوع اللي يدلل الحريم جدا .... يهديني بمناسبة ومن غير مناسبة .... يختلق المناسبات أحيانا ليهديني شي شافه بالسوق وأعجبه وحب يكون لي .
هالمرة حاطة في بالي هدية معينة ثمينة ناوية أخلي زوجي يجيبها لي في الفالنتين !
( له عادة يجيب لي هدية بهذه المناسبة )
وخططت حق هاليوم من رمضان اللي فات ... تنازلت عن عيادي عيد الفطر والأضحى ومصاريف سفرة راس السنة الميلادية ... حتى أجمع قيمة هدايا كل هالمناسبات !
مواعيد رجعة زوجي من العمل غير ثابته ... فأجلس أنتظر رجعته ... وأجابله على الغدا
هو يتغدى ... وأنا أسولف على راسه ( لأني شبعانه ومتغدية مع اليهال ) !
مره كان راجع من العمل وهو تافل العافية من إرهاق العمل وراسه مصدع .... وأنا راسي صاحي ومنطلقة بالسوالف .... سالفه ورا الثانية .... حتى رفع يده بإشارة لي للتوقف وعيونه مغمضة من الألم ... سكت فورا وأما مستحية من روحي .
من كم يوم طحت على مسلسل سوري إسمه أهل الراية يعرض ظهرا في محطة أم بي سي.... شدني جدا المسلسل... وقته مناسب لي وهو وقت إنتظاري لزوجي .
باقي أيام قليلة على الفالنتين ... المفروض إني أكثف إهتمامي لزوجي حتى أنال الهدية اللي مخططه لها من زمان ... لكن جرت الرياح بما لا تشتهي السفن !
إندمجت كثيرا ذاك اليوم مع المسلسل ... الأحداث كانت مشوقة .
لما إنتهت الحلقة ... تذكرت زوجي .... مرت الخادمة جدامي فقلت لها ألفت نظرها : شوفي الأكل لا يحترق .
ردت : بابا يجي ... خلاص غدا .
رحت له بالغرفة وإلا الريال نايم ... في سابع نومة .
قلت بعد شسوي ... قمت ونمت .... ولما صحيت كان طالع من البيت !
وبالليل رحت عرس ... ولما رجعت كان نايم .... المهم ما شفته إلا ثاني يوم الصبح !
الريال قعد من نومه وهو عاقد نونته ونفسه بخشمه .... يعني زعلان !
على هذرتني وسوالفي اللي بمعنى ومن غير معنى ... إربط لساني وماني قادره أبرر تصرفي لأن شاف بعيونه إشكثر كنت مندمجة بالمسلسل ومو حاسة باللي حوالي .
وعميت القصة بنومي وطلعتي للعرس قبل لا أشوف اللي بخاطره وأراضيه !
حدي ضايق خلقي على الهدية اللي طارت مني بسبتي .

هناك 15 تعليقًا:

Cr8ivia يقول...

ya salaaam
ضايق خلقج علي الهديه مو علي زعل ريلج :/

قانونى كويتي يقول...

لا لا لا ما يصير عاد

انشا ءالله انشا ءالله انشا ءالله

ما يعدى اليوم الا ومتراضين

تحياتى لكم

bof-10 يقول...

حرااااااااااااام علييييييييييييييج

انتي من صجج @@

لألألألأ عاد مو جذي مسكين ناسيته ... والله انا اقولج روحي جهز هديته ..وراضيه ترا وايد احسن


والله يخليكم حق بعض ياربي :)

fatto يقول...

انا اقول راضي الريال احسن قبل لايطنقر ازياده :) ييبيله ورده حلوه نفسج وعطيه اياه .. والله الاشياء البسيطه ولصغيره لها تأثير قوي بالنفس :) اشفيني صرت فوزيه دريع :) لوووول

بنت الشاميه يقول...

ان شاء الله خيرها بغيرها

واذا تاخرت يوم او يومين ما تضر
انت تبين السلة والا العنب
هههههههه

سـهـيـر زكــي يقول...

عاوزة رأيي؟ تغور الهدية, كفاية انه بيحبك وانتي بتحبيه, مش بالضرورة ان الراجل يعبّر عن حبه لمراته بهدايا

أنا معاكي فكرة الهدية حلوة ومحدش بيرفضها والكل بيتمناها, بس ليه مابتعتبريش وجوده بحياتك هو أكبر هدية

بالنسبة لزعله لانك تجاهلتيه من غير قصد, ديت ممكن تحاولي تصلّحيها وبطريقتك

ربنا يخليكو لبعض ويسعدكو


زي المرّة الّي فاتت, أرجو إنك بعد ما تقري الرد بتاعي, تلغيه وما تنشريهوش

ميرسي

فريج سعود يقول...

اخذي هديتج من ادارة ال mbc

Tekana يقول...

يمديج تراضينه ترى

بسرعة لا تطير الهديه :P

Fahad Al Askr يقول...

شنو هالمسلسل القوي، لازم أشوف منه حلقة، ماني مصدق، في مرة تنسى إن عندها ريل بس تجابله

خلاص بوصي الربع ينصحون حريهم بتابعونه

غير معرف يقول...

Nikon8

ودنا أنعرف ماهى الهدايا القيمة اللى الزوجة العزيزة تقدمها حق الزوج العزيز
والأ موضوع الهدايا أهو فى أتجاه واحد فقط ؟؟؟

وهابى فالنتاين

esTeKaNa يقول...

واي كسر خاطري
!!
ترا الريال من داخله ارق من ما تتصورين
كلمه حلوة
وجبره خاطر
وكل الامور بذكاء الانثى تتعدل
:)

غير معرف يقول...

أقولج شي أختي

تبين نصيحة أخو

ترى احنا يا معشر الشوارب نحب المرة اللي تدللنا

واذا كنتي تظنين انه متضايق من هذرتج كل يوم فانتي غلطانه

يمكن زودتيها ذاك اليوم ... بس فرحة الريال لما يدش البيت راجع من الدوام... من شغل ملوع جبده.. من ناس ماله خلقهم مغصوب يشوفهم كل يوم بسبب الشغل... فرحته انه يلقى مرته تنطره وتجابله وتسولف معاه شوي عن احداث يومها مهما كان نوع هالسوالف
لأنه يحس بأهميته


وبالمقابل اكثر شي يخلي الريال يتضايق ... هو احساسه بأنه فقد أهميته مقابل شي ثاني...خاصة لما يحل شي في الوقت اللي كنتي مخصصته له... تلفزيون... طلعة ... هذره بالتلفون...الريال يبي يشوف أهميته بعيونج قبل كل شي وبعد كل شي


الله يهديكم ويصلح بينكم ولا يفرقكم

أما الهدية فأنا أقول مفروض تكون أحلى لو اهو اختارها ... الشي اللي تبينه ممكن تشترينه انتي... لكن خلي الهدية هو يختارها... ترى في المشوار اللي يقضيه الريال بروحه وهو يختار لج هدية ويروح مكان ثاني علشان يغلها ويضيف عليها شوية حركات...فيه متعة لا توصف..وفيه احساس الحب يزيد ويوصل القمة


الله يوفقكم :)

Manal يقول...

يا حلو السوالف الي في هالمدونة

انا بسال
ابو العيال يدري عن المدونة؟؟


على العموم
موضوع الهدية شي خاص بالانسان او الشخص المقابل

ما احس بلذة الهدية اذا انا اخترتها

لكن كثيرا ما اسمع من الصديقات بانهم يطلبون الهدية الي ودهم فيها
وهذا شي عادي

بس عاد ما صمدتي والسبب المسلسل

موجود على النت
شوفيه من اول ما يطلع من البيت
وكوني جاهزة اول ما يوصل
احلى لحظة تقرب بين الزوجين هي لحظة اللقاء بعد عناء يوم طويل في العمل

الله يجمعكم على الخير

ويدوم المحبة بينكم سنين يا رب

وتنالين الي تبينة
:)
يا عسل

ZooZ "3grbgr" يقول...

ههههههههههههههههه

والله ضحكتيني

مادري ليش حسيت الموضوع حده دمه خفيف

الله يديمكم لبعض

ولا يحرمكم من راحه البال

بهدية ولا بدونها

:")

Unknown يقول...

ليييييش جذي... اهم شي زوجج ورضاه من رضى الله