الأربعاء، 4 مارس 2009

ريجيم يهال

تقول أمهم : الكل يعاتبني على سمنتهم ... صايرين كرتين يمشون
مع إني مستانسة عليهم وأشوفهم بعيوني متكتكين .... وخفاف دم ... ويضحكوني وبالذات إنهم عايشين بنفسية الأطفال الرشيقين !!!
من كثر ما أبوهم خايف إنه يزيد وزنهم قال لي :
خلينا ناخذهم عيادة التغذية في مستشفى الصباح دام إنهم صغار ( ثمان سنوات ) ويسمعون كلامنا الحين ونقدر نعودهم على الأكل الصحي .... باكر لي كبروا ما نقدر عليهم ... ربع ومطاعم
حبايبي كانوا متحمسين جدا لأنهم راح يصيرون ضعاف نفس أبوهم
في أول يوم كانوا يرددون كلام الدكتورة ويطبقونه هذا مفيد ... هذا صحي ... ( يقصدون الحليب والبرتقال )
أما البطاط الشيبس فكانوا غير مقتنعين إنه ضار لأنهم دافعوا عنه بحرارة جدام الدكتورة
دكتورة البطاط حلو ... جربي تذوقينه
كسروا خاطرها فسمحت لهم بالقليل منه
ثاني يوم سألوا عنه : وين البطاط الشيبس ... الدكتورة تقول زين لكم يضعف ... نبي أكبر كيس بطاط بالجمعية !
ثالث يوم ملوا وسألوا متى يخلص الريجيم ؟
واليوم هو اليوم الرابع ... الإنهيار كان اضح عليهم من الغدا
يمة التمر مفيد ... ميخالف ناكله مع هرده مثلكم
ميخالف .... فردة واحدة ... وإذا إعجبتكم إخذوا فردة ثانية ... وبس مفهوم
بعد شوي
يمة كل اللي على الطاولة مفيد لنا قالت الدكتورة... ميخالف ناكل من كل شي شوية
لا ما يصير الدكتورة قالت بس تاكلون ثلاث أشياء مفيدة
إنزين يمة ميخالف نشرب بيبسي بعد الغدا ... أبوي كله يقول البيبسي يهضم
لا ما يصير
الزين بس نتمضمض فيه ... ما نشربه ... والله ... والله يمة
تقول أتصنع الجد مع إن فيني الضحكة أنا وأبوهم :
إنزين راح أفكر ... ويعتمد على سلوكم إذا سويتوا الواجبات وخلصتوا أسمح لكم تشربون شوية
بالعصر وعلى شاي العصر كان فيه صحن فيه بسكوت دايجستف ( خبري فيهم ما يحبونه )
سألوا : يمة نذوق البسكوت خل نجرب... يمكن بحبه مثلكم
أرد :هذا حق أبوكم مو لكم
كانوا بجانبي يذاكرون ( مو لله حق البيبسي ) وأنا أشاهد قناة فتافيت ( قناة خاصة بالأكل )
وفجأة بكى سعودي ورمى يسوفي كتابه وصرخوا بإحتجاج
كل مكان أكل ... كل مكان أكل ... ما تقدر ندرس كل شي يشوق ... وكله ممنوع !!!

هناك 38 تعليقًا:

حياتي هدف مو عبث يقول...

ههههههههه
يونسون هالمتختخين :)

يمكن يحتاجون شي يلهيهم
مادري عيالج ولا عيال أحد ثاني !
بس خل يشتركون بنادي أو طلعوا تمشوا معاهم على البحر منها تغير جو ولمة عائلية ومنها رياضة
ولا أقولج ما يفيد لأن بالكويت كل طلعة
كل فرّه بالشارع وسينما ومول وكل شي كل شي لازم يختم بالأكل ولا بوسطة أكل وبأولة بعد :(
ما ينلامون :*


هالقناة أمي متابعتها 24 ساعة
اهي تشووف وأنا أنتفخ ههههه :/

مركبنا يقول...

ههههههههههههههه

حرام عليها عذبتهم
تشيل الاكل من جدامهم
بالخش والدس
ولا بعد كملتها بفتافيت!!

Sn3a يقول...

لووووول
يختيييييي
هذيل وين ورجييم وين
بيتمضمضون بالبيبسي
ويي فديييتهم


شكلي برجع رجيم
بس صج كلامهم شنسوي كل مكان اكل!

esTeKaNa يقول...

يا بعد قلبي قلبهم
لووووول
واي ضحكوني
وذكروني بجم شخص عندنا جذي
عندي بنت عمي تعاني من السمنه من كانت صغيره،وامي عندها حاله من الالم عايشتهاليش ما يوكلونها تكبر وتضعف
!!
وتنحاش البنت وتيي عند امي توكل فيها
:)))

سمنه الاطفال زايدة بشكل مو طبيعي
ويكسرون الخاطر ما تقدرين بعد تحكمين سلوكهم

يا حياتي اهم شي يقولون بس نتمضمض كسرو خاطري
:)

Manal يقول...

مساك عسل يا غالية

نقطة وايد مهمة

ملاحظة وزن الابناء من الصغر

لان التعليم في الصغر كالنقش على الحجر

اذا تعلم الابناء الاكل الصحيح

يتقبلونة من صغرهم

ويمارسون الرياضة بانتظام

نقدر نقول ان الاهل يخافون على عيالهم
ويفكرون بمستقبلهم الصحي

ربي يوفقج على هالموضوع

وان شاء الله الاهل يقرون ويتعضون

:)

ANGEL HEART يقول...

وااي كسروا خاطري لاني حاسه فيهم الريجيم بس اسمه يتعب النفسيه وصح كل مكان اكل اكل اكل اصلا حتى البيت مايراعون ونصيحتي لا تخليهم يحطون بالهم سالفه الريجيم لانها بتعبهم نفسيااا وتخليهم يحبون الاكل اكثر خل تسوي نظام غذائي حق البيت كله تزيد سلطات خصروات فواكه اكلات صحيه بدون مايحسون

Q8EL5AIR يقول...

اي والله مساكين مصار ريجيم :)


حلوه يتمضمضون بالبيبسي :)

كاااااااااااااااااااااك :)

الله يعينهم .. بس لا مع هذا ضروري يسون ريجيم .. احسن لهم والله بعدين ..


وتحياتي ..
ويسلموااااااااااااااااااااااا :)

Don Juan يقول...

الله يعينهم بصراحة
خصوصاً هالعمر
عندي ولد اخت بنفس عمرهم تقريباً و متين ,, امه ساعات تزفه عشان يقوم من عالسفرة
صج انه مو حلو الواحد يقوم و عينه بالأكل بس عشان صحتهم
ليش الناس فيهم قابلية سمنة ماني عارف D;

كويتيه بحرينيه يقول...

هههههههههه والله ذكرتيني في وحده الله يستر عليها من يوم هي صغيره وهي تعاني من رجيم الى رجيم ولا تضعف لووووووووول ... عرفتوها ولا ماعرفتوها؟؟؟؟

Hope يقول...

واي اسم الله عليهم
يهبلون ، دمهم خفيف
اهم شي يخففون الاكل و ما ياكلون وجبات جانبيه، ال3 وجبات الرئيسيه كافيه، و هم لو يسوون رياضه زين على زين
الله يحفظم و يخليهم لأهلهم

Paris يقول...

مساكييييييين

اليهال بهالعمر مو مال رجيم

بس مفروض يعني بس يقللون من الاكل و

تأكلهم الوالده اكل صحي و يلعبونهم

رياضه احسن لهم من الرجيم

الله يخليهم لاهلهم :)

أحمد الحيدر يقول...

:))))))

الله يخليهم لكم .. ويعينهم علرجيم ..

بس فعلا أسها أتوقع بالصغر ..

أتوقع لأنه عمري ما متنت مادري :))

الحارث بن همّام يقول...

نصيحة .. لحقي عليهم قبل لا ينفلتون

اليوم اسهل من باجر

daggero يقول...

كما يقولون

It is tough being a kid

nikon 8 يقول...

حياتي هدف مو عبث
لا ما هم عيالي .... عيال بنت عمي
فعلا محتاجين شي يشغلهم جسديا بدل التلفزيون
تحياتي ... سعيدة بتعليقج :)

nikon 8 يقول...

مركبنا
لازم يقوون إرادهم ... أتغشمر معاج الأم ما إنتبهت إن كل المغريات جدامهم :)

nikon 8 يقول...

سنعة
إذا سويتي ريجيم لا تنسين تمضمضين باي عصير بخاطرج :)

nikon 8 يقول...

إستكانة
فعلا سمنة الأطفال صارت ظاهرة خطرة
نتمنى الأطفال يستوعبون هالشي :)

nikon 8 يقول...

منال
الله يسلمج يا منال
وأعتقد إنهم بحاجة إلي نشاط جسدي
وأتفق معك بملاحظة وزن الأبناء ومع عدم التساهل معه ... منذ الصغر
شكرا على النصايح :)

nikon 8 يقول...

ANGEL HEART
المشكلة إن الأبو وايد ضعيف وما عنده مشكلة ... وتعالي شوفي لي تهاوشوا من يقعد بحضن أبوه :))

nikon 8 يقول...

Q8EL5AIR
الله يسلمك ... وقرار الريجيم لا تراجع عنه :)
حياك الله

nikon 8 يقول...

دون جوان
الفراغ والملل هو اللي يخليهم يجابلون الأكل :)
تحياتي :)

nikon 8 يقول...

كويتية بحرينية
عرفناها عدل ... وعارفة عزيمتها القوية للريجيم :)

nikon 8 يقول...

هوب
صاج والله ... الأكل بين الوجبات اللي كلها سكريات ودهون هي السبب .

nikon 8 يقول...

باريس
المشكلة إنهم يخششون أكل تحت فراشهم :))

nikon 8 يقول...

أحمد الحيدر
الله يسلمك .... السمنة ما تعرف عمر
لكن السمنة بالصغر خطرة على الأطفال :)
تحياتي :))

nikon 8 يقول...

الحارث بن همام
هذا اللي قاعد يصير ... واللي يشجعهم على التمرد إنهم يسمعون عبارات تساعدهم على التمرد ... لأنهم يمثلون جدام الناس إنهم ميتين جوع :))

nikon 8 يقول...

daggero
أحيانا .... نعم ... مثل هذا الموضوع
أما باقي المواضيع فأحلى شي هي الطفولة :))
تحياتي :)

sologa-bologa يقول...

إي والله كل شي يشوق وكله ممنوع
:)

مساكين
بس المفروض ما يحرمونهم اذا كبروا تتغير اجسامهم خصوصا فترة البلوغ
بس اهم شي يوخرون عن الفاست فود

بنت الشامية يقول...

يا بعد قلبى قلبهم

شوفى احسن شيئ لا تقولون لهم كلوه رجيم
بعدين يكرهونها ويرفضون يسمعون شيئ عنها.....الكلمة الصحيحة تغير نمط الغذاء ....لصحة افضل وعمر اطول
لا تحرمينهم من شيئ بس كل شيئ بالتقنين

والله يكون بعونهم....البيت كله لازم تسوي هالغبر اللى اسمه رجيم....يانى ما احبه...ههههههههههههههه

ReLaaaX يقول...

حياااااااااتي والله ... انزين ليش مايكون اكلهم بشكل يشوقهم على الاقل يستمتعون فيه ياقليبي


يالله ان شالله بيتعودووون ويصيرون سمبتيك;)

روان يقول...

لوووووول مايذكروني بنفسي ابدا :p
ان شاء الله ينحفو بسرررررعة عشان ياكلوا كل شي ...حسة فيهم من قلب لووول

شهرزاد يقول...

و الله العيال معهم حق . احنا كبار ويوم ننوي نسوي ريجيم نشتهي كل ممنوع.يعني لما نقدر احنا على الريجيم نبقى على الاقل قدوة لهم ( خوش قدوة )مش نقعد ناكل ما لذ و طاب و نمنعهم ..؟؟( اهل مفتريين ) .
خليهم يعيشوا طفولتهم و يستمتعوا بيها و بدل ما تصرفي على اطباء و ريجيمات طلعيهم و خليهم يمارسوا نشاطات مختلفة لأن الأطفال يحرقو سعرات حرارية اضعافنا بس اهم شيء لهم الحركة و هم بيجيلهم وقت يضعفوا طبيعي ..الله يعطيهم الصحة و يخليهم لك

nikon 8 يقول...

سلوقا بلوقا
أهلا بك بالزيارة الأولى لدار عزيزة :)
أول شي قاعدين نتحكم بكيمة ونوع الأكل وبالذات اللي تسمن وما تفيد
المهمة شاقة لأنا ما نبيهم يكبرون على سمنة :))
شكرا للنصايح :))

nikon 8 يقول...

ينت الشامية
هذا اللي قاعد يصير كلنا مرجومين بسببهم :))

nikon 8 يقول...

ريلاكس
إسم الله عليهم صاير كل شي يشوقهم :))
المهمة جدا صعبة !!!
بس لازم نستمر :)

nikon 8 يقول...

روان
شكرا لدعواتك الصادقة ... وأهلا بك في دار عزيزة :))

nikon 8 يقول...

شهرزاد
العيال يلعبون ...لكن مو بالصورة اللي تكفي إنهم يحرقون سعرات وايدة
أكيد إنتي أم وحاسة بمعاناتهم :))