الأربعاء، 1 أبريل 2009

يا غافلين لكم الله

جاءت فوزية لدارعزيزة لتعزمنا على حفل إستقبال زوجة أبيها
أما عن قصة زواج أبيها فأنقلها لكم كما سمعتها منها شخصيا
تقول فوزية كبرى بنات أحمد الـ .....
ترمل والدي أوائل الشتاء الماضي
حزنا جميعا لموت والدتنا المفاجئ
والدي كان أكثرنا حزنا لأن أمي كانت تلازمه كظله .... ما يلتفت يدورها إلا وهي جدامه
ومن يصوت يناديها ... يأتيه صوتها ترد عليه بكلمة لبيك ....
هي أول من يراها عندما يصبح وآخر من تودعه عيونه قبل ما ينام
ومن بعد التقاعد صارت حياته وحياتها تفاصيلهما واحده
تجلس بجانبه بالمقعد الأمامي في السيارة كل صباح
ويتسوقون ويتمشون كل يوم في جمعية أو سوق أو مجمع
وفي العصاري يحوس بالحديقة لحد المغرب يا شايل هوز الماي ويسقي الزرع وإلا جايب شتلات جديدة يزرعها ويشلع الزرع الميت .
أما في المساء فنأتي حنا الأبناء وعيالنا جميعا ونجتمع معهم .... يراوينا شنهي الأشياء الغريبة والجديدة اللي لقوها في جولتهم الصباحية ويعلمنا بالأسعار .... ومن تصير الساعة ثمان يبدون سيارات الوجبات السريعة والمطاعم يطقون الجرس كل سيارة من مطعم غير على حسب رغبات العيال ... وطبعا الوالد هو اللي يطلع لهم ويحاسبهم .... يتذمر مع كل رنة جرس ... ومع هذا ما يرضى ندفع !!!
أبوي حنون علينا ويحب يونسنا ..... ودائما يوزع علينا بشارة الفاكهة والخضار أول ما تنزل بموسمها .... مثل الفقع والخلال
ويفتخر إنه أول من يشتري الزبيدي والربيان أول ما ينزل وبسعر جيد ويوزعه علينا
يفتر علي بيوتنا في الصبابيح والضحاوي بعد ما يشتري أي شي ويوزعه علينا طازجا وحنا في دواماتنا وأمي تعلم شغالين المنزل شيسوون بالأكل والأيدام ... اللي يحتاج تبريد مثل الفاكهة والخضار أو تنظيف مثل الفقع أو حفظ في الفريزر مثل الأيدام .
أول ثلاث أشهر من وفاة أمي كنا نمر بحزن عميق وحالة لا توازن ..... ولكن حالة أبوي كانت تطحن العمر
كأنه كطفل فقد أمه وتيتم
كان دائما يتذكر أمي وسوالفها وحركتها في البيت وشنو تحب .... وشنوما تحب ... ومصر على المحافظة على كل شي تحبه أمي .... حتى الأشياء اللي كان يعارضها عليها !
مكان جلوسها المفضل في غرفة المعيشة ظل فاضي ولا يقبل لأي كائن كان إنه يجلس فيه حتى الأطفال .... و يجلس هو في مكانه المعتاد .... أحيانا كثيرة يخطر على باله يقول شي يلتف صوب مكان أمي يبي يقول لها السالفة ولي شاف مكانها فاضي تذكر إنها متوفية .... تتبدل ملامح وجهه لحزن عميق فيسكت .
صرنا نبكي على حالة أبوي أكثر من فقدان أمي ..... خفنا على أبوي لا يجن ونفقده بعد !
وبعد ست شهور لاحظنا تغيير على والدنا ...... سكت عن تذكر أمنا فقلنا ريال ما يبين عليه الحزن وقدر يتغلب عليه !!!
بصراحة إرتحنا لتطور حالة أبونا للأفضل .... وصرنا نتحاشى ذكر أمنا جدامه حتى لا تنتكس حالته ويرجع للحزن مرة ثانية .
وبعد تسع شهور بدأ يخفف من تمسكه بذكريات أمنا !!!
صبغ صالة المعيشة وغير الديكور ... فأختفى الركن اللي كانت أمنا تجلس فيه دائما !!!
تباشرنا بالتغيير بين بعضنا البعض .... ورحبنا وشجعنا أبونا وقلنا له زين ما سويت والتجديد يغير النفسية .
التغيير حاش حتى صورة جدتي لأمي فشالها مع لوحات وتحف تخص أمنا ..... ووزعهم علينا وقال لنا ذكرى من أمكم !
كل هذا ولا إستنكرنا منه غير إن إبونا صار ما يبينا نطول عنده إلى وقت متأخر بالليل
وصار يتعذر بإنه تعبان وفيه النوم مع إن عيونه ما تقول جذيه .... وشكله شاتر !!!
صار أبوي يردد مفردات ما كانت تدور على لسانه من قبل مثل :
الربع شاروا علي إني أعزم وأتزوج ..... الزواج يجدد الشباب ( يوجه هذا الكلام لإخواني بالذات ) .... البيت صخة أبي ضحكة مرة ترن بين إطوف البيت .... الله لي حصل لي وحده تلقمني بإيدها وألقمها وتغمز لي وأغمز لها ..... صرنا نتطالع بعضنا البعض ما عرفنا إشلون نرد وبالذات مع كلمته الأخيرة .... وعلى دلال أمي له ما شفناه يوم لقمها أو غمز لها .... أصلا أول مرة ندري إن أبونا يستلطف حركات الدلع علانية ويجاهر بها أمامنا !!!
ومن مدة شهرين قال لنا إنه كان ناطر يدور الحول على وفاة أمنا ليصارحنا برغبته بالزواج !
قلنا له هذا حقك والشرع حلل لك .... وهذي الساعة المباركة ....... لأن أبوي كان فعلا بحاجة لزوجة بجانبه وبخاصة وأن البيت خالي ما فيه أحد غيره والخدم .
بعضنا ما كان متقبل الفكرة ويقولون ما له سالفة يتزوج بعد أمي .... لكن أخوي العود أقنعهم فرشحنا له إحدى قريباتنا
فاجأنا لما رفض الترشيح وقال لنا العروس موجودة وأبيكم تروحون تخطبونها لي !
طقتنا البوهة .... إشلون وإمتى صار هالشي ؟؟؟
طلع إنه بعد وفاة أمنا بفترة قصيرة إتصلت على أبونا وحده تواسيه بوفاة زوجته !!
يقول أبوي إن رقم التليفون عرفته من إعلان الوفاة في الجرايد فأحتفظت فيه !
بالأول كانت تتصل عليه كل جم يوم وتالي صارت الإتصالات يومية لحد ما تعلق أبوي فيها وصار هو اللي يتصل عليها كل ليلة وتسولف له عن ظروفها المشابهة لظروفه ووحدانيتها في هذه الدنيا بعد طلاقها ..... وإنها إرتاحت له من نبرة صوته .... وإنها محتاجة لزوج حنون على عياله مثله ..... وإنها أنسب وحده له .... متفهمة ظروفة وقابلة بأولاده وقادرة تقوم على رعايته مثل ما تسوي له المرحومة زوجته وأكثر .... وفوق هذا ما عندها عيال يشغلونها عنه !
المواصفات العامة إعجبت الوالد وايد وطلب يشوفها فتقابلوا جدام سوق السمك اللي بجانب سوق شرق قعدوا على الكراسي وتكلموا وإرتاحوا حق بعض .
ويقول إنه إختبرها جم إختبار ليتأكد إنها مو وحده نصابة وإلا بياعة حجي وإلا راعية لعب .... وتأكد من صدق كلامها .... عاد إشلون تأكد ؟ ما ندري ولا علمنا !
وقال لنا بعد إنه شارط عليها كم شرط أولهم عياله
كل هذا صار وحنا يا غافلين لكم الله ....
أخوي الصغير إعترض إشلون تاخذ وحده راكضة وراك ؟
وأختي الكبيرة كلش ما بلعت طريقة الزواج ... إشلون تعرض نفسها للزواج وتستغل ظرف حزنك ؟
وأخوي العود فتح عيونه وسكت .... منصدم من الحقائق اللي سمعها
وأنا قمت أتطالع بالعيون بإستغراب مع الباجين وفرحت من داخل قلبي على أبي .... والله يطلع منه !!
أبوي قال ما أبي إعتراض ... أنا واحد أبي أتزوج ... وما أبي وأنا بهالعمر أتفرفر على بيوت الأوادم وعيالي قايديني حتى أخطب .... وهذي تيوز لي وذيك ما تيوز لي ... ما فيني شدة على جذيه ؟
وطالعنا كلنا وقال إختياراتكم بالزواج ما عارضتها فليش تعارضون إختياري ؟
ما ني صغير وبحاجة لوصاية ؟ ..... أنا ريال وأعرف أختار اللي تناسبني .
فكرنا كم يوم وتالي وافقنا .... هذا حقه .... وهذا إختياره والله يوفقه .... والله خير المرة بنت حلال ... لما رحنا نخطبها وندز عليها المهر (أيه صاروا مره وحده لأن أبوي ما بغي فترة خطوبة .... يقول متفاهمين وخالصين والمرحلة عاشها وخلص )
قالت لنا عن شروط أبونا لها ومنهم إنها ما تداحره على عياله وعلى عطاياه لهم وروحتهم وجيتهم على أبوهم .
كلامها أثر فينا إشلون حنا شي مهم عند أبوي وشارطة على الزوجة اللي إختارها .
وحتى نبين لأبونا إنا فرحانين له بنسوي للعروس حفل إستقبال .
فوزية خلصت كلامها بدون أي مقاطعة من الرواد المندمجين تماما بالقصة
وفجأة تعالت التعليقات والتبريكات من الجميع بصوت واحد ووقت واحد
ورغم الضجة إلا أن صبايا دار عزيزة الأرامل إتفقن على على كلمات معناها واحد :
آخ لو ندري له نية زواج .... جان سبقنا العروس .... ما دام السالفة ما تبي غير تليفون..... وكلمتين ناعمين !

هناك 53 تعليقًا:

chandal/danchal!! يقول...

لووووووووووووووووول

يا صباح الأعراس والليالي الملاح


كل بصوب وسوق السمج وردة فعل عياله بصوووووب

ماشاءالله... مرته حظيظة فيه... واي يا خف طينته... الله يوفقهم ويهنيهم ويعوضه خير فيها


أنا جدا متفائلة بيومي من عقب هالتصبيحة الحلوة:))))

Ra-1 يقول...

@@

آنا بققت عيوني على الطريقة إلي سوتها المرة ويحليلها خطتها انجحت!

LOL :)

muhrah يقول...

وااي يازينهم زيناااه و يا نطعهم:)
محد هين يخجييي
الله يتمم على بو فوزيه بخير و تصير خير مرت ابو لهم يارب


و عسىبيت عزيزه عامر بأهله

muhrah يقول...

وااي يازينهم زيناااه و يا نطعهم:)
محد هين يخجييي
الله يتمم على بو فوزيه بخير و تصير خير مرت ابو لهم يارب


و عسىبيت عزيزه عامر بأهله

نون النساء يقول...

مرت ابو فوزية شقردية الظاهر ...
ضبطت عمرها ..


بس دام انها بنت حلال.. الحمدالله


بس استغربت طريقة تعرفهم على بعض
واااااي احس وايد قوية ان وحده تعرض نفسلها للزواج ...

وانا قاعده اقرا استحيت





شلووونج بنت عزيزة :*

الزين يقول...

على كلمات معناها واحد :
آخ لو ندري له نية زواج .... جان سبقنا العروس .... ما دام السالفة ما تبي غير تليفون..... وكلمتين ناعمين !


لووووووووووول

القصه كلها بصوب وهالفقرة بصوب

مساكين ما لحقوا

:*

يازين سوالفج

وصباحج خير يارب

Sweet Revenge يقول...

والله غير سالفة هذي بعد :)
صاجين صبايا دار عزيزة اهم اولا
شكله ابو فوزية مزيون الي كل هاذا علشانه ;)

nanonano يقول...

ونـــــــــــــاسه

والله محد سهل

وايد يازت لي القصه و الطريقه

زين سووا العيال باحتوائهم لمرت الأبو

و فوزيه بعد ضبطت أمورها

قصه مملوحه

شهرزاد يقول...

والله الرجال مالهم أمان... عادي انك تلاقي أرملة شابة توهب كل عمرها لعيالها و لا تقدر تفكر في أحد تاني غير زوجها المتوفي ..أما الرجل مهما كان حزنه على زوجته وحبه لها فإن كثر سنة و يتزوج غيرها . و قالوها اللي قبلنا ( يا مآمنة للرجال يا مآمنة للمية في الغربال .. ’’يعني المشخال’’)..و عجبي

esTeKaNa يقول...

سالفه قريبه!
لا ودققي بالتفاصيل شايفها عند سوق السمج
:))
احيان يا صديقتي لما ننظر للموضوع من بعيد نقول اشلون جذي؟
لا ما يصير
وعيب وحرام!!
بس لما نحط انفسنا في مكان هالشخصين تتغير نظرتنا
واللي عجبني بالاولاد رغم حزنهم ودهشتهم
الا انهم شرو راحه ابوهم ورضاه
الله يوفقه ويرزقهم بره ورضاه عليهم
خوش قصه
:)

maha يقول...

أنا اتوقع مافي بنت او مره تعرض نفسها للزواج الا ظروف حدتها

دام انها بنية حلال اكيد ظروف قاهره

الهجر والوجد !! يقول...

والله قصه قويه وصادت الريال بالمي العكر وعرفت نقطقت ضعفه خابره الي يتخذ ارقام تلفون اهل المتوفين يعزون هذي الظاهر خططت انه تصيده الله يسعدهم وتصيرهم خير مرت الابو
تقبلي مروري
الوجد

Sn3a يقول...

لووووول اخر سطرين خطيرين
بس غريبه شلون وحده تدق على ريال وتعزيه وترد تكلمه
شهالجراه
بس صج نصيب

النصيب مايعرف خطبه اهل ولا كاريبو الصالحيه..ولا سوق السمج!

الله يهنيهم


بس اثر فيني ابوهم لما بيلتفت يقول لمرته المتوفيه السالفه ومايلقاها
صج شعور صعب

vancouver يقول...

هاهاهاهاها ادري اضحححك ما ادري ابجي

اضحك انه الشايب يحليله طلع ككككلش مو هين
وعنده سوااالف
والله يهنييييييه بزواجه ويباركله

وابجي

على حاااااااااااالنا احنا يالحريم
الوحده تنتف روحها من القهر والحزن على زوجها
وتظل سنيييين على حسه وكل اللي حواليها يحسسونها بالذنب لو
قررت تلتفت لروحها شوي

اما الريااااااال
لووووو شنو يحب زوجته
بسسسسسسسرعة ينسى وتمشي اموره



دنيا
!!

القصة جدا واااااقعيه

مره سمعت عن واحد توفت مرته وكل عيااااالة بحادث
قلت حق امي وعليه عليييه بياكل بعمره لما يموت
قالتلي يا بنيتي نطري عليه ماراح تدور السنة الا متزووووج



وصدقت الوالده
:\\\

um_alzain يقول...

عزيزتي

nikon8

ماصدق

كل هذا يطلع من بعد كل هل حب

قويه قصه التعزيه ومواساته بزوجته المتوفيه وهي طمعانه فيه صعببببه

صدق من قال ان كيدهن لعظيم














2

مركبنا يقول...

هههههههههههههههههههه

في البداية اخنقتني العبرة

والنهاية مت من الضحك من صج الريايل

غير معرف يقول...

الشايب مو هين ولله ...

يحليلهم تواعدوا صوب سوق السمج .. بس مو اي سوق ... مال شرق

يطلع من الشياب ولله ...

بس صراحة موحلوة المرة تقط روحها جذي
انا مو مقتنعه نيتها طيبة ..

الا اذا مو حاشمة نفسها شي ثاني

بس ربي يوفقهم يمكن اهي احسن مني

بس عجبتني سالفة "مايبون فترة خطبة"
لووووووووووووووووووووووووول
العرب مظبطينها وخلاااااااص

daggero يقول...

Nikon8

وحدة تتدلع على زوجها تقوله
تحبنى
قالها
أكثر من ماتتصورين
قالت له
شنو يصير فيك لو أنا مت
رد وقال لها
أكيد راح أجن
سألته
تتزوج بعدى
قال لها

يعد أنا خلاص جنيت فأكيد بتزوج

فحذارى أيتها النساء من الرجال

muhrah يقول...

على قوله يدتي الله يرحمها
المره حرتها نفس طقت الكوع تعور و تبرد بسرعه
جذي حره المره بقلب الرياييل

كبرياء وردة يقول...

هههههههههههههه

وي يا حليلهم

بس عياله عاقلين يوم انهم وافقوا

شروا راحة ورضا ابوهم ومحبة مرته

الله يتمم عليهم

lawyer يقول...

اتصدقين من امس و انا افكر في البوست

عندي تعليقين

من منطلق المنطق و العقل ان معاه حق
وان عيالله تفهموا هالشي لانهم متزوجين و مايصير الريال يقعد جذي بروحه و الحياه تمشي




من منطلق قلبي

مممممممممممممممممممممممممت حره من الرياااااااااااااااييل مسسسسسسسسسسسسسسرع ما ينسوووووووووون


لألأ مو ينسووووووون اقصد ان اهما ما يقدرون يعيشون على الذكرى مثلنا

و في مثل يقوووول حره المره مثل طقه الكوع تعووووووور حيب بس بسرعه تنسى




ومن منططططططططططلق بختي اقولج

ياااااااااااااحسره قلبي حتى الشيااااااااااااب يدوبرون و يخططوووووووون

انا يوم عنست قلت اشوه في امل اخذ ارررررررمل

الحييييييييييييين الارمل الي مابالعين شي صاااااااااار بعد يتخطط له !!




ماني شايفه ريل الاااا بالجنه انشاااااااء الله


ههههههههههههههههههههههههه

غير معرف يقول...

"لبيــــــــــــــــــــــــــك" وردها لها
"لبيــــــــــــــــــــــــــج"
حبكة الإتصال للتعزية تأكد أن كيدهن عجيب وعظيم.
على العموم الرجل إذا كبر يصير خواف وينعكس المثل ويقول الرجل "ظل مرأة ولا ظل حيط ". وأعتقد أن الغلط من المرحومة دلعته أكثر من اللازم لدرجة أنه يحسب أن كل الحريم راح يعاملون نفس المعاملة "لبيك" ولكن هيهات هل يستطيع التأقلم مع الخريطة الجديدة كم من الوقت يحتاج لمعرفة الطرق الجديدة؟ وهل سيارة المستعملة فيها روح لمقارعة هذه الشوارع الجديدة عليه؟
شارع الذكريات الجميلة،شارع القصص المشتركة،شارع العادات ، شارع الصبر ،شارع التفاهم، شارع التقبل ، شارع الشخير ، شارع الريحه ،شارع الإستقبال ....
باين من الحديث أن المرحومة ماتت وباقي لها درس واحد تعطيه إياه وهو "ما تعرفي قدري إلا بعد ما تجرب غيري"
غميضة على "لبيك"
هذا لا يعني أن الجديدة لا تتغلب على المرحومة إلا إن علم الإحصاء يقول احتمال نجاح تطبيق زواج الأرمل ضيئل جد ولا يتعدى 15% وخاصة في الأسر ذو الدخل المتوسط و وتقل أكثر مع ذو الخل العالي اللي يشتري حاله ويشتري زواج مسيار أو متعة أو فرند ..... وفك عمرك من هالدندنة.

مهرة سالم يقول...

السلام عليكم ...
سوالف الشياب ...
الله يرحم والدتها ...
...
ويسعد والدها ...
>>>
صراحه إزقرت مكان اللقتء الأول ...
صج حب شياب..
......
دمتِ بخير

Nikon 8 يقول...

chandal/danchal!!
يا صباح الأمطار الحلوة :)
خليج دائما متفائلة
والله يرسل فرحه مو على البال ولا الخاطر مثل العروس اللي ظبطت بوفوزية وهو غافل :))

Nikon 8 يقول...

Ra-1
كل شي بهالدنيا يبي تخطيط صح وتنفيذ صح وإختيار اصح .... عدل كلامي ؟

Nikon 8 يقول...

muhrah
يا هلا وسهلا فيج يا مهرة ... إسمج وايد حلو .... جدتج معاها حق في كلامها :)
عندي إعتقاد إن اللي طلع المثل هو مرة !!!!
:))
وصدقتي محد هين بهالدنيا :))
ومشكورة على الدعوة ... وحياج الله دوم عزيزة في دار عزيزة:)

Nikon 8 يقول...

نون النساء
يا هلا بنون النساء :)
فقدتج وايد ..... زمنا يقول اللي يبي الشي يسعى وراه .... صحيح الأسلوب قوي لبعض الناس ولكن ما في له بديل عند البعض الآخر !

Nikon 8 يقول...

الزين
يا صباح الزين كله :)
تصدقين في وحدة تأثرت وايد بالموقف فصارت تتابع الوفيات وتثبت على اللي متوفية حريمهم ... تبي تجرب بواحد عل وعسى الطريقة تضبط معاها :)

Nikon 8 يقول...

Sweet Revenge
في بعض المواصفات العامة تشجع الحريم للزواج من رجل معين ... مثل يكون وحيد بالبيت ... حالته مستوره وما رواه مسؤوليات مصاريف عيال ... وعنده بيت وخدم !!!!

Nikon 8 يقول...

nanonano
يا حليلج حدج إستانستي لهم :))
وصدقتي محد سهل كلش ... والمثل يقول كل عود وفيه دخان !!!!
حياج الله دوم عزيزة في دار عزيزة:))

Nikon 8 يقول...

esTeKaNa
شكرا يا إستكانة :))
ترا العيال بالأول عارضوا على إسلوب المرة بالتعرف على أبوهم لكنه ذكرهم إشلون تعرفوا على حريمهم وتزوجوهم والبنات بعضهم إشلون تعرفوا بعد على أزواجهم .... وهذا اللي سكتهم بالإضافة إالى أن أخوهم الكبير متدين وأقنعهم بأن هذا شرع الله ... ومهما ظلوا العيال بالقرب من أبوهم تظل لهم حياتهم الخاصة وعيالهم وبيوتهم بتشغلهم عن أبوهم ... وهذا معترفين فيه العيال كلهم وساعد إنهم يحتوون أبوهم .
عجبني إنك عذرتي بوفوزية وزوجته لما قلتي إنا لما نحط نفسنا مكانهم تتغير نظرتنا :)
وحياج الله دوم عزيزة في دار عزيزة :)

Nikon 8 يقول...

شهرزاد
كلامج صحيح يا شهرزاد ووهب الأرملة حياتها لعيالها بعد ترملها هذا إختيارها هي لأن الشرع إجاز لها الزواج ... شهرزاد إسمج وايد شاعري ويدل على إنسانة ذكية مثل إسطورة ألف ليلة وليلة .... هل كلامي صيح ؟

Nikon 8 يقول...

maha
كلامج ألف بالمية صحيح .... ظروف البنت كانت وايد صعبة وما لقت غير هذي الطريقة لأنها جربت الخطابات وويلهم وما نفع معاها وشافت إن إسلوبهم وايد مهين بالنسبة لوحدة بنت عايلة ومتربية مثلها .

Nikon 8 يقول...

الوجد
يا هلا بك عزيزة في دار عزيزة :)
هذه أول زيارة لك للدار وإنشاء اله ما تكون الأخيرة :)
الله يسسعدهم إنشاء الله ... ظروف بوفوزية وزوجته ساعدتهم إنهم يتقربون من بعض ... وبعدين ما كان في شي يوقف عائق أمام زواجهم :)

Nikon 8 يقول...

Sn3a
يا هلا فيج يا سنعة
وما ألومج لي تأثرتي على بوفوزية بعد وفاة أم عياله !!!!
وهذا اللي خلاه ما يقدر يعيش بدون زوجة ... لأنه متعلم على زوجته دائما جنبه :))
الله يرحم زوجته ويعوضه بالزوجة الجديدة :))

Nikon 8 يقول...

vancouver
فقدان زوجة وعيال مرة وحدة وايد صعب على الرجل وما يعوضه غير الزواج مرة ثانية !!!!
وترا الرجل يحزن لكن طبيعة خلقته إن يتحكم بعواطفه بعكس المرأءة العاطفية جدا .
حياج الله دوم عزيزة في دار عزيزة :))

Nikon 8 يقول...

um_alzain
ههههههههههههههههه
إش على بالج يا أم الزين ؟؟؟
اللي خلقنا قال عنا كيدهن عظيم !!!
تبين هالأرمل الحزين ما يقتنع بإسلوب وطريقة المرة الجديدة ؟؟؟

Nikon 8 يقول...

مركبنا
حي الله صباحج الجميل يا مركبنا:))
وعساج دوم تضحكين :))

Nikon 8 يقول...

حجر كريم
الطريقة كان يبي لها إسلوب وجرأة ودقة بالتنفيذ ... والأهم صدق في النوايا .... وهذ اللي حسه بوفوزية صدق نواياها وصدق نواياه .
أما سوق السمج فهو مكان عام ومألوف لبوفوزية ... والأهم يدله.
أتوقع إن الإسلوب ما يصلح للأعمار الصغيرة أما الكبار ففرص تعرفهم على بعض قليلة وفيها إحراج كبير لهم !!

Nikon 8 يقول...

daggero
أشكرك على التعليق أولا فأنت الرجل الوحيد الذي تجرأ وعلق على الموضوع :))
النكته ضحكتني .... وما تحتاج تحذر النساء فماشاء الله عليهم الرياييل إشدعوة عاد رادهم شي سواء المرة حية وإلا ميته !!!

Nikon 8 يقول...

كبرياء وردة
شكرا على إبداء الراي :))
أصلا العيال ما عندهم سبب جوهري يعارضون عليه زواج أبوهم غير طريق التعرف !!!
وهذي رد عليها أبوهم وذكرته في ردي على إستكانه :)
حياج الله دوم عزيزة في دار عزيزة :))

Nikon 8 يقول...

لوير
تصدقين الريال الكبير لقطة أكثر من الصغير ... بس عاد تحملي قعدته بالبيت يعني ماكو إطردي كل مكان وتحملي بعد عسارته والأطباع اللي معودته عليه المرحومة !!!
وبعدين لا تقولون عنست هذي الكلمة إنقرضت ما عادت تنقال ... الحين جميع مراحل أعمارنا مطلوبة ولها ميزات وتذكرى دائما مرت أبو فوزية :))

Nikon 8 يقول...

نهار
يا هلا بأهل الإمارات إعزاز في دار عزيزة :)
النصيب يأتي في كل مكان والحمدالله إن ليس حصرا على الأماكن الراقية ....جان محد تزوج :))

Nikon 8 يقول...

غير معرف
أتفهم حسرتج على المرحومة... وأفهم من كلامك إنج أنثى .
عموما الأيام القادمة راح تعلمنا إين تسير دفة حياة الزوجين.
لحد الآن يقولون إنهم طايرين في بعض وإذا المرة فرحانه بالزوج ومحتاجة له راح تسوي المستحيل حتي تلبق عنده .

enter-q8 يقول...

أممم قاعد افكر ادز المره تروح جمعية الوفرة مشتهي لبن و يكون الجو ممطر علشان تبين لي اذا تحبني و الا لأ


و من عقبها
بحط رقم تلفوني بالـ15 جريدة مالوت الكويت

ReLaaaX يقول...

سبحان الله!


أرزاق!

Nikon 8 يقول...

Enter-Q8
كلشي عاد ولا أم وليد :)
إسم الله عليها:))
ترا ما نرضى عليها ... لو ما نعرفها :))

Nikon 8 يقول...

ReLaaaX
شفتي ؟!
والرزق يبي سعي .... مو عدل ؟
:)

lawyer يقول...

من صجج انتي؟؟ مرت ابووووووو فوزيه صااااااااااااارت مثلي الاعلى في الحيااااااااااااااااه

خلاص


بجابل الجرايد من اليووووووم و رايح بس كلااااااااااا ريايييييييل الي ميتين على حظي


:ppP

lawyer يقول...

انتر كويت

يااااااااااااااااااااامجرررررررررررررررررررررررررررررررررررم


صصصصصصصصصصصصصصصصصصصصصصج مالكم امااااااااااااااااااااااااااااااااااااان




شفتاااااااااااي نيكووووووووووون شفتااااااااااااي



خلج شاااااااهده هاااااااا

daggero يقول...

Nikon8
U welcome

وكملى معروفك وبلغى الخوات اللى علقوا باقى القصة وقوليلهم كم سنة هالزوجة الجديدة أصغر من الزوج, أذا أنا مو غلطان حول عشرين سنة ,

ها أنصدمتوا مرة ثانية يانساء

هههههههههههههه

Nikon 8 يقول...

daggero
صحيح كلامك فو فوزية عمره بالستين والعروس خمسة وأربعين :)

Nikon 8 يقول...

لوير
هههههههههههههههه
سوري .... مو قصدي تسوين نفس مرت أبو فوزية .
قصدي خلي الأمل دايما موجود :)
ومن صبر قدر :)
تستاهلين كل خير يا لوير :))