السبت، 11 أبريل، 2009

الفيس بوك

زميلتنا بالعمل ماجدة من المدمنات على الفيس بوك !
إنظمت إلى مجاميع الفيس بوك بالبداية بسبب بنتها المراهقة .... طالبة الثانوية ... لتكون قريبة من إهتمامات بنتها .... ولتتماشى مع زمن الكمبيوتر .... والأهم من كل هذا .... حماية للبنت من الإنجراف وراء كلمات رقيقة لأشخاص مجهولي الهوية الحقيقية .... وشي ثاني أخطر من وجهة نظر ماجدة حتى تفرمل رغبة البنت في نشر صور خاصة لها لا تصلح للنشر للعامة .... لأنها لحظات خاصة لا يقدرها إلا من يعرفهم تماما !
جاءتنا ماجدة ذات صباح فرحانة وهي تقول :
تصدقون لقيت على الفيس بوك لطيفة أقرب صديقة لي أيام المتوسطة والثانوية .... وايد فرحت فيها وهي بعد فرحت فيني .... الله يا الدنيا صار لي سنين طويلة فاقدة أثرها من بعد ما غيروا عنوان سكنهم ومكان بيتهم القديم صار عمارة ...... وتغيرت أرقام تليفوناتهم .... ومع كل هالسنين ما نسيتها ودايما أسولف على عيالي عنها وعن إختها شريفة وإشلون كانوا مؤدبات وخفيفات دم وكلهم حيوية .... كانوا الوحيدات اللي أمي كانت ترضالي أزورهم بالبيت .... وإتفقنا الحين إنهم أهم اللي يزورني في بيتي إهي وإختها اليوم بدون العيال .... نبي نتذكر أيامنا وما نبي مقاطعات من عيال ما لحقوا على أيامنا ..... فيني حجي وايد وما ودي أسكت بأقوله لهم .
سألنا ماجدة شفتي صورتها ؟ مثل صورتها اللي بالج وإلا تغيرت ؟
ردت : تغيروا شوي علي إهي وإختها ....... ما أدري ليش نظرة المرح اللي بعيونهم قبل إختفت كنت وايد أحب هذي النظرة ... ووايد حاولت أقلدهم بس ما قدرت !
هونا عليها وقلنا : كنتوا صغار .... والحين كل وحده ما شاء الله عليها شوي وتصير جدة ... أكيد نظرة الشقاوة بتختفي .
ماجدة كانت وايد مختبة على رفيجات الدراسة اللي لقتهم وخبت اللي حواليها كلهم معاها.... خبرت كل صديقاتها اللي لا زالت تتواصل معاهم .... طلبوا منها إذا شافتهم إنها تدعيهم على جمعتهم الشهرية .... لأنهم همن ولهانين عليهم وفرصة حلوة لتكتمل مجموعة الدراسة وينبسطون مع بعض ويتبادلون الذكريات ويستانسون ... ومن كثر ما هم مستانسين صاروا يدورون على صورهم أيام الدراسة ويجمعونها وينسخون منها عدة نسخ حتى تكون كل وحده عندها مجموعة كاملة .
وبسبب العلاقة القوية اللي كانت تجمع ماجدة مع لطيفة وأختها شريفة ... فضلوا باقي الصديقات إن اللقاء الأول يكون فقط محصور بين ماجدة ولطيفة وشريفة ..... والمرة الثانية يلتقون فيهم مثل ما إتفقوا في جمعتهم الشهرية .
أم ماجدة وخواتها بغوا يحضرون اللقاء .... لكن ماجدة عيت عليهم ... وقالت لهم ... أيام الله وايده .... ولاحقين بتشفونهم وتشبعون منهم في المرات الجاية .
قصة لطيفة وشريفة مع ماجدة كانت حدث غير إعتيادي في الدوام.... والكل في حالة ترقب للموعد اللي بيجمع الصديقات بعد فراق طويل .... بنات الدوام أصروا على ماجدة إنهم يساهمون بشوية أصناف غذائية وأكلات وسلطات مميزة وحلو فنتق .... ليكتمل الجو العام بحرارة اللقاء الأول وشوق وترحيب ماجدة بصديقاتها .
ومن كثر بلاغة الشف فينا حنا بنات الدوام .... اليوم اللي صادف بعد لقاء ماجدة بصديقاتها
كنا كاملين العدد من الصبح ولا وحدة ماخذه إستئذان أو متأخرة وبإنتظار إطلالة ماجدة علينا .... نبي نعرف إنطباعهم ببعض ... الموضوع بالنسبة لنا صار مسلسل مشوق :)

جاءت ماجدة متأخرة ساعة كاملة عن الدوام .... قلنا عادي أكيد أخذها الوقت وطالت السهرة مع صديقاتها .
ملامح ماجدة كانت تدل على قلة النوم والحزن !
سألنا بقلق خير ماجدة عسى ما شر ؟
ماجدة : أول سووا لي قهوة سادة قوية .... خلوني أصحصح
بعد رشفتين من القهوة قالت ماجدة بحزن وإستسلام : أحيانا الذكرى .... أفضل من واقع نركض وراه بأحاسيس وظروف الماضي :(

إنتقل إلينا شعور الحزن فسكتنا ولم نسألها إشلون ؟
أكملت ماجدة : إستقبلت لطيفة وأختها شريفة بحرارة كبيرة ... كنت أضمهم لصدري وأنا أطيل مدة الضم .... كانوا فرحانين بشوقي الكبير لهم ... وكنت فرحانه جدا لدرجة إن إبتسامتي ما إختفت خلال الترحيب فيهم .... الفرح نشرته بكل مكان بمنزلي .... ترحيبا بهم .
لطيفة إنبهرت وقالت بلحظتها: ماجدة إنتي تونسين ...... وبيتج يونس ...... ويشرح الصدر .... حتى عصيرج ألوانه تفرفش الروح ...... يا بختج على هالروح ...... من متى صرتي جذيه ؟
ماجدة : مهما سويت ما أوصل إلى مرحكم وحيويتكم وروحكم الحلوة ..... وإلا نسيتوا ؟
كنت دائما أحاول أقلدكم ؟
شريفة : والله ؟ إحنا كنا جذيه ؟
ماجدة : ترا بنات الدراسة وأمي وخواتي كلهم مشتاقين لكم .... لكني بغيت هذا اليوم يكون لنا بروحنا .... تعالوا أول أوريكم بيتي :)

طفت فيهم حوالين البيت وأنا أعرفهم على عيالي الفخورة بهم وعلى وزوجي من خلال الصور الموزعة بكل إركان وحيطان المنزل مع أهم إنجازات كل واحد فيهم وطموحة بالمستقبل .... طبعا صور زواجي كان لها نصيب لأني دائما أفتخر بروحي لما كنت عروسة !
ردينا لغرفة الضيوف .... خذينا على بعض بسرعة .... وأنا أقدم لهم الشاي سألتهم : ها .... ما خليت شي ما علمتكم عنه عن نفسي وعن أسرتي الصغيرة والحين جاء دوركم .
لطيفة بدت الأول : بعد الثانوية ما كملت تعليمي العالي ... كان كل همي إني أتزوج وأكون أسرة ...... لدرجة إن أهلي إذا ردوا أي خطيب كنت أزعل وأنعزل بغرفتي وأضرب عن الطعام !
لحد ما جاء مرزوق يخطبني .... الكل يعرف بسمعته السيئة .... حتى أنا ... لكني أصريت على أهلي إني أتزوجه .... يمكن الله يهديه على إيدي .... ومرزوق قام يمثل دور حمامة المسجد وإنه عقل عن شطانة الشباب حتى وافقوا أهلي عليه !
زواجي منه كان مأساة كبيره .... خناق وهواش وضرب .... وشوفي خشمي إشلون صار ؟ كله بسببه لأنه كاسره لي !
أمي نصحتني أكثر من العيال لأنهم يعقلون الزوج !
جبت ثمان عيال على مدي 22 سنة .... كل واحد أبلس من الثاني .... طلعوا على أبوهم .... شطانه ولسان طويل .... صج إنهم يحبوني وهم اللي يعلموني على كل جديد مثل إستعمال الهاتف النقال والستالايت والكمبيوتر ... لكني ما أقدر أسيطر عليهم .... شخصيتهم أقوى مني !
وأثنين منهم صار لهم حادث وهم يشفطون بالسيارة .... واحد توفى والثاني صارت له عاهة مستديمة .... الكبار ولا واحد فيهم دخل الجامعة .... والصغار مو باين عليهم .... لأنهم متعثرين بالدراسة .
وأنا كل مرض فيني من هالزواج والعيال .... وزوجي تولع بالزواج من جنسيات مختلفة .... وأموري المادية معتمده فيها على راتبي التقاعدي وورثي من أبوي !
وبعد كل هالسنين لا أنا هديت ريلي ولا كثرة العيال قدرت تركده ولا أنا سويت شي زين حق نفسي !
أما شريفة فقالت : زوجي أهلي إختاروه لي ... خوش زوج لكني وحده متسلطة وأهله ما يخلون أحد بحاله وأنا ماني سهلة ما أطوف لهم شي ..... حياتي كلها هواش معاهم ... علاقتي كلش سيئة مع أهل زوجي ... وهو بدأ يتضايق من الوضع ... وأكثر من مرة ...ننفصل عن بعض ... وطلقني مرتين ... وباقي لي طلقة وحده قاعده أحافظ عليها علشان عيالي .... أدري طبعي صعب لكن ما بيدي شي .... وقبل ثلاث أشهر إكتشفوا الأطباء المرض الخبيث بجسم زوجي .... فصرت أسمح حق أهله بزيارته في بيته .... عيالي تأثروا من الجو العام في البيت .... والأخصائية الإجتماعية في المدرسة دائما تشكي من سلوكهم العدواني في المدرسة !
تكمل ماجدة حديثها بعد ما طلبت نسوي لها قهوة ثانية :
لطيفة وشريفة من قعدوا لي طلعوا من بيتي ما قالوا كلمة وحد تونس أو فيها أمل .... نظرتهم للحياة سوداوية ... متشائمين من كل شي ... وما أسألهم عن أحد إلا ويقولون لي عن مصيبة صايرتله .... اللي بيتهم إحترق ومات ولدهم .... واللي الخدامة حاولت تذبح عيوزتهم ... واللي طلع فيه مرض نادر .... واللي ترملت ومحتاسة بحياتها .... واللي طاح ببالوعة غطاها بايقينه البنغالية .... واللي يصلح الستلايت طاح وإنكسر ظهره .... واللي تنظف تحت السرير طق ظهرها وصار فيها ديسك .... واللي الفرن بق بوجهها وإحترقت قذلتها وحواجبها ولصقت العدسات اللاصقة بعيونها .... واللي صارت مرافقة حق أمها المريضة ... واللي تعقدت ما جاها نصيب وتزوجت .... واللي أضرب عن الزواج من كثر ما يردونه !
ويا بعد عمري أمي إشتغلت علي تليفونات تبي تتطمن من لقائي بصديقاتي ... قلت لها يا حلوهم كاهم معاي أسولف لج بعدين ! ما قدرت أقول لها كارثة اللقاء الأول !
والغريبة إن لطيفة وشريفة كأنهم خايفين أعرف شي زين عنهم !
يعني معقولة كل حياتهم مصايب ونكد وغم ؟ ما في يوم أو لحظة فرح ؟ .... محد خالي وكلنا معرضين حق هالمواقف وأكثر وعشنا أيام وايد صعبة ... والله وحده يعلم فيها .... لكن هذا لا يعني إني أنشر الحزن والفرح أخاف أحد يدري عنه ؟!
والأكثر غرابة إنهم مو حاسين بنفسهم إنهم من قعدوا ما في غير أخبار أمراض غريبة عجيبة وهم وغم !
من كثر ما إنزعجت من أخبارهم صارت فيني ضيقة ... ويوم قلت لهم تفضلوا على العشا ما قدرت آكل شي من ضيقة الخلق من سوالف النكد اللي سمعتها ... حاسة شي تك على صدري وخانقني .... وما شاء الله عليهم لفوا كل شي حاطته لهم لف وبشيهة مفتوحة ... واللي حرني إنهم ياكلون ويعذربون !
يسألون السلطة فيها خل ؟
أقول لهم إيه شوية ... يقولون لي ديري بالج ترا كثرة الخل تقضض الكبد !
سلطة الجرجير ... كنت مختاره أحسن ورق جرجير من مركز سلطان ... تعجبوا من نظافتة وحجم ورقة الجرجير فقالوا : إيه هذا كله من السماد الكيماوي !
والمشروم الطازج عقلوا عليه وقالوا عاد يقولون فيه نوع يسمم !
ما قط مرة تسممتوا منه ؟!
وسألوا عن طبق أنا مشهورة فيه شنو مكوناته ؟ ... أرد عليهم ... ويوم قلت فيه قيمر وكريمة .... قالوا الله هذا وحدة بوحدة حق الكوليسترول !
طبق المسخن بعد ما كلوه وحبوا طعمه قالوا لي : عاد الدياي هالأيام كله طاقينه هرمونات!
والحلو الغريب اللي مستانسه عليه يوم ضاقوه وإستانسوا عليه قالوا لي والله ماجدة زين ما يطق عندج السكري ؟!
ما طلعوا من بيتي إلا وأنا فيني إكتئاب .... جرعة النكد كانت ( أوفر دوز ) علي :(
ولا كلمة ولا معلومة مفيدة سمعتها منهم .... صرت بس أدعي بقلبي وأقول الحمد الله الذي عافانا مما إبتلا به غيرنا .
بصراحة قاعدة أفكر إشلون أتفكك منهم .... صديقاتي ما راح يسامحوني إذا حضروا تجمعنا الشهري وقمتوا قلب مجموعة الدراسة .... وأحمد ربي إني ما خليت أمي ولا خواتي يحضرون .... محد ناقص يسمع مصايب غيره وبهالكثافة المركزة جدا :(
ويارب ما أقول إلا إنك تجعلنا خفاف على غيرنا ولا تبلينا بأطباع تزعج الناس فينا .... والحمد لله على كل شي.

وتوبة بعد إن تعرفت على أحد قديم من الفيس بوك وجبته البيت وحاولت أعيش الذكريات معاه !

أحمي بنتي وأنا اللي تعلمت الدرس !

وإهي نوبة وتوبة مثل ما يقولون .

هناك 41 تعليقًا:

Broke يقول...

إستغفرالله ظيم ! ما أواطن هالنوعية من الناس
ولا أعرف أعاشرهم

طاقة سلبية متنقلة ... الله يكافينا الشر

maha يقول...

مرحبا نيكون

كسرت خاطري رفيجتج

صراحه مافي إنسان خالي من الهم لكن الله يعينه

وبعدين إن الله لا يغير بقوم حتى يغيروا مافي أنفسهم


إذا بنقعد نتحلطم على كل شي أكيد ماراح نطلع من القوقعه

ياربي والله الله يعينها شلون قدرت تتحملهم
أنا وأنا أقرا انغثيت منهم

بس كل طقه بتعلومه

تدرين درس حتى أنا تعلمت منه

lawyer يقول...

ويع ويع ويع

عمى بعينهم اقمتوووووووووووووو قلبي هذولاااااااااااااا



ينثبروون في بيووووووتهم ولا يسيرووووووووووووون على احد




ذكروني في رفيجه امي
تشوفينها في عرس و قاعد ترقص
اتشكاااااااا من الامراض


مافيها الا يني الحسسسسسسد الي راكبهاااااااااا و بس اتششششششكى





علووووووووو قلبي



لي تعليق اخر على الفيس بوووووووووك
باجر عقب قهوه الصبح

غير معرف يقول...

لا حول ولا قوة الا بالله

ضيقتى خلقى , صار فينى اكتئاب والله من سوالفهم , اللهم لا تبلينا

قولى حق رفيجتج تسكر بابهم , لانهم شكلهم صارو من بسطاء القوم الجهله , لا منطق لا اسلوب , مو بس جذى , مافى ذرة اتيكيت , واخزياااااه

Cr8ivia يقول...

شر البليه ما يضحك
من قمتتي بسوالفهم قمت اضحك !

استغفر الله الحمدلله علي النعمه و راحه البال

واااايد يكونون في البعد اجمل اجمل

esTeKaNa يقول...

لا حول ولا قوة الا بللله!
ويه ما سوت عليها هاللقا
قولي لها تحط سورة البقره في بيتها لا تييها عين تعفس كل شي عليها
!!
سبحان الله في ناس فعلا فيهم كم طاقه سلبيه يقدرون يسحبونج لي الارض معاهم
ويخافون يقولون شي زين صار بحياتهم لو لحظة خوفا من العين
ناس غريبين:(



أحيانا نلتقيهم بعد فراق سنين
نعتقد ان لقائنا معهم قد يعيد حميميه تلك الايام وروعه لقائها
ولكن نكتشف ان كل شئ تغير
حتى نحن!
للزمن دور
وللحياه دور آخر



استمتعت بقراءتك كالعاده
دمتي لنا صديقه جميله ذكيه باختيار كل مواضيعها
:)

um_alzain يقول...
أزال المؤلف هذا التعليق.
um_alzain يقول...

عزيزتي nikon8
دائما اقرا موضوعاتك مره وثنتين واحيانا ثلاث مرات واستمتع
ولكن هل بوست
مره ومابعدها مره
على فكره ارتفع ضغطي
كل منج
الله يسامحج على سوالفج

New Bride يقول...

استغفر الله ويييع يضيقون الخلق

و الله انا قمت كلش ما اقعد مع ناس متشائمين و الله صج يأثر


الله لا يبلانا انشالله

حجر كريم يقول...

أوف ... لله المستعان

ماكان له داعي التشكي ...

جنهم يبون يصدون العين :)
هالنوعية ترفع ضغطي

Manal يقول...

نيكون
كالعادة
بوسج حلو بتفاصيلة الدقيقة

الله حافظج حبيبتي

:)
اما صديقتج

صج عاد شر البلية ما يضحك

:)

شي يضيق الخلق لكن يضحك بنفس الوقت

نعيش ونسمع

سوالف مالها اول ولا اخر

دنيا فيها اشكال والوان

ربي يساعدها الطيبة الحبوبة
سلميلي عليها وايد

وقوليلها الدنيا ما تسوة
الاول تحول
والدنيا تغيرت

:)

والله يعوضها خير

حياتي هدف مو عبث يقول...

الله يعينهم ويعين صديقتج

ليش اسمها لطيفة نفسي :(

بعض المرات عدم التواصل أفضل من التواصل المتعب ..

ولا أحب اللي يشكون واايد وخاصة بعد فترة إنقطاع طويلة

Someday يقول...

امبيه استغفر الله
قاعد أضحك
سوري بس انا ماره علي هالنوعيه
سبحان الله ما يقدرون يشوفون شي حلو بحياتهم
عندهم وايد اشياء اوضحها الصحه و العافيه و بعد ما يقدرونها
الي يتراوالي صاير عندهم ان التفنن بالكلام عن مصايبهم عشان يكونون مركز الاهتمام و مع المده يصير طبع
مع ان حكمه الله بالبشر ان ينسون همهم و بلاويهم عشان يقدرون يعيشون بس هالناس يوصلون مرحله ان هالحجي ماله ارتباط عاطفي معاهم كلمه و تناقل و هذا صار نمط سوالفهم يعني ما يضايقهم و لا يأثر فيهم
و هذا المصيبه الصجيه ان الواحد مشاعره تموت
btw Je adore facebook :$$

I7na 3shagnaha يقول...

يا من شرا له من حلاله عله

ختصك بابهم بطين و عيين

chandal/danchal!! يقول...

لا حول ولا قوة الا بالله

يا ساتر على جذي بشر!


مسكينة ما سوت عليها!


تصدقين نيكون... أنا رديت رافجت بنات عن طريق الفيس بوك... ولنا يمعة كل ما تمينا... صج وناسة وما ودنا ننشلع من القعدة!

قبل كنت اقول صديقاتي اللي من عمر كافي علي وما عندي استعداد ارافج على كبر... بس طلعت غلطانة... والله اني متحسفة واقول ويني عن جروب الفيس بوك من زمان... يعني مسكينة صديقتك


وعلى قولتك... لما نتيمع نصور الاكل ونحطه على الفيس بوك وتعالي شوفي التعليقات والضحك... اببييييه ادمان احس جني مصرية... لان الشعب المصري يقولك اكثر واحد محلل الفيس بوك... بس احس احنا ازيد!


انا من طحت بهالبلوقز وانا خافة ريلي عل فيس بوك... بس يمعتنا لابد منها كل ما تمينا.... ويا حلو لما تلاقين ناس خبرك فيهم من ايام المتوسط والثانوي... اجمل مراحل عمري واحلى صدقة... صج لما اشوفهم احس جني رديت بذاك الزمن وعلى قولتج

شبقني وشبقته والولع شين
:)... ذكريات حلوة لازم نطول باللمة:)

Sweet Revenge يقول...

السلام عليكم
حبيبتي هذول الي يقولون عنهم البعد عنهم غنيمة .
الله يعينهم علي انفسهم واتجنبيهم كثر ماتقدرين لان اتوقع متروسه قلوبهم حسد
والله الحافظ

كويتيه بحرينيه يقول...

اعوذ بالله .. شنو هالناس والله نكد... حبيبتي الله يكفيج شرهم لان هالنوعيه تحب تطالع غيرها وتحسدهم على اللي عندهم.. مع انهم تلاقينهم عايشين احسن منج بس يتصنعون

Nikon 8 يقول...

بروك
صدقتي والله .... الله يكافينا شرهم



:::::::::::

مها
يا فيج يا مها ... المسكينة ما هقت يصير فيها جذيه ... كانت متعشمة بقعده حلوه مع الصديقات




::::::::::

لوير
لووووووووووووووووووول
ضحكتيني على رفيجة أمج اللي تتشكي وترقص بالعروس ..... يا كثر اللي مثلها.... يخافون يقولون الحمدالله إحنا زينين :)



::::::::::

غير معرف
والله المسكينة متوهقة الحين مهي عارفة إشلون إتفكك منهم .... أهم إستانسوا عليها ... وهي ضاق خلقها منهم :(

Nikon 8 يقول...

Cr8ivia
فعلا شر البلية ما يضحك
وإحنا نسمع سالفتها كنا متأثرين ولما خلصت قمنا نضحك :)


::::::::::::::::

إستكانة
أول شي سويته اليوم الصبح إني نقلت لها نصايحج .... وماجدة توصلج السلام اليوم الصبح قرت البوست مع التعليقات
شكرا لتفاعلكم :)


:::::::::::::::

أم الزين
إسم الله عليج من الضيقة ورفعة الضغط :)
عيل المسكينة ماجدة شنقول عنها اللي جابلتهم بروحها :(


::::::::::::::

New Bride

زين ما نسوين البعد عن الناس المشائمة نعمة :)


:::::::::::::::

حجر كريم
فعلا تصرفهم كأنهم بيصدون العين عنهم او طبع سيء الله يكافينا شره

Nikon 8 يقول...

منال
يا هلا بالصديقة منال
سلامج وصل لماجدة وقرته اليوم الصبح
وشكرا على الإطراء يا عزيزتي :)

:::::::::


حياتي هدف مو عبث
آسفة جدا إذا إسمها طلع نفس إسمج
والمفروض تكون لطيفة نفس إسمها ولكن !!!!
وكلامج صحيح ألف بالمية :)

:::::::::



Someday
فعلا الله عامي عيونهم من التبصر بالنعم اللي عندهم .... وصار هذا الإسلوب هو نمط حياتهم وإسلوبهم بالكلام !!!!

::::::

I7na 3shagnaha

والله اليوم الصبح قاعدة تقول لنا إنها تحاول تصك بابهم .... بس الموضوع مو بالسهولة اللي نتصورها لأن ماجده تستحي !

Nikon 8 يقول...

chandal/danchal!!
احلى شي ذكريات المتوسطة والثانوية
والحمدالله إنج لقيتي صديقات هذي المرحلة وإستانستي معاهم:))
يمكن البعد الزمني بعد اللقاء الثاني ما كان كبير مثل ما حصل ما ماجدةوبالتالي تغيرت عليها وايد اشياء في صديقاتها!

::::::::::

Sweet Revenge

فعلا البعد عن هالأشكال غنيمة وهذي ماجده قاعده تحاول تبتعد عنهم !

::::::::::::::

كويتية بحرينية
فاقدتج من زمان !
وزين اللي قصة ماجده خلتنا نشوف تعليقج :)
أتفق معاك أكيد إنهم عايشين عيشة زينة ولكن ما يقولون عن الجانب الزين !
تهقين يخافون لا نستانس :)

نون النساء يقول...

امبييييي ببجي..

حطيت تعليق

وشكلي عن الفشيلة بغط شهرين <__>

مادري بأي بلوغ قطيته ؟؟ @@ ...

ههههههههههههههههههههههههه



وافشيلتاااه >___<

Nikon 8 يقول...

نون النساء
ولا يهمج :)
تحصل فينا أحيانا .... وما في داعي تفتشلين وإلا تغطين :)
ما صار إلا الخير ... وحياك الله دوم :))

:: بـوح الصمـت :: يقول...

أمبي استغفر الله يـا ربي مادري ليش إنتابتني موجة ضحك على أخير شـي لوووول !

الحمدلله الذي عافانا !!

بعض الناس ترى الحياة بمنظار سوداوي , وهالشي المفروض ما يطلعونه على غيرهم , إنزين إنتي متضايقة مو شـرط إعلان هام !

خلاص يعني أول لقاء مع رفيجتج من بعد غيبة خلي فيه ذكريات حلوة وسوالف تفتح النفس !

خوفج يحسدونها بس خل تقرى على نفسها :) !

الله يكافينا الشـر !


مرات لمّـا نحتفظ بشخص غالي علينا من الماضي , من الأفضل إن نخليه صورته نفس ما اهيا ببالنا لإن الناس تتغير فما له داعي نشوه هالصورة بالحاضر اللي دائماً ما يكون عكس عند أغلب الناس !


عشان جذي أنا إذا شفت وحدة من زمان مو شايفتها ما أروح أسلم مو عن شي لكن أبيها بذاكرتي نفس ما خليتها نقيّة صافية شفافة أفضل بوايد :) !


أما الفيس بوك صراحة أنا شخصياً ما يعجبني لا تسألين ليش :) !!

ويزاج الله خير على البوست حده عجبني ويقلب المواجع ;q
سلمت يمناكِ عزيزتي ., سعدت بزيارتي الأولـى :*

Enter-Q8 يقول...

اول شي ما بيك تزعلين مني

تعرفين راي بكتاباتك و اللي اصر انها تاخذ نطاق نشر اكبر من التدوين

تذكرين حبابه

بوستك اخر شي اقراه بالريدر و السبب اني فعلا اندمج و يمكن انسى اي موضوع ثاني

لو نظرت الى الحادثه او سمعتها من احد ثاني لقلت عادي
و لكن طريقة سردك و توظيف المفردات و الاسلوب ما تخليني الا اقول
رائعه يا وخيتي

Sn3a يقول...

انا انقمت قلبي منهم !
شهالناس
ماكو شي يونس بحياتهم شدعوة

وي وي قثا الواحد يتيمع عشان يفرح ويوسع سدره ولا عشان ينقث ويتكدر
معقوله ماحسو بعمرهم واهم يتكلمون ؟

Nikon 8 يقول...

:: بـوح الصمـت ::
يا هلا فيج عزيزة في دار عزيزة :)
شكرا على التعليق ولا تقاطعينا :)

Nikon 8 يقول...

Enter-Q8
أخي بووليد .... تقول لي رائعة وتبيني أزعل !
بالعكس أنا اللي أشكرك على التواصل حتى لو كان بوستي أخر شي تقراه:)
لوووووووووووووول
صايره أذكرك بحبابة :)
عاد تدري كان من ضمن الأسماء المرشحة ليكون النيك نيم لي :)

Nikon 8 يقول...

Sn3a
تصدقين إن الصديقات ما حسوا بروحهم!!!
بالعكس إستانسوا واللي إنقمت قلبها ماجدة... لأنها ما صادفت ناس جذيه من قبل !

برنسيس إيكاروس يقول...

حبوبة نيكون
تجربة ومرت على خير
الناس يا عزيزتي أشكال وألوان و نكهات ولطيفة وإختها لون جديد علينا أن نتعوده أو نبتعد عنه حتى لا نتأثر باسلوب حياتهم الغريب
بصراحة تصلح قصة جميلة.. اشرايج تكتبينها ؟!
اسلوبك قصصي رائع يا عزيزتي
مودتي
منى

Nikon 8 يقول...

برنسيس إيكاروس
عزيزتي منى
جميل جدا من كاتبة لها باع طويل بالكتابة أن تشجعني بهذه الطريقةالحلوة :)
سوف أحاول وسأتواصل مع عن طريق البريد الإلكتروني
شكرا لك بحرارة :))

Daggero يقول...

Nikon8

عرب وين وتكنولوجيا وين

طحنا على ال( IRC ) عطبنا سيرفرات العالم بالهذرة

رحنا ال( ICQ) صار اللى يدشه بس يبى عمره

قلنا ( Pal talk )صارت فضايح

درنا الموجة على ال (YouTube ) صار سب أمسابب

دشينا ال( Blogs)وأشتغلنا على بعض ملخ بالأنمنومس

سوينا ال( MSN)وهاكنج على المظافين لما قام السيستم ينازع

الحين ال ( Face Book ,My space)راح يكونون أدواتنا الجديدة فى رحلة سؤء التعامل مع عصر المعلومات

باقى ال(Twitter),اكيد راح نلقى له أستخدام لخلق التوتر قريبا

Yin يقول...

أستغفر الله العلي العظيم
الحمدلله الذي عافانا مما ابتلى به غيرنا

صج الله لا يبلينا بالهنظرة السودا للدنيا والناس ...

يا إلهي ما هذا!!!

مسكينة رفيجتك درس لن تنساه ...
ودرس لنا بعد


بوست رائع صراحة كتبتيه بتفصيل مشوق

قواك الله

fatto يقول...

واااي الله يعينهم على مابتلاهم .. حتن انا يتني ضيقه ابصدري .. مساكين الله يفرج همهم .. الي يسمع هموم الناس تهون عليه بلوته .

على قولتج خلج على الذكريات احسلج

Nikon 8 يقول...

Daggero
شفت إشلون إنتفنن بكيفية إستعمال التكنولوجيا بطريقة ما نخطر على بال اللي إخترعها :))

Nikon 8 يقول...

Yin
أهلا بك يا ين عزيزة في دار عزيزة :))
وفعلا الدرس كان قاسي ولا خطر على بال ماجدة إنه بيصير لها هالموقف .... صج مسكينة .

Nikon 8 يقول...

fatto
إسم الله عليج من الضيقة ... وآسفة إذا الموضوع إزعجك .
أهلا بك دائما عزيزة في دار عزيزة :)

بحار مهموم يقول...

قالي مره شخص عزيز((هناك معادن كثيره تتحول وتتمحور مع مرور الزمن إلا الذهب يجور عليه الزمان فلا يؤثر فيه غيران بريقه يختفي فإذا اختفى بريقه اعاده الماء))
دوام الحال من المحال
الله يعين رفيجتج هههههههه من المضحك اني قبل فتره صادفت صديق لي ايام الابتدائي طبعا نفس الشي حاولت اقلل الروابط وياه, تمحور مع الزمن هههه

ومشكوره على الموضوع الرائع واتقبلي مروري

Nikon 8 يقول...

بحار مهموم
العفو يا بحار :)
وصدق صاحبك بمعادن الناس .... وأهلا بك عزيز في دار عزيزة :)
تواصلك يسعدنا :))

Lucifer يقول...

loooool walla mane emsadeg fee nas chethee
tara mayseer akhaf hathola mayteen

Nikon 8 يقول...

Lucifer
للأسف فيه ناس جذيه !!!
وحياك الله دوم زميل عزيز في دار عزيزة
:)