الخميس، 16 أبريل 2009

مسلسلات

بما أننا بنهاية الأسبوع فالبوست راح يكون خفيف علي وعليكم :)
بما إني من محبي ومتابعي المسلسلات التركية فعندي شوية ملاحظات تكاد تكون واحدة في كل المسلسلات :
الكل يتقن التمثيل بالذات بتوظيف تحريك ملامح الوجه ولغة العيون ... ودي أتقن لغة العيون شوي وأرتاح من الهذرة !
جمال الممثلين والممثلات المريح للعين ملفت للنظر والملابس طايره عليهم من كثر ما هي مرتبة عليهم .... رغم بساطتها ..... والسر بالرشاقة .... سمعتوا يا بعض الممثلات ؟؟؟
المكياج الناعم والبسيط والجميل بنفس الوقت .... ذكرونا بالملامح الطبيعية اللي نكاد ننساها !
جمال المناظر الطبيعية .... الله يرزقنا مثل ما رزقهم
منازلهم جميلة وشرحة .... وحوشهم وبلكوناتهم ولا أروع منها
عاملات المنزل يبردون القلب بالشغل والجمال والأناقة والعقل .... وما كو صك وحك مع راعية البيت .... وعلى كثر ما يحملون بطلات المسلسلات خارج نطاق الزواج ... بس عاملات المنزل أبدا ما يسوونها .... عكس اللي عندنا !!!
يا كثر ما يتجمعون على طاولة الأكل وياكلون .... ومع هذا ما يسمنون مع إن الحلقات تغطي فترة زمنية طويلة !!!
من يكونون في قمة أناستهم ويتراضون بعد زعل طويل .... يردون يزعلون على شي بسيط :(
البطلة من تلبس البدلة البيضاء للعرس ... ما أدري شيصير ويتفركش العرس :(
الله ما كثر إلا الإغتيالات بالرصاص والضرب العنيف ومع هذا البطل والبطلة ما يموتون !
البطلات يتميزن بالنجاح وبقوة الشخصية والريال دائما هو اللي يركض وراها ... تزعل ويراضيها ... تخانقه ويتأسف منها .... تصد عنه ويلاحقها .... تغلط عليه وحلو على قلبه ... يا بختهم :)
إندماج أمهاتنا وجداتنا مع المسلسلات التركية كبير جدا ... وذكرهم بأيام الأفلام القديمة لما كانوا يسمون مواليدهم على أسماء البطلات والأبطال .... يقولون راحت عليهم الحين وإلا جان سموا على إسم كنان ومهند وأسمر وأغلو !
عجايزهم كل وحده كبر اللقمة ومع ذلك قمة بالنشاط والطاقة والأناقة .... .. ولا وحده فيهم شكت من الضغط والسكري وإلا قالت تحتاج تبديل ركبة... أوتبي موعد للمستشفى ومو محصلة !
لوتطوفنا كم حلقة ... ما في مشكلة .... كل شي ينفهم !
ومع هذا .... الله يعافيكم من مسلسلات تركية ........ملأتم فراغ في محطاتنا .... صرنا نجلس بالبيوت لنتابع الأحداث .... ولو خرجنا نحرص على الرده قبل وقت عرض المسلسل !
وجان زين من الحين يفكرون يسوون لنا مسلسل تركي خاص لنا ليعرض برمضان بدل الإيذاء البصري والسمعي اللي نشوفه بعنوان المسلسلات خليجية والجرأة في الطرح !

هناك 18 تعليقًا:

lawyer يقول...

انا معااااااج في شي و اختلف وياج في شي


صااااااجه بسيطين و بيوتهم شرحه و حريمهم كلا يتحركون و يشتغلون و هبات ريح و البناااااات الويه زبده و اللون مرمر ...

و طول اليوم يا ياكلون جبنه و خبزه او مربي و زبده

ورياييلهم كلا سكاره فقاره ,,

ما سمعنا مره تركيه تصرخ ..


مو مثل حريمنا في المسلسلات بس تنابح جنها جلب..


بس بصراحه غزونااااااا

لحسوا عقل الامهات و اليدااااات

حريم اشكبركم مجابليين حبني و احبك و يتحلوووووون على واحد كبر اصغر حفيدهم ..

الله يرحمج يا يدتي يا للي من ادش عليج ماسكه مسبااحج و تسبحين

الحين ادش على يده رفيجتي عمرهاااا فوق 75 و مليون عله فيهاااااا قولي يالله حسسسسسسسن الخاتمه قووولي الحمدلله الذي عافانااااا

حاطه الحفيدات اليهاااااال هالمراهقااااات واتحلى على البطل و على صدر البطله المشدود
و على الخصر و على شفاااااايف مهند و على شعره


تراااااااا عييييب مصخوهااا عااد

يااااااا حب و مسخره يطريقه ماصخه يا اجرااااااام


يا معوده يجابلووووووووون هولات فجر السعيد و وطاقااااات الدراريع الي يبلسووووووووووونها و هوايلهم ابرررررررك من تفصخ هالتركيااااااات و البووووووس و التلملم و الفراش

غيروا المبااااادئ في مجتمعناااااا




الله يرحم عيالنا من هالاعلاااااام المدمر..

يا زيييييييين طفولتنا و شبابنا

خرج و لم يعد و خالتي قماشه و افلام ابيض و اسود و افواه و ارانب و يوووووووووم كبرناا جابنا خلاجين انطونيلا و كشتهاااااااا...

chandal/danchal!! يقول...

LOOOOOOOOOOOOOOOOOOOL

لأ لأ لأ... بديت أشك انج امي

:))))

انا كرهت المسلسلات التركية والسبة اندماج امي فيها... حتى مواعيد زوارة الليل تغيرت... اروح من ال 9 الى 10

لان في مسلسل على الراي الساعة 8 وفي واحد ثاني على
mbc 4
عل 10

:(

اكره المسلسلات التركية واكره حوارها

بس صاجة... بسيطين ويرفرفون من النظافة.... مو الضيم اللي عندنا

دراريع من مصممة فلانية ومكياج بالصالون الفلاني وتسريحة عند علان العلاني.... شي اييب المرض... تصدقين!!! ما شفت ولا مسلسل خليجي!! وحدي مسلسلين برمضان وغالبا يكون مصري


يا زين حياة الفهد وبساطتها... كشة منتفشة ودراريع ام جاسم بعندما تغني الزهور والفرية... بس يختج ما ودج الحلقة تخلص!


خوش بوست :)... واجازة نهاية اسبوع سعيدة

:)

esTeKaNa يقول...

صباح الخير:)

هالمسلسلات جملو الأتراك بعينا
ولا من عشره سنين في تركيا معاهم اهم فيهم جلافه ولا يفهمون ولا لغه غير التركي!
وفيهم قدر من اللقافه
لو تنزلين تربطين خيط جوتيج وانتي بكرامه ينزلون وياج ويطلون بويهج
!!
وعندهم ظاهره الخز بشكل موطبيعي
كل هذا ولما اشوف المسلسل التركي احس جنهم حلو بعيني
:))
واوافقج الراي
جمالهم مو طبيعي
يجمع بياض الغرب بدقه وملح جمال الشرق
تعرفت على الكثيرات هناك اللي فعلا ما ينصد عنهم ما شاءالله

....
خوش بوست
دمتي بخير يارب

maha يقول...

صباح الخيرات نيكون
المسلسلات التركية لاعبة في أمي لعب
مخربطة نومتها عشان إعادة الحلقات
تدرين تشوف الحلقة وإعادتها تخاف يطوفها شي
عاد تدرين في دراسة جديدة عن أكثر الشعوب رومانسية وأشملت تركيا ودول أوروبا وجنوب أفريقيا
المصيبة إن تركيا أقل نسبة بينهم الأخيرة
وجنوب أفريقيا طلعت الأولى
الدراسة موجودة جوجل نول

شهرزاد يقول...

و الله عندك حق و اللي معلقنا بهالمسلسلات افتقادنا للاشياء اللي ذكرتيها بمجتمعاتنا العربية وحتى بمسلسلاتنا بقت كلها نكد و مشاكل أو اجرام و قتل و ما في رومانسية بالمرة.. ربنا يهديلنا ازواجنا و يتعلموا شوية... دة غير المكياج اللي بالكيلو طبقات طبقات حتى لو صاحيين من النوم.... و اللي عاجبني في مسلسلاتهم اكثر انهم نشطوا السياحة عندهم بالمناظر الطبيعية و الاماكن الجميلة اللي بيعرضوها يوميا لما شوقونا لزيارة تركيا..

الحــــر يقول...

السلام يا عزيزة الدار..
طبعاً ما ذكرتيه من أحداث تدور في مجنمعنا فهذا شي لا يختلف عليه أحد ولكن دعونا نفكر معاً ما هي آثار هذه المسلسلات على المجتمع وخصوصا المراهقين الذين هم في مرحله حرجه من العمر وبحاجة إلى توجيه ومراقبه لعدم الانحراف الاخلاقي والفكري فيجب عند رؤية المسلسلات عدم النظر للقصه الغراميه المشوقه وحسب وانما يجب معرفة الانطباعات التي سيأخذها المشاهد من هذه القصه وهذا للأسف الشي الي يغفل عنه الكثيرين
اترك المراقبه لكم خصوصا المراهقين الذين يرون الابطال بصوره غير التي نراها فأي عمل يقومون به هو الصواب فمثلا حمل "لميس" من "يحيى "في سنوات الضياع كان المشاهد يراه وكأن الحادثه بسيطه لا واكثر من ذلك كان يتمنى ان يعلم البطل ان هذا الولد منه وإلى أخره من القصه..
فما الذي ستكتسبه البنت المراهقه من هذه النقطه مثلا بالقصه؟
ان الحب ليس حراماً؟
وانها باعت نفسها لشخص تحبه وهو يحبها وبالنهايه سيتزوجان مثل بطلين المسلسل ؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
علامات استفهام كثيره لو دققنا بما تحمله هذه المسلسلات من فكر صار يصل للمشاهد ويختزل فيه اختزالا دون ان يشعر والخوف من المستقبل كبيـــــر
:(
شكرا

Hashemy يقول...

ذكرونا بالملامح الطبيعية اللي نكاد ننساها !

اي والله صدقتي نسينا هالملامح من كثر الالوان

وفعلا المسلسلات التركيه اتت باسلوب جديد وجميل وشدت شريحه كبيره من المشاهدين

Yin مدام يقول...

ما أقدر أعلق لأني لم أشاهد أي مسلسل تركي عدا بعض المقاطع أثناء زياراتي للأقارب وما عجبوني

بس طرح جميل
أؤيد وجهة النظر بالنسبة لمسلسلات شهر رمضان "مأساة بصراحة"

ولكن بالنسبة للمسلسلات التركية فلم أحبذ الإنتشار الواسع لها بين كل الأعمار والتأثير الذي ستخلفه على عقول الصغيرات

والأخت لوير هم صاجة
والله من الأقارب ناس ما تطلع ولا تستقبل أحد ولا تسولف وقت المسلسل أبد ولا فهمت تصرفهم إلى اليوم
شدعوة !!!!
عفية لميس وما أدري شاسم الثانيين اللي خذت عقول وقلوب الناس !!


أتمنى لك نهاية أسبوع سعيدة بكل نواحيها
وجمعة مباركة مقدما إن شاءالله
:))

مهرة سالم يقول...

السلام عليكم....
هههههه
عسل ...
صج هم أبداما يمتنون وكل ما كبرو حلوو بزياده...
......
هههه
تتوقعين حد بيسمي ولد أوغلو ...
ههه إيسونها صراحه...
......
وكلامج صح ميه بالميه بالنسبه لمسلسلات الخليج والممثلات ..
...
دمتِ بخير

um_alzain يقول...

عزيزتي nikon8


وجان زين من الحين يفكرون يسوون لنا مسلسل تركي خاص لنا ليعرض في رمضان بدل الايذاء البصري والسمعي اللي نشوفه بعنوان المسلسلات خليجية والجرأة في الطرح !

انا اوافقك الراي
ولكن بشرط مانبي طواله
ياريت فعلا ويرحمونا من سخافة مسلسلات رمضان

fatto يقول...

على قولتج البطل لايموت :)

الي عندنا اذا مالطخو ابهالمكياج وذا مالبسو هشك بشك مايعرفون يمثلون .. ياحلو الوحده البسيطه والطبيعيه

استمتعي بالويك اند :)

Paris يقول...

المسلسلات التركيه لاعبه بعقول الناس لعب و ليعاذ بالله..

اهني عندنا بالبحرين سوو دراسه اكثر بنات ينولدون يسمونهم نور و لميس و الصبيان يحيى و مهند

شدعوه كل هذا عشان هالمسلسلات !!

و فيها تاثير كبير ع الناس من الجانب الاخلاقي و التربوي

كل بنت الحين تبي ولد مثل مهند و مثل يحيى مادري شفيهم عليهم

و صاجه ع كل الي قلتيه ع البساطه و المكياج الخفيف انا الحين ما اتابع مسلسلات العربيه احس فقدت رونقها مو مثل قبل
قبل كانت المسلسلات احلى الحين احسهم حتى لو ما فيهم شي يحاولون يقلدون الغرب و كلها قصصهم مالها معنى و لا داعي ..

@alhaidar يقول...

حرام عليج ..

تقارنين جكر التاركيات بجمال شيماء علي ورشاقة إلهام الفضالة ؟

لا هذي ما حبيتها منج أخيتي .. راجعي حساباتج ;p

وبعدين من قال ممثلاتنا مو بسطين .. بالعكس جدا طبيعيات .. يقعدون من النوم بويههم كيلوين مكياج .. واقعية ;p

بوست جميل بس حبيت اتحرش :)

Sn3a يقول...

ماجذبني الا سنوات الضياع
اما الباجي اشوفهم لان ماكو شي بالتلفزيون

صاجه هدومهم مو حلوة بس مرتبه وويهم مبين
وماعندهم ان الغني لازم مدمن والفقيره لازم رايحه فيها

واهم شي كلمن يتأوص بالمسدس
بس ناقص يأوصون المخرج بالغلط

Mr_CHoCoLaTe يقول...

بعيداً عن هذا الموضوع و الموضوع السياسي اللي قبله

حبيت اشكرج على المواضيع الباجي اللي طافتني وااايد حلوه و يعطيج العافيه

وايد استمتعت بقرائتها

و ان شاءالله ما اقطع و اظل متابع

مع السلامه

Q8EL5AIR يقول...

والله قاعدتلهم قعدة :)

عيل وحده توهه قاعدة من النوم وبويهه مكياج !!

بالله وين صارت هذي !!

انزين مثلو صح مايصير جذي !!!







وتحياتي ...
ويسلموااااااااااااااااااااا :)

Super Woman يقول...

تبين تلعبين معانا ؟؟

http://shlalat.blogspot.com/2009/04/find-treasure-game.html


عطيني خبر مبجر عشان ادخلج
قبل الليل

ساره النومس يقول...

شوف تقرير لوووووووول

بس انا ماحب المسلسلات التركية