الأحد، 19 أبريل 2009

هواش خدام

هل معارك خدم المنازل مع بعضهم البعض أمر ضروري وطبيعي وينبغي الإنتباه له ؟؟؟
صديقتي نصحتني بأن لا أتدخل بأي هوشة للخدم لأن هذا هو نمط حياتهم في بلدهم ... ووضع طبيعي جدا إن معاركهم توصل للسما ويتصافون بعدها بلحظات ....... وفوق هذا يدافعون عن بعضم البعض ( وقت طمطمة الخمال ) ولا كأن هوشتهم مع بعض ما مر عليها إلا ساعات قليلة !
أما صديقتي الثانية فأمها تلجأ لوسيلة إشعال الفتنة بين الخدم عمدا بين فترة والثانية وعلى أسباب تافهة مثل فلانة قالت عنج كذا وكذا وتقول للثانية ترى جاءت لي فلانة وتشكي منك إنك قلتي عنها جذاك !!!
وطبيعي بعدها تشب الهوشة بينهم بثواني !
والسبب إنها ترى إن المعارك والصراخ بين الخدم وسيلة جيدة للتنفيس عن مشاعرهم المكبوته بسبب الغربة ومشاكلها !
وبعد تفريغ شحنات الغضب والإنفعالات السيئة من أجسادهم .....تصفى نفسياتهم وترتاح وتكون قابليتهم للعمل أفضل !!!
وسبب آخر تعلنه أم صديقتي للمقربين لها واللي تعزهم فقط ... وهو إن إشعال الفتنة بين الخدم يخليهم يطلعون ( الخنين والخايس ) وتعرف كل الأسرار الخافية عليها لما يفضحون بعضهم البعض !!!
وعليها فقط التفرج والتصرف فيما بعد :)
ولا تقبل أي وجهة نظر معارضة لأسلوبها المتبع مع الخدم .... وعذرها .... حتى لا يتعاونون عليها ويعملون أشياء في بيتها من وراء ظهرها وهي غافلة !!!
شخصيا أتبع نصيحة صديقتي بعدم التدخل بمشاكل الخدم .... أما طريقة أم صديقتي فما تتناسب مع شخصيتي .... لأني ما أعرف أفتن أصلا ... غير إني شايفة روحي أكبر من هالتصرف :(
الغريب إني من أستغرب من موقف أو أستهجن من تصرف حتى لو بيني وبين نفسي ألقى نفسي أطيح بنفس المواقف بطريقة تجعلني أبرر لغيري تصرفهم الغريب من وجهة نظري !!!
بطبعي أنا متساهلة مع الخدم .... ومع هذا يبدو أن خدم منزلي يطمحون للمزيد من ( تغمض العين ) !
زوجي دائما يقف بجانب الخدم ضدي ...... وأمامهم ! ...... وينصرهم علي ! ..... ويلومني جدامهم ! ...... ودائما يقول لا تصيرين حاره عليهم !!!
والخادمة من تشوف مناصرة زوجي العزيز لها تتفنن في التمثيل وكسر الخاطر وإدعاء المرض والإدعاء علي بالقسوة عليها وكثرة الشغل !
فصاروا إذا بغوا شي أو الشكوى علي وقفوا ( لبابا ) عند باب البيت الخارجي ( حتى ما أشوفهم ) قبل لا يطلع وتشكوا له !!!
وطبعا كل شي يبونه يصير ... وغصبن علي بعد !!!
بعد زعلة ( جايدة ) مني .... إقتنع زوجي بأن الخدم سبب رئيسي لمشاكلنا وزرع الشقاق بيننا .... وما رضيت إلا بعد ما ( حلف يمين ) بعدم التدخل بمشاكل الخدم وترك هذا الأمر بالكامل لي :))
كنا متجمعين أنا وزوجي والعيال أمام التلفزيون نتعشى قبل موعد نوم الصغار .... الوضع كان طبيعي :)
وصل لمسامعنا أصوات خناق الخدم وبالعربي المكسر لأنهما من جنسيات مختلفة !!!
نظر لي زوجي ورديت عليه بنظره قاسية ( إستغربت كيف إطلعت مني ! ) تعني لا تتدخل !!!
صوت ميري تهدد سوما : أنا يقول حق ماما ... إنتي واحد حماره .... واجد خراب !
سوما : أنا خراب .... أنا حماره ؟ ... أنا يقول حق ماما إنت شنو يسوي ؟
لحظات وإذا بميري وسوما أمامنا وكل وحده تتوعد بفضح الأخرى :\
سوما : تبي أنا يقول حق ماما إنتي يجيب هذا نفر بنغالي ينام في غرفة مال إحنا ثلاثة يوم ؟
ميري بغضب : جدابة ؟
سوما : إنتي جدابة .... ( تلتفت علي وتوجه كلامها لي ) ماما إنتي سافر عمرة ميري يجيب نفر بنغالي درايفر ( سايق ) ماما نوال !
ميري : ماما سوما كله ياخذ باجي فلوس مال أغراض جمعية ويقول حق إنتي فلوس ضاع ... ماكو خرده .... طار بالهوا .... ( ميري تهز راسها دليل على إنتصارها )
سوما ترد على النصر بضربة مباغتة : ماما ميري سوي هبي بس ... بس ( صوت بوس وقبلات ) مع كله نفر سيارة زبالة كل يوم فجر ! وهذا نفر يعطي فلوس ... هذا وحده هبي يعطي ربع دينار !!!
حمى الجدال وتسارعت وتيرة الهواش !
ميري : ماما سوما ياخذ فلوس من جنطة ماما كبيرة لولوه !!! ( تعني خالتي أم زوجي )
سوما : جدابة ماما .... ميري يروح بقالة أكو نفر مو زين يسوي جذيه ( وتعمل حركة تعني لمس وفقص النهدين !!! ) وبعدين هذا نفر يعطي ميري كرت موبايل أثنين دينار فري ( مجانا ) !
ميري : ماما إنتي ماكو يصدق هذي جدابه .... سوما ياخذ فلوس واجد مال عيد مال بابا !!!
سوما : ماما والله والله ... أنا ماكو لسان إنشاء الله ...... ميري يقول حق راجو مال بيت نيبر ( صبي الجيران ) إنت سوي أنا بكجر ( صورة ) وأنا يسوي جذيه ( تعمل حركة إغراء وهي تبرز مفاتنها ) وياخذ فلوس من راجو .
ميري : ماما إنتي يسأل سوما ... وين سلسلة ذهب مال بنتي سونه .... هذا سوما بوقي .... وياخذ عيش وحليب وزيت مال إنته وبيعيه حق نفرات ....... ويطبخ حق نفرات من إنت أكل ماما !
سوما وهي تصرخ بقوة : ماما لا يصدق .... والله أنا يقول الحين كلام واجد قوي ... ميري يمشي جدام نفر هندي صلحي حمام ( سمكري ) وهي يسوي جذيه ( تهز وترج مؤخرتها ) والحين هذا نفر هندي داخل غرفة مال إحنا !!!
إنعقد لساني من قوة الأهوال اللي أسمعها .... أنزلت رأسي ووضعت يداي الأثنين على رأسي !
عيالي تركوا الأكل ومتابعة التلفزيون وتحولوا لمتابعة الهوشة بذهول وإنتباه ينقلون نظراتهم من سوما إلى ميري .... أصوات شهقاتهم في كل مرة يسمعون فيها كلمة ( عيب ) مع سد أفواههم بأيديهم الصغيرة وفتح عيونهم على الآخر من قوة ( العيب ) اللي سمعوه !!!
منظري المنصدم والمنهار في آن واحد ..... ومنظر مباراة الفضايح بين خادمتي .... وجو الإثارة المخزي والجديد بالنسبة للصغار ... جعل زوجي يتجاهل نظرة التهديد اللي حصلها مني قبل دقائق لأنه خشي على العيال من سماع المزيد من الفضايح وبالذات فضايح ميري ( الفصعة ) بعد أن بدأت سوما بالتعمق في فضح أفعالها !!!
تدخل زوجي بحزم لإسكاتهما ( وبيني وبين نفسي كنت ممتنة له هذا التدخل ) وحبس الضيف الغير مرغوب به بغرفة الخدم لحين مجيء رجال الشرطة لأخذ ( البواقة والبارع ) والضيف قبلهم !!
والغريب في الموضوع .... ومن قواة العين إن البارع ميري متصلة علي من المخفر وتقول لي : ماما الله يخليج .... أنا أكو مية وخمسين دينار في غرفة مال أنا .... الله يخليج إنت لا ياخذ فلوس مال أنا !!!
ما كأن الفلوس هي من مكدة أعمال ( الفهارة ) !!!
ولا كأنها سوت شي غلط ولازم تعتذر لنا عن أفعالها !!!
والغريب أكثر إنها كانت تتصنع الثقل أمامي .... وتحكي لي قصصها كيف تنهر الرجال وتصدهم ! ...... وأنا بقلبي كنت مسرورة من ثقلها !
معقولة إن كلامها طلع بس علشان تبعد الشبهات عن نفسها وتحصل على ثقتي ؟؟؟
وهل يفترض بي أن أكون حارسه على أخلاقها ومراقبة لتصرفاتها ؟
عساني أربي عيالي وأراقب حلالي ( زوجي !!! ) من باب عينك على حلالك دوا :) و يا حلوه من دوا :))
أما البواقة فكل شي بخاطرها من فلوس وغيره مخبأ بطرق جهنمية ومرتب وجاهز للشحن لبلدها !
ومتصلة أيضا تخبرني بأنها سترسل شخص من طرفها لأخذ أغراضها ( اللي هي أغراضنا المسروقة ! )
كنت أعلم بأن يدها خفيفة .... ولكني قلت لماذا أقطع رزقها ؟ لأتحرص أنا أكثر على ما أملك في بيتي .... ومع الوقت راح تحس وتستحي وتبطل بوق ! .... ولكني طلعت غلطانه لأن هناك حالات ما فيها علاج ولا ينفع معها طب !
أما الضيف الهندي سمكري الجمعية فإتضح إنه ومن قبل قوله الله أكبر يترك عمله ويتجة للمسجد للصلاة !!!
ثقة المسؤولين به كبيرة بسبب خوفه الظاهري من الله وإلتزامه بالصلاة ..... وبسبب شطارته جاء مسؤوله إلى المخفر ليدافع عنه ويقول إنه أشرف من الشرف وخادمتنا هي سبب في غوايتة !!!
مع إن السمكري إعترف بأنه يتنقل ليلا بين بيوت المنطقة التي يزورها صباحا ويلمس تجاوبا من خادمات المنزل !!!
صبي الجيران راجو أيضا وقفوا معازيبه معه ودافعوا عنه ..... ولامونا كثيرا لإيصالنا الموضوع للشرطة .... فمن أين سيأتون بصبي بديل الآن ومتعلم عليهم ومتعلمين عليه وعارف شغل بيتهم وقايم بديوانيتهم ؟؟
أما سايق ماما نوال ففص ملح وذاب ....ونوال فشلانه منا ... وبنفس الوقت ضاق خلقها على سايقها ولو بإسلوب غير علني حرصا على مشاعرنا !!!
بعد هدوء السالفة وتسفير الخادمتين سألني زوجي العزيز بفخر وتيه بنفسه : إشرايج فيني ؟ شفتي إشلون ريلج يتصرف وقت الشدايد ؟
أنا من كل قلبي : الله لا يحرمني منك يا راعي بيتي ما كنت أدري شسوي بدونك ؟!
وإبتسمت وأنا أكمل : عليك صيام ثلاثة أيام .... ناسي إنك حالف جدامي ما تتدخل بمشاكل الخدم ؟؟؟؟


(( زوار مدونتي الأعزاء : ترددت كثيرا قبل نشر هذا البوست ... وأعتذر عن أي كلمة سببت لكم الصدمة أو خدشت حياؤكم .... فوالله نقلت الحدث لكم بأبسط الكلمات وحاولت تخفيفه قدر الإمكان .... لأن ما حدث بالفعل كان أفظع مما نقلته لكم .... والله يكافينا شر من آويناهم منازلنا وعاملناهم برفق ولين وإنسانية .... وكافئونا بالإساءة إلينا وإنتهاك حرمة منازلنا !!!
وعفيه عين عليهم ما تنكسر من فعل الخير والطيب معهم ؟؟؟؟؟
وما أقول إلا الله يذكرج بالخير يا أم صديقتي .... كانت لج وجهة نظر .... إستنكرت تصرفك وقال ربي أوريج .... لو متبعة نصيحتك ما صار لي اللي صار !!! ))

هناك 35 تعليقًا:

Sweet Revenge يقول...

السلام عليكم شلونج نيكون
اول شي عسي ارتحتي :)
لان الكتابة تساعد الواحد يطلع الي بداخله
الحمد لله انج كشفتيهم قبل لا تصير مشاكل اكبر
مثل ما قلتي عينك علي حلالك دوا ما اقصد انج مقصره لاسمح الله بس الحرص واجب
ما ارح اعور ر اسج بكلام وايد بس الفئات هذي او العماله المنزلية محتاجين اوامر كثيرة ومراقبة كاملة ودعم معنوي قليل يعني التساهل مايصلح لهم خلج حقانية معاهم بس حازمة
والله الحافظ .

Deema يقول...

ذكرتيني في حميد طباخنا، يشكي على أمي إن الصبي الجديد ما يخليه يخم

و ذاك مسيكين على بو يحترمه يخم عنه

Hashemy يقول...

ويقولون شلون تصير الجرايم والمصايب بالبيوت كله من هالخدم واللي يدخلونهم

جزاء الاحسان مو دايما يبين بعين الناس

والله يعينج ماتنلامين على كل اللي قلتيه من حرتج

بس كان افضل ان من اول ماتكلمو وحسيتي السالفه جايده توخرون اليهال عشان لايسمعون كلام جذي

يعطيج العافيه

نون النساء يقول...

واااااااااي أنا استحيت من سوالفهم x_X


يمه يمه يمه يمه منهم
وحده سلاطة لسان والثانيه منفهره ..ماكو حيا ..


ترا الخدم الله يستر منهم ومن فعايلهم
أمبيييه اتذكرت سوّاق سيايير الفريج لما نادو خدامة رفيجة امي وبيعطونها فلوس ويقولون لها: احنا خمسه نفر x_X





أنا مع ام صديقتك
صج الطريقة أخلاقها اشويه :P~ بس
على قولتج تكشفلك الخنين والشين

I7na 3shagnaha يقول...

بل بل بل

الله يعينج عليهم و على فرقاهم بعد

تعالي الحين ييبي و ودي من هالمكاتب

والله احنا مع هالخدم حالة كسيفة

تبين نصيحة من وحدة مجربة

وحدي الجنسية, تفتكين من اللقوة و الهواش

و يا حبذا لو يكون الستاف كلة فلبيني

شحليلهم .. ادب و نظافة

و خليهم يطلعون مرة بالشهر .. لان اخلاقهم لهم

على ما قلتي نجابلهم و الا نجابل اليهال

Hasan.B يقول...

Wala el khadam mesaken. Yemkin mo hathail bes aghlabhum

NewQ8 Bride يقول...

وااااي ما تدرين شكثر مت من الضحك و الله قاعده اتخيل الحوار مع الأشكال

واي هوشات الخدم ابداع

بس انا عندي عادي انشالله يتذابحون بس اهم شي يخلصون شغلي :) و زوجي عاد ابو البرود حده ماله شغل بالخدم يحرني مرات


احب اسلوبج و احب كتاباتج

غير معرف يقول...

الله يعينكم على الخدم

عندى بس طباخ وسايق وصبيان

الطباخ والسايق ياخذون اجازتهم من الخميس بالليل ويرجعون يوم الجمعة العصر , يطلعون كل طاقتهم بره البيت
والصبيان يوم الاحد

لا للحريم فى بيتى

بنتى تغسل هدومها وهدومى , والصبيان لأولادى الشباب وابو العيال

وخلاص على كده

بنت الشاميه يقول...

الله يعينج....مشاكلهم ما تخلص
وكل بيت نوعية مشاكل الخدم عنده تختلف عن غيره

انا شريت راسي من زمااااان
انا ماحب كثره الخدم الحريم بالبيت
وحده وبس كاااافي علي
لانهم هم اللى كله يتخانقون وعلى راسي
والشغل اللى تسويه الثنتين تخلصه وحده بروحها وهي مرتاحه وانا مرتاحه
بس اعلمج ايدي بايدهاااااااااا
طول الوقت...واللى ما يخلص اليوم يخلص باجر.....!!!ء
انما الخدم الريايل حتى لو يتخانقون بره بالملحق
ماااا ادري عنهم....لووووول

والعتب مرفوع عنج لان لازم توعين الاخرين عنهم
لان سوااااياهم تفشل

الله يعينج.....ومااااقصر ابو العيال على مواقفه المشرفه لفك الاشتباك بينهم....له تحيه خاصه
: )

lawyer يقول...

الله يااااخذهم هالخدم محلوووووين بيوت الحمايل بيوووت دعاره و احنا ماندري


انا في الي البيت مسميييييني مكافحه الجريمه الجنسيه بس هم ما تلحقيييييييين

موديلي كلا حيااااتي كبساااااات


اتضحلي ان رئيس العصااابه طباخنا و لكن ابووووووووي لو شنو ما ستغنى عنه

فمانقدر نقوول شي





الله ياااااااخذ العدو خدممممممج يخرعووووون

يصرعووووووووون


يما من بلاوييييهم
اهو بووووق و اهووووو بلاوي و اهووووو خياااس


شي شي شي شي

صاااااجه والله يشيبون الراس ..




انا اتبع نظريه ام رفيجتج فرق تسد

سـهـيـر زكــي يقول...

عزيزتي نيكون

إحنا ما عندناش شغالة لأننا بالأساس متعودين نعمل كل حاجة بالبيت بنفسينا, بس ليّ صاحبة عنديهم شغالتين بالبيت ومن جنسيتين مختلفتين وبرضه ديانتين مختلفتين

لما سألتها ليه ما جبتوش الإتنين من نوعية واحدة, على الاقل يونّسوا بعضيهم وما يحسّوش بالغربة, عارفة قالت لي إيه؟

قالت: عشان لو جه في يوم وحدة منهم عملت حاجة مش كويّسة من ورا ظهر اصحاب البيت, تروح التانية تفتن عليها

يخرب بيتها, دي ب تستعمل معاهم نظرية فرّق تسد

:)

Daddy's Girl يقول...

وااااااااااااي

ضحكت ضحك!!!! شهالهوايل؟!؟!؟!!؟

أنا وحدة مقاطعة الخدم و لا أبي أي خدامة تدش بيتي!!!!

أذكر مرة أيام ما كنت في بيت أبوي، قاعدة توووووووووني راجعة البيت من الجامعة من فجر الله لين الخمس أكرف من لاب لين لاب.... توني قاعدة باكل لقمة اليوم و بروحي بالبيت و لا صراااااااااخ

جان أيون الخدامتين و يتهاوشون جدامي يعني أنا المحكم

و انا مالييييي خلق عيني على الأكل لا يبرد

إلا يتطور الوضع و يتكافخون على راسي!!!!

و للأسف على ما فاككتهم و لعبت وياهم لص ملك جلاد و طردت وحدة فوق و خليت وحدة عندي تبكي، إلا الأكل برد و أعصابي تعبت و أخترب اليوم!!!!

Yin مدام يقول...

ما هذا !!!!!!!!!!!
واخزيتاه
وجدام ريلج واليهال ؟!؟!؟؟! يا لهوي
قواة عين !!

المهم كتبتي وفضفتي وإن شاءالله ارتحتي

مشاكلهم ما تخلص
أنا آخذها من قاصرها أي حركة مني ولا مني رادتها المكتب وأتحمل الشغل وإن طحت على وحدة سنعة أغريها بالبقاء وما أقصر
هذا غير محاضرة أول يوم
هم بشر حالهم حالنا فيهم الزين وفيهم الشين بس هالثنائي اللي عندج بدع صراحة !!

وزوجك ما قصر تدخل أخيرا وأحسن التصرف

صام الثلاث أيام ولا بعد.؟؟
لوول

الله يرزقك بخادمة تكون لك عون لا فرعون :))

enter-q8 يقول...

دوختهم ودوخه بس والدة صديقتك صاجه
تخيلي الثنتين من جنسية مختلفه تعالي شوفي الشغل و الاهتمام بس تعالي اخذي حنه و ودوخه من هذي و هذي
ريحت راسي و جبت ثنتين من نفس الجنسية و اخلى المره اهي تتعامل معاهم و تخوفهم فيني
يعني تقدرين تقولين انا القوات الخاصة حق الفرعيات

Cr8ivia يقول...

yumma hathool chaydeen !!!!

Allah eykafeena weykafeekum ilshar!

fatto يقول...

لألألألألأ ماصدق الحوار الخطير امبيه
ميري اطلعت موهينه.. هذي الظاهر يايه بالغلط عندكم صدقيني هذي مكانها
( ابملهى او ديسكو )
حددها فصصصصعه لووووول

الزين يقول...

وه وه وه

حسبي الله وهو الكافي


يعلهم الويعه يختج مالنا غناة عنهم ولا نقدر نعيش وياهم


انزين شنسوي


والله انا لو يسوون هالدحرة جدام عيالي

بالملاس على روسهم


خدمنا من يسمعون حسي راده من الدوام

صار حجيهم بهمس يدرون فيني ما احب اللغوة

ومن انزر وحده فيهم تراكضوا الباجيين

حسبي الله عليهم ما يبي لهم الا الشده


ما ينعطون وي




بس خداماتج انتي طلعوا فيلم

:$

غير معرف يقول...

بالعكس ، لازم تثبتين على موقفج وتعاملينهم بأنسانية ،لأن كل بني آدم تعرف أخلاقه الحقيقية من تصرفه مع من هم أضعف منه أو مسئول عنهم ، لأن باقي معاملاته تتحكم فيها المجاملة والخوف الكفائة .... خلج على أخلاقج مع الجميع ، وعامليهم بذوق وانسانية مع الخدم خاصة والموظفين عندج ...

المرسل : واحد مجرب

ANGEL HEART يقول...

لووول مايستحون ال2 عيل الثانيه تمثل وتشرح جدام زوجج واليهال @@
المشكله انه اهما بشر ومتغربين يعني الواحد ملزوم يعاملهم بالحسنى بس وايد مايبين بعينهم عيل تاليتها بايقه كل اغراضكم

واي الله يعين والله شر لابد منه احنا متعودين عالسايق وتعذبنا وياهم اكثر الشغاله امي ماتحبها وبس حق التنظيف والترتيب عشان جذي مفتكين من الهواش وعوار الراس وانا اشجع انه يكون في شغالات نص يوم بس هم يخرعون

عبدالرحمن يقول...

اسمحيلي باني قهقهت على الضحك

رغم ان الحدث مو هين الا اني تخيلت الموقف

وخليتيني اتذكر الخدم في بيتنا اللي امي مدلعتهم اكثر مننا احنا ياعيالها

الله يستر شيسون من ورا الحجيه


بس صج ترا قطعتي ارزاق العالم وسويتي بلبله
البنقالي ما الجمعيه راح وسايق نوال راح وسايق جيرانكم كان بيلحقهم

من بقا بالمنطقه

الله يخليلج زوجج وعيالج ويحفظهم من كل بارع وفصعه

um_alzain يقول...

مساك الله بالخير عزيزتي nikon8
الخدم شر لابد منه
ياما شفنا وسمعنا مثل هل امور وبنشوف
مايتوبون ولا يحرمون من عمايلهم الوصخه

المهم اعيالج عسى ينسون المشاهد الي شافوها من وصف وتفاصيل الله يغربلهم ولا استحو من الاطفال وابوهم

الله يكون بعونج

ريــــــانــه الـعـــــود يقول...

وااااااااي الله يعين عيالج :(

مساكين لا يتعقدون من هالميانين

والله قلبي عورني وانا اقرا خرابهم

ما خذينا منهم غير هالسوالف الخايسة

انا ان شاء الله ما راح ادخل الخدم بيتي

عاد هذي النية p:

الله يحفظنا ويكفينا شرهم :)

حياتي هدف مو عبث يقول...

الله يعينج
خالتي كان عندها ثنتين من اثيوبيا
يمه يمه يخرعووون تهاوشوا
ولا يطلعون فضاايح بعض
كلام كبير واايد واشياء محد يتوقعها
ووقاحة مو طبيعية
فخالتي خلتهم ثنتيتهم يولون
ويبت وحدة بس وارتاحت
والحمدلله إن أمي ما تواطن الخدم
ولا تبلعهم أصلاً ..
ويدتي فقط عندها خدامة عشان لي احتاجت شي واحنا طالعين ولا نايمين
عاد الحين خايفين منها عندها سوالف
بس انا وخالتي بنسوي لها كمين هاهاهاها
حسيت نفسي مجرمة بس ما يصير نتهمها بشي مو متأكدين منه
الله يستر بس
وديربالج على عيالج ربي يحفظهم ويخليهم لكم :*

Manal يقول...

باختصار

شديد

الله يساعد كلالي ما يقدرون يستغنون عن الخدم

بالنسبة لي

رافعة شعار

لا الف لا للخدم

ولله الحمد

chandal/danchal!! يقول...

تصدقين قريت اسم الموضوع من امس واصد عنه

بس من كثر ما احب طريقة كتابتك تشجعت وقريته

كان الله بعونك

اذا عيالك حليوين وشايلين عمرهم وما عندج بيبي بالبيت... فا يا زين البيت بدونهم

قطيعة تقطعهم اللي كانوا عندج... والله انهم يطيرون بركة البيت!


مو الكل... حرام في طيبين ويبون الستر ولقمة بالحلال والواحد والله ماخذ فيهم ويه الله

انشاءالله تييج اللي احسن منهم... انصح باستقدام عمالة فلبينية

ومالج شغل باللي يعلمك شلون تتعاملين معاهم

راقية بكل شي واكيد تراعين ربك فيهم وما تحملينهم فوق طاقتهم... وسالفة فرق تسُد ما وراها فايدة... هذي حق الناس الفاضية!

ويا رب يعطيج خيرهم وخير ما اتوا به ويكفيج شرهم

Ducati يقول...

بسراحة الأكسن الي يصير هالأيام نتعلم منه

بس شنو خطوتج اليايه هل راح اتييبين خدم و تتبعين معاهم نفس الإسلوب ولا في تغيير ؟

:)

Daggero يقول...

Nikon 8

باقى كم سنة واليابانين راح يظبطون صناعة الروبوت لخدمة البيت

السبب فى أهتمامهم بالموضوع لأن الشعب اليابانى أعداد وأعمار الشياب والعجائز عندهم فى تزايد بينما أعداد الشباب والبالغين فى تناقص فما فى أحد يدير باله على الشياب مستقبلا

والحل هو الروبوت اللى يخم ويغسل ويحمم المعازيب وحتى يشيلهم الى الفراش ويناغيهم علشان ينامون

وهذا الكلام صحيح و فى رحلة رئيس الوزراء اليابانى الى التشيك خذوا الروبوت (أسيمو) معهم فى الوفد وغنى ورقص بالشيكى وهذا فى أحتفال بكاتب شيكى اللى أخترع كلمة روبوت

ونحن فى الأنتظار

Nikon 8 يقول...

Sweet Revenge
الحمد الله أنا الحين وايد أحسن ... شكرا :)
الحزم والأوامر ضرورية مع الكل بس أحيانا يكسرون خاطري وأقول مساكين في غربة !


:::::::::::

Deema
على فكرة يا ديمة ... غرمهم يتسلطون على بعض ... ما أدري ليش ؟؟؟


::::::::::::::


Hashemy

ما تتصور سرعة تطور الأحداث ... لولا تدخل زوجي جان ما أدري شيصير ؟؟؟


::::::::::

نون النساء

يا نون عيل لو شايفة الموقف حي على الهواء مباشرة جان شي يصير فيج ؟؟؟
ما أقول إلا الله يعطينا خيرهم ويكافينا شرهم .


:::::::::::


I7na 3shagnaha

راح أجرب نصيحتج .... شكرا بحراره :)


::::::::::::

Hasan.B
أخي الكريم
ما تتخيل إشكثر أتعاطف مع الخدم بسبب وصايا الرسول عليه الصلاة والسلام عليهم :)

Nikon 8 يقول...

New Bride
حبتج العافية يا عزيزتي :)
من كثر أهوال الموقف أنا فعلا قمت أضحك ... وشر البلية ما يضحك ... بس مو جدام اليهال :)

:::::::::::::

غير معرف
معاج وجهة نظر .... بس أنا أخاف من الريال في البيت لحد الحين ما تعلمت إن يكون عندي عامل في البيت
وحياج الله عزيزة في دار عزيزة :)


:::::::::::

بنت الشاميه

تحيتج وصلت لأبونا .... حده متشقق ويقول عسى صرت بطل بنظر القراء؟؟؟
:)

:::::::::::

lawyer
رئيس العصابة موجود في كل بيت
والكارثة محد يرضى عليه ... ودايما يقولون هو ماله شغل كله من الحريم لعبوا بعقله ؟؟؟؟
عندنا وعندج خير :)

::::::::::::

سـهـيـر زكــي

نظرية فرق تسد صحيحة وإلا ما كانت مستمرة لحد الآن :)
وأهلا بعودتك مرة أخرى للتدوين :))

:::::::::::

Nikon 8 يقول...

Daddy's Girl
لووووووووووووووول خوش موقف :)
الخدم أحيانا ما نقدر نستغني عنهم ... متطلبات الحياة كثيرة ونحتاج لمساعدة :)


::::::::::::

Yin مدام
الحمدالله إرتحت الحين :)
أما الصيام فزوجي صام يومين وسألني ما في تخفيف عقوبة إذا نيتي كانت سليمة ؟
قلت له لا ما في واليوم الثالث عليك يعني عليك :)


:::::::::


Enter-Q8

لوووووووووووووووول شكله زوجي بعد بيصير مثلك قوات خاصة للفرعيات:)

Nikon 8 يقول...

Cr8ivia

أشوه إنهم تفاتنوا وإلا ما كنا ندري عنهم؟؟؟
تدرين إن سبب الهوشة كان نص دينار !!


::::::::::

fatto

الله يسامحها ميري حدها إصدمتني !!!


::::::::::

الزين

لولا هوشتهم ما كنت دريت عن خمالهم
ربج لي بغى يفضح .


:::::::::::

واحد مجرب

شكرا على النصايح الرقيقة
وراح ألتزم بكلماتك وما أخلي التجربة السيئة تخرب من أطباعي
ومع ذلك فالحذر واجب فعندي أطفال أخاف عليهم وعندي زوج أيضا أخاف عليه :)

:::::::::

ANGEL HEART

وإنتي الصاجة في كل كلمة قلتيها :)
وجان زين يطبق نظام خدم بنص دوام :)

Nikon 8 يقول...

عبدالرحمن
شكرا يا عبدالرحمن على الدعاء لي ولزوجي :)
وإشدعوة عاد إنقطعت أرزاق اللي قلت عنهم ... لا زالوا موجودين ما عدا سايق ماما نوال ...ولو بطلع الحين فأكيد راح ترجعه عندها وتسامحه :))


::::::::

um_alzain

تصدقين يا أم الزين إن اليهال وايد مبهورين وقصوا القصة على يهال المدرسة بس أشوه ما عرفوا ينقلون الحدث عدل :))
بس ينفهم من كلامهم إن الخدامات سووا شي وايد عيب !


:::::::::

ريــــــانــه الـعـــــود

لا بد من الخدم إذا كنتي تعملين وعندج إلتزامات وحياة إجتماعية
وأتمنى فعلا إنج تقدرين تستغنين عن الخدم :)
تحياتي :))

:::::::::

حياتي هدف مو عبث

الله يكون بعونكم
وإختبار الخدم عندي صار ضرورة
حتى لا أتفاجأ بسلوك لا يعجبني :))


:::::::::

منال
تصدقين وقت السفر حتى إذا طولنا بالسفر ما أحس إني بحاجة لخدم
بس ما أدري ليش شايفة الموضوع صعب بالكويت ؟؟؟!!!!!

Nikon 8 يقول...

chandal/danchal!!
حبتج العافية يا أختي العزيزة
فعلا الحين أحس إن كل شي أجيبة فيه بركة بعكس لما كانوا عندي وشغالين بوق !!!!
مشكورة على النصايح وايد
تصدقين عاد كان عندنا خادمة هندية من يوم أمي كانت عند بيت أهلها وماتت عندنا الله يرحمها .... كنا وايد نحبها وما تعلمنا أكل الفلفل إلا منها :)


::::::::::

Ducati
فعلا كان أكشن !!!!
الحين جبت خادمة ... باين عليه زينة
وراح أطلب الثانية قريبا ... وكلهم نفس الجنسية والديانة :))


::::::::::

Daggero

خوش خبر :)
ونحن أيضا بالإنتظار :)
وعلى فكرة ضحكت على يناغيهم بالفراش
لووووووووووووول

FANDI يقول...

انا قايلكم يالحريم ردو ايام قبل
ليش خدم وليش ٦ خدامات في بيت واحد
ياحلو الام لي طبخت حق البيت وكليت من ايدها
وياحلو الاخت لي غسلت هدومي
وياحلو الام لي ربتبة فراشي

انا ضد شغل المرأه خلاص

Mr_CHoCoLaTe يقول...

الله يحفظ الجميع من بلاوي الخدّام