من النادر جدا أن يطلب زوجي صنف معين من الأكل على الغداء
كل شي مقبول عنده بشرط يكون فيه إيدام ( سمك أو لحم أو دجاج ) وعيش ( رز )
ولي مطلق الحرية بالتفنن بطريقة الطبخ
( غالبا ما تكون أول تجربة وتكون فيها أخطاء صغيرة تنغص على زوجي الإستمتاع بالطبخة أحيانا قليلة !)
ومن كثر ما أسأله كل يوم شنو تحب على الغدا اليوم ؟ ويكون الجواب كيفكم ... اللي يطلع منكم
صرت ما أسأله !
طبعا هذا الطبع يلازمه فقط في أيام الفطر أما أيام رمضان المبارك فلها قصص أخرى !
اليوم وقبل لا يخرج للدوام قال : تدرين كافخة بخشمي ريحة سمك مشوي ؟ ما تسوونه لي على الغدا ؟
بدون تفكير رديت بإبتسامة عريضة : إشهوة فيها العافية .... وأنا بسويه لك بإيدي .
هو : إشلون بإيدج ؟ منتي رايحة للدوام ؟
أنا : اليوم بآخذ إجازة عارضة .... ريلي يشتهي سمج مشوي وما أسويله ؟
ضحك وهو خارج ... وأسمعه يكلم نفسه الله يستر ..نشوف على الغدا ؟ ... الطباخ يسوى تغيب عن الدوام وإلا لا ؟
تريقت على راحتي .... عقبها طرت لصاحبنا السماك ونقيت ذاك البالول وطلبت ينظفه لي للشوي
رديت البيت بعد ما تسوقت شوي بالجمعية وجبت شوية خضرة ..... كانت الساعة الحادية عشر .... دخلت المطبخ ..... فتحت الراديو ..... أحلى شي إنكم تشتغلون بالمطبخ على صوت الراديو .... غسلت البالول ورشيت عليه الملح والكركم وتركته على المشخال حتى تنقط منه الزفرة .
فتحت باب المطبخ الخارجي ليساعد على طرد ريحة الزفر وخليته مفتوح .
دخلت داخل البيت وإتصلت على الدوام ..... أتفقد أحوالهم ......وأعرف شنو صار عندهم بغيابي ؟
وهاذي تبي تكلمني ... وذيج تي تسأل عن شي .... وسالفة على سالفة .... وهي هي هي ( ضحك ) طالت المكالمة .
أخيرا سديت التليفون بعد ساعة كاملة تقريبا .... ولولا الأذان ووقت الصلاة وإلا جان المكالمة صارت أطول !
بعد الصلاة .... قلت أغسل السمكة وأتبلها وبعدين وأحشيها بالبصل والصبار والكزبرة الخضراء وشوية بهارات وأجهزها للشوي ..... وقبل لا يطلع ريلي من الدوام بنص ساعة أدخلها الفرن .
دخلت المطبخ .... وما أشوف إلا القطوه بايقة السمكة ... عاضتها بأسنانها وراكضة فيها بره المطبخ .
وي وي وي .... شسوي الحين ؟؟؟؟؟
تبخرت كل أحلامي بسمكة مشوية على المزاج ومثل ما أبي !!!!
يا فضيحة بجلالجل .... آخ لو يدري بوعيالي .... يا شماتة ريلي علي ..... يا حسرة شسوي ؟
ماكو وقت أجيب سمكة ثانية .... هذا وقت هدة المدارس ... الشوارع صارت زحمة الحين !
قلت ما لي إلا مطعم شواية السمك اللي ذكروه مرة وإمدحوه بنات الدوام !!!
إتصلت عليه وطلبت منه يوصل لي سمكة مشوية من أي نوع متوفر عنده حاليا !!
ظليت متواكلة وأحاتي حتى وصلت السمكة المشوية لبيتي بالسلامة :)
على طول تخلصت من ورق المطعم وحطيت السمكة بصينية فرن من مواعين بيتي
وجهزنا اللبن ( ريلي ما يحب اللبن الجاهز ... يحبه من روبة البيت مثل ما تسويها أمه له )
وقصصنا الرقية الحمرة اللي طعمها مثل العسل ... وحطينا التمر المعسل .... وطبخنا عيش مشخول بقاعته بطاط وبيديان وبصل وطماط .... يم .. يم ... ( ريحته عجيبة )
رائحة السمك المشوي اللذيذة إستقبلت أنف زوجي ....وقال أه ما فيني صبر أبدل ثيابي ... غسل إيدة وفسر كمومة وجلس فورا على المائدة يستمتع بنزع الاشواك ويتلذذ بكل لقمة ... يتنقص لي بلقمة ... ويضع في صحون عياله لحم السمك ويحثهم على أكله أولا ... وبعدين الرقي !
ريلي : الحمدلله ... تسلم إيدج على الشوي العجيب ... ولج مكافئة نروح الكافيه اليوم العصر ونشرب لنا شاي نهضم فيه السمك .
عرض مثل هذا يعني إن زوجي في قمة الرضى علي .... ياااااااااااي يااااا بختي
أتشكر منه بحياء وأنا أحمد ربي إن الموقف فات على خير ... وفوقه مكافئة وأنا أقول له بالعافية يا بو عيالي :)
ذهب لينام قليلا وأنا أفكر أي كافيه أقترح عليه ؟
بعد راحة نومة الظهر ...جلست بجانب زوجي في السيارة ونحن ننظر إلى الأمام
وإلا شا أشوف ؟؟؟؟
شاهدت ما جعلني أتجمد بمكاني وتتوقف عيوني عن الرمش !!!
الله يغربلها من قطوة ... ما كفاها السمكة الطرية اللي باقتها .... نافشة الزبالة ومطلعة بقايا السمكة المشوية وكيس المطعم وعازومة قطاوة الفريج كلهم !!
المشكلة إن زبالتنا هي الوحيدة بهذا الجانب من الشارع .. لأن جاري على اليمين وجارتي على اليسار لديهم أبواب جانبية أخرى .... يعني واضح جدا إن كيس المطعم طالع من زبالتنا !!
إلتقت نظراتي الخائفة من إكتشاف حقيقة الكذبة ( البيضاء ) بنظرات زوجي المتسائلة صحيح السمكة المشوية من مطعم ؟؟؟!!!!
هززت رأسي بنعم ... نفخ بضيق ... تشجعت وقلت : واللي يسلمك لا تخرب علينا الطلعة ... فعلا السمكة كانت من مطعم ... لأن صار لي موقف كلش يضحك أقصه عليك وإحنا نشرب الشاي هي هي هي ( أضحك بتمثيل ) والله بتضحك مثلي لي سمعته
إقتنع قليلا ... فكر قليلا ثم تكلم أخيرا وقال : تدرين كان خوش شوي .. حده مضبوط .. كنت مشتهي سمك مشوي ... ويوم قلتي أنا بسويه قلت الله يستر ... لأنك ما تجيدينه ... ومع هذا ما حبيت أكسر بخاطرج يوم شفتج مختبه !!!
خوش نقوة مطعم تستاهلين عليه عزيمة كافيه وخوش عيش مشخول.....ومرة ثانية لا تخشين عني شي !
وضحك وصار يتشكر من القطوة ويطلب لها العافية اللي علمته الصج ... وشغل السيارة وإنطلقنا
أحمدك يارب على السهالة اللي نزلت على زوجي ... وعلى تعدي الموقف على خير
كلشي عاد ولا تخترب طلعتي مع زوجي ... أهو ماد البوز ... وأنا أساحل فيه !
وتوبة بعد إن خشيت عن ريلي شي
بصراحة ما هقيت إن القطوة اللي هي سبب الموقف إهي اللي بتفضحني وتكشف كذبتي !!!
كل شي مقبول عنده بشرط يكون فيه إيدام ( سمك أو لحم أو دجاج ) وعيش ( رز )
ولي مطلق الحرية بالتفنن بطريقة الطبخ
( غالبا ما تكون أول تجربة وتكون فيها أخطاء صغيرة تنغص على زوجي الإستمتاع بالطبخة أحيانا قليلة !)
ومن كثر ما أسأله كل يوم شنو تحب على الغدا اليوم ؟ ويكون الجواب كيفكم ... اللي يطلع منكم
صرت ما أسأله !
طبعا هذا الطبع يلازمه فقط في أيام الفطر أما أيام رمضان المبارك فلها قصص أخرى !
اليوم وقبل لا يخرج للدوام قال : تدرين كافخة بخشمي ريحة سمك مشوي ؟ ما تسوونه لي على الغدا ؟
بدون تفكير رديت بإبتسامة عريضة : إشهوة فيها العافية .... وأنا بسويه لك بإيدي .
هو : إشلون بإيدج ؟ منتي رايحة للدوام ؟
أنا : اليوم بآخذ إجازة عارضة .... ريلي يشتهي سمج مشوي وما أسويله ؟
ضحك وهو خارج ... وأسمعه يكلم نفسه الله يستر ..نشوف على الغدا ؟ ... الطباخ يسوى تغيب عن الدوام وإلا لا ؟
تريقت على راحتي .... عقبها طرت لصاحبنا السماك ونقيت ذاك البالول وطلبت ينظفه لي للشوي
رديت البيت بعد ما تسوقت شوي بالجمعية وجبت شوية خضرة ..... كانت الساعة الحادية عشر .... دخلت المطبخ ..... فتحت الراديو ..... أحلى شي إنكم تشتغلون بالمطبخ على صوت الراديو .... غسلت البالول ورشيت عليه الملح والكركم وتركته على المشخال حتى تنقط منه الزفرة .
فتحت باب المطبخ الخارجي ليساعد على طرد ريحة الزفر وخليته مفتوح .
دخلت داخل البيت وإتصلت على الدوام ..... أتفقد أحوالهم ......وأعرف شنو صار عندهم بغيابي ؟
وهاذي تبي تكلمني ... وذيج تي تسأل عن شي .... وسالفة على سالفة .... وهي هي هي ( ضحك ) طالت المكالمة .
أخيرا سديت التليفون بعد ساعة كاملة تقريبا .... ولولا الأذان ووقت الصلاة وإلا جان المكالمة صارت أطول !
بعد الصلاة .... قلت أغسل السمكة وأتبلها وبعدين وأحشيها بالبصل والصبار والكزبرة الخضراء وشوية بهارات وأجهزها للشوي ..... وقبل لا يطلع ريلي من الدوام بنص ساعة أدخلها الفرن .
دخلت المطبخ .... وما أشوف إلا القطوه بايقة السمكة ... عاضتها بأسنانها وراكضة فيها بره المطبخ .
وي وي وي .... شسوي الحين ؟؟؟؟؟
تبخرت كل أحلامي بسمكة مشوية على المزاج ومثل ما أبي !!!!
يا فضيحة بجلالجل .... آخ لو يدري بوعيالي .... يا شماتة ريلي علي ..... يا حسرة شسوي ؟
ماكو وقت أجيب سمكة ثانية .... هذا وقت هدة المدارس ... الشوارع صارت زحمة الحين !
قلت ما لي إلا مطعم شواية السمك اللي ذكروه مرة وإمدحوه بنات الدوام !!!
إتصلت عليه وطلبت منه يوصل لي سمكة مشوية من أي نوع متوفر عنده حاليا !!
ظليت متواكلة وأحاتي حتى وصلت السمكة المشوية لبيتي بالسلامة :)
على طول تخلصت من ورق المطعم وحطيت السمكة بصينية فرن من مواعين بيتي
وجهزنا اللبن ( ريلي ما يحب اللبن الجاهز ... يحبه من روبة البيت مثل ما تسويها أمه له )
وقصصنا الرقية الحمرة اللي طعمها مثل العسل ... وحطينا التمر المعسل .... وطبخنا عيش مشخول بقاعته بطاط وبيديان وبصل وطماط .... يم .. يم ... ( ريحته عجيبة )
رائحة السمك المشوي اللذيذة إستقبلت أنف زوجي ....وقال أه ما فيني صبر أبدل ثيابي ... غسل إيدة وفسر كمومة وجلس فورا على المائدة يستمتع بنزع الاشواك ويتلذذ بكل لقمة ... يتنقص لي بلقمة ... ويضع في صحون عياله لحم السمك ويحثهم على أكله أولا ... وبعدين الرقي !
ريلي : الحمدلله ... تسلم إيدج على الشوي العجيب ... ولج مكافئة نروح الكافيه اليوم العصر ونشرب لنا شاي نهضم فيه السمك .
عرض مثل هذا يعني إن زوجي في قمة الرضى علي .... ياااااااااااي يااااا بختي
أتشكر منه بحياء وأنا أحمد ربي إن الموقف فات على خير ... وفوقه مكافئة وأنا أقول له بالعافية يا بو عيالي :)
ذهب لينام قليلا وأنا أفكر أي كافيه أقترح عليه ؟
بعد راحة نومة الظهر ...جلست بجانب زوجي في السيارة ونحن ننظر إلى الأمام
وإلا شا أشوف ؟؟؟؟
شاهدت ما جعلني أتجمد بمكاني وتتوقف عيوني عن الرمش !!!
الله يغربلها من قطوة ... ما كفاها السمكة الطرية اللي باقتها .... نافشة الزبالة ومطلعة بقايا السمكة المشوية وكيس المطعم وعازومة قطاوة الفريج كلهم !!
المشكلة إن زبالتنا هي الوحيدة بهذا الجانب من الشارع .. لأن جاري على اليمين وجارتي على اليسار لديهم أبواب جانبية أخرى .... يعني واضح جدا إن كيس المطعم طالع من زبالتنا !!
إلتقت نظراتي الخائفة من إكتشاف حقيقة الكذبة ( البيضاء ) بنظرات زوجي المتسائلة صحيح السمكة المشوية من مطعم ؟؟؟!!!!
هززت رأسي بنعم ... نفخ بضيق ... تشجعت وقلت : واللي يسلمك لا تخرب علينا الطلعة ... فعلا السمكة كانت من مطعم ... لأن صار لي موقف كلش يضحك أقصه عليك وإحنا نشرب الشاي هي هي هي ( أضحك بتمثيل ) والله بتضحك مثلي لي سمعته
إقتنع قليلا ... فكر قليلا ثم تكلم أخيرا وقال : تدرين كان خوش شوي .. حده مضبوط .. كنت مشتهي سمك مشوي ... ويوم قلتي أنا بسويه قلت الله يستر ... لأنك ما تجيدينه ... ومع هذا ما حبيت أكسر بخاطرج يوم شفتج مختبه !!!
خوش نقوة مطعم تستاهلين عليه عزيمة كافيه وخوش عيش مشخول.....ومرة ثانية لا تخشين عني شي !
وضحك وصار يتشكر من القطوة ويطلب لها العافية اللي علمته الصج ... وشغل السيارة وإنطلقنا
أحمدك يارب على السهالة اللي نزلت على زوجي ... وعلى تعدي الموقف على خير
كلشي عاد ولا تخترب طلعتي مع زوجي ... أهو ماد البوز ... وأنا أساحل فيه !
وتوبة بعد إن خشيت عن ريلي شي
بصراحة ما هقيت إن القطوة اللي هي سبب الموقف إهي اللي بتفضحني وتكشف كذبتي !!!
هناك 66 تعليقًا:
بالعافية
:))
وعلى قولة سعد بدرب الزلق: هل كيف الغش بالتجارة؟! :))
قطوة فتانة جذيه انا ما شفت!
كالعادة مواضيع تعدل المزاج ما نلقاها الا عند نيكون :))
HEHE,I LOVED THE STORY,NICE END,LUCKY U!;)HEHEHE
على طريقة الوصف فقط انا يعت اقول يبيلك كاسكو و خليه بالبيت ترى القطاوة تخاف منه
مداخيل العافية:)
عسى ربي يحفظك ويحفظ لك بو عيالك واسرتك الجميلة
استمتع جدا بقراءة هذه النوعيه من المواضيع العاكسة للبيوت الكويتية الجميلة...
بوستك شميت فيه ريحة المشخول والبطاط والسمك
اما القطوة
هههههههه
فصج بدعت فيج
:)
عسى الرحمن يفتح لك ابواب الجنه كلها برضاه عنك قولي امين
هاهاهاها
حبله قصييييير ابيض او بامبا
تذكرت قبل جنه كارتون قطوه تبوق السمج
هههههههههه حسبي الله عليها من قطوه فضيحه
الحمدلله عدت على خير
عاد انا استمتع بالسمجج مشوي مقلي بكل حالاته مالوم القطوه لما تسحبت بره ويا السمجه
قطاوة هالزمن ما يخافون
ولدى ذاك اليوم رجع البيت يقول لى
القطوه بالنادى فتحت كيس الاكل ماله و كلت شندويشته
جبن سلايس و تيركى
تعيشين و تاكين غيرها
:)
LOOOOOOOOOOOOOOOOOL
الله ياهي قصة
بالعافية عليكم و ع القطوة
:)))
الظاهر انها مدسوسة من ادارتج!
:)
الله يعطيج العافيه
صج حبل الجذب قصير..ههههههههههه
لو سمحتى عطينا اسم مطعم السمج لو انزنق مثل زناتك...لوووووول
ياااحلو لريال اللى يقدر ويتفهم الموقف بسرعه ويتعامل معها باريحيه
الله يخليكم لبعض ويخلي ايامكم كلها هناء وسعاده
اي كافيه رحتوا....؟؟؟ بلاغة شف كويتيه السماااات
لوووول
ليش دايما الجذب الابيض حبلة جدا قصير؟؟!!!
وليش اللي جذوبهم كل وحده اكبر من الثانية .. ماشاءالله تعدي ولا احد يدري؟؟!!
بالهناء و الشفا:)
بس صج هالقطوة ابو النحاسه
هههههههههههههههههههههههههه
خطيرة القطوة خوش شئ فوق شينها قوات عينها (=
شفينا عم علينا العزالة
صرنا كلنا زفرة كل بوست ريحته تصحك اكثر من الثاني
خطاج السو
لوووول
الحمدلله رب ضارة نافعة :)
وترى ريلج صاج الصراحة ما في أحلى منها
القصة عجيبة والقطوة بدعت
والحلو الزيادة أمي صارت فيها نفس السالفة ولكن السمج كان صبور لوووول بس لحقت لأنه القطوة بدعت فيها قبل ال10 صباحاً
لووول
الله يحفظج أنت وكل أحبابك يا رب
بوست يهبل
تسلمين
:))
وليييييييييييييييييين يا بعد عمري عمممممممممممممممممرج
وانتي كلا مدارحرينج و متسلطيييين عليج
ياخدم
يا قطااااااااوه
ريليج تيبيكااااااااااااال ابووووووووو كويتي
هههههههههههههههههه
ياعلها العافيه انشا الله
المهم استاااااااااانستاي بالجويييييهه و الكوفي شووب
سؤال بررررررررررررررئ والله
ليششششششششششش من نفكر نجذب ننكششششششششششف
و نااااااااااس يدوبرووووووووون ومحد يدري عنهم
صلاح
يا هلا فيك يا صلاح :)
ترا القطاوة مو أول مرة تفتن !
صار لي موقف معاهم من قبل راح أذكره قريبا :))
غير معرف 1
عليك بالعافية ... دار عزيزة فيها كل اللي يشرح الصدر .. خلك متابعنا :)
ويا هلا فيكم :))
Enter-Q8
خوش معلومة ... ولكن وين أحط الكاسكو حتى تخاف منه القطاوة ؟
ما أقدر أحطه بالمطبخ !
تحياتي :)
esTeKaNa
يا هلا بإستكانتنا الغالية :)
عليج بالعافية ... وشكرا على الأدعية الحلوة اللي ترد الروح :)
Cr8ivia
أي والله حده قصير مهما كان لونه !
تحياتي :)
ANGEL HEART
ما في شك بلذة السمك لي كان محيوف عدل مهما كان مقلي أو مشوي أو مطبق مع عيش ... يم ... يم ... يمي
الحين أفكر أركب باب شبك إضافي على باب المطبخ ... يساعد على طرد ريحة الطباخ ولا يدخل القطاوة !
غير معرف 2
إي والله ما يخافون أبد !
بس صج جريئة القطوة اللي فتحت كيس ولدج وكلت السندويشة !
أخاف يجينا يوم القطاوة تفتح فريزراتنا وتاخذ الإيدام اللي تبيه !
تحياتي :)
chandal/danchal!!
:)
تهقين جذيه ؟!
والله مو بعيدة ... هالأيام كلشي يتسلط سواء كان مدسوس أو غير !
الله يعافيج ... ويا هلا :)
بنت الشامية
الله يعافيج :)
رحنا كافيه هاجندز في سوق شرق ... أحي أيسكريمهم:)
السمك أخذته من شواية العديلية في الجمعية في المباني الجديدة وجربي القباقب المشوية واللي بالصلصة وايد حلو .
وعندج في شواية بكيفان بجانب نادي الكويت
وفي شواية في جمعية قرطبة المباني القديمة اللي ما هدموها .
بالعافية :)
I7na 3shagnaha
الله يعافيج :)
تصدقين هذا اللي أفكر فيه ؟
كذبتنا البيضة ما تصمد وا عليه علينا حتى ساعات !!
يمكن الله يحبنا ويكشفنا بسرعة
تحياتي :)
مركبنا
الصيف بدا ... وكل عام والجميع بألف خير ... والصيف وقت السمك :)
ولاحظي وقت الغدا ساعات تشمين ريحة السمك المشوي عند الجيران !
يمكن هذا اللي شوق ريلي :)
Yin مدام
الله يسلمج يا مدام ين ... وخطاج اللاش
الصراحة أكيد حلوة بين الأزواج لكني خفت أقول له الصج بقول لي
رزق القطاوة على الخاملات
وإلا غايبة حتى تطبخين لي وإلا تفتحين حلجك وتسولفين بالتليفونات !
تحياتي يا مدام ويا هلا فيج :)
lawyer
يا هلا بأخيتي لوير
إستانست بالكوفي شوب وأكلت أيس كريم أول وبعدين شربت الشاي ... بردت على قلبي بعد خرعة القطوة الله يسامحها !
أما ريلي صج حده كويتي :)
وسؤالج ما ني قادرة ألاقي له إجابة ومحيرني مثلج
ليش اللي يدوبرون ويكذبون إكذوب ما لها والي تعدي ونصدقها وخلف الله علينا كذبتنا تطق طبول كل من يدري عنها !!!
هالقطوة ام الفتن
هاذي نوعيتها هواش مع قطاوة الفريج تالي الليل دايماً ...
بس الصراحه موقففججججج ما يترقع كلّش
قطوة؟؟؟؟؟؟؟؟؟
قطوة يا نيكون طلعت المستخبي ؟؟؟
ههههههههههههههههههههههه
عساه مداخيل العافيه يارب
للعلم فقط من بوستج الي قريته امس نص الليل كنسسسسسلت الغدا بره و خليتهم يسون لنااااا سمج
:)))
اكثر انسانه اتأثر بالدعايه انا هههههههههههههههههه
السلام عليكم....
بالعافيه....
لا هذي القطوه أكيد مستقصدتنج.....
........
الله يسخرلج زوجج يارب...
ويحفظكم حق بعض..
...
دمتِ بخير
أمبي مت من الضحك
كلش مو خوش موقف
الله يقطعها من قطوه ....فضيحه
اكيد هذي مدزوزه وتبي اتفتر العلاقات
الزوجيه ....
ماشالله عليج اتعرفين تطبخين
مو انا فاااااشله وبامتياز
:(
المهم عليكم بالعافيه السمجه
وبوست يفتح النفس
:**
لوووووووووول موتيني ضحك
بس القطوه عجييبه لووول
بالعافيه عليكم :)
والله ثم والله
من اول ما طلع ريلج وانا قايل السمجة راح تكون من مطعم
:q
نون النساء
الله يعافيج يا الغالية ... ما قصرتي :)
شفتش عاد اللي فتن علي قطوة ولا خطر على بالي يصير فيني جذيه!
تحياتي :)
lawyer
بالعافية :)
لو كل الدعايات صج فيها خير مثل السمج فعليج بالعافية !
عسى سمك غداكم كان مع ملحقاته وبالذات الرقي الحمر والتمر !
نهــــــــــار
الله يسلمج يا الغالية
ويا هلا فيج بالدار :)
صبا
أكيد أعرف أطبخ ... لأن هذه من شروط الأهل
اللي تبي تتزوج لازم تعرف مباديء الطبخ والطباخ !
لكن أعترف لك إني بالطباخ الكويتي مو أوصل مستوى أمي وجدتي ... لأني معتمدة عليهم وبالذات بالهريس والجريش والقبوط والمنهنة !
fatto
الله يسلمج ويعافيج يا الغالية :)
وعسانا دوم نقدر نسعدج بسوالفنا :)
ولد الديرة
لوووووووووووووووول
والله ثم والله
إن النية كانت موجودة ... لكن جرت الرياح بما لاتشتهي السفن .
وحياك الله عزيز في دار عزيزة :)
الله ولهت عليـــــــــــــــــكم... شخباركم؟؟
والله اني بطينيه ماييت الا على سالفة البالول واااي اشتهيت اكل سمج... والله انها شاطره وريلها طلع تمام الله يتمم عليهم ويهنيهم ويبعد عنهم القطاوه
هالقطوة دزوزة من بنات الدوام
*مدزوزة
شهالقطوة المتسلطه واي تقهر
بس الحمد لله الموقف عدي علي خير علي نيتج وعساه مداخيل العافية :)
طبعا طبعا
سمج مشوي
و مطبق سمج مع مرقه سمج
سلطه جرجير بالطماط و البصل
سله الخضرااا كامله
خبز ايراني
اجار طماط
و اجاراااات ثانيه
روب
و تمر
وعقبها
الرقي الحمر و المنجااااااا
وشاي اللومي يشيل دسوووووومه السمج
وعلينا و عليييييييييكم بالعافيه
:))))
هههههههههههههههههه
بالعافيه
ما ادري ليش لما قلتي خليتي باب المطبخ مفتوح تذكرت القطاوه ههههه
حبل الجذب قصير هي هي
و ربي يسعدكم و يحفظكم ^_^
خييره .. أنه القطوه باقت البالول !!
يمكن الطبخه ما كانت بتضبط
:)
Nikon
مساء الخير
عليكم بلـ عافية
خوووووش فكرة والله .. إبتكااار
ويا حلو رياييل لكويت ..
دام يايزتلهم الطبخة مو مهم المصدر :)
ياليتني أعرف أطبخ.. مواعدة الوالدة تعطيني كورس طباخ كويتي أصلي ؛)
قبل لو أدش المطبخ.. الوالدة تزفني .. ما بلسانها إلا روووحي درسي
لا تعفسين علينا الدنيا :)
الله يهداها ..
ألحين توهقت فيني يوم سافرت طباختي كل يوم دازة الغدا من بيتها ؛)
أقول.. لقطاوة مكودة يم بيتي . أخاف انتي يارتي وانا مادري ؛)
وسمحيلي علـ مرووور :)
Nikon 8
قطوتكم هذى شعبية
من المطبخ الى درام الزبالة و راضية بالبالول
أشوه أنها مو من النوع المدلل اللى نشوفه هالأيام اللى يحطون لهم فيونكات جان مارضت الأ بسوشى وشرط من ماكى بعد
لووول
انا حسيت اني خفت لما قريت ان القطوة مبطله الزباله وانتو بكرامه
بس اشوه انتهى الموقف على خير
عليكم بالف عافيه
كويتيه بحرينيه
والله ولهنا على تعليقاتج :)
الله يسلمج ويسعدج ... بس لا تطولين الغيبة علينا :)
فريج سعود
ليش لا؟
شاكة فيهم :)
يا هلا فيك :)
Sweet Revenge
إي والله تقهر .... طيرت فرحتي بنجاح حيلتي ... الله يسامحها .
لي الحين لي طلعت برة بالسكة وشفتها أتذكر جذبتي !!!
lawyer
بالعافية ... بالعافية :)
بنقلدكم المرة الثانية :)
بغش منكم المنجة حق العصاري ... وشاي اللومي :)
خوش أفكار ... شكرا :)
Mr_CHoCoLaTe
الله يعافيك :)
عسى ما صار فيكم المقلب من قبل والقطوة باقت سمجكم ؟؟؟
يا هلا فيك في دار عزيزة :)
monshg
نفس تفكير ريلي :)
وهذا بالضبط اللي خلاه يسامحني لأنه من كثر ما كان مشتاق للسمج ما كان يبي أغلاط متوقعة مني بالطبخة !!!
U know WHO
مو بعيد نطلع جارات وحنا ما ندري ؟؟؟
تدرين إن الطبخ الكويتي وأقصد فيه المكابيس والعيوش والمرق طلعت أسهل شي في الطبخ وشكلة رزة على المائدة ويترس العين بعكس الطبخات الثانية من البلدان المختلفة بعضها ياخذ مجهود ولا بالعين شي لأن أسمه بالنهاية يا مقبلات أو طبق ثانوي
الفرصة لا زالت أمامك للتعلم :)
يا هلا بك ضيفة جديدة وعزيزة في دار عزيزة :)
daggero
ألف بالمية شعبية :)
لأنها قطوة الشارع :)
وأشوة ما عندنا قطوة مدللة نربيها جان علمتها على حركات البوق والتفتن :))
تحياتي :)
Sn3a
ما شفتي يا وخيتي إشلون عيوني تبققت من الخرعة لأن إسم المطعم كان وايد واضح ... والقطاوة طايحين له تخرمش وتمصمص بالعظام :)
الحمد لله حمدا كثيرا على سلامة النتايج :)
شكرا يا عزيزتي .. وحياج الله :)
صباح الخير
صباح عجلة المطابخ
صباح الزفرة وربعها
نيكون عندي اعتراض
بالول ... ومشوي!!!!!
ترى ما ترهم
اشوة ان القطوة باقته
:)
ويازين الحريم السنعين والله
احسن شي ان عندج سرعة بديهه ودبرتي حالج
يا زين سوالفج تونس
والله هل عتوي ظحكنا ,موقف طريف جدا
والنهايه ولافي احلا منها ,تسلم ايدج طبعا على الكتابه مو على المشوي :))
الزين
لك حق تعترضين على البالول مشوي بس سشوي ريلي ما يحب العظام !
حتى الزبيدي ساعات نسويه له مشوي أو مقلي إذا حاب يغير عن المطبق !
دلوع وما أقدر أغير طبعه :)
ويا هلا فيج دوم عزيزة في دار عزيزة:)
Someday
الله يونس بالصحةوالعافية :)
ويا هلا فيج في دار عزيزة:)
um_alzain
الله يسلمج يا أم الزين :)
المهم النهايات السعيدة ... والحمدلله جت العواقب سليمة .
لو ما كان الريال مزاجة رايق ذاك اليوم جان ظل زعلان أسبوع كامل !!!
الله ستر :)
السلام..
بالعافيه يارب..
وي شهالقطوه اللعينه ..
يدتي الله يطول بعمرها كله تقول : رزق القطاوة على الخاملات :)
بس ما هقيت اقراها ببلوق D:
بوسعد
لووووووووووول
من أول تعليق لك عندي أطلع خاملة :(
على العموم يا هلا فيك ضيف عزيز في دار عزيزة :))
إرسال تعليق