الأحد، 14 يونيو 2009

حفلة تفوق عهود

الوقت الخامسة مساء
أركض هنا وهناك للإشراف على اللمسات النهائية لحفل تفوق إبنتي عهود
أتأكد أن كل شيء على ما يرام لإستقبال ثلاثين بنت من المرحلة الإبتدائية في منزلي
تلفوني النقال لم يهدأ من الرنين ... والإتصال على من إتفقت معهم لإحياء فقرات الحفل وحثهم على سرعة المجيء
صاحب الدي جي ينصب سماعاته هنا وهناك
البالونات والزينة موزعة في الصالة
أقف أتفقد طاولة الطعام وأبدي ملاحظاتي لمتعهدي الأكل وعن الطريقة التي أفضلها في رص أصناف الطعام
وسط كل هذه المعمعة يرن هاتفي وأرد
أنا : نعم ... من معاي
هي تسأل : أم عهود ؟
أنا : نعم معاج
هي : والله أنا أم فلانة ... وبنتي معزومة عندكم
أنا : يا هلا .. تبين أدليج البيت ؟
هي : لا والله ..... بس حبيت أقول لج إني سألت عنكم ومحد عرفكم ..... وإشلون أودي بنتي لناس ما أعرفهم ولا أثق فيهم ؟
أنا شبه مصدومة : حبيبتي منتي ملزومة تجيبين بنتك لناس ما تعرفينهم مثل ما تقولين ولا تثقين فيهم .
هي : طولي بالج لا تنزعجين .... أقصد وين بيتكم ؟
أنا : في السلام
هي : وبيتكم كبير وإلا صغير ؟ عتيج وإلا جديد ؟أجار وإلا تمليك ؟
أنا : والله شريناه جاهز ... وتعالي شوفيه وحكمي بنفسك على جحمة !
هي : وبيت أهل زوجك وين فيه ؟
أنا : في الأندلس
ترد بإستياء واضح : أه ... في الأندلس :(
وتسأل مرة أخرى : قلتي لي وين بيتكم ؟
أنا وقد بدأ صبري ينفذ : قلت لج في السلام
هي بنزر : درينا في السلام ... أقصد بيت أهلج وين فيه ؟
أرد وأنا أتعجب بيني وبين نفسي ( ما دخل بيت أهلي وأهل زوجي بعزيمة أطفال ؟ ) : في الروضة .
هي : أمج من بنته ؟ وخالتج أم ريلج من بنته ؟
أنا ( أكتم غيظي غصبا عني ) : إختي ... ترا السالفة كلها حفلة أطفال ماهي زواج ... حابه تجيبين بنتج أهلا وسهلا وإنتي معاها تفضلي وخليني أتعرف بعد عليج وعلى تاريخ أهلك وأهل زوجك .
هي وقد أحست بإستيائي : والله مو قصدي ... بس غريبة محد عرفكم عاد إشكثر سألنا عنكم ؟ من متى متجنسين ؟
أنا بغضب : والله السؤال نفسه قاعد يدور ببالي عنج ! ومن قال إنج لازم تعرفين الكويت كلها ؟
هي : والله تدرين بعد الدنيا تخرع ولازم أختار صداقات زينة ومعروفة من الحين حق بنتي !
أنا : يا إختي ترا العزيمة مو إجبارية !
هي : على العموم راح أفكر أجيبها لكم أو أوديها معاي حق عيال صديقتي فلانة الفلانية تعرفينهم بعد ما شاء الله عليهم خير ونعمة وجاه وأبوهم شاري لهم الله يهنيهم على بيت بيت في غرب مشرف .
أنا : اللي تشوفينه ويريحج . أقفلت الخط وأنا أفكر بنوعية هالناس اللي إختصاصها تنكد على الغير في لحظات فرحهم .
معقولة إن هناك من لا زال يسأل بهذه الفظاظة ؟؟؟!!!
ظننت خطأ أن التعليم والإحتكاك مع الحضارات والتمدن كفيل بالقضاء على سلوكيات عديمة اللباقة !
المكالمة شغلت بالي وكدرتني وخشيت أن تؤثر على باقي المعازيم وتحثهم بعدم المجيء إلى منزلنا وتكسر بخاطر بنتي .
في السادسة والنصف دخلت علينا صاحبة الإتصال مع بنتها ... عيونها طايرة .... ومتشنجة وتسأل سؤال وراء الثاني
رحبت بها أجلستها قليلا لتهدأ وشربت عصير .... ثم تجولت معها حول المكان لأريها الإستعدادات وأبين لها حرصي على البنات وأنني سأكون معهم طوال الحفلة .
لم تتوقع جمال وترتيت المكان ولا تنوع الترفيه المعد للبنات ( هالمرة طارت عيونها من الإنبهار ! ) ... تبدلت ملامحها وإكتست بتعابير الرضى والإرتياح ... وإختفت عباراتها الإستفزازية التي ( غثتني ) فيها قبل قليل وتبدلت إلى حبيبتي ويا بعد عمري ويا عيوني إنتي وصار كلامها وتصرفها أنعم من النعومة .
تطمنت وفضلت ترك البنت عندنا لتأخذها بنهاية الحفلة ... عند الباب حيتني مودعة وقالت : الحين تطمنت على بنتي.... وعلى فكرة زوجي عرفكم ومدح فيكم وايد ... وذكرني بصلة قرابة بعيدة بينكم مع أهله .
ضحكت وأكملت : يعني طلعنا أهل .... وبصراحة أبي عهوده الصغيرة تصير صديقة بنتي الأنتيم .
لم أرد لأني لا أريد لأبنتي أن تتعلم الفظاظة في الكلام ولا أن تحكم على الناس من كبر بيتهم وموقعة وإذا كان جديد وإلا قديم أو تاريخ تجنيسهم !
لك يا عزيزتي ولمن على شاكلتك أقول : عفوا ... أنا مستغنية عنكم ولا أبي بنتي تتطبع من طبايعكم !

هناك 33 تعليقًا:

مـغـاتيــــــــــــر يقول...

نست تسأل مزدوجين جنسية ولا لأ لووول
 

esTeKaNa يقول...

بداية:
الف الف مبروك تفوق ابنتك الله يحفظها ويبلغك فيها متفوقه ومتخرجة من الجامعه بأعلى الدرجات وتفرحين فيها عروس
:)
افرح واقدر جدا حفلات التفوق والنجاح وكنت حريصه على تلبيه هذه الدعوات وانا بعمر اصغر ولا ازال:)
بداية :
كانت امي ممن يسئل
ولكن طبعا ليست هذه النوع من الاسئله
الام فظه بطريقه غير مستحبه ابدا
وكانت هذه مناسبه جيده لك انتي لاختيار الصديقات اللائقات بابنتك الله يحفظها
:)

غير معرف يقول...

لله يبارك فيج وفي تفكيرج الراقي

انا تعرضت لنقلات ثقافية في طفولتي

الإبتدائي بمحافظة ...

والثنوية والمتوسط بيئات مختلفة ...

فالبداية كانت المفاضلة بين
سنية\شيعية
حضرية\بدوية
عايلة الفلانية\عايلة الفلنتانية



وكله نتاج بيئة وثقافة العائلة ...

وبالنهاية حمدت ربي ان اهلي ماربوني على الفروقات السخيفة ...

وبالنهاية ... صرت أتأقلم معكل الأنواع والأصناف ...

الله يخليلج بنتج

صبا يقول...

عسى الله يحفظ عهود ويطول بعمرج وتشوفينها عروس وتفرحين فيها
يارب ...عاد لا تنسين تعزميني

:))

وبالنسبه لام صديقة عهود
الصراحه... لا تعليق..!!
الحمدلله والشكر....!!!
المهم انج استانستي بحفلة
ابنيتج...

بس ما حطيتي لنا الصور

؛)

بحار يقول...

ههههههههههههههههههههههههههههه
اولا مبروك تفوق عهود وعقبال ما نشوفها متخرجه من الجامعه , وتتربى بعزكم على الادب والطاعة,آمين,

زين جت السالفه على الاسأله واللقافه او الفضاضه هههههه

توقعت تطلع المره تطلع بالاخير المحقق كونان النسخه الكويتيه هههه

ياما ناس مرو علينا مثل شاكلتها مالهم حل ابد ههههه

الله يكون بعونج

بس عسى الحفله عدت على خير!

Sn3a يقول...

معقوله
معقوله في ناي مخهم قد حبه الرمل؟ واقل جايز؟
انا اصدق ان في ناس جايز للحين تفكيرهم جذيه
لكن توصل فيهم الوقاحه يتكلمون جذيه !

شفيها هذا اللي من متى تجنسين
من تكلم عن الاصل قليل اصل

حرام الوحده تخلي عيالها ترافج ناس جذيه اهلهم

والف مبروك على عهود عأبال فرحه تفوق وتخرج الجامعه

ولد الديرة يقول...

عفوا "هنديتكم" من وين في "الفلبين"؟

Sweet Revenge يقول...

صاجة والله نيكون شفت هالنوع والصراحة رفعت الجام ابد ما يتعاشرون
هالناس البعد عنهم غنيمة
والف مبروك نجاح بنتج وعسا تشوفينها باعلي المراتب تفتخرين فيها

رزنامــــــة يقول...

اول شئ مبروك تفوق بنتك في الابتدائي
والله يبلغج فيها متفوقه بالجامعة ويبلغج فيها عروس ،،، المفروض تخشين هالاحتفالات حق الجامعة .... :-)

ننتقل الى الموصاحية
معقولة في ناس تتصرف بهالطريقة !!!!
هذي بجاحة في التصرف مع الناس عيني عينك
والحق عليج انك ما سكرتي الباب عليها من البداية
والا شكو تعطينها معلومات شخصية عنك وانتي ما تعرفينها .. خلي بالك من هالاشكال لأنهم راديو متحرك ولك ما عطيتيها معلومات كل ما زاد البث الاذاعي عن بيتكم

بو سعد يقول...

ايه فيه ناس ذابحتهم المظاهر ..

انا ولد فلان ما اقعد مع العايلة الفلانية !

انا عندي فلوس ما اقعد مع واحد فقير !

انا ساكن بالمكان الفلاني ما اقعد مع ناس ساكنين بالمكان العلاني !

يا جماعة الناس باخلاقهم ..

و انما الامم الاخلاق مابقيت ** فإن هم ذهبت اخلاقهم ذهبوا

ياما ناس عندهم خير و اصل و فصل و ساكنين باحسن المناطق و ما تقدر تقعد وياه من ثقل طينته ولا من قلة ادبه ولا من ثوالة في مخه !

الله يهدينا ويثبت عقولنا

نون النساء يقول...

عسى الله يبلغج فيها وتنظمين حفل تخرجها من الجامعه قولي امين ..


وبنات عزيزة في غنى عن أناس عقولهم تافه ما تسوى بيزة ...

حرام حتى دشتها لبيتج ..





كبرتِ بعيني على تصرفج معاها
مع انها كانت قمة في الوقاحه وعدم الذوق.

كانت تقدر اتعرف اللي تبيه من غير هالإسلوب
بس الحمدلله انها جذي ما تعرف تتحجى عشان تستغنين عن معرفتها من بادي الوقت ..



وآآآآدي بوسة ياستي ولا تزعليييين

I7na 3shagnaha يقول...

يحليلج والله و انتي ماخذة و معطية معاها

لو انا جان من زمان صاكة التلفون بويها

ماشاء الله عليج و على وساعة صدرج :))

ميمة السبيت يقول...

تدرين لو انا مكانج والله جان من اول سؤال ملييق مثلها صكيت التلفون اشلون تحملتي قلة الادب هذي عفيه علييج والله اعصابج قوية ..

دزيلي رقم مال الحفلات حق عيد ميلاد جوجوه :)

غير معرف يقول...

ما شاء الله على البال الوسيع
الله يحفظ عهود لكم:)

lawyer يقول...

سووووووري نيكووووووووون سامحيني على التعليق



بس انا لو وحده تقووووول

لا والله ..... بس حبيت أقول لج إني سألت عنكم ومحد عرفكم ..... وإشلون أودي بنتي لناس ما أعرفهم ولا أثق فيهم ؟



ارد عليييييييييها

اكلااااااااي خرااااااااج و اسكر التلفووووووووون

قوليلها يكفي احنا متنزلين و مناديييينكم مالت عليج انتي و بينج فوووووووقج

amani يقول...

قبل كل شي : الف مبرووك لبنيتج ومنهاا للأعلى انشاءالله واقولج لا تتحكمين بصداقات بنتج وتجبرينها تمشي مع فلانه ولا علانه خليها على كيفها بس اذا سوت الغلط حاسبيها وذكريها انه احنا بمجتمع لا يسمح للغلط خليها تشوف منو الصح ومنو الغلط من غير ابعادهاا عن وحده بسبب امها.

ثانياا : ااااه ذكرتيني بمعاناتي بالحياه كل اسبوع لازم يصير فيني نفس الموقف اذا ماتكررت ثلاث اربع مرات
بس الفرق انه يطالعوني بنظره استحقار بالبدايه او علامات عدم التصديق بسبب اخر اسمي ينتمي للباديه وحده يمكن اعتبرها من اعز زميلاتي فقط وليس صديقاتي ببدايه تعارفي عليها لازم نتكلم بأمور الحياه والنمط المعيشي فكانت تسألني كم تصرفين ؟ كم مره تروحين السوق؟ شكبر بيتكم؟ شنو عندكم في البيت؟ عندكم حمام سباحه ؟ اقولهاا ما عندنا حمام سباحه بس عندنا نادي رياضي داخل البيت طبعاا في البدايه لا هي ولا قرووب البنات صدقوو واعتبروني نكره على المجتمع او كما سمعت منهم بالصدفه ( تعيش احلام فقاره) فقررت اني اعزمهم لبيتنا خصوصا انا احد الناس اللي متطبع بالاطباع الفرنسيه اي من سابع المستحيلات اني ادخل احد بيتي حتى لو كان صديق . بس اضطريت علشان يشوفون الاقاويل والاكاذيب مثل ما يقولون فوحده قالت لي امي تبي تكلمج ولما كلمتني استلمتني اسأله انتي من بنته؟ وين بيتكم؟ ليش وين كنتم ساكنين قبل؟ كم بيت غيرتوا؟ ابوج شنو وظيفته؟ وامج بعد؟ عندج اخوان ؟ ولا كلكم بنات ؟ ماباقي تقولي الا جم مره تروحين لفيلا مودا بالشهر ... ولما قبلوا العزيمه ودخلو البيت وشافوه واستانسوا وطبعا لازم المقبلات من اي مكان هاي كلاس اخذتييه وصدمتهم لما قلت لهم لا والله انا بنفسي مسويته من بعد دورات الطبخ العديده اللي ماخذتها من قبل ..
ثاني يوم دوام لما شافوني صرت اعز صديقه لدى كل وحده فيهم والكل من صوب اماني خلينا نروح المكان الفلاني .. اماني والله امي ودها تتعرف عليج .. والاهم : اماني عيدميلادي بعد اسبوع ( يعني لاتنسين هديتي) وطبعاااا صرت عند الام عزيزه وغاليه ولما تسمع اسمي قالت لبنتها اطلعي حبيبتي انا عادي واثقه بصديقتج هذي
فييه ناس جذي ما يهمها اسم العايله او شكثر اهلج معروفين بالكويت اهم شي كم تملك ومانوع السياره التي تقودها وكم مره تاكل بمطعم فاخر خلال الاسبوع ... اييه واهم شي حفلاتج منو اللي ينظمها لج وبكم.

chandal/danchal!! يقول...

مبروك للبنوتة وتبلغين فيها عروس (الرجل بإيد والشهادة بالايد الثانية)

:)


واي مت من الضحك على تعليق لوير لوووووووووووووووووووووووول


عندي اكتشاف يديد حق المكالمات الغير مرغوب فيها


اييب جيس بطاط نايس
salt and vinegar
واخرخش الجيس جنه الشبكة تخرخش واصك التلفون وباب البنت وامها بطين وعجين!

maha يقول...

الف مبروك نيكون على نجاح عهود عسى ربي يبلغج فيها



موقف يدل على رجاحة عقل منج وسعة صدر

Alia يقول...

وااااي أحتريت عليج ... عيل شتقولين بوحده أعرفها لما صار سيل فيلا مودا دازه لي مسج جان أقولها أدري واليوم الي قبله مسوين سيل حق VIP جان ترد علي بالمسج هو أنا VIP ليش ما دزولي؟؟ ومن صجها مو تتغشمر عقوووول فاضيه لا تحتكين فيها وتتأثرين فيها بدون شعور خليج جذيه ما شاء الله عليج عقل و ثقل وتحمدين ربج على نعمة العقل الي الله عطاج اياها وحرمها منها

DiLLi O MiLLi يقول...

يااااا صبر أيووووب عندج !!!
أنا جان من أول سؤال .. أقول لها مووو لزووم .. وسادته بويها !!!
:)

عيل السنع بالبيت والفلوس .. كاهم أشكثرهم فلوس وجاه وماااكووو لا سنع ولا منع !!


مبرووووك تفوق عهود
عقبال الشهادة الجبيرة ياااارب

:)

ReLaaaX يقول...

loooooooooooool
والله من صجها هذي؟

اااااااااااااع!شهالتفكير ؟
ليش اهيا بتناسبكم الاخت ؟

بو سعد يقول...

نسيت ابارك بتفوق عهود .. من حر ما فيني

على البركة و يا رب تشوفينها شايلة اعلى الشهادات و تفرحين فيها عروس :)

um_alzain يقول...

مساء النجاح
الف مبروك النجاح والتفوق وانشالله نفرح معاج بتفوقها من الجامعه

فعلا بعض الامهات غير شكل عليهم اسأله غريبه وعجيبه مادري من اللقافه ولا الفراقه ؟؟
وسبحان الله تلاقين بنتها فوله وانأسمت نصفين
يعني نفس اطباع امها بالشحاطه والمزامط
ومن شاف اولها ينعاف تاليها

مـغـاتيــــــــــــر يقول...

نستنا نبارك المخبر كونان ..
ألف مبروك ، يحفظها ربي انشالله ويمدها بحياة كلها نجاح وصحة وسعادة

NewQ8 Bride يقول...

الف الف مبروك على تفوق عهود يا رب منهالأعلى و انشالله الله يبلغج فيها عروسة و تكتبين لنا عن عرسها و تعزمينا بعد :) ))

على الأم ما اقول الا الحمدالله و الشكر ترى عادي انا يوم تزوجت وحده ما كنت تكلمني انصدمت يوم انا خذيت واحد من عايلة معروفه نوعا ما بالكويت و انا اصلي من فيلكا ترى ما كنت تكلمني بس تزوجت على قولتها اني صرت من بنات الحمايل

استغفر الله العظيم

Manal يقول...

هالساقة نكتت الموسم الصراحة

:)

الباب اي اييك منه ريح سده وستؤيح وانتي مو ملزومة تصادقين او تتعرفين على ناس من هالنوع

هم بحالهم وانتي بحالج وعيالج

الحمد لله على نعمة القناعة
والصحبة الطيبة

ولا يهمج ولا يتكدر مزاجج

اهم شي
ان بنتج متفوقة
ما شاء الله

:)

وان شاء الله دوم

صبا يقول...

لوووووووووير
ههههههههههههه
هههههههههههههههههاااي



الله يقطع سواالفج



:*

Q8EL5AIR يقول...

يااااااااااااااو بطت جبدي والله .. شالناس .. الله لايبلانه .. بل لايحوشك !!

اعوذ بالله ..

ماادري شلون صبرتي عليها واستقبلتيها ..

اااااااااخخخخخخخخخخخ !!

حدها قاهرتني !!


حمدلله والشكر ..

الله يعينه على هالاشكال !








وتحياتي ..
ويسلموااااااااااااااااا :)

فريج سعود يقول...

ما سألت عن بايباتكم عدساني ولا الماني ؟

بالله هذي لي بغت تزوج بنته بتسأل عن شنو ؟

بن جبلة يقول...

مثل ما قالت الاخت لوير


و مبروك لعهود النجاح والتفوق

Mr_CHoCoLaTe يقول...

ألف مبروك و الله يحفظها من كل شر يا رب

بس والله انصدمت ما ادري شعلق
من صجها هذي !! اوكي مو عيب الواحد يكون حريص على عياله بس مو جذي يعني ما تودي عيالها حق ناس مو معروفين أو مالهم مكانه

الحمدلله و الشكر

بسم الله الرحمن الرحيم

(يَا أَيُّهَا النَّاسُ إِنَّا خَلَقْنَاكُم مِّن ذَكَرٍ وَأُنثَى وَجَعَلْنَاكُمْ شُعُوباً وَقَبَائِلَ لِتَعَارَفُوا إِنَّ أَكْرَمَكُمْ عِندَ اللَّهِ أَتْقَاكُمْ إِنَّ اللَّهَ عَلِيمٌ خَبِيرٌ)الحجرات 13

صدق الله العظيم

Unknown يقول...

والله هذا التصرف ان دل انما يدل على الشفاحه وانها مو شايفه خير اساسا واذا ياهم الخير ياها على كبر واخترعت... ياكرهي

Nikon 8 يقول...

شكرا لكل من بارك لي بتفوق عهود والله لا يحرمن من خفة ظل تعليقاتكم وشعوركم الصادق بالفرحة .