الثلاثاء، 23 يونيو 2009

معاريس

نزل مسرعا للطابق السفلي مهموما لا يعرف كيف يبدأ بالكلام
سألته أمه : إشفيها مرتك طالعة طايره لا سلام ولا كلام ؟
لا يكون تخانقتوا ؟ توكم معاريس ما صار لكم كم شهر من عرستوا ؟
ينطلق بالكلام وكأن الفرصة سنحت له ليفضفض عما في قلبه وقال :
سألتها شنو تبين أييبلج معاي وأنا راجع قالت وجبة تشيكن بيرغر وجبت لها ... وفجأة زعلت وشالت جنطتها وطلعت .... وما أدري شنو اللي زعلها ؟
الأم : بس جذيه بسيطة ... هات التليفون خلني أكلم أمها وهي بتعقلها لك ... أفا عليك يا وليدي ليش يضيق خلقك ؟
طووووت ..... طووووت .... طووووت ....الهاتف يرن
يرد الطرف الأخر ... أم العروس
أم المعرس : يا هلا بأم فلان ... إشلونكم وشخباركم ؟
أم العروس بنره إستهزاء وبصوت عالي يصل لخارج السماعة : أخبارنا ؟ سألي سلامة عمره ولدج شمسوي ؟؟؟ البيت منقلب فوق حدر بسبته !
المعرس يعقد ما بين حاجبيه مستغربا !!!
أم المعرس وهي تحاول تلطف الجو : هي ... هي .....هي ( تضحك ) إشدعوه عاد البيت ينقلب على زعله بسيطة ؟ والله توني دريت ... فقلت أتصل وآخذ بخاطر البنت .... وإنتي تعرفين البنت عروس وحابه تتدلع وتتغلى على الريل .... هي هي هي ( تضحك )
أم العروس وهي هاده دردوبها : والله خوش !!! تعرفين وفوقها تضحكين وتقولين غلا ودلع بنات ... أحر ما عندنا أبرد ما عندكم ! إي دلع بنات وإشفيها ؟
أم المعرس تمسك أعصابها وتستمر في تلطيف الجو وتتكلم بجد وبنبره لطيفه : يا بنت الحلال ما صار إلا الخير ... أنا وإنتي مجربين الزواج ولا بد من الهواش والزعل ... علمي بنتج مو على أبسط شيء تهد البيت وتمشي !
أم العروس : ومن قال لج هذا شي بسيط ... عيل البنت مشتهية وجبه من ماكدونالدز يروح يجيب لها من كنتاكي .... عيل ليش سائلها من وين تبين وجبتج ؟ !
تنظر الأم لأبنها مستفسره عن صحة الكلام .... يهز رأسه بالإيجاب
ترسل لإبنها نظره خانقة وهي تضرب أصابع يدها على خدها بضربات خفيفة كإشارة على حسرتها من الموقف !!!
أم المعرس تكمل حديثها مهدئة أم العروس : والله ما يصير خاطرج وخاطرها إلا طيب ... وأنا مستعده الحين أقوم وأجيب لها كل وجبات ماكدونالدز .... بس إنتي عقلي البنت وقنعيها ترجع لبيت زوجها .
أم العروس : وليش أعقلها على ريل ما يسمع الكلام .... تبينها تنقرد مثل ما إنقردت قبلها !!
لا يوبا الباب اللي يجيلك منه الريح سده وإستريح .
المعرس يضرب بيده على راسه !!!
أم المعرس وقد بدأت معالم الدهشة تظهر عليها :
أي باب وأي ريح وأي قراده يا بنت الناس ... الولد والبنت توهم معاريس ....هذي لا أول ولا آخر زعله بتمر عليهم ... وباكر مع الوقت بتفاهمون ويصير لهم راي بروحهم لا أنا ولا إنتي لنا دخل .... تسكت لتتنهد ثم تكمل : أنا مستعدة أجي أراضيها وأييبه معاي أخليه يتسامح منها ... بعد إشتبين ؟
المعرس يهز راسه لأمه بعدم الموافقة .... وأمه تصر عليه بالنظره الحازمة !
أم العروس وهي مستمرة بذات النبرة التي تعني لا للتفاهم :
لا لا لا لا ... ما نبي نشوفه وهذي مو أول مره يزعلها على نفس السبب ... والعوي عوي عمره ما يتعدل !!!
أم المعرس : بعد شمسوي ؟ والله يسامحج ولدي عوي ؟
المعرس ينفخ ويهز راسه بأسى .... يتأسف لحاله بسبب اللقب الذي حصل عليه
أم العروس : قبل هالمره قالت له أبي عصير منجة فرغلي قام وجاب لها عصير كي دي دي .... قولي لي بالله هذا وين يتسنع ؟ باكر لي صار عنده عيال عيل بعاندنا ومو مخلينا نسمي على كيفنا ؟
وإلا باكر لي صار عندهم بيت وبغينا نبني أو نأثث بنقعد بشيل وحط معاه حنا نقول يمين وهو يسوي شمال ؟ وبيترس قلبي وقلب بنتي حرات !!!
عيوني .... الولد من الحين مبين عليه عنيد وبخيل وما يعرف يتعامل مع الحريم !
الولد يأشر على نفسه مستغربا هذا الكلام عنه ويهز راسه بالنفي لأمة ... بمعنى هذا الكلام غير صحيح !!
أم المعرس : إشلون يعني ما يعرف يتعامل مع الحريم ؟ أنا شايفته طاير فيها .
أم العروس : هذا اللي تشوفينه جدامج .... واللي ما تشوفينه إن ولدج لي قعد مع بنتي يشوفون التلفزيون... ياه يبي يشوف مباراة وإلا حط الكمبيوتر بحضنه وقام يطقطق ويتبوسم مع الله أعلم منو ؟؟؟
أم المعرس : يعني إشقصدج ؟
أم العروس : والله إنتي فهمي .... وربوا عيالكم عدل قبل لا تزوجونهم .... بنات الناس ما يتزوجون عشان يعيشون بضيقة خلق ونكد وريال بخيل وما يتفاهم ...... والله ندعي ونطلب لبناتنا إنهم يروحون لسعادتهم ...... لكن ما أقول إلا وا عليه على بنتي وعلى السعاده اللي طاحت فيها !!!
أم المعرس : إنشاء الله ما صار إلا الخير ويا مالها من الخير إنشاء الله ... أنا بشوف الولد وأسأله وأرد عليكم ... مع السلامة
أم العروس : مع السلامة .
أغلفت الأم الهاتف وهي متكدره ..... وفلت الولد بالحجي لتبرير أفعاله :
يمه والله ما سويت مثل ما تقول أمها .... الوجبة اللي جبتها لها كانت جديدة وحاطين إعلاناتها بالشارع فحبيت أفاجأها لأنه تحب تجرب كل شي جديد في المطاعم وكانت دجاج مثل ما تحب !
والعصير قال لي واحد من الربع إنهم يعصرونه بريولهم ويزيدونه قرع وهي ما تحب القرع وتخاف من الوساخة فقلت عصير كي دي دي أنظف !
أما الكمبيوتر فهي ما تبيني أروح الديوانية عند الربع فقمت أحاجيهم بالنت .... والمباراة إشلون تبي تحرمني منها ومبارايات كأس الأمير وكأس العالم للقارات حامية هالأيام ؟ ... كافي إني قاعد أشوفها بروحي بدون تشجيع الربع بالديوانية !
أم المعرس : والله يا وليدي أنا اللي مربيتك وأعرفك زين ما تطلع منك الشينة .... لكن شقول لك المره بهرتني بكلامها وقلت يمكن بعد صرت بروحك وقمت تغلط بالتصرف مع العروس !!!

هناك 49 تعليقًا:

غير معرف يقول...

العروس وامها فى مثلهم وايد لكن المعرس وامه انقرضوا او نادرين

الزين يقول...

@@

مو صج


تبين الصج عاد
امان اللي ما يحفظها
كلش مو خوش عروس

مو تعرف السنع وامها مساعدتها

واللي هذي اولها ينعاف تاليها




وصباحج حكمه بعد قلبي

Sweet Revenge يقول...

@@
لا نيكون قولي لي انها قصة خياليه
اكو ناس بهالتفاهة ,تطلع من بيت زوجها علشان وجبه
فرق بين قصص امس واليوم

esTeKaNa يقول...

يا ثجالة طينتها من عرووووس
انا اقول تنثبر بالبيت بلا زواج بلا بطيخ وتجابل ماكدونالدز احسن لها
!!
تدرين شلي يحرني؟
ان وايد اشوف نماذج البنت طينة ينه ولا اله الا الله تطيح بواحد يعل القلب
ولا مثل هالقصه...البنت مال من يفرصها ويقرصها لانها حرتني
والريال واعليه متنقص لها وجبه يديده
!!


كالعاده مبدعه
:)

lawyer يقول...

شالخرابيط

شالخمال
ازعل و اهد بيت ريلي على وجبه !
ادز الساايق

اطلب من طلبااات


من صجههم جذي

تراااا الناس الي بتقرا بلوقج بيقولون مهندستنا تبالغ

بس لو تقعدون ويا قاضي احوال شخصيه يشيب راسهم ..


لكن هم هالريال مو ريال اسمحولي


يبتلج كنتاكي يبتلج زحيييييير


طفحيه و بلعي العافيه كافي نعمه الله و يايبلج

والا توست و جبن ابرررررك


اهو معطيها ويه واييييييييد

بو سعد يقول...

دشة الاهل بين الزوجين غلط ..

روحة البنت عند اهلها غلط ..

دلع البنت "الزايد" غلط ..

الاستعجال في التأقلم مع الحياة الزوجية غلط ..

طاعة الزوج زوجته في انه ما يروح الديوانية غلط .. له وقته و لها وقتها .. و اذا صار وقته ما له شغل فيها .. و اذا صار وقتها يصك اللابتوب ويطفي النقال و يجابلها ..

سالفة فرغلي و كي دي دي تضحك D:

و قولوا حق الولد يسحب عليهم .. هذول مو كفو حشيمة :)

Daddy's Girl يقول...

لوووول

ولو ان السالفة نوعا ما سخيفة لكن انا افهم شنو اللي حارها...

اول شيء إذا المعرس طاير بعروسه ما يهدها و يجابل الكمبيوتر يسولف و يتبوسم مع ربع الديوانية... مفروض يكون حايفها حوف و ماله خلق اي شيء ثاني... شغل اقعد يمك بس مو وياك هذا مقبول عقب سنة مثلا مو من أول شهر..

أما سالفة الشيكن برغر فسوري بس الريال مليق و يتفلسف

يعني البنت تبي من مكدونالدز مشتهية من مكدونالدز تقوم انت تقرر انه لأ و الله انت تعتقد انه كنتاكي اصلح او انظف او اونس فبالتالي اخذت قرار تعسفي بروحك و قررت انه اهي لازم تاكل اللي انت يريحك و بالطقاق اهي شتقول...

ملاقة..

يعني باكر اتقوله انا بروح لندن يقول اوكي و تتزهب... لمن تركب الطيارة تلاقي روحها رايحة ماليزيا لأنه العم المعرس قرر انه احسن من تلقاء نفسه و اهي مثل الصخلة امباع وراه...

او قررت تدخل الياهل مدرسة خاصة ووافق و اول يوم دوام تلاقيه اموديه مدرسة ثانية لأنه العم قرر من نفسه انه اهو يفتهم اكثر و بالتالي غير بكيفه

هذي ماهي عيشة! احساسه انه اهو اللي يفهم و رايه اهم و اهي صخلة و لا ليش تعترض بعد!!!!!

ARTFUL يقول...

والله اذا السالفه صجيه مصييييبه

اللهم لا شماته الله يكافينا الشر ويبعد عنا هالسوالف

والله انه الام اردا من البنت

!!!!!!!!!!

يالله العفو والعافيه :)

غير معرف يقول...

اذا علي ادناة الدون بتهد البيت و الام العويه بدل ما تهديها تشيشها اكيد بينهد البيت00 مالت علي هالبنات الماسخين اللي ما يعرفون معني الزواج و المسؤليه

نون النساء يقول...

العروس وامها يبيلهم كف حامي يفر الراس

ودوسة بطن ..



جم عمرها هالعروس ؟؟ 7 سنين ؟؟
سوالف يهال هاذي

غير معرف يقول...

بتعقديني بالقصص هاذي بتم عزوبي

I7na 3shagnaha يقول...

الله يعين لو يايب لها بنت الديك

جان اش سوت ؟؟

صج جيل ما يعلم فيه الا ربنا :)

om comment kuwait يقول...

ايه والله انا مع غير معرف

صج هالناس شكثرهم


" السنع و العدال "


انقرض

daggero يقول...

Nikon8

سنة أولى زواج لازم فيها كم نحشة للبنت الى بيت الأهل بس بدون زعل قوى .

أخطر سنة فى الحياة الزوجية لأن الطرفين ماعندهم خبرة فى تجنب الأحتكاك بالتنازل المتبادل لأن الأعتزاز بالرأى والأصرار على كسب الموقف هو مايحكم العلاقة وخاصة أذا ماكان فيه علاقة حب أو معرفة قبل الزواج
سؤال :هل أم البنت مطلقة ؟؟؟

على كل الرجل فى النهاية راح يخسر هذه المعارك كلها وراح يتعود الأعتذار حتى عن أشياء ما سواها ههههههههههههههه

الصراحة كلمة فرغلى تخرع والكى دى دى عصير جيد بس كمية السكر فيه عالية

يمكن عصير المراعى يكون حل وسط

أما الوجبة فما فى على ومبى بالبيض

أهل شرق يقول...

ذكرتيني بمحكمة الفريج

عطتني ماي حااااااااار حرق براطمي

(( الحمد الله على نعمة العقل ))

Nikon 8 يقول...

غير معرف 1
اللي يبي الخير لعياله لازم يتعلم إسلوب التفاوض وأخذ البنت على قد سنها أو عقلها ... قصدي كسب رضا البنت مو عيب إذا كنا راح نكسب أشياء أكبر وهي إستقرار حياتهم الزوجية :)

Nikon 8 يقول...

الزين
مسائك خير وسلام وأحلام هنية :)
صحيح المفروض الأم تهون على بنتها وتساعدها على تقريب وجهات النظر بينها وبين زوجها ... أعني الحوار مطلوب بين الطرفين للتفاهم
تحياتي المسائية الحالمة :)

Nikon 8 يقول...

Sweet Revenge
الدنيا مليانه بما هو أغرب من الخيال فقط إلتفتي حولك لترى صحة كلامي .
ما هو تافه عندنا قد يكون مهم جدا لغيرنا ... المهم هو التفاهم والحوار البناء لمعرفو دوافع الولد ليش عمل كذا ؟
تحياتي المسائية العطرة :))

Nikon 8 يقول...

esTeKaNa
بالضبط يا إستكانة الولد يعتقد إنه مسوى شي زين وبيفرح العروس !!!
طلع الموضوع عايدي عليه !!!
والعروس فهمت إنه بيعاندها :)
شكرا يا عزيزتي ... ما نعلى على إستكاناتج :))

Nikon 8 يقول...

lawyer
بعد تدرين معرس وحاب يدلل مرته :)
ما دري بيصير فيه جذيه ؟
كان المفروض من البنت إنها تفرح بالوجبة وتشكره لأن قصده إنه يفرحها بس هي ما عطته مجال يبرر لها أو هو ما عرف يفهمها عدل .
فعلا يا عزيزتي قضاة الأحوال الشخصية تمر عليهم قصص وأسباب أغرب من جذيه .
تحياتي المسائية العطرة :))

Nikon 8 يقول...

بو سعد
بوسعد ... الحياة الزوجية في البداية فيها الكثير من الأخطاء :)
هناك ثوابت على الزوج والزوجة إنهم يعرفونها منذ بداية الزواج منها بعض ما تفضلت به .
كل شي بالتفاهم ينحل :)
مسائك فل وياسمين :))

Nikon 8 يقول...

Daddy's Girl
هههههههههههههه
حسيت بحرتج من المعرس :)
الأخطاء صدرت من الطرفين من العروس والمعرس وفوقهم أم العروس !!! والوحيده العاقلة في الموضوع هي أم المعرس بصراحة تستاهل بوسة على الراس .... وين فيه وحده مستعده تراضي الزوجة حتى لو كانت خل نقول أساءت التصرف .
العروس فهمت إن المعرس يعاندها
والمعرس في باله إنه يدللها
وأم العروس تبي ريل لبنتها تقدر تعوض فيه اللي ما قدرت تسويه مع زوجها !
قليل من التفاهم والحوار الهادي بين الزوجين يحل الموضوع وبالذات والريل حاب يدللها :)
مسائك خير :))

Nikon 8 يقول...

ARTFUL
أحيانا الزوج يتدبس بزواجه ويكون كأنه متزوج الأم وبنتها !!!
تحياتي العطرة :))

Nikon 8 يقول...

غير معرف 2
الأم يشيش لأن لها دوافعها وأسبابها من وجهة نظرها !
الأم تبي زوج لبنتها تعوض هي نفسها ما فقدته من زوجها .... يعني تبي تطلع حره الريل في النسيب !!!

Nikon 8 يقول...

نون النساء
كثير من البنات يتزوجن الآن وفي بالهن إن الزواج مطاعم وسينمات
والمسؤولية ومعنى الزواج بكون غائب عنهن تماما .... الشكوى لله .
تحياتي المسائية العطرة :))

Nikon 8 يقول...

غير معرف 3
وليش تتعقد ؟؟؟
كل بوستاتي أمدح بالحريم :)
يا هلا فيك والله يرزقك بالمره الصالحه :))

Nikon 8 يقول...

I7na 3shagnaha
لووووووووووووول
الله يحفظهم وينور بصيرتهم :))
تحياتي العطرة لك :))

Nikon 8 يقول...

om comment kuwait
الدنيا لازالت بخير ... والقصص الدالة على ذلك كثيرة .
يا ما الحريم صبروا وكانوا أمهات السنع وضربت فيهم الأمثال ... راح نحاول ننشر بعضها !
أخاف أكثر من قصص سنع الحريم وصبرهم على أزواجهن ويشيشون علي إخوانا الرياييل :)

Nikon 8 يقول...

daggero
يا هلا بالزميل المشجع :)
صار لك فترة تعليقاتك قليلة :)
أم البنت ليست مطلقة ولكنها من النوع الي يحب يسير الريال على هواها وهذا ما لم يحصل لها في الواقع .... فارادت مشاركة بنتها بزوجها ... تفرض عليه شروطها وطلباتها !!!
وبعدين من وين مطلع الومبي أم بيض ؟؟؟
:))
بإنتظار بوست جديد منك ... ليش وقفت بعد بوست الشوي على الواجهات ؟؟
تحياتي المسائية الجميلة :)
يقولون كانت

Nikon 8 يقول...

أهل شرق
لوووووووووووووول
مسرحيات وتمثيليات قبل تعبر عن واقعنا الأن :))
يا هلا :))

Manal يقول...

لول
حاله مزرية
وعليه على زواج من هالنوع

هذا حال الديرة بصراحة

شي يقهر ويحر القلب

الابتعاد عن القيم والامور الاخلاقية البسيطة كفيلة في ان الناس يكون فهمها وتفكيرها سطحي للغاية

بس والله حبكة قصتهم

عسى ما يكون صج عاد
:)

غير معرف يقول...

يابخت نسيب المستقبل فيج (زوج عهود)

chــاي أخضر يقول...

ألف بالامية ريل الام خاتم ولا سكان مايروح بعيد


استغفر الله

شلنا بخلق الله ..

بس أثنينهم يبيلهم يتعلمون شلون يتعاملون مع الجنس الثاني

اهو غلط واهي خو ماكو مخ على امها

رزنامـــــة يقول...

القصة اليوم خلت الدم يفور لقمة راسي ولا اشك انها حقيقية لأن ماشاء الله على دار عزيزة قصصها واقعية الهدف منها توعوي فجزاكِ الله خيرا كثيرا

باختصار شديد
البنت وامها ما يستحون ولا عارفين شئ عن هذا الرباط المقدس
حتى الرسول عليه الصلاة والسلام بنفسه يقول
لو أمرت أحداً أن يسجد لأحد لأمرت المرأة أن تسجد لزوجها

بعدين اكو شئ اسمه تفاهم
اكو شئ اسمه تدرج
اكو شئ اسمه سرية ما بين الزوجين

والامصخ منهم Daddy's Girl
انها موافقة البنت على فعلتها
يابابا اكو اختراع اسمه تفاهم ما بين الازواج اذا خانه التنسيق في المرة الاولى بيتعلم من المرة الثانية
مو تهد البيت وتقط الحجوة بحضن امها

واذا هذا اولها ينعاف تاليها ( المعرس وامه المفروض يقولون هالكلام مو البنت وامها قليلة الادب )

الله يهدي الجميع

Daddy's Girl يقول...

لووول

مو انا اللي عندي عليه حركات جذي... عادي جدا يواعدني بشيء و يطنش او يتليقف اييب لي بديل -أسوأ- و يحرني
...

لكن مفروض و الله لووووو شنوووو ما اطلع من بيت ريلي... احطه و اتفاهم وياه... او اقعد اكمش شعري و ابكي لين اتيي امه اللي واضح انها خوش مرة و سنعة و تبين له وين غلط...

بس هالأيام الأوادم صايرين كبريت....

آخير أشصار عليهم؟ تصالحوا و لا ليلحين؟

بحار مهموم يقول...

مساء المسك والعمبر:
((يروى ان جد ابوي في سنةٍ من السنين حذف امرته بجدر-او بنجر- لانها كانت تمشط شعرها وما انجبت العشى))

بصراحه الرجال المفروض يتنازل عن بعض الاشياء بعد الزواج مثل السهر بالدوانيه وإذا بيسهر ما يطول ويستأثن للسهر بس ويكون طيب وحلو لما يكون متغابي نوعا ما بس لو حاولت تتدلع زياده وتمصخها ارا ان فعل جد ابوي عين العقل في مقل هذا الموفق ((بس مو نجر او جدر علقة كلنكس كافي هههه))

تقبلي مروري
وشكرا.

Nikon 8 يقول...

Manal
جميع قصصي من واقع حياة البيت الكويتي بأفراحه وآلامه... هناك ما حدث لي شخصيا وهناك ما حدث لأقربائي وأحبائي وهناك ما هو من ذكرىات طفولتي .
أنقل تلك القصص لتكون عبرة لنا مع حرصي على عدم الإساءة للبيت الكويتي
وفعلا الإبتعاد عن القيم والأمور الأخلاقية وعدم الإستماع إلى نصائح من أكبر منا سنا سبب لكثير من المشاكل .
يسعد هالصباح اللي شفت فيه تعليقك :))

Nikon 8 يقول...

غير معرف 4
إذا أمه داعية له بيطيح ببناتنا :))

Nikon 8 يقول...

رزنامـــــة
واضح جدا إن القصة فورت دمك ... ولكن آسفة جدا إذا خليت دمك يفر لهذه الدرجة .
أما بالنسبة لـ Daddy's Girl فهي قالت رأيها وما شعرت به بصدق فما أعتقد اللي يقول رأيه حتى لو يخالفنا نقول عنه ماصخ !
وبعدين البنت لها تعليق على ردي عليها بعد ما وضحت لها شوية أمور وأعتقد إن ردها هالمره بيعجك وايد لأن مبين من ردها إنها إنسانه تزن الأمور صح :))
شكرا على رأيك وحياك الله دوم
والمره الثانية راح أتحاشى أفور دمك :))

Nikon 8 يقول...

chــاي أخضر
لووووووووووووووول
بالعكس ريل الأم صعب وما تقدر عليه علشان جذيه تبي ريل حق بنتها يقدرون عليه أهما الثنتين !!
مساكين بعض الرياييل كأنهم متزوجين البنت وأنها بوقت واحد !!

Nikon 8 يقول...

Daddy's Girl
والله كفو هذه المره السنعة :))
الأم نصحته إن يخليها كم يوم عند أهلها لحد ما تهدا وتقدر تتفاهم وياها .... على فكرة الأم كل يوم تتصل فيها وتكلمها وتضحك معاها ... وعاذرتها..... وتقول بعدها ما عرفت الدنيا وباكر بتصير أسنع الحريم :))

Nikon 8 يقول...

بحار مهموم
لوووووووووووووووول
كلامك صحيح وعقابك أشوه خفيف :)
أحاتي مرت جد أبوك إشصار فيها بعد حذفة الجدر ؟؟؟؟

Sn3a يقول...

اي شي
اي شي

يعني مو العروس بس مخها نتفه
لا مو نتفه
الا مكانه خالي
حتى امها

اخييه كسر خاطري الريال
جد جد احسه فقييير مسكييين
وطاع الساحره اللي متزوجها


مو هذا اهو
الحين يا البنت شينه والولد زين
او العكس

جد الزواج من اكبر العلاقات الاجتماعيه اللي تييب البلاوي والمشاكل والمرض!

رزنامـــــة يقول...

لوووووووول
قاعد اقرأ ردي واقول منو هذا ؟؟
ما عرفت نفسي لووول

واكتشفت اني فعلا كنت مندمج بالقصة
ان دل على شئ فانه من اسلوبك الممتع بسرد القصة

سامحونا جميعا على القصور :)

Nikon 8 يقول...

Sn3a
كل طراق بتعلوم لحد ما يتعلمون :)
تحياتي الجميلة لك :))

Nikon 8 يقول...

رزنامـــــة
بسيطة وحصل خير:)
المهم مسامحة Daddy's Girl لك :))
حياك الله دائما :))

Daddy's Girl يقول...

هو توني أشوف...!!!!

انا ماصخة؟!؟!؟!؟!؟!

مايخالف ماصخة ماصخة... بس انا للأسف انا فاهمه سبب حرتها شنو و لو انه رد فعلها مبالغ فيه وايد و الأمور ما تؤخذ بالغلبة و الصراخ...

على العموم مايخالف اخوي اذا نايكون مسامحتك فباي ديفالت طاح الحطب عندي إشدعوه...

بحار مهموم يقول...

هههههههه بصراحه ما سألت عن مصيرها لاني خفت يجيني جدر على الطاير اعرفه جدي الجينات متشابهه فينا ههههه

اكيد شي بديهي طلقها وهذا الواقع ههههه

Nikon 8 يقول...

بحار مهموم
:))
ما سوت عليها تمشط شعر !!!