الاثنين، 24 أغسطس، 2009

نقصة

بما أننا لا زلنا في بدايات الشهر الفضيل ألاحظ أن عادة التنقص لبعضنا البعض لم تحم بعد !
في أول يوم صيام وقبل وقت المغرب بساعة خطر لي خاطر بأن أتقصى عن أحوال الفريج وأشوف فريجنا بدوا بعادة التنقص وإلا لأ ؟
من وراء فرجة صغيرة في باب السكة صرت أرسل نظراتي للشارع ومن زوايا مختلفة لأرى جيراني .... والنتيجة .... ما كو شي ؟ ..... فتحت الباب أكثر ومديت رقبتي لأطلطل ولفيتها لجيران اليمين واليسار .... همن ما كو شي ؟ .... فلا طباخ شايل على راسه صينيية معدن كبيرة تحمل مواعين مملوءة بما لذ وطاب لتوزع على الجيران .... ولا شغالة تحمل بيدها ( سفرطاس ) لجار معين وكل من تراه من جنسيتها في طريقها ( تدق معاه سالفة ) !
الوضع طمني بأني أسير مع الجماعة ... ولا حرج علي بعدم تنقصي لجيراني بشيء في اليوم الأول .... مع إني كنت متشوقة لهذه العادة بس قلت بقلبي ( عن اللقافة )
تحضرني حادثة حصلت لي رمضان الماضي مع النقصة
كنا تجاوزنا منتصف رمضان بقليل وكانت مائدتي يوميا لا تخلو من نقصة ما من جارة قريبة مني أو من صديقة بعيدة أرسلت لي نقصتها مع السايق
ولعل الهريس وصب القفشة واللقيمات هم الأطباق الأكثر ورودا لي من الحبايب
لعلم الجميع بان إعداد هذه الأصناف وبالذات لعائلة صغيرة مثل عائلتي نصفها فاطر ( لأنهم أطفال ) شيء ما يستاهل تعبه !
لذا يكون من الطبيعي أن أتلقى أحيانا أكثر من طبق هريس ومن أكثر من بيت
في ذلك اليوم كانت عادة التنقص في ذروتها قبل حلول العشر الأواخر
وتلقيت ثلاثة أطباق من الهريس .... إخترت أحدهم للفطور ... والثاني للسحور ...أما الثالث فقد هداني تفكيري لأرسالة إلى جارتي البعيدة كنوع من النقصة .
بعد حوالي ساعة جاءتني نقصة من جارة قريبة من منزلي .... وكانت المفاجأة إنه نفسه طبق الهريس الذي أرسلته أنا من قبل لجارتي البعيدة !!
والله أعلم كم منزلا دخل هذا الطبق قبل أن يرجع لي مرة أرى ؟
الموقف جعلني أعيد النظر بإعادة توزيع ما يصلني من نقصات .... لإحتمالية رجوعها لصاحبها كما حدث معي !
ومن يومها قررت إرسال ما يزيد عن حاجتي للمسجد أو أرسله لغبقات الديوانية
وأحمد ربي أن صاحبة طبق الهريس المتنقل تسكن بمنطقة بعيدة عن منزلي وإلا لكان إحراجي أمامها ( ما يترقع ) .

هناك 55 تعليقًا:

Yin مدام يقول...

لووووووووووووول

الله ستر عليج وإلا صج فشيلة لو صاحبة النقصة بنفس الفريج!!

الحمدلله ما أتبع إعادة التدوير في أي شي لا بالهدايا ولا غيرها ولا أؤيدها لأني شهدت إعادة تدوير هدية عادت لصاحبتها الأولى
مو خوش موقف !!


يحليله جارنا الجديد والله وزع صحن حلو ومحترم علينا كلنا مع بطاقة تهنئة بحلول الشهر
وجارنا القديم تنقص لنا برطب
جزاهم الله خير

وأؤيدك بإرسال الطعام للمساجد على الإفطار.. خاصة وأن الكثير من العزاب والعمال يفطر هناك

قواج الله
بوست ممتع
:))

عنيف يقول...

لوووول


ذكريني بسالفه من تقريبا 7 سنوات


دزينا حق جيرانا مطبق زبيدي من النوع الطيب

بعد ربع ساعه ولا يطقون البيت نفس الجيران ومعاهم بنتهم جان تسأل هذا شلون ينوكل ؟؟؟

4 يقول...

:)

هني وعافية

Bahrain Fashion يقول...

Oh, interesting!

Ramadan Kareem :)

As YoU LiKE يقول...

الرطوبة وتأثيرها على التبادل التجاري بين الجيران هي السبب

بعد الـعشر الأيام الأولى .. يزداد التبادل التجاري بإذن الله.

لحظه يقول...

ههههه حده موقف بايخ امبيه...تدرين أنا لي طرشت نقصة حق ييراني تدرين شقول في بالي على اتعبي بياكلونه ولا بينقط ...لأن أنا لاحظت في وايد ناس ماتحب تاكل من أحد غريب مادري ليش عكسي تماما كل ما تييني نقصة اتشقق من الوناسة وأدق أتشكر واشتط شحط بالماعون لي رديته..بوست جميل كعادتك دائما تخلين لكل سالفة نكهة لذيذة

مركبنا يقول...

كل عام وانت بخير يالغاليه (=

{~المباركية~} يقول...

صحفه وعافيه
وكل عام وانتي بخير

صح ملاحظ هالشي انا انه ماكو مثل قبل نشوف ناس تدز نقصه حق الجيران او حركه بالفريج
الظاهر هالعاده بدت تنقرض او التحمق زاد

الزين يقول...

لوووول

قوية حدها

والمسجد وااايد ابرك

:)


صباحج فل يا ست الكل

:*

esTeKaNa يقول...

صبحك الله بالخير يا الغالية
ليش شميت بهالبوست ريحة هريس
:P
على طاري هالموقف العجبة،جدتي تحفظ ودا خاصا لكل أوانيها ومواعينها ومستحيل تتنقص لاحد بصحن عادي عندها هذا شي يفشل وعيب
شنو الحل؟
ستيركز
عليكم بالعافيه
أو
هني وعافية

ومن ثم ام فلان
:))

وفيه خير الماعون ما يرد لبيتها بعد هالعلامة
!!
ستيكرز شفاف واسم جدتي منقوش،تقولين كرستيان ديور
:P
ولكن حل مفيد اتبعته هي قبل سنين والآن اراه منتشر لدى الكثير
:)

Nikon 8 يقول...

إستكانه
صبحج الله بالنور وطاعة الرحمن
والله جدتج وايد مطورة لأن أمي عزيزة توها هابة بالستيكرز وإلا قبل كانت تنيشن على أماعينها بصبغ الأظافر الأحمر !!!
لووووووووووول

Nikon 8 يقول...

الزين
يا هلا بالزين وكل الزين :)
خطتي لهذا الرمضان هي المسجد من غير تفكير ولكن بأطرش سايقنا حتى يحرس مواعين الناس عن لا تضيع :)

ARTFUL يقول...

كااااااااااااااااااااك

قويييييييييييييه

D;

ايي والله حمدي ربج ما مر على صاحبة النقصة

حنا الحمدالله من اول يوم عامر

اليوم مترقبين لقيمات يارتنا D;

ميمة السبيت يقول...

** صج ما تترقع لوووووووول

- انا مشكلتي ان فطوري كل يوم عند امي لأن بس انا وزوجي و بنتي توها صغيره ، البيت اللي انا ساكنه في كانوا يتنقصولي مساكين بس المشكلة اني ما اقدر ارد صحونهم بوقتهم لأن ما اطبخ في بيتي فيتم الصحن بدون قصد عندي فتره و الشي هذا اكره شي عند ربات البيوت ، السنه اعتقد تابوا محد قام يدزلي شي لوووووووووووووووووول

الحمدالله عالنعمة و الله لايقطعها من عادة :)

Sweet Revenge يقول...

احب النقصة سبحان الله طبق مختلف عن الي متعودين عليه في البيت بس اعادة توزيعها اذا فاضت عن الحاجة ما فيه شي بس المشكلة اذا رجع لصاحبه اهنب المشكلة ;)
عساها عادة دايمة ماتنقطع

chandal/danchal!! يقول...

loooooooooooooool

مو خوش سالفة

شكل الجيران من الجيل الصاعد

:)

Nikon 8 يقول...

المباركية

الله يعافيك والله لا يقوله إن هالعادة بتنقرض

Nikon 8 يقول...

مركبنا

وإنتي بخير وسلامة

Nikon 8 يقول...

لحظة
صاجة .. وإذا كنت أعرف إن في ناس ما تاكل من أحد ما أحرجهم ولا أتعب حالي معاهم .

Nikon 8 يقول...

As YoU LiKE
مو بعيدة الرطوبة هي السبب ... وفعلا بعد العشر الأيام الأولى تزيد النقصات .

Nikon 8 يقول...

Bahrain Fashion

والله أكرم وحياكم الله بدار عزيزة :)

Nikon 8 يقول...

4

الله يعافيك

Nikon 8 يقول...

عنيف

لووووووووووول
صج والله
في ناس لحد الحين ما ذاقت السمج ؟

Nikon 8 يقول...

Yin مدام

توبة بعد ... لا تدوير بعد ذيج السالفة
والله يهنيكم بجيرانكم
حنا جارنا النائب السابق يطرش لنا خلال أول ما يبشر ورطب مثلج في رمضان وكله من إنتاج نخيله .

Nikon 8 يقول...

ARTFUL

الله يهنيكم .. أكيد بيطلع زين ما دام الرطوبة إرتفعت .

Nikon 8 يقول...

ميمة السبيت

كل ولا الصحون اللي تتم عند الجيران
أطرش الشغالة من الصبح تروح تجيبهم قبل لا يصحون من النوم .

Nikon 8 يقول...

Sweet Revenge
الله يسمع منج ولا يحرمج من النقصات اللي يحبها قلبج .

Nikon 8 يقول...

chandal/danchal!!

يعني تقدريين تقولين معظمهم !

bent el deera يقول...

لوووووول صارت فيني من قبل و احترييييت... دزيت حق وحده نقصه عطته مرت اخوها وهذي عطته حق مرت عمي ومرت عمي يابته لنا مضافا له سوالف اخرى.. طبعا الوصفه كانت هبه بذيك الفتره والكل يسويها بس عرفتها من بايركسنا (( امي الله يرحمها تحط اول حرف من اسمها بصبغ الاظافر على كل مواعينا هههه))

وهالعاده باذن الله ما تنقطع عطيهم اسبوع وتبلش :>

رزنامـــــة يقول...

عادة النقصة عادة جميلة وفيها اعادة التواصل ما بين الجيران
الله لا يحرمنا من هالعادة الجميلة بالكويت اما موقف بيت الجيران فعلا قوي لوووول فعلا موقف لا تحسدين عليه

Fahad Al Askr يقول...

لما اسمع مصطلح النقصة، على طول إيي في بالي ألوان باهتة وسيارات قديمة وتلفزيونات دقم وفر، لأن للأسف عادات مثل هذه اندثرت، وما عاد في تقدير حق الجيرة مثل قبل.

ملاحظة وايد مهمة:
أنا أحسدج على برود أعصابج، لو أنا داز نقصة حق جاري وتالي اييني الماعون على عداله من أحد ثاني، آخذه وأروح وأطق عليه الباب، وأول ما يتلقاني عند الباب أتعادل له وأمردغه بويهه، وأقول له صج إنك مو مال حشيمة، والشرهة على اللي وجبك، بس المشكلة لإنه قليل أدب أظن بيدق على 777 والغبقة تصير بالمخفر، بس تهقين شنو عقوبة اللي يمردغ ويه جاره بماعون هريس، أظن غرامة خمسين دينار، أنا مشكلتي مو الخمسين، مشكلتي إن جاري بكبره وقتها بيكون ما يسوى خمسين دينار

ma6goog يقول...

عادة جميلة و لكن مالها داعي

ReLaaaX يقول...

looooooool


يالفشتي لو رجع الماعون بيت المره مره ثانيه ;p





لا ماعليج ماانقرضت دام ان فيه ناس ليلحين محافظه عليها :)))



واذا توهقتي كلش كلش وماعندج شي تسوينه بالماعون اليريش مايقول لأ لا ويريش السره لأن يريش جمعيتنا ابلق يلوع الجبد استغفرالله

وبس اللي عليج الحشو فقط لاغير نثريه فوقه طبعا عقب ماتصبينه بماعونهم وطرشيه ;p




دزيلي عنوانكم ادز لج نقصه --> اتحب اتنقص حق الاوادم


آنا اقول الظاهر الناس ليلحين مو مستوعبه ان رمضان

Enter-Q8 يقول...

انا انطر رمضان علشان نقصة جيرانا ام بدر الله يطول بعمرها عليها لقيمات ما كليت مثلها بحياتي
و اذكر مره ان الاهل قاعدين يحنون يبون شغله قلت لها اذا سويتي نفس لقيمات ام بدر اللحين احقق لك مطلبك راحت لها و قالت لها بس ماكو مثل ام بدر

Sn3a يقول...

لوول الله ستر
احسن شي وزعو عالعمال وعالمسيد القريب

بالنسبه لنقصه فريجنا
انا معاج
الوضع اقل من قبل

وتقبل الله

Nikon 8 يقول...

bent el deera
ونستيني إن في أحد مثل أمي عزيزة يحط علامات بصبغ الأظافر على المواعين
لوووووووووووووووول
كأنه إذا كتبت يعني بيرجع لها ؟
الله معطيهم على نياتهم

Nikon 8 يقول...

رزنامـــــة
فعلا اله لا يحرمنا منها
وبالذات لي كانت نقصة ممتازة

Nikon 8 يقول...

Fahad Al Askr
حيا الله شاعرنا فهد
الله يعافي النقصة اللي خلتنا نسمع رايك .. مبارك عليك الشهر أول شي :)
ثانيا : فعلا فيني برود أعصاب وإلا كان جنيت على المواقف اللي تصير لي ... كل واحد أكبر من الثاني :)
وغذا تبي الصج المفروض إن الي دازه لي النقصة أول شي هي اللي تزعل لأني ما فكرت حتى أذوقها
وها ما نوصيك ترا على الجار هالله هالله فيه :)

Nikon 8 يقول...

ma6goog
لولا النقصة لما ذقنا رانقينة بيت اليوسفي العجيبة :))
ومن أرجع لهم الصحن يجيني صحن متروس بداله :)

Nikon 8 يقول...

ReLaaaX

تصدقين الكل يحجي عن لذته إهو ونخي العديلية :)
نقصتج إعتبريها واصله ما تقصرين يا الغالية... مشكورة حبيبتي :)

RoOra يقول...

امي عكسج تحاتي ماعون الأوادم ;p

RoOra يقول...

استكانه ماعون يديتج بو لزقه
نفس خالاتي و امي
كل وحده ماعونها عليه لزقه ;p

xname يقول...

موووقف كللش مو حلووو

إحنا بدينا بالتنقص بأول يوم بالرمضان

والجيران عليهم تفنتك ماشاءالله يبدعون والسفره تنترس بالأشكال والأرناق =))

كل عام وأنتي بخير

Nikon 8 يقول...

Enter-Q8
شوقتنا يا بووليد
الله يهنيك بأم بدر ولقيماتهاوعساها عالصحة والعافية :)

Nikon 8 يقول...

Sn3a
منا ومنج ... آمين
ومالي إلا المسجد أطرش لهم الزايد من الأكل :)

Nikon 8 يقول...

RoOra
جيراني مجربين علشان جذيه ما أحاتي مواعيني عندهم لأنهم مجربين ما ينفقد عندهم شي :)

Nikon 8 يقول...

xname
وإنتي بخير وسلامة :)
وعوافي ... عساها عادة ما تنقطع :)

dm3t _almghor يقول...

موخوش موقف :)))))

السنة هذي وبحكم فريج الوالدة الأغلبية

يعاني من هروب الخدم فقررو ان يوزعون

النقصة بالصحون البلاستيك :))

تبين الصج مت من الضحك عليهم

بس علشان لايتعبون بغسيل الصحون ويلتزمون بردهم

:)))))))))

Nikon 8 يقول...

dm3t _almghor
خوش فكرة والله ... ما فطنت فيها من قبل
بأجربها :)

-mate يقول...

لوووول

عجيبة السالفة

والجيران - الله يهداهم- مايستحون
:)

Nikon 8 يقول...

-mate
لو يدرون ما سووها :)
لأني أرسلتها لجار وجتني من جار آخر ما يدري إني المصدر !

U know WHO يقول...

يا حلات الهريس..
ما ينشبع منه..
احنا اذا اكثرت عندنا نقصة الهريس..
ناخذ وحدة ونرد نخلطهاونطبخها بالفلفل ونسويها هريسه حارة :)
ورمضان كريم ؛)

ومبارك عليج الشهر

xname يقول...

نيكون قاعده افكر
اذا بتردين الماعون لجيرانج المطرشينه لج
والجيران بيردون الماعون لجيرانهم اللي انتي معطيتهم الماعون
وتالي الماعون بينرد لج لووول

فهمتي علي XD

صج مووقف

Nikon 8 يقول...

U know WHO

والله خوش فكرة :)
ما عندج فكرة ثانية حق اللي ما يحبون الفلفل ؟

Nikon 8 يقول...

xname
هذا مصير إعادة التدوير
ما وراه غير الفشلة
لوووووووووووول