الاثنين، 7 ديسمبر 2009

اليامعة

تحقيق جريدة الوطن المنشور يوم الجمعة الماضي عن الرقية أثار ذكريات طريفة لصبايا دار عزيزة



فضلت أن أكون المستمعة لألتقط قصصا لم ألحق عليها لزمان مضى


تقول إحداهن :


حرصت على إقتناء يامعة ( الجامعة أو الرقية ) أمي الله يرحمها عندما تقاسمنا أنا وأخوتي مقتنياتها بعد وفاتها الله يرحمها


يامعة المرحومة أمي كانت لغرض الشفاء من الأمراض التي تعاني منها بأواخر أيامها وبالذات عوار صداع الراس الذي يحل ضيفا ثقيلا دائما علي أمي وورثته أنا عنها !


اليامعة كانت من أثمن الأشياء عند أمي تحرص عليها أشد الحرص ولا تفرط بإعارتها للمهملين


وكل ما حست ببوادر عوار الراس قالت : جيبوا لي اليامعة


تعلقها على صدرها وتنام ولا تصحو الصبح إلا ما فيها إلا العافية


تلتفت لأمي عزيزة وتسألها : تذكرين هاليامعة


أمي عزيزة بتأكيد وهي تلتفت لطيبة بنت الجيران وتقول : إشلون ما أذكر وأمج ماخذه طيبة للملا يوم إنها عروس وبطت بالحمال وسوّا لها يامعة وعقبها لا إله إلا الله هلُوا عليها العيال هلْ واحد ورا الثاني .... تطلع من نفاس وتحمل بالثاني !!!


يضحكون مع بعض وتكمل


اللي سوا لنا اليامعة مطوع من أهل بوحليفة خوش ريال ونفسه مبروك وقرايته وحده بوحده والناس عليه كسره ... خلق الله ما خلق ... وذاك من ذاك اللي يحصل على يامعة من الملا


ويوم سمعنا إنه توفي بعد سنين قالت لي بنتي :


يمه أخاف نارث عوار الراس منج خلينا نفتح اليامعة ونعرف الآية المكتوبة فيها نفيد روحنا ونفيد الناس ... اليامعة كل مالها وتعتق زيادة وأخاف تنمحي الكتبة اللي فيها وما نعرف نفكها


قعدت أتفكر .... كلام بنتي عدل .... رضيت إنها تفتح اليامعة الجلد المخيطة باليد وبداخلها ورقة مسفطة وفيها الكتبة


فتحتها بنتي وقرت بسم الله الرحمن الرحيم


من الجهرا للسالمية رافعين علم الحرية ( أغنية لعبدالحليم حافظ غناها للكويت )


وقامت تطالعني ... وأنا أنهرها : إقري عدل ... ما قلت لج غني


وبنيتي تقول لي : يمه والله هذا اللي مكتوب !


هو ... هذي القراية اللي تطيب أمي وتطيبني طول هالسنين !!!


نراقب جميعا مجرى الحديث وقد إنتقل لطيبة لتكمل الحديث :


وفتحت اليامعة اللي عندي وإلا اللي مكتوب فيها هالجملة :


بسم الله الرحمن الرحيم


إن حملتي ودي وإن ما حملتي عند يدّي


إشهالحجي ؟


وقعدت أتفكر .... معقولة ؟


هذي اليامعة اللي طيبتني وصرت أتنقصها لكل وحده ما تحمل ؟


قمنا وأخذنا السايق ورحنا لبيت الملا في بوحليفة وطلعت لنا بنته وهللت ورحبت فينا


كأنا طايحين عليها من السما وعتبت علينا وقالت :


يا حافظ ما شفناكم من عزا أبوي الله يرحمه ؟


عاد سألوا عني ؟


يعني إلا قراية ويامعة وإلا ما تسألون ؟


وقلنا لها على طاري أبوج الله يرحمه وقرايته عندنا سالفة لج ونبي نعرف الصج لأنا بصراحة محنا قادرين نصدق ؟


وصفينا عليها السالفة ....بالأول كانت مفتخرة بقراية أبوها وكان فعلا يستحق الفخر وله مواقف لا تنسى ( بفك عوق ناس وايده ) بفضل من الله سبحانه وتعالى ومن ثم قرايته 


ويوم قلنا لها إنا حنا فتحنا اليامعة وعلمناها اللي مكتوب فيها فشلت فورا وعضت على براطمها وضحكت وهي قاطه راسها بالقاع
وشر البلية ما يضحك وضحكنا نحن معها !!!


تدرون إشطلع ؟


أثاري الملا يوم كبر وصار نظره خفيف صار يطلب من بنته تكتب له بعض الآيات على قطع ورق صغيرة


البنت كانت صغيرة وتبي تلعب بالحوش مع البنات وتمللت من كثر ما يناديها أبوها ويطلب منها تكتب


تقول قمت أكتب اللي يخطر ببالي ... وقلبي مع اللعب أبي أخلص بسرعة وألحق


ولما كبرت وصرت أستوعب اللي سويته وفهمت الدين وآيات الله صرت بس أفكر بمصير الأوراق اللي كتبتها
وأطلب من الله إنه يسامحني وأطلب سماح والدي على اللي سويته بحقه وبحق الدين وبحق سمعته الطيبة 


سألناها : عساهم مو وايدين ؟


لا والله ما هم وايدين لأن مرت أخوي لما شافت حالي كذيه إشفقت على أبوي صارت تكتب له تالي .... هذيله ثنتين طبوا بيدكم والله يستر من الباجين من بيده طاحوا ؟


ونظرت لنا بنظرات الأسف وهي تقول :


الحمدالله اللي طاحت بيدكم مو بيد غرب .... حللوني وعسى الله يسامحني .


هناك 26 تعليقًا:

flaanh يقول...

تعرفين ..

دايما اقول انه الامور بالنفسية ..

يعني لما احط اليامعة ويكون عندي احساس اني بخف ..يكون تفكير ايجابي ويخف الامر ولله الحمد..

امر ايجابي + اليامعة= شفاء

ف لله الحمد اولا واخيرا ..

الف شكر لج خيتوووو...

غير معرف يقول...

يبيلنا يامعه اصليه حق الكويت

عسي الله يحفظها ويحنن قلوب اهلها عليها

تري النعمه زواله

ولد الديرة يقول...

لووووووووووووول

يازت لي من الجهر للسالمية

خوووش يامعة جمعت المناطق الخارجية والداخلية

:)

chandal/danchal!! يقول...

مت من الضحك عالسالفة

والا عند يدي؟

لووووووووووووووووووول

lawyer يقول...

كلا بصوووووووووب وهالجلمه بصووووووب



إن حملتي ودي وإن ما حملتي عند يدّي







لوووووووووووووووووووول عجبه صج شر البليه ما يضحك

rabo3a يقول...

صبحج الله بالخير
صاجة امي لحد الحين خاشة يامعة يدتي (جدتي) . وتصدقين ازرعت فينا الاعتقاد في هذا الشي الي اهو الاعتقاد بالشفاء من الامراض النفسية اولا ومن ثم الامراض الاخرى في قراءة القراءن .
ادرجة انحطة تحت مخدة اليهال .
تصدقين ان بنتي عمرها 9 سنوات ماخذه هذا الطبع من امي وما تعرف تنام الا والقران تحت مخدتها .

عاد لا طوليين علينا

ARTFUL يقول...

على قبل جم اسبوع شايب بالدوانيه اييب يوامع يوزع على الشياب

عاد في من الشياب واحد أسود يقوله انت بالذات يبتلك وحده خرجتها بيضه علشان تبين

p;

Sweet Revenge يقول...

يا سبحان الله ,يمكن الي خلي الام تطيب من صداعها كل مرة الظن ان اليامعه معاها .
بس اشوة الشيخ طلع برئ

ميمة السبيت يقول...

* ايه والله عند يدي .. بس والله حتى خرابيطها يابت نتيجة

- الحمدلله الذي عافانا ساعات الواحد اذا كان مضايق مايدري شسوي بعمره و يصدق اي شي

الزين يقول...

ايمانج وتصديقج بالشي يخلي له المفعول اللي ترتجينه

شي طبيعا واهي حيله عقليه لعبوا على وترها السحره والدجالين

سالفه اليامعه ما اقدر اقول صج ولا جذب
بس انا ما اصدقها
ولا راح الجأ لها

وعلى فكره
نطري فضه وشاهين
بندخل في مرحلة هالخزعبلات
:))

والله يعنيكم على خرابيطي

:**

صباح شاي الزنجبيل

New Bride يقول...

وااااااي مت من الضحك لووووول و الله النفسية تلعب دور حدها بالموضوع

بنت الشاميه يقول...

غششششششششيت من الضحك


لا مو معقوله
كل شيئ الا اذا ما حملتي عند يدي
هههههههههه

لاحول ولا قوة الا بالله

مشكوره انج وسعتي صدري بهالبوست
الى الحين واناااااا اضحك
ههههههههه
من صج ما قصرتي

:: بـوح الصمـت :: يقول...

لوول استغفر الله .. صج ضحكوني !
لكن حاليّاً للأسف في ناس تصدق هالخرافات !

عن النبي صلى الله عليه وسلم : "إن الرُّقى والتمائم والتِّولة شرك "


إطلعي على هالموضوع .. لعلّ الله أن ينفعنا وإيّاكِ والقراء به ..

http://www.islamway.com/?iw_s=Article&iw_a=view&article_id=241

لإنه مما يؤسفني أن البعض لا زال يجهل أن تعليق تلك التمائم من الخرافات المؤديّة إلى الشرك الأصغر ..

شـكراً لكِ ..

Nikon 8 يقول...

flaanh
أهم شي النفسية
تلعب دور مهم :)
يا مسا الخيرات يا الغالية:)

Nikon 8 يقول...

غير معرف 1
المهم القناعات الشخصية للناس
لو نسوي ألف يامعة من دون قناعة ما كو فايدة
الله يحفظ الجميع ويا هلا :)

Nikon 8 يقول...

ولد الديرة

:)
ومع ذلك اللي مسوين اليامعة من أهل بوحليفة وما إحتجوا إن منطقتهم مو مذكورة !
حياك الله يا أخي العزيز :)

Nikon 8 يقول...

lawyer
لو شايفة صدمتهم وويوهم إشلون تغيرت ألوانها
لووووووول
يا مسا البرد الناعم يا لوير
ولا تتأخرين علينا :)

Nikon 8 يقول...

chandal/danchal!!

لوووووووووووووول
لا وحملت بعد !
يا مسا الأنوار :)

Nikon 8 يقول...

rabo3a
يا هلا بربوعة
عذروني جميعا على التأخير صايره مشغولة هذي الأيام
والله يحفظنا بحفظنا للقرآن
يا هلا يا ربوعة :)

Nikon 8 يقول...

ARTFUL

اليامعة أنواع هذا شي يوزع على الشياب ؟
لوووووووووووووووول
خوش سالفة
:)
حياك الله

Nikon 8 يقول...

Sweet Revenge
الملا أشوه طلع بريء من فعايل فعايل بنته النزغة
دائما أقول الله لا يحوجنا لأحد
لأن هذي النتيجة من بيتحملنا ويتحمل طلباتنا !
حياك الله ومسا الورد :)

Nikon 8 يقول...

ميمة السبيت
إي والله الجمد الله على العافية
يا هلا بميمتنا :)

Nikon 8 يقول...

الزين
الله شاي زنجبيل يا بختي :)
ولا تقولين خرابيط هذي عصارة أفكارج وقتج وحنا حدنا مندمجين معاك
وبإنتظار فضة الحبيبة وشاهين
يا مسا الدفا والكستنا المشوية :)

Nikon 8 يقول...

New Bride

طبعا النفسية تلعب دور وتفويض أمرنا لله وصرف التفكير عن الموضوع أيضا يسهل الأمر
يا مسا الأنوار يا عزيزتي :)

Nikon 8 يقول...

بنت الشاميه
عسا الفرحة والضحكة ما تفارقج يا الغالية :)
يا مساالبسمة الصافية:))

Nikon 8 يقول...

:: بـوح الصمـت

اعفو يا عزيزتي وشكرا على الرابط
أن نحفظ القرآن بقلوبنا وأحساسينا وإيماننا أفضل من تعليق أيات على حائط أو داخل ورقة ولا تقرأ بالقلب
شكرا يا عزيزتي ويا مسا العفو والعافية :)