الأحد، 6 يونيو، 2010

حبل الكذب قصير

خلال جلستنا الصباحية لشرب قهوة الصباح

حدثتنا إحدى الزميلات عن لذة الريوق في المطعم الفلاني وجمال منظره المطل على بحر الخليج الهادي وزرقته الجميلة التي تزيح الهم من القلب !

تشوقنا جميعا للوصف وتحركت فينا الرغبة الملحة لتجربة هذا المطعم معا وكسر روتين حياتنا

أكثرنا تشوقا كانت زميلتنا رشا بالرغم من أن زوجها لا يحبذ خروجها خلال ساعات الدوام بغرض الريوق في المطاعم والكافيهات !

وبما أننا نريد الإستفادة من ساعات الإسئذانات الرسمية لأمور أخرى

ولأن ونهايات الأسبوع محجوزة مسبقا للزيارات العائلية وترفيه الأبناء

إقترحت علينا واحدة من البنات أن نطلب من المدير الإستئذان بحجة تقديم واجب العزاء !

وهي حجة وهمية طبعا القصد منها السماح لنا بالخروج بوقت واحد وبدون أن تكون محتسبة ضمن الإستئذانات الرسمية !

كنا ست موظفات ( تسحبنا ) منفردات واحدة وراء الأخرى حتى لا يشعروا بنا باقي الموظفين والموظفات ويسألونا وين رايحين ؟

انطلقنا جميعا بسيارة واحدة مباشرة نحو المطعم

ورجعنا للدوام بعد ثلاث ساعات بالضبط ونحن نشعر بالراحة والإنشراح

لا نحاتي غير غداء البيت لأن لا مكان له بعد أن ( ترسنا بطونا ) بالريوق العجيب

دخل المدير بعد وصولنا لمكتبة بدقائق قليلة

واستدعى على الفور زميلتنا التي طلبت الإذن منه بالخروج

لم نشك باستدعاء المدير لزميلتنا بسبب النعاس الذي بدأ يداعب جفوننا بعد مشوارالطريق في مثل هذا الجو الحار و ( تثقلنا ) بالأكل

زميلتنا خرجت من المدير وهي بنص وجه من الإحراج

رؤيتنا لها أطارت كل أثر للنعاس وسألناها بصوت واحد :

إشفيج ؟؟؟؟

لنكتشف أن المديرمنزعج جدا من كذبنا عليه !

لأنه رآنا وهو خارج من المستشفى الأميري ونحن نخرج بسيارتنا من مواقف المطعم الواقع على شارع الخليج العربي متجهين نحو عملنا !!!
وعندما سألها :
ليش تأخرتوا ؟
قالت له إن بيت العزاء بعيد ويقع في المنطقة الفلانية
وذكرت له إسم منطقة بعيدة تماما عن مطعمنا
عندها قال لها :
يعني العزا ما كان في المطعم الفلاني اللي شفتكم طلعين منه ؟
طبعا الزميلة ( إنربط لسانها ) ولا عذر لها والمدير بنفسه ( طايح علينا )
بالجرم المشهود !!!
لا أعلم أي صدفة تلك التي ( تسلطت ) علينا وفضحتنا ونحن الموظفات المثاليات بنظر مديرنا ؟؟

وجعلتنا ( نطيح من عينه ) !

أغلب الموظفين والموظفات يختلقون أعذارا أشكالا وألوانا ومع ذلك لا أحد يكتشفهم

وليش حنا من بد الناس ننكشف من أول كذبة ؟
وبيضاء بعد ؟

كل هذا يعني من ( قراده حظنا ) ؟

وإلا المسألة لا تتعدي حوبة ريل رشا ؟

غريبة والله !
حبل كذبتنا أقصر مما توقعنا !!!

هناك 40 تعليقًا:

سلة ميوّة يقول...

عاد تدرين ...
انا أمشي على مثل

don't lie..don't say!


وماجذب لو شنو على شان أطلع وإلا أستأذن
لسبب بسيط
إني أعرف حظي زين مازين..وقرادتي اللهم بارك مافوقها فوق...
:) من جذي أدري أي جذبة بنجّك فيها...
( بس صكيتو على حظي إنتو :) )
من 3 شهور
تأخرت على الدوام
وأنا طبعي من 7 متواجدة قبل الكاتبات والمرضى بعد:)
بس مره من قرادة الحظ مادري شلون راحت علي نومة
وصلت الدوام والا رئيس قسمي يدور علي بقظوظ الطوفا...شدعوه عليك.. المهم ماعلينا..السكرتيرة دقت وانا بالطريج
دكتورة وينج
قتلها يمج الدكتور فلان :)؟
ترد: اي ان شالله..إنتي بس وينج؟
أنا: بالطريج..قوليلة بالطريج...

أول ما وصلت وإلا بويهي

دكتتوره وينج تأخرتي ( وهو يطالع ساعته ) كانت 8 وربع...ماراح اقول اشمعني انا اتشوف ساعتك علي؟ وماني قايله ليش فلان يداوم تسع...
ابتسمت والويه متفخ وبعين قويه
قلت له:

راحت علي نومة!


:) أهوا فز..أول ماسمعها...
وتوهق ماعرف شيقول...من الوهقة صار مثل اليهال قالي لاتعيدنها هاهاهاهاهاهي
شنو لاتعيدنها بايقه حلاو:)

المهم...عقبها حتى لو تأخرت عشر دقايق صار يستحي يسألني ...لأن يدري بعطي دلاقم وماراح استحي:)


قرقة أكثر من البوست...
ولهنا عليج وعلى بوستاتج الناطعه


مسى الورد النوير
وياعساه ريوق العافية *:

Danderma يقول...

شوفي سبحان الله انا اكتشفت هالشغلة مع الزمن

الريال إذا مو راضي تسوين شيء و عاندتي و سويتيه لازم حوبة الريال تقبس و تخرب الشيء... او كلش كلش عقب ما تتهنين فيه او يصير فيك شيء ينسيك الوناسة اللي تونستيها و يطلعها من جبدك

مرة ثانية لا تخذونها وياكم هال رشا إلا بإقرار خطي من ريلها انه موافق و فرحان... و لا المطاعم متروسة موظفين امزرقين من الدوام إشمعنا على حظكم انتو؟؟؟

Nikon 8 يقول...

سلة ميوّة

يا زينج والله من سلة ميوة
ولهت عليج العافية حبيبتي
تصدقين ضحكت على دلاقيمج
ههههههههههههه
لكن هذا اللي يفيد
عيل كذبتنا اللي طولت حتى يوم ؟
مسا العسل يا عسل
:)

Nikon 8 يقول...

Danderma

هههههههههههه
صاجة والله بسالفة الإذن الخطي من ريل رشا وعجبني يكون فرحان فرقها يا الله نلحق راس .... إي والله
أما المطعم فكان حريم متقاعدات
وبنات مزرقات من الدوام
وناس تطالع ناس جود معرف بعض !
مسا الأنوار يا غالية
:)

الليوان يقول...

عزيزتي نيكون
انا كنت اجذب عشان اروح اي مكان مع رفيجاتي يوم انا بالجامعة خبرج على وقتي مافية مثل الحين هالمجمعات حدنا جمعية العديلية والا الصالحية
بس مرة قاللي خالي يابعد قلبي(يوم درى عني لان امي تدري بس كنت اخش عن ابوي رحمة الله علية)
اذا صار فيج شي بالطريج او اختربت سيارتج من بتدقين علية اكيد ابوج ساعتها بيفقد الثقة فيج في كل شي وبتخسرين ابسط حقوقج وماراح يثق فيج ابد
عقبها صرت ماجذب
وعلى سالفة الريل 100% صح عن تجربة
وسامحيني قرقت وايد
تحياتي

Deema يقول...

ما اهجا الرياييل عندهم حوبة، أحسها ميزة نسائية

أنا فشلت و انا اقرا..

:s

نمووول يقول...

امر الله
عشان ما تتمادون بالجذب يمكن :), يلا اول مرة مو مشكلة, مادري ليش حسيت ان مديركم طيب ..

تكبرون وتنسون

صباح الورد ,,

Nikon 8 يقول...

الليوان

حيا الله الليوان ويازين قرقته
:)
كلامج صحيح ولكن يبقى التزرق من الدوام على نكهة :))

Nikon 8 يقول...

Deema

لا صدقي إن الرياييل عندهم حوبة
وبالذات الوالدين والزوج :)
ديما إذا إنتي من القراية فشلتي شتقولين عنا إن الموقف صار وجها لوجه !
صباحج سكر :)

Nikon 8 يقول...

نمووول

صباح الطيب والرياحيين يا أخي العزيز
مديرنا فعلا طيب
لدرجة إن قال إذا مشتهين تطلعون مرة ثانية قولوا لي بس لا تكذبون عليّ !
أطيب من جذيه بعد إشنبي ؟

ARTFUL يقول...

الله يغربل ابليسكم

بعد ما تعرفون تجذبون

لو انا منكم لا جذب ولا خرابيط

اخذوا اجازه واستانسوا

وبلا عوار راس


:)

Antonio يقول...

نيكون

يعطيج العافية

غائب عن مدونتك كثيرا وما ان ارجع حتى استمتع بكل الحكايات التي تسطرين اعذري غيابي ..

الصراحة صج حبل الجذب قصير ..
واللي صار ترى محبة من الله عشان ما تجذبون مره ثانية لان مو من طبعكم
وهذا الحظ بعد شتسوين ...

بس اهم شي ان الريوق كان طيب واذا على مديركم خل يطوف عاد لايزعل وايد
يامه ضبطوه وخصوصا مع زوجته (السالفه القديمه) ..

بس هم ما يمنع اعتذروله وقولوله ترى كان بخاطرنا ... :)

دمتي بالف خير
ودار العزيزه دائما
عزيزه

تقبلي ودي
الكبير

ميمة السبيت يقول...

** طلع من جبدكم الريوق كاش ماسوى عليكم

بس والله فشله راضوه يبوله كاكاو و لا حلو حق مكتبة

مـي يقول...

بصراحة موقف محرج جدا جدا ..

يعني راحت الوناسة كلها من عقب كلام المدير !

أنا عندي قناعة ان أي تصرف أسويه مع مديري ، بيسوونه فيني الموظفات تحتي !

chandal/danchal!! يقول...

loooooooooooooool

كـــــــــــــابسة -بطريقة سعيد صالح-


اهو زعلان ليش ما تنقصتوله من الترويئة

يالله يكبر وينسى

:)))


بصراحة مافي داعي يسأل عن سبب الاستئذان واذا سأل اقوله عندي شغيل (يعني مو شغلك تسأل بس بطريقة مؤدبة)... مبتلشين فيني بلشة!

why me يقول...

الموقف اللي صار وايد صعب وايد

Seema* يقول...

خنت حيلي ما سوت عليكم! ;P
بالعافية ولا تعيدونها على جذب! ; )

esTeKaNa يقول...

يا مسا الورد يا شيخة صبايا دار عزيزه
:)
تصدقين انا اقرا شقالها المدير
حسيت لو انا مكانها بغطي ويهي من الفشله
!!
خزياه ..كل شي يتسلط
الاهل اذا ما رضو على طلعه حتى موقف ما تلقين،وتوني اكتشف ان الريل بعد اذا مو راضي تتعسر الطلعه غير نمونه
لعنه الفراعنه مو بس حوبه
:P

Sami يقول...

Casper & Gambini's ؟؟ ما شفتكم انا كنت فوق :)

Sn3a يقول...

فشششله
بس صج كلامج سبحان الله اللي ينحاشون محد يدري عنهم
بس لين سويتي الشي اول مره كلمن يدري ويشوف

المهم بالعافيه الريوق

فيلسوف يقول...

موقف صاحبتك حدددددددددده بايخ

شفتوا يا حريم هذه حوووبه زوج المدام المصون رشا

عشان ما تطلعون من ورا ازواجكم

ترا حوبت الريايل كبيره ديروا بالكم

P:

.... دائما انتظر البوست منج لانه دائما يكون مشوق

الله يحفظكم

Nikon 8 يقول...

ARTFUL

تصدق إن التزرق أعاد لنا شعور الشطانة لما كنا صغار
صج كانت قصة وجه لكنها مغامرة
:)

Nikon 8 يقول...

Antonio

الله يعافيك يا أخي الكريم
حياك الله دوم وقت ما حبيت :)
وفعلا مديرنا طيب والله مو راضي لنا إنا نكذب على مديرنا

Nikon 8 يقول...

ميمة السبيت

إي وإنتي الصاجة طلع من جبدنا هالريوق
المرة الثنية لي نوينا على ريوق راح نصارح المدير بالصج :)

Nikon 8 يقول...

مـي

يا هلا بمي :)
كلامج خلاني أتفكر زين
وفعلا الحياة مثل الدين كل شي نسويه ننلاقيه وبسرعة :)

Nikon 8 يقول...

chandal/danchal!!

يا هلا بالعزيزة جندل
:)
المشكلة إن مديرنا ما يسأل ليش بناخذ إذن لكن الشيطان زين لنا إنا ناخذ زيادة على أذوناتنا الرسمية ومن غير ما يخصمون علينا :)

Nikon 8 يقول...

why me

أكيد صعب يا عزيزتي
كنا في موقف يصعب على العدو :)

Nikon 8 يقول...

Seema*

الله يعافيج حبيبتي :)
راح نعيدها على صج المره الثانية :))

Nikon 8 يقول...

esTeKaNa

هههههههههههههههه
صدقتي والله بسالفة لعنة الفراعنة
وزميلتنا اللي صار الموقف بوجها قاعده تفكر بطريقة تكسب فيها ثقته مرة ثانية :)

Nikon 8 يقول...

Sami

لا ما كنا بهذا المطعم :)
وبعدين وين الدوام ؟
ليش مزرق ؟
:))

Nikon 8 يقول...

Sn3a

الله يعافيج يا سنعة
أنا أقول إن الله ما يبينا نكذب علشان جذيه إنفضحنا بحزتها :)
نعيدها إنشاءالله على صج دام المدير ما عنده مانع :))

Nikon 8 يقول...

فيلسوف

تصدق يا فيلسوف إني خفت من تحذيراتك
بصراحة ما له داعي الزوجات يسوون شي ما يرضي الزوج ولو من وراء ظهره
أظن ما راح يصير بركة
حياك الله دوم يا عزيزي في دارك ومكانك
:)

كبرياء وردة يقول...

لو عازمينه على الريوق ما صار كل هذا :p

Nikon 8 يقول...

كبرياء وردة

لو ندري عندج مضاد للحوبات جان من غير حجي عازمينج
:))

Manal يقول...

نيكون الغالية
صج اشتقت لكتاباتج

:)

عليكم بالعافية الريوق الحلو
ويالله هالمرة الوحدة وما اتوقع بتكررونها
:)

Nikon 8 يقول...

Manal

واي
ما أصدق منال وينج ؟
إشلونج وإشلون دراستج وإشلون العيال وأبوهم ؟
ولهنا عليج وايد وايد
:)
لا بتعيدها بس بنقول الصج المرة الثانية حتى نتهنا أكثر
:)

aL-NooR . يقول...

واااااااي
حبل الجذب قصير حيــــل
يعني ماكو الا الاميري p;

بس يكبر و ينسى p;
عاد حسيته طيب

و اشوة مو انتي
اللي صارت بويهج
:)

******************

Nikon 8 يقول...

aL-NooR

هلا بالنور
إي نعم مديرنا حده طيب
وكون الموقف ما صار بوجهي ما يعني إن فلت منه لأنا كلنا مشتركين بالكذبة الكبيرة
:)

NOIR يقول...

امبـــــــيه!!
ههههههههه

انا تسير فيني الصبح .. لما تروح على نومه ادق عليهم و اقولهم بستان
ما احب اتاخر و لا احب اجذب

اخاف الصراحه بيني و بينج:S

يلا اتحصل ..

و بالعافية :*

Hopeless Sight يقول...

أنا أخاف أكذب و السبب نفس اللي صار لكم !