الاثنين، 19 يوليو 2010

السر

صادفتها في مكان مطعم ما

كانت برفقة زوجها تعدت هي وهو سن الشباب

ومع ذلك تتدلع بروح فتاة العشرينات

تتكلم معه وكأنها في منزلها فصوتها مسموعا لمن حولها

تتدلع على الزوج وكأنها لوحدهما

يبتسم لحركاتها وكلامها وكأنه يراها ويسمعها للمرة الأولى

لا يعجبها العجب فكلما طلب الزوج لها صنفا من الأكل

ذاقت القليل منه وأبعدته عنها

وهو لا ييأس من طلب غيره وغيره من الطعام

إلى أن حاز أحدهم على إعجابها وتهلل وجه الزوج فرحا

فأرسلت له نظرة شكر ولمسه رقيقة من يدها على خده

تراعيه وتدلل به كأنه طفل

تذوق الأكل قبله وتحسن من نكهته بإضافة قطرات الليمون وطحن الفلفل الأسود الطازج عليه

أول لقمة للزوج هي هدية منه في فم زوجته

وعندما إنتهيا مسحت طرف فمه بمنديلها وتأكدت من نظافة أطراف أكمامة من بقايا الأكل

وقاما معا من الطاولة لمغادرة المطعم

أول مرة أجلس في مطعم آكل ما في صحني وعيوني ( صابه حوله ) على الطاولة التي بجواري !

لا شعوريا قلت لزوجي : إذا قلت لك الأكل مو عاجبني إشلون بتتصرف ؟

قال : ما جبتك غصب إنتي اللي تحنين عليّ من زمان ودك بهالمطعم ... وإذا ما عجبك شي إتصلي الحين على أي مطعم وطلبي اللي تبين وبيكون واصل البيت على ما نوصل !

أنا : ويه على بالي بتختب نفس الطاولة اللي جنبي

هو : كل واحد يختب على قده ... وبعدين أنا أقترحت عليج حل ... بعد ما قلت لج نامي خفيفة أصح لج ؟!

ثم أردف بعتب : قنعي باللي عندج لا تطالعين غيرج

أحسست حقا بالأسف على عبارتي لزوجي لأنه ما يستاهل أقارنه بغيره

لطفت الجو بشوية عبارات وشكر وإمتنان على عزيمته لي

ذهبت لدورة المياة وهناك صادفت جارتي على الطاولة تهم بالمغادرة

إبتسمت لها وإبتسمت لي وهي تسألني كيف كان طعامكم

رددت عليها بالثناء ومدح الخدمة الجيدة

أيدتني بذلك وهي تعتذر عن ما سببته لهم مشقة لجلب ما يعجبها من طعام فذوقها تقلييدي جدا ولا تستسيغ الغريب من الطعام

لم أنس طبعا أن ألمح بسعة بال زوجها وحرصه على إرضاء ذوقها

كما أطريت طريقة تدليلها لزوجها

إبتسمت إبتسامة المنتصر ونظرت لي نظرة تحمل القليل من المرارة وقالت :

لا أعرفك ولكني سأقول لك سرا

تكونين مطاعة الكلمة ومدللة عندما تمضين 30 سنة زوجية

و 90% مما يحدث أمامك وتسمعينه تطبقين فيه شعار

لا أسمع ولا أرى ولا أتكلم

هناك 18 تعليقًا:

Hope يقول...

السلام عليكم

يا معوده يقولج اقنع بما قسمه الله لك تكن اسعد الناس
لا تطالعين غيرج ترى المناظر خداعة
عيل ثلاثين سنه لا أسمع لا أرى لا أتكلم
والله ما يسوى عليها هالدلال تلقينه مطلعه من جبدها

قواج الله
=]

الليوان يقول...

واااااي ياحليلة
نيكون.. اكيد مو كويتي (؛
صح!!!!
بس يلا .... رياييلنا احسن من غيرهم
على قولة ابوكم
قنعي باللي عندج ولا تطالعين غيرج
بس تدرين
اكيد في شي عندكم مو عندهم
لازم... الله عادل يحب العدل سبحانة
دمتي بحب وسعادة

الجودي يقول...

كلام زوجج صح المقارنة بين العلاقات في الغالب اتسبب مشاكل ..

أول لقمة لزوج من يد زوجته لها مفعول السحر في تغيير سلوكه للأفضل ..

نصيحتها حلوة لكن نست تقولج إنها إدلل زوجها بعد و الدلال بالعدوة ينتقل لوما تعاملها معاه بهذا الإسلوب ما كان تحمل دلعها لأنها ادلعه بالأساس ..



الله يهنيج بزوجج و يهني جارتج بالطاولة بزوجها و ربي لا يغير عليكم إلا للأحسن اللهم آمين ربي يبارك لكم ويبارك عليكم ويجمع بينكم بالخير ...

:)

SHOOSH يقول...

أوالللللللللللللللللللله


ثلاثيــــــــــن ؟!!!

مَـــــعْــــمَــــعَـــــه يقول...

والله كنت بقول انها يمكن مو زوجته بس انصدمت انهم متزوجين 30 سنه شلووووون متحمل .. هذا بالمطعم جذي بالبيت شلوووون ... الله يعينهم على بعض

Seema* يقول...

الله يهنيها وتعيش عيشة الملوك ان شاء الله
ما حبيت تصرفها, كيفها تتشرط على المطعم بالنهاية اهما يقومون بشغلهم وبيتقاضون عليه أجر لكن على الأقل على شان المسكين اللي معاها!

MSMAAR يقول...

لااسمع لااري لااتكلم الى حد ما او سياسة التنطيش عن الامور اللي ماتستاهل
القناعه بما لديك وان الدنيا ارزاق وكل شخض سياخذ نصيبه كاملا كاملا دون نقصان

الزين يقول...

تعالي بلمج

ياربي لج فريه كبر الدنيا
انتي وين غطيتي

:**
بعد قلبي وربي ولهت عليج

استصبحت بمدونتج
وكالعادة استمتعت بكل حرف قريته
عسى ربي لا يحرمنا منج قولي آمين
:**

Sami يقول...

انتي تشوفينه يدلل مرته ..اما ريلج شلون يشوفه ؟ ..سكانه مرته :)

Antonio يقول...

لا اسمع لا ارى لا اتكلم

ونحن معك يا نيكون نفعل كل هذا

كم فرحنا بعودتك الجميل والموضوع الاجمل

هذي الحريم السنعه :)

كفو عليها

والله يديم هالمحبه ان شاء الله

:)

صباح الطاعه الزوجية :)

aL-NooR . يقول...

هل هو حقا سر !!


الحمدلله ..الانسان يشوف كل اللي عنده ..لان سبحانه مقسم الارزاق


:)
صبحج الله بالسوالف الحلو
*****************

ARTFUL يقول...

اهلا وسهلا

تبين الصج ما فهمت ليش اهو مدللها جذي

!!

p;

فقير بو العيال ياييبج ومطلعج ولا اكو فايده هم داقرته

والله الرياييل ما يستاهلون الا كل خير

:)

غير معرف يقول...

السلام عليكم
ماشاءالله الله يخليهم لبعض
بالفعل كل ما طالت سنين العشرة كل ما زاد الغلا طبعا بشرط اساسي ان يكون فيه احترام متبادل
ولا اذا مافي احترام و أدب بين الطرفين بالعكس كل يوم بطوف بيكرهون بعض أكثر

و تبين الصج تصرفهم مو طبيعي حتى لو كانو يحبون بعض
يمكن كان مزعلها و قاعد يدللها يوم بعمرها و صدفت حضرتج شفتيهم بهاليوم
مو معناته ان كل ايامهم بهالطريقة
ومشكورة حلو المقال و تقبلي مروري

Girls and Kuwait City يقول...

دارنا العزيزه
تدرييييييييييين شنو السر؟

انها مو كويتيه ؛)

فيلسوف يقول...

لكل رجل و لكل امرأه مفتاح

المهم كل واحد فينا يعرف مفتاح شريكه بالحياه

Sweet Revenge يقول...

ماشاء الله 30 سنة ,بعد هالعمر اكيد لازم يدللها
الله يهنيهم
خلاص نيكون هانت كلها جم عقد من الزمن وتدللين مثلها;)
الله يخليلكم ابو العيال يدلل ويتدلل :)

fatto يقول...

يحليلهم .. الله يخليهم لبعض .. وصح والله الشخص اذا كان مرتاح مع شريك حياته لايطالع غيره لأن راح يتعب .. كل واحد له اسلوبه وطريقته في التعبير عن الحب والتقدير والاحترام

ميمة السبيت يقول...

** صعبة و انا اختج لا أرى و لا أتكلم يعله عمره ما وداني مكان بس ما أتكلم أموووت