الجمعة، 17 سبتمبر 2010

طراروة مودرن

وكل عام والجميع بخير

إنتهى رمضان أعادة الله علينا وعليكم بالخير واليمن والبركات

أمر غريب حقا كيف أصبحت الطرارة تتخذ أشكالا أكثر جرأة وثقة عما تعودنا عليه

موقف مر علينا خلال شهر الصوم وأترك لكم حرية الرأي فيه

وأطلب الحذر منكم وبالذات على النساء والرجال كبار السن من تلك الفئة من الناس

ولا أقول غير الشكوى لله

في أحد أيام شهر رمضان الكريم أقبلت علينا في مجلس دار عزيزة

سيدة محترمة بلباس مرتب ورائحة طيب جميلة وتقاطيع وجهة مريحة

دخلت ولسانها العذب يبث الدعاء ويهلل على كل ما تقع عليه عينها
طريقة دخولها الواثق جدا توحي بمعرفتها المسبقة ببعض الرواد !

وقتها كانت زحمة التباريك بالشهر الفضيل إنتهت

سلمت على الموجودين وسألت عن أمي عزيزة

قدمت نفسها بأنها أم فلان ... فلانة الفلانية كويتية ومن عائلة معروفة

أبرزت بطاقتها المدنية كزيادة في التأكيد

أمي عزيزة : يا هلا ومرحبا بالأياويد ... ما في داعي تراويني شي ... إرتاحي
طبعا لم يهتم أحد بالتدقيق على الهوية

وبسرعة كبيرة كسرعة دخولها علينا .... شرعت المرأة بالحديث عن قصتها ومأساتها مع زوجها المطلوب على ذمة قضايا مالية كبيرة ومرضها الذي يحتاج إلى تدخل جراحي سريع قبل أن يستفحل !

وكيف أنها تسعى لإنقاذ زوجها من قضبان السجن رحمة بعيالها وسمعة عائلتها من القيل والقال

وأنها تضحي بصحتها إلا إذا جادوا عليها أهل الخير الذين يبغون الخير في شهر الخير والرحمة ببعض المال لها شخصيا لتعالج في أحد المستشفيات الخاصة !

وذكرت مبالغ المساعدات المالية الكبيرة التي تلقتها من جيراننا وبذكر كنية أمهاتهم ( أم فلان .. وأم فلنتان ) .... وبأسماء عوائلهم

وأنهم هم الذين دلوها وقالوا لها إنها ستخرج من دار عزيزة بملغ محترم من صاحبته ورواده تغينها عن السؤال وطلب المساعدة !

الصدف شاءت في ذلك اليوم غياب معظم الصبايا والرواد بسبب أو بآخر

ومن باب وأما السائل فلا تنهر الذي تنتهجه أمي عزيزة

بدفع ما تجود بها نفسها بغض النظر عن وجهة نظرها الشخصية

عن الشخص السائل ومدى غرابة تصرفاته وطريقة سؤاله

قامت أمي عزيزة من مجلسها لتحضر للسائلة من غرفتها بعض المال

والحقيقة أن المرأة بارعة جدا في الحديث ... سيطرت على المجلس وفتحت عدة مواضيع مع الرواد وكأنها ( عرف وولف ) معاهم من زمن بعيد

عرفتهم بالخدمات التي تقدمها للجميع كمعرفتها ببياعات الكبة وصاحبات المشاغل .... والخطابات أيضا !!!



الأمر الذي أثار إستغراب أمي عزيزة أكثر نحو هذه المرأة السائلة ووالواثقة جدا والجريئة والتي تجيد أمورا كثيرة ممكن أن تدر المال وإن لم تكن بالمبالغ الكبيرة التي تلمح لها ... كما أن معرفتها بالناس ممكن تغنيها عن دخول منازل غريبة !

رجعت أمي عزيزة لمجلسها وكانت المرأة السائلة قد تعرفت بلسانها الحلو على كل الحضور وأخذت أرقام هواتف بعضهن بعذر الخدمات التي تقدمها وتعرفها ودونت عناوين منازل البعض الآخر بهدف زيارتهن لعرض بضاعة من الصين !
دست أمي عزيزة المقسوم بيد الغريبة التي نهضت بسرعة وهي تقبل راس أمي عزيزة وتدعو لها ... همت بالخروج وهي تعد النقود التي دست بيدها

توقفت عن الدعاء فجأة وقالت مستنكرة

بس هذا ؟

أنا قلت بعد بيتكم ما راح أحتاج أروح لأحد غيركم ؟ هقيتك أكرم من جذيه ؟!

زيديني شوية ... معقولة جارتك أم فلان تعطيني أربعمية وإنتي بس إمية ؟!

وبعدين هذي لي وإلا لزوجي ؟

أمي عزيزة بإستغراب : هذا الموجود عندي ... الله يفك عوقج

وتستطرد أمي عزيزة :

آخر زمن بعد ... حتى الطلبة صار فيها تسعيرة ومزايد؟!!!

الغريبة بإعتراض : إشدعوة يمة ؟ ما طلبت إلا من مال الله وهذا حق عليكم للفقراء والمحتاجين مثلي ؟

أمي عزيزة بغضب : عطيتج اللي أقدر عليه بنفس راضية ... إرضي فيه وحمدي ربك
الغريبة : إشدعوة زعلتي ؟ ما قلت إلا الصج ؟

وتطلب باقي الرواد:

وإنتو بعد ... كل وحدة ومدة إيدها

أجابت واحدة من الحاضرات :

ما جبنا إبواكتنا

بينما لزمت باقي الحضور السكوت

وخرجت بسرعة وهي ( تتحلطم ) بصوت منخفض بكلام غير مفهوم ولكن نفهم إنها غير راضية

بعدها بقليل أقبلت علينا إحدى جارات دار عزيزة

وبعد السلام سألت : من اللي طلعت منكم قبل شوي ؟

أمي عزيزة : وحدة محتاجة

الجارة : وي ... لا يكون هذي اللي دخلت عليّ وقالت أنا فلانة وتطلب مساعدة لها ولزوجها
تراها نصابة ... وناصبة على الجيران كلهم ... والبطاقة اللي عندها أقرب مالها مبيوقة
وأسماء الجيران تعرفها من الخدم السواق 

هناك 18 تعليقًا:

Seema* يقول...

واااي!
قوة عين اللي داشة البيت واهي ما تعرف أهله وتطلب منهم وما يعجبها.. والله اللي محتاج يحمد ربه على اللي اييه.. حرتني! هذا اللي يقول طرار ويتشرط!
تبين الصج, مو كفو حشيمة مال تنادولها الشرطة ولو تكون بنت اللي تكون.
قلة حيا!

سلة ميوّة يقول...

حسبي الله ونعم الوكيل!!!

شنحكم وشنقول...لاحول ولاقوة..

لاحول ولا قوة الا بالله يعني
معقوله وصلت فيهم الجرئة يدشون البيوت!!!


عندي من هالقصص شكثر..اخر واقرب وحده كانت عند جمعية العديلية...

المرة بعباتها وجنطتها ويمها ياهل
وماهي كويتيه لهجتها عربيه بس مو منّا
المهم وقفتني وانا نازلة من سيارتي
وعطيني وعيالي وانا ام لمعاق و ريلي وبيتي ومن هالخرابيط...
المهم..

الي لفت انتباهي ان معاها موبايل!
صج انه قديم حيل
بس يعني عندها خط..:)
فطارت فوق راسي فراشاتي عاد:)
وقتلها..شينقالج؟
قالت ام فلان...
قتلها عطيني رقم موبايلج
وانا اعرف وحده عندها لجنة خيريه
اتيج لي عند الباب اتاعين وضعج
وتساعدج
سواء بشغل والا فلوس والا تحسين وضع.. يعني مهي مقصرة
ماعجبها اول شي..تبي كاش...
وتطحن تخيلي...
قتلها شوفي هذا الي عندي..
تعطيني رقمج وانيكم احنا ياللجنه
والا ماعندي شي اعطيج اياه...
طبعا شوي بنزر..لأنها مصختها اشكره تبي فلوس...
وان عطيتيها نوط ازرق تعفس البوز تبي حمر والا خضر ...
المهم..
اخذت رقمها وانا الصاجه عند ربي وعطيته حق
وحده من خواتنا المطوعات الي عندها لجنة واتباشر المحتاجين واتعنالهم لي باب بيتهم...

وارتحت ...ارتحت اني سويت شي صح...

ما شجعتها على الطرارة لأني اشوف التسول شي غلط..وغلط كبير...
وبنفس الوقت مارديتها
من باب
فأما السائل فلا تنهر...

بس ياخيتي...قصتج..مامرت علي ولا بالبال...جراة..و وقاحه وقوات عين...
كان المفروض اطلعونها من غير فلس واحد وتاخذون بياناتها وتعطونها لهاللجان...

حسبي الله على هالناس..

ربي يعطيكم من نعيمه على قد نيتكم واكثر
ويعز داركم ودار من تحبون

حبي:*

may يقول...

ابيه ! هذي شلون تجرأت تدخل البيت جذي!!

يمه ، أنا لا يمكن أقبل مثل هالأشكال..

طقوا الباب علينا أكثر من مرة ، علمت الخدامات ما يفتحون الباب أبدا لأي حرمة ، إلا إذا أنا قلت لهم ..

مال من يبلغ عليهم !!

chandal/danchal!! يقول...

اول هام وقبل لا اشتط

عيدج مبارك وكل عام ونيكون ودار عزيزة بخير وصحة وسلامة

ثاني هام

افضل اني ما اشتط
:p

بس ترى تعودنا على هالاشكال يدرعمون علينا برمضان والمشكلة ان بيوتنا صايرة سبيل من سبّلك
خاصة اذا كانت مجالس مفتوحة مثل مجلس داركم العامر

الله يكافينا شرهم -عصابات-

مركبنا يقول...

ضيييييييييييييييم !

لاحول ولا قوة الا بالله !!

احنا مرت علينا وحده وتقول انا جارتكم جديده وجاية اتعرف .. وقالت لنا اسماء الجيران كلها وسوالفهم

وبعدين اخرتها قالت ابي المقسوم
وبعدين مع سوالف الجيران قالوا نفس الشئ !

VELVET يقول...

قطيعة لا وبعد موعاجبها المبلغ
مادري وين الشرطة عن هالاشكال
لي ياتكم مرة ثانية دقوا على 211

ميمة السبيت يقول...

** اي شخص اقط ويها للناس نصاب موعاجبها 100 الخانم لو انج راده الفلوس منها وايد احسن

الجودي يقول...

المرأة اتخوف و بيتكم إشلون جذي سبيل مرأة غريبة تيي و تدخل بس جد قواة عين أشوه نصابة على طرارة ولا شي ثاني هالأشكال يخرعون الله يكافينا وياكم والجميع الشر ..

و كل عام و إنتي و أمج عزيزة و كل رواد دار عزيزة بخير و تقبل الله منا ومنكم :)

lil.D يقول...

الله يعطي امج اجر الصدقه ان كانت نصابه ولا لا
بس صدق جرأه ووقاحه (اسفه ع الكلمه) مادري ليش جيه
يعني بعد تتشرط؟ سبحان الله! ،، انقهرت من الموضوع !

Antonio يقول...

لا حولة ولا قوة الا بالله

اي والله طرارات آخر زمن

لا وكل يوم يطلعون بفنتق يديد ..

الله يحفظكم ويحفظنا والمسلمين ...

دائما متألقة بمواضيعج نيكون ...

كل عام وانتي بخير ..

تقبلي ودي الكبير ...

ARTFUL يقول...

عندنا وعندكم خير

حتى بدواوينا يدرعمون لا حيا ولا مستحا

بس والله أقل منكم

يعدون ويلصقون براعي الدوانية تالي ياخذه بكلمة راس

يدخل علينا راعي الدوانية يقول ترا محتاج ومادري اذا هو صاج والا يجذب واللي يبي يعطيه

وبس

الله يجيرنه

!!

Sweet Revenge يقول...

كل عام وانت بخير وتقبل الله طاعتج :)
لاحول ولاقوة الا بالله مو بس البيوت نيكون يمرون علي بالداوم بعد
المصيبة تكاسر بعد والله عين قوية

زينب علي حبيب يقول...

لاااااااا تعليييييييق


اني لو بمكان امج انطيها محاضرة مرررتبة


يعني اقوللها السائل عنده حيا المفروض و بما انج تعرفين مليون شغلة وشغلة اشتغلي احسن متجدين من عالم فلووس


شغلة تعصب !

عروستى يقول...

مجهود رائع منك

قلب طفله يقول...

@@
يمه قواة العين شلون صايره !!!!
المهم ان ربي يعطيكم على قد نيتكم و
يكافينا شرهم و كل عام تعودونه
انتوا و غالينكم ~

Maram يقول...

يا قوة عينها

ما قاموا يستحون من أحد

حسبي الله عليهم

الليوان يقول...

اي والله قواة عين..@@
بعد مو عاجبها..

هذي جان مسكتوها وبلغتوا عنها..
يمكن تدش بيت مافية الا مرة كبيرة وعيوز وتبوقها...

الله يحفظنا من هالاشكال..

تحياتي

سعد الحوشان يقول...

جنون،

هذي ما كانت تستحق الاعتذار ان الحاضرات ما جابوا بواكتهن، هذي تستحق جزمة كعب تطير 120 بين عيونها.

يا كبر قلبها أمك عزيزة، لو مكانها ما يردني غير أقرب مغرفة من المطبخ(لزوم المرقوق طالما جدتك لول) ألفعها فيها.

بس هذي أهون من غيرها، من وقت لوقت بالرياض يجون طرارات يقمرون على الحريم (يسحرون). جت وحدة مرة بس عيت امي تدخلها، ما ارتاحت، اسلوبها غريب من ورى الباب ومو من الجارات مثل ما تقول، بعدين اتصلت ام الجيران بسرعة تقول لا تدخلونها انا ارسلتها لكم ما أدري وشلون، بعد ما أخذت منها مبالغ بدون وعيها.