الاثنين، 3 نوفمبر 2008

المرشحة غنيمة ( 5 - مفاوضات مع أم سالم )

عندما عاد بوسالم من العمل استقبلته أم سالم بحفاوة زائدة : هلا بنور البيت ... الله لا يحرمني من شوفتك .
الغداء كان سمك مشوي بالطريقة التي يفضلها بوسالم .
أم سالم : اليوم بسوي لك مثل ما كانت أمي تسوي حق أبوي .
وباشرت بإزالة الشوك عن السمك ومناولته لبوسالم .
إن تنحنح بوسالم بسبب شوكة ناعمة عالقة ببلعومه سارعت أم سالم بمد يدها التمر
وقالت : اسم الله عليك ... خذ فردة تمرة
وإن تكلم أحد أبنائها نهرته : خل أبوك يتغدى ... لا تشرقه ..
أحس بوسالم إن أم سالم لديها إحساس عن نيته بالزواج بسبب حفاوتها له الغير معهودة... في الحقيقة رق قلبه لها .
مد يده بلقمه عيش ومعها سمك وقال : هاللقمة منقولة مني لك يا أم سالم .
تقبلتها أم سالم بحياء أمام أولادها وهم يرون هذا النوع من الغزل .
رفرف قلب أم سالم من السعادة ... وتمنت دوامها من قلبها ؟
جلسا بعد ذلك لوحدهما يشربان شاي العصر وأم سالم لا زالت واقعة تحت تأثير لقمة بوسالم .
بوسالم وهو يفكر كيف يختار كلماته : أم سالم باكون صريح معاك .
تنبهت أم سالم جيدا فهذه نبرة الجد بصوت بوسالم .
بوسالم : حوفك الزايد اليوم لي وراه شي ... أكيد حاسة إني على نية زواج
أم سالم ساكته
بوسالم : أم سالم ... مستعد أبعد فكرة الزواج ... بس تقبلين تجين معاي بره
أم سالم بعد تفكير : ما أقدر يا بو سالم ... غصبن علي وتبكي بصمت
بوسالم برقة : إنتي قولي لي شالعمل ؟ أدري صعب تقبلين ... بس شسوي ؟ ... لو كان أخوك بوضعي كان رحتي بنفسك تخطبين له .
أم سالم : إنت أبو عيالي ولا أبي أخسرك ... أخاف لي تزوجت تنساني أنا وعيالي
بوسالم : عيالك هم عيالي وإنتي أمهم ... وبيني وبينك عقد زواج مو سهل... وواجباتي المالية والأدبية والنفسية تجاهك لا يمكن أقصر فيها ...
ويكمل : ما أبي أسوي شي من ورا ظهرك ... إذا رافضة تجين معاي ترا ما راح أرجع لمكاني بره إلا وأنا متزوج .
يسكت قليلا ويكمل بصوت لين : يا أم سالم آخذ وحده تعرفينها وضامنة تربيتها وشبعانة من الخير أحسن لك من وحده ما تعرفينها ولا تدرين إشوراها ؟
أم سالم بيأس : من حاط في بالك ؟
هنا استخدم بوسالم دهائه : سميرة أو فريال أو وسمية ( بوسالم يعلم أن أم سالم لا تطيقهم)
تصرخ أم سالم بهلع من الفكرة : قطييييييييييييييييعة تقطع العدو ... ( بسرعة انهمرت الدموع من عينيها )
وين طروا على بالك ؟ تبكي وهي تهدد : إن أخذت وحده منهم ... اعتبر إن حرب داحس والغبرا بدت بيني وبين اللي بتزوجها منهم !
يضحك بوسالم : لا يوبا لا نبي حرب ولا شي مو لزوم هالثلاث... من ترشحين لي ؟
تسكت أم سالم ويكمل بوسالم : أنا أقول أبي وحده متعلمة وتعرف إنجليزي وأمها وأبوها معروفين وبنت خير وتقبل تسافر معاي ومطلقة وما تجيب عيال !
أم سالم : تقصد غنيمة ؟
بوسالم : وأقصد عايده !
أم سالم : أنا تحط على راسي عايده .... حق شماتة أهلها فيني ... ما تدري يا بوسالم إن ذيك السنة بغاها أخوي وأنا عييت عليه ياخذها ؟
بوسالم : من بقي عيل ترضين فيه ؟ عيل أتزوج وحده عربية من بره ؟
فكرة العربية لم تعجب أم سالم فقالت بإنهزام : عندك غنيمة .... إذا تقبل فيك !
بوسالم : هذا إقتراحك ؟ راح أفكر فيه ! يدعي عدم الاهتمام وقلبه يرقص داخل صدره .
نكمل في الحلقة القادمة ....

هناك 5 تعليقات:

كويتيه بحرينيه يقول...

يابعد روحي روحج يا ام سالم ... والله عورتي قلبي ... والله تقطع قلبها وبوسالم هالعيار مو حاس فيها... هو صح ان الدين حلل اربع لكن ياربي الوحده اذا حبت زوجها صعب تتخيل ان يروح عنها لوحده ثانيه حتى لو كان عادل بينهم ... ان شاء الله غنيمه بالقصه اليايه تتزوج الاحسن من بو سالم ... وبوسالم يحيلونه للتقاعد عشان ترتاح ام سلوووم...
nikon8 مشكوره حبيبتي وكملي بسرعه ابي اعرف الاحداث لاني استبقتها بفكري... لووول

daggero يقول...

Nikon 8

رهيب والله رهيب

دبلوماسى فوق العادة أنت يا بوسالم وقائمة المرشحات خمسة مو وحدة والأسماء كل أسم يقول الزود عندى :)


والتوقيت ممتاز بعد اللقمة أو بالأصح اللغمة التى أطاحت برأس أم سالم

جزء ممتازة والى المزيد

nikon 8 يقول...

كويتية بحرينية
هالمره ما راح أطول عليكم لوووول .

daggero
شكرا والتوقيت ما كان مخطط له بوسالم بس صادف يكون بعد اللقمة .

um_alzain يقول...

قرأت العجب!!! الله ياهي حرررره.. صج الذيب مايهرول عبث اشلون استدرجها بو سالم ووصلها للي يبيه اهبببب طلعت ذيب ,قلت لكم طبانه قدر عليها بلقمة وكلمتين ووصلها لتزل بلسانها وترشحله غنيمه" يعني ملعوبه واثقه بترفضه"!!! مقيوله الكويتيه ظايع حظها ولا لوغيرها جان دوكرته وسوته انببببباع

nikon 8 يقول...

um alzain
إسم الله عليك من الحره.
تفاعلكم يخليني أنزل الحلقة الجاية بسرعة .