الخميس، 4 ديسمبر، 2008

أريد حلا ؟

كافأت روحي بطلعة للسينما قبل لا تخلص الامتحانات وتنترس الصالة يهال رايحين وجايين إما للكافتريا أو الحمامات ... ويقطعون علي اندماجي مع الفيلم
اخترت كرسي في وسط الصالة أمام الشاشة
الله ... أحسن من هالمكان ماكو بعد ؟
جلست وأنا سعيدة إن محد يرافقني لأستمتع بأقصى حد بقصة الفيلم
ولأن شوفة الفيلم ما تكمل إلا بالببسي والنفيش ..... فشريتهم ..... النفيش بحضني والببسي بيدي
وصاجين الأوليين يوم قالوا القرادة إشلون قايلة ؟؟ حمرا وإلا خضرا ؟؟؟
بتسألون ليش ؟؟ أنا أقول لكم !
أول ما بدت الدعايات شفت عامل السينما يرشد ثلاث فتيات لمكانهن ...
ظلهن على الشاشة لفت أنظار رواد السينما إليهن ... بسبب رؤوسهن المنفوخة (كلمة منفوخة شوية عليهم )
قرادة حظي إن الثلاث كانوا أمامي بالضبط
امتلأت المقاعد بجانبي وورائي وانحشرت بمكاني
حاولت أن أقف لأغير مكاني .... فصدمت وحدة من النفخات أمامي .... التفتت على بحمق وقالت : أي ما تشوفين .. طيحتي حجابي ؟
بلعتها وسكت ... ما أبي أخرب مكافأتي لروحي بالصيحة علي شي ما يسوى !
التفت حوالي ... رجال مع زوجاتهم ... وين أتقلقص بينهم وأطلع من مكاني
قلت مالي إلا أنثبر بمكاني أنا ونفيشي وبيبسي وجنطتي فوقهم
ابتدأ الفيلم ... وبدأت تعليقات الفتيات مع بعضهم البعض ... وطبعا روسهم تتحرك تبعا لطبيعة التعليق ... مرة هامس يحتاج خفض الرأس ومرة عادي مجرد التفاته ومرات هز الراس كعلامات لنعم ولا ( مع إني ما ني شايفة لها داعي بسب الظلمة )
وأنا وراهم حالتي حالة .... ظليت طول مدة الفيلم أطق رقبة مرة يمين ... ومرة شمال ... ومرات أرزز أرقبتي لفوق ... أدور مكان أقدر أشوف فيه الشاشة كاملة ....
طلعت من السينما وأنا أقول بقلبي ماكو أحلى من أول سطر !
وإلا إشرايكم ؟ عندكم حل ؟

هناك 22 تعليقًا:

Broke يقول...

LOL

المفروض يطلعون قانون يمنعون فيه حجاب بو تفخة في السينما و المسارح !

ترى صج كل مالهم و يبدعون و يتفخونه أكثر

New Bride يقول...

لوووول و الله مشكله هالحجابات المنفوخة

انا جذي بالسينما احب اندمج حاولي انج تروحين يا وقت متأخر او الظهر

um dhari يقول...

law ana chan 6ala3t min awal ma shefhum mejbeleen

كويتيه بحرينيه يقول...

احسن شي انج تشترين لج الرفعه اللي يحطونها حق اليهال بالصالونات ( الكرسي الصغير اللي يحطونه فوق الكرسي ليرفع الياهل) وقعدي مرتزه انتي ونفيشج وبيبسيج والي تكلمج هبديها على راسها عشان يتأدبون... واااي مادري اشفيني احس اني صايره شريره

daggero يقول...

Nikon 8

الحل أن تشترى ال DVD وتسوى نفيش فى البيت وتستمتع بالفيلم

أما حجاب الأيرباق الضارب فعلى شركة السينما أن تدفع صاحبته قيمة الكرسى اللى خلفها كذلك وأبقائه فاضيا لأن لن يتمكن الجالس وراها من المشاهدة بسبب الصيهد اللى مسويته

وهذه الفكرة مستقاة من شركات الطيران الأمريكية التى بدأت فى تدفيع المسافرين السمان قيمة الكرسى الجانبى الذى كانو يحتلونه مجانا سابقا بسبب أحجامهم الضخمة (بالمقاس الأمريكى طبعا )

أقترح حملة أرسال أيميلات ألى شركة السينما الكويتية بهذا الأقتراح .

Deema يقول...

انا اقول ماكو احلى من home theatre

:D

غير معرف يقول...

اهم شي غيرتي جو:)

kazmawy يقول...

مالج الا واحدة من ثنتين
تشترين دى فى دى
او تروحين سينما بدبى
:)
وعيدج مبارك

nikon 8 يقول...

broke
الله أقوى ... شنقول ؟
كل ما تكلمنا قالوا حرية شخصية !
أبتلشنا ما صارت حرية !

nikon 8 يقول...

new bride
الوقت المتأخر ما يناسبني :)
أما الظهر فالحضور كلش قليل أصلي أحب أسمع ضحك الجمهور حتي تضيع ضحكتي معاهم :)

nikon 8 يقول...

um dhari
ما هقيت يقعدون جدامي !
واللي على يميني ويساري كلهم أزواج مع حريمهم .. استحيت أمر جدامهم !

nikon 8 يقول...

كويتية بحرينية
ترا الرفعة اللي تقصدينها موجوده بالسينما بس ما أقدر أوسويها !
وبعدين من كلام بس خفت هالنوب أهبد .. ما أقدر !

nikon 8 يقول...

daggero
والله خوش فكرة :)
بالنسبة لـ dvd فكل شي عندنا بالبيوت بس الروح تبي الأرواح :)
ومثل ما عند الر ياييل شاي الديوانية غير فأنا عندي نفيش السينما غير :(

nikon 8 يقول...

deema
ننفذها إذا دخلنا باقي الحوش وبنيناه :)

nikon 8 يقول...

غير معرف
كل طق هالرقبة وتسمونه تغيير جو :)
كان خوش تدريب لطق الرقبة :)
فرصة ما تتكرر :)

nikon 8 يقول...

kazmawy
ودبي بناتهم ما جتهم موضة حجاب بو نفخة ؟!

daggero يقول...

Nikon8

Sorry

هذه السالفة صارت لك

أنا تعودت أنك تقصين الأحداث على لسان الأخريات فطافت على هالمرة

تدرين أن بعض شيوخ الدين حرم هذا النوع من الحجاب أمتثالا للحديث الشريف

" رؤسهن كأنها سنم البخت "

وجمعة مباركة

nikon 8 يقول...

daggero
جمعة مباركة لك أيضا :)
صحيح كلامك .. بس وين اللي يسمع الكلام :(

um_alzain يقول...

nikon8انا عندي لج راي يااما تحجزين في vipسينما وترتاحين من خبصة الناس ......او تسوين مثل بعض الجماعه وتحجزين السينما كلها وتعزمينا معاج !!!

nikon 8 يقول...

um alzain
عجبني الراي الثاني ... على الأقل إن لبست وحده بوتفخة نقدر نمون عليها ونقول لها خوش كشخةوشفناك فيها بس الحين شيلي التفخة وردي حطيها بعد إنتهاء الفيلم :)

um_alzain يقول...

لووووووووووووووووووول ماهقوتي تسوينها خبرج في مجاملات بين الاهل والاصحاب بتمدحين حجاب بونفخه وتبلعين التعليق خوفا من الضرر النفسي عليهم, ولك الله .

nikon 8 يقول...

um alzain
حتى الميانة للأهل والصدقاء إنفقدت ؟
صج لنا الله :(