الخميس، 18 ديسمبر، 2008

مستوصفنا وجدتي

لا يمر أسبوعان إلا وتذهب أمي عزيزة إلى مستوصف المنطقة .... لتتعالج من أمراض شتى بعضها حقيقي وكثير منها وهمي :)
جميع من في المستوصف تعرفهم واحد واحد من الدكتور إلى الفراش ........ وطبعا معظم المراجعين ..!!
ما شاء الله عليها ..... لديها سوالف مناسبة للجميع ... فعندما تقف لأخذ الملف ورقم الدخول من الكاتبات تسألهم عن الموجود من الدكاترة .... من هو الدكتور الجديد ؟ ومن الذي انتقل ؟ ومن سافر . ومن داوم ؟...
وطبعا الكاتبات يردن عليها بطيب خاطر ... لمعزتها في قلوبهم .
لا تحصل أمي عزيزة على ملفها إلا وهى منتهية من معرفة ملفات حضور وانصراف الدكاترة وأخبارهم !
تتجه بعد ذلك لتجلس على الكرسي بعد أن تهلل باسم الله وتسلم على الجلوس .... وأول ما تستقر في كرسيها تسأل الجالس بجانبها كم رقمك ؟ أيا كان هذا الجالس ... خادم ... رجل مسن ... شاب ... امرأة ...
كم رقمك ؟.... جملة سحرية تفتح باب الأحاديث والتعارف في المستوصفات !.... ومن ثم سالفة تجر سالفة .... حتى ترتفع أصواتهم تماما مثل مسرحية باي باي لندن ( لا أحد يفتن علي إني قلت كذي ) ثم تهدأ إذا إنتبهوا لأنفسهم !
وإذا كانت السوالف مشوقة تتأفف من سرعة وصول الدور عليها وتقول لمن تكلمهم : يوم استانسا بالسوالف يه دوري بسرعة ! ....
ودائما تختم حديثها بـ .... ما تشوفون شر و تدعوهم لزيارة دار عزيزة ...
أما الشباب ( كما تطلق عليهم وهم بالحقيقة شياب ) فتتبادل معهم الهموم والذكريات ... مع ضحكات الخجل الخفيفة وتغطية جزء من وجهها بالعباءة !!!!
ولكم أن تتخيلوا سعادة الشباب والصبايا ( أقصد الشياب والعجائز مجازا ) بهذه الأحاديث العفوية :))
من فترة قريبة رافقت أمي عزيزة إلى المستوصف ... وأحببت طريقتها العفوية بالتحدث مع الناس مع إن بعضهم لا تعرفهم ... كلامها بمكانه وبدون لغو زايد ... وهذا بروحه فن !....
دخلنا على الدكتورة عفاف ، دكتورة مصرية وكبيرة في السن وتعزها جدتي كثيرا
أمي عزيزة : ياهلا بالدكتورة عفاف ... الحمد الله على السلامة ... والله طولتي بالغيبة ؟
دكتورة عفاف : الله يسلمك يا ماما ... فعلا الحمد لله .
أمي عزيزة : دعيتي لنا في العمرة ؟
دكتورة عفاف : عمرة إيه يا ماما .... ده أنا كنت بالعناية المركزة ... تعبت من قلبي وحطوني تحت الملاحظة .
أمي عزيزة وهي منصدمة من وقع الخبر علي مسامعها : عناية مركزة ! .. والله ما درينا ... سألت عنك الكاتبات وقالوا لي إنك بالعمرة ! لو ندري كان قمنا بالواجب !
دكتورة عفاف : طول عمرك صاحبة واجب يا ماما .... متشكرة أوي .
انتهينا من الكشف وأخذ النصائح العلاجية .
خرجنا باتجاه الصيدلية ...
أتت الصيدلانية السمراء الممتلئة باتجاهنا تبتسم لأمي عزيزة وهي تسلم
أمي عزيزة : ما شاء الله إش هالرشاقة ؟.... إي جذيه استمري بالريجيم
الصيدلانية : مشكورة يمه ... هذا كله من تشجيعك .
أمي عزيزة : خلك من ريوق هالدوامات وأكل المطاعم ما وراه غير تربي الشحوم ... وخلي يوعج حق وجبة أميمتك تراها أبرك لك !
الصيدلانية : صاجه يمه .
أمي عزيزة وهي تخفض من صوتها : أقول ؟ ما كنه زميلتكم حنان تحجبت ؟!
توطي الصيدلانية رأسها وتدخله بالشباك وتهمس لأمي عزيزة : إي نعم ، تحجبت بعد وفاة أبوها .
أمي عزيزة باندهاش : من متى ؟ وليش ما ندري ؟ هذا ثاني خبر اسمعه الحين خلال ربع ساعة وما أدري عنه !
انزعجت جدتي كثيرا من عدم علمها بما حدث للدكتورة والصيدلانية لتقوم بأداء الواجب لهم كما يجب .
ذهبت مباشرة إلي أمين المستوصف مسرعة وأنا خلفها....
استقبلها أمين المستوصف أحسن استقبال ....وسألها : آمري يمة ؟
أمي عزيزة : ما يامر عليك عدو ...أبي يا وليدي تسوون إعلانات عند مدخل باب المستوصف تعلمون فيه المراجعين أخبار اللي يشتغلون بالمستوصف وأنا أقصد الأخبار اللي تهمنا مثل زواج ... ولادة ... وفاة..... والله يا وليدي إني فشلت اليوم جدام الدكتورة والصيدلانية ... ما دريت عنهم !
أمين المستوصف : معذورة يمة ... راح أشوف الموضوع مع الوزارة ويصير خير إنشاء الله .
خرجنا وأمي عزيزة غير مقتنعة برد أمين المستوصف ... لأنها مثل ما تقول : إشدعوة يا حافظ ... كلها ورقة ... ما تبي تشاور الوزارة فيها !
في طريق العودة للمنزل سألتني أمي عزيزة : الكمبيوتر اللي تقرين فيه ليل نهار ما يعلمكم أخبار الناس في منطقتنا ؟ أشوف كل شي تدرون عنه عن طريق الكمبيوتر إلا هالشي !
رديت عليها : هذا بالذات محد يجيب له طاري !
وأنا بدوري أسألكم ما رأيكم بنقل هذا الاقتراح إلي مختار المنطقة أو الجمعية التعاونية لإنشاء مواقع إلكترونية لنشر الأخبار الاجتماعية للمنطقة ؟ تهقون الفكرة تستاهل ؟!
وإن صارت .... ولا تنسون إن حقوق الفكرة الفكرية لأمي عزيزة :)

هناك 16 تعليقًا:

Almwaysa يقول...

قراءة ممتعة بالفعل.
اقتراح شدني في النهاية .. يعني هالموقع ممكن يقوي ترابط اهل المنطقة الواحدة :)
الله يخلي الوالدة لكم ويعطيها طول العمر ان شاء الله :)

New Bride يقول...

مشاالله مشالله تينن ماما عزيزة الله يخليها لكم و يطول بعمرهالكم اسم الله عليهم اليدات صايريين يهبلون عليهم سوالف و فناتق :) ووالله الفكره حلوه ليش ما توصلونها حق مختار المنطقه و الله

Salah يقول...

الله يعطيها الصحة والعافية وطولت العمر


الصراحة هالبوست أمتعني وأعاد ذكريات كثيرة.

مشكورة

:)

لبنة يقول...

هاهاها كتاب طلب للوزير يقول فيه نبي ننشر افراح واحزان سطاف المستوصف
:))

ما اعتقد المسالة تحتاج كتاب انما التواصل يكفي.. من مسجات الى تلفونات الى لقاءات.. الكلمة تنتقل بظرف دقائق

استمتعت شكرا واظل متابعة لك ولماما عزيزة

um_alzain يقول...

nikon8 تحياتي لك ولماما عزيزه وكثر الله من امثالها المتابعين لاخبار واحوال اهل المنطقه الله يعطيها الصحه وطولة العمر ,اما بالنسبه لاعلان احوال ومناسبات من فرح وحزن فكره مااشجعها لانها مطبقه في المدرسه الامريكيه وبصراحه صارت مصاخه ألتزام كبير صعب صعب توفين وتلتزمين وتجاملين المدرسات الاجانب فمابالج اهل منطقتج حق التشره والزعل ,لاانسى .

Enter-Q8 يقول...

الله
الله يطولكم بعمرها هالبركة
وينهم حريم قبل

nikon 8 يقول...

Almwaysa
طبعا ممكن إذا ما كان راح يسبب ضغط إجتماعي مثل ما علقت الإخت أم الزين
شكرا على المرور .... وأهلا بك عزيزة في دار عزيزة :)

nikon 8 يقول...

New Bride
بحاول أول الفكرة بعد ما ندرس محاسنها وعيونها.
أما قناتك الجدات صج تهبل وما أدري من وين يتفنتكون !!

nikon 8 يقول...

Salah
الله يسلمك .. أكيد الجدة من ربع السوالف في المستوصفات :)
الله يخلى أمهاتكم وجداتكم :)

nikon 8 يقول...

لبنة
إذا ما إشتهى المسؤول شيقول ؟!
نحول الموضوع للوزير أو نعمل لجنة !
شكرا على التعليق ... وأهلا بك عزيزة في دار عزيزة :)

nikon 8 يقول...

um_alzain
مشكورة اللي نبهتينا على هالمشكلة بس والله عجبتيني ... الأجانب يتشرهون ؟!!
على بالي بس حنا أصحاب تشره !

nikon 8 يقول...

Enter-Q8
الله يسلمك ... حريم الأول موجودين بس حنا اللي ابتعدنا عنهم وعن سلوكهم ... خذتنا المدنية :(

كويتيه بحرينيه يقول...

ياحليلج يا يمه عزيزه اتصدقون ذكرتني بامي هالامهات يمشون ويسولفون مع اللي حواليهم ... اما عن فكرتج عن اخبار المنطقه والله انها فكره حلوه ويابخت المنطقه اللي ساكنه فيها امي عزيزه لان المختار بيعينها كمديره للدعم الفني والمعلوماتي... لوووووول

nikon 8 يقول...

كويتيه بحرينيه
لوووول :)
ما ودي أخرعج بس هذي علامات التقدم بالسن ... الله يحفظها لكم :)
أما الدعم الفن فأظن أم بزيع أصلح شي للمنصب :)

Kuw_Son يقول...

جذبني النك نيم أول شي ..

الله يحفظ لكم الجدة .. و عسى الله يطول في عمرها .. ما شاء الله اجتماعية لأبعد الحدود .. و على نياتها :)

nikon 8 يقول...

إبن الكويت
مرورك جعلني أطل على مدونتك وصورك الرائعة ... شكرا لك وأهلا بك بدار عزيزة :)