الأحد، 14 ديسمبر 2008

إحراج

المواقف المحرجة التي تمر علينا كثيرة ... إلا أن موقفا بعينه صار يتكرر لكثير من الناس وتلعب فيه الصدف دورا كبيرا ...
سأسرد عليكم موقف حصل لي واللي لحد الحين من أذكره أضحك على نفسي وأنا أعض على براطمي من الإحراج ...
كنت على موعد للتجمع عند أحدى قريباتي في سرداب منزلها والدعوة كانت لصديقاتها وجاراتها وبعض معارفها ...
ذهبت للعنوان حسب وصفها ... دليت المنزل بسهولة .. ركنت السيارة .... خرجت منها وأنا أسمع أصوات الضيوف ...
القعدة بتكون بالحوش الساقط .... الله .... أكيد مسوية لنا جو حلو ... أعرفها وأعرف فناتكها دائما عندها أفكار تبهرنا فيها .. طليت داخل جنطتي أتفقد اللي فيها ... أشوة ... ما نسيت هاتفي النقال بو الكاميرا !
نزلت للسرداب عن طريق سلم بجانب الباب الخارجي .. كلها كم سلمة فإذا أنا أمام الضيوف
استغربت بالبداية من الضيوف فهناك رجال بينهم ... قلت بقلبي ... ماشي .... نست لا تقول إن بعلي العزيز معزوم ... ما علي عاذرتها أعرف لوية العزايم !
دخلت ... البسمة ترس الوجه وسلمت .... مطخت الحريم وبوستهم والرجال صافحتهم وعرفت الجميع على نفسي مع إني لم أعرف أحدا منهم ... الوجوه كانت غريبة علي .
جلست وأنا أتلفت حولي : ما شاء الله إش هالترتيب الحلو ... عيل وين راعية البيت ؟
ردوا علي : دخلت داخل عندها تليفون .. جاية بعد شوي .
أنا : إي أدري كل شي يتسلط بالعزايم والمناسبات ... الله يعينها .
جاءت صينية العصير ... كل كلاس عصير به نوع عصير مختلف عن الآخر ... الألوان كانت جذابة .... وتتوسطهم مزهرية صغيرة تحمل زهور أنيقة زادت من أناقة الصينية .
اخترت نوع عصير وأنا أمدح الذوق ... وذقت العصير وزدت بالمدح .... الله طعم وشكل .
بسرعة اندمجت مع الحضور وتبادلت الأحاديث معهم ... كانوا ودودين للغاية ... مما ساهم بالتخفيف من تكلفي والذي يرافقني عادة مع الناس الغرباء .... وأخذت راحتي معاهم .
خلص العصير وجاءت صينية الشاي .... بصراحة طار عقلي ... ما دري شوصف لكم وشخلي ... تقديم أنيق بعيد عن التقليدية !
إهني ما قدرت أمسك نفسي فقلت : يا جماعة ما ني مستحية منكم ... أنا العادة أحب آخذ لقطات لفناتك راعية البيت لأنها مرجع لي لما أسوي عزايم ... عن إذنكم أبي أصور .
ردوا : ما دام راعية البيت متعودة علي تصرفاتك ... إذنك معاك .
الدنيا ليل والإضاءة في الحوش لم تكن كافية ... حملت الصينية للداخل ... وضعتها بركن مناسب في صالة السرداب وصورت









































.... شفت زرعه في الصالة شكلها غريب ...همن صورتها ...









































بس انتهيت تصوير ... أتت وحدة تهلي وترحب ... أتاني إحساس قوي إني في ورطة !
انتبهت إني غلطانة .... وداخله بيت غلط
سألتها فورا : إنتي صاحبة البيت ؟؟

ردت علي : نعم ... وإنتي ... ما عرفناك ؟
تدفق دم الخجل لوجهي وأحسست بواهي وحرورة .... وقلت لها : لا ما تعرفيني !
اعتذرت لها بشدة ووضحت لها غلطانه بالعنوان .... وسألتها : عيل وين بيت فلان ؟
دلتني عليه وكان يقع خلف منزلهم بالضبط .... ورجتني أن أكمل الجلوس معهم
كانت مضيافة للغاية ... لكن قصة وجهي جدامها وجدام ضيوفها كانت لا توصف ...
صرت أتحلطم على روحي الضيوف الصج جالسين بأماكنهم كما ينبغي للضيوف أن يفعلوا .... وأنا .... وإلا ما في داعي أتكلم .. يكفي فشلتي ...
خرجت مسرعة نحو سيارتي ... في هذه اللحظة رن هاتفي
كانت صاحبة الدعوة تستفسر عن سبب تأخري .
موقفي المحرج كان محور حديث تجمعنا عند قريبتي .... وصارت كل وحدة تحكي موقفا شبيها مرت به وضحكنا كثيرا علي أنفسنا ... وكانت سهرة من أمتع السهرات اللي جمعتنا معا ... ولولا حكايتي كان كل وحدة خامره وساكتة علي موقفها المحرج ....ولكن تبون الصج ..... محد سوى سواتي !
كل ما أشوف الصور أتذكر هذا الموقف ولا شعوريا أقول واخزياااااه ... وساعات يوزني الشيطان وأقول بقلبي ليتني مصورة صينية العصير ما دام إنها زلقة بطيحة !

هناك 16 تعليقًا:

enter-q8 يقول...

يا ساااااااتر
بنفس صوت قتيبة الغانم لما قال
خاااااااااالص

موقف اقشر و انا اخوك حيل حيل
و ياريته مع راعية البيت الا الضيوف بعد ياااااااااااو

انا الموقف المحرج اللي بحياتي ما انساه
لما رحت اول مره النقابه و دشيت من الباب اللي ورى و نقابتنا بمنطقة سكنية بالعاصمة سابقاً

تخيلي دشيت و فتحت باب السكة و دشيت داخل البيت و احوس و الا بصالة داخلية و متروسه حريم
خذي عندك باقي الفيلم اللي صار عاد
بس السؤال
ليش تصير تصرفاتنا اعبط من موقفنا بزياده

Fahad Al Askr يقول...

أنا أذكر مرة رحت أبارك حق واحد بملجته، وصلت البيت على ما أتوقع، شفت ناس واقفين برة، دخلت قاموا الناس، سلمت، طبعا ما أعرف أحد، سألت واحد من الشباب وين فلان، قال لي ما نعرفه

خلال ذلك قام واحد من الحضور وقال أحسن الله عزاكم

أنا صرت بنص هدومي، وهاللي سلمت عليهم حسبالي أهل المعرس والعروس

لحظتها شفت الباب يبعد وأنا بمكاني، صج ودي كان الأرض تنشق وتبلعني

أشوه إني ما قلت لهم بالمبارك وعساها أفراح دايمة

جنة الحواس يقول...

لا انتي بدعتي ما شاء الله عليج .. مصورة بعد

:P

موقف مشابه صار بجدتي و عمتي الأسبوع اللي طاف .. لما حضروا ملكة ولد عمي بوقت مبكر عن المعتاد

و الحفلة كانت ببيت جدة العروس .. يعني حتى راعية البيت ما يعرفونها لأنهم ما كانوا حاضرين الخطبة


صاروا بوضع لا يحسدون عليه

um.alzain يقول...

لوووووووووول ياخزياه الله ياالفشله دخلتي وسلمتي وشربتي العصير والجاي ولا بعد صورتي ولا احد حس ان في غلط بالموضوع , الحمدلله مر الموقف على خير وطلعتي سالمه مسلمه .

نون النساء يقول...

موقفج كلش ما يترقع .. لو كنت مكانج راح ابجي ما اضحك ..

ما احب انحرج .. خاصة اني انسانة قاعده احاول اني اكون من النوع اللي ما ينحرج بسهوله ههههههههههههههه لان الله وكيلج تصرفاتي وبدلياتي اتصير لاتعد ولا تحصى ..




قبل فترة كان عندنا عرس ونوعي انا اللي احط ميك آب حق نفسي لأن الصالونات يطلعونج اتخرعين المهم رحت عند شارمل ابي اخذ من عندهم إضاءة ولون شدو على لون نفنوفي وامدحولي البنات بالإضاءة رحتلهم اسم الله علي فاردة طولي ..

وكنت حدي تعبانه مالي خلق والله وكان المحل جامته زجاااااااج وكانت تللللمع وتلق من النظافة ومن خوارتي جان ادعم بالباب

والله العظيم ماكان مبين ان اكو باب

وااااي انحرجت حدييييييييي جان الف فوق تحت خذتلي فرة على ما ينسون ويهي ههههههههههههههههههه

nikon 8 يقول...

Enter-Q8
لووووول
أكيد لما دخلت عالحريم تطايروا مثل النفيش كل وحدة بإتجاه :)
ههههههههه
أما تصرفاتنا اللي أعبط من مواقفنا فهذه أعتقد ماركة مسجلة لكل البشر :)

nikon 8 يقول...

Fahad Al Askr
الله ستر محد درى عنك لوووول
ويا حلو ملجتهم مثل الأول مبكر :)

nikon 8 يقول...

Broke
واي يا الفشلة ... إشفينا كلنا دخلنا بيوت غلط .. ومناسبات غلط بعد
:)

nikon 8 يقول...

نون النساء
تصدقين ما أدري إشلون شالتني ريولي من الفشلة وصعدت الدرج :)
سلامات وخطاج السو من الباب :)

Manal يقول...

:)
يحليلج

والله موفق محرج وايد الصراحة
:)

nikon 8 يقول...

منال
فعلا في كنت في موقف لا أحسد عليه :)

غير معرف يقول...

حد الرهاة وتاخذين صور بعد:)

الله يحفظك

غير معرف يقول...

موقف ما ادري شنو اقولج اتكيد وااايد منا يتعرضوون لمواقف مختلفه بس موقفج والله قصت ويه عجبتيني تصرفج واايد حلو

حسيتج اجتماعيه بطريقه ذربه وحلوووه

nikon 8 يقول...

غير معرف
إجتماعية يطريقة ذربه وحلوه ..:)
الله يسمع منكم .. ويا ريت إحساس أهل وضيوف البيت اللي غلطت عندهم مثل إحساسكم ..:)
شكرا وأهلا بكم بدار عزيزة :)

غير معرف يقول...

هههههههههههههههه

الموقف قوي ومحرج حده

وكثيره المواقف المحرجه الي تمر علينا بس الحمد لله ان ربي عطانا نعمه النسيان وننسى كثير منها

فيه موقف في بالي صار له سنين ما قدرت انساه وهو ان اختي كان عازمه صاحبتها وصاحبتها جت قبل لبيت اختي المهم واحنا نتقهوى الا اختي تقولي افتحي سله الشوكولاته ودوري علينا فيها وانا اقولها لا وهي تعيد وانا اقول لا .. اخر شي قلت لها وع شكلها ما يشجع

المصيبه ان صاحبه اختي هي الي كانت جايبتها معاها خخخخخخ

شرايك بالموقف هههههههههههه

غير معرف يقول...

واااااااااي حراام والله مواقفكم مره محرجه انا كمان صار لي موقف انحرجت وزعلت كثير من اللي سوته فيني والى يومكم هذا انا حاقده عليها الموقف هو انو كنا مجتمعين جمعه كبيره احنا وناس كثير من جماعتنا انا كنت ابي وحده من البنات وكانت بعيده عني قلت باأدق عليها جوال وكان الجوال مع اختها واختها كانت بنفس الغرفه اللي انا فيها وكان حولها بنات كثير وكانت قريبه مني مابيننا مسافه كثير المهم دقيت الااختها ردت وقلدت صوت البنت اللي ابيها وانا متحمسه واتكلم واياها الاهذي تستهبل عليه وتكلمني على انها اختها والبنات اللي حولها يضحكون والمشكله انو اخت خطيبي كانت جنبها وشافتني لما انحرجت وضحكت وانحرجت مره لما ضحكوا عليه البنات يعني من جد موقف لاتعــــــــــــليق00