السبت، 7 فبراير 2009

إقتراحات

أعلن الفلكي محمد العجيري إن غبار هذه السنة سيكون لمدة 100 يوم :(
الله يبشرك بالخير :)
على الأقل راح تكون أقل من السنة الماضية اللي غبارها بدأ من شهر فبراير
رواد دار عزيزة لهم رأي ثاني
ولسبب أن معظمهم يعاني من حساسية وربو ...
ومئة يوم ليست قليلة على من يعاني أمراض مثلهم ؟
فهم يقترحون رش مياه البحر على رمال الصحراء بالهيلوكبتر
ويفضلون البداية تكون من على الحدود والإتجاه إلى الداخل
أدري خيالهم واسع ... !
بس والله فكرة ما طرت على بالنا !
ويا زين العقول لي فكرت وبدعت :)
وعلى طاري العقول ... رواد دار عزيزة لديهم إقتراح :
تنظيم مظاهرة نسائية للإحتجاج على نواب مجلس الأمة
بالأمس وصلناكم للمجلس بأصواتنا .... فرحنا واستبشرنا خيرا :))
واليوم نعلن لكم بأننا إنزعجنا منكم ... وزعلنا
عقدنا عليكم آمالا .... فكانت خيالا
مللتونا من المجلس واللي فيه
كفرنا بالديمقراطية .... لأنكم تريدونها لأنفسكم فقط
تطالبون بحرية رأي ونقد ... وعندما وصل النقد إليكم صرختم أين الرقابة ؟
تعبنا من الجو المتوتر والعراك الكلامي بينكم
تصرفاتكم تدفعنا للمطالبة بحل المجلس لنرتاح
وإذا كان هذا مبتغاكم ؟
ليش ركضتوا وراءنا لنصوت لكم ؟
لتقنعونا بأنكم كذلك ؟ لا تصوتوا لنا مرة أخرى !

هناك 20 تعليقًا:

enter-q8 يقول...

مللتونا من المجلس واللي فيه
كفرنا بالديمقراطية ....

هذا اللي يبونا نوصله
ديري بالك توصلين لهالقناعة

nikon 8 يقول...

Enter-Q8
أولا صباح الخير :)
ثانيا : تصدق إن هذا الشعور أو القناعة مثل ما سميتها أهو اللي حاسيين فيه الناس العادية وأنا نقلته ولأنه تكرر أمامي مع أكثر من مجموعة فحبيت أنقله لكم كما هو ليعلم النواب إن الناس طفرت !!!
أدري إننا لا يمكن نتخلى عن ديموقراطيتنا ولكن ليعلم النواب الأفاضل إن تصرفاتهم قاعدة تصدمنا ومو قاعدين نشوف أو يرسخ في بالنا إلا إهيا .
أما عن قناعتي شخصيا فأريد نواب نوابا يبهروني بأدائهم كما بهرونا بخطبهم وانتخبناهم مع إحترامي للجميع.
أحب أصبح بكلام ومواضيع خفيفة ... فآسفة هذه المرة على التصبيحة الدسمة .
راح أراعي هذا الشي مرة ثانية وأنزل لكم بوست صباحي خفيف طينة في الصبح
:))

Sn3a يقول...

على فكره
فكره رش الصحاري بالمياه مو غلط
وعلميا ممكن تتطبق


اما بالنسبه للمجلس
صدقيني جايز 10 بالاميه من الناخبين صوتو على اساس قناعه تامه
مو شيعه وسنه وبدو وحضر وولد عمي وولد خالي وولد ديوانيتنا وولد فريجنا
للاسف للحين مافهمنا شنو الهدف من مجلس الامه وواجبنا بتوصيل النواب
عشان جذيه نوصل ناس
وتالي نتحلطم عليهم

غير معرف يقول...

فكرة رش مياه البحر على الصحراء قد لاتكون ذات جدوى لان الغبار يجينا من جنوب العراق. الحل العملي لكن طويل الامد اعادة تاهيل البيئة الصحراوية ووقف الرعي بكل انواعها فيها وما اقول فقط الجائر لان الغطاء محدود جدا واى رعي حتى لو خفيف يقضي عليه. الغطاء النباتي يعمل كحائط صد يوقف الغبار ويحمينا من الغباء المحمل بامراض ومواد خطرة

Cr8ivia يقول...

بصراحه
هذا احساسي .. مليت و لاعت جبدي و الكل مل و لاعت جبده منهم

بس مع ذلك لا يزال الرفض قاطع و غير قابل للنقاش بالتخلي عن الديمقراطيه

قانونى كويتي يقول...

مساء الخير

وبعدين جونا بالصيف عادى فيه غبار وفيه اللى كل سنة متعودين عليه وهو خير وبركة علينا

بس الغريب اللى انشوفه الحين اللى يحصل بجلسات مجلس الامة

ويا الزين نتمنى اختياركم يكون صحيح بالمرة القادمة

ويا ريت تعطون حق المرشحات وخل تتغير بوصلة المجلس القادم


تحياتى لج

nikon 8 يقول...

سنعة
صحيح كلامك يا سنعة ... وصلناهم لكن إسلوبهم خيب ظنا :)

nikon 8 يقول...

غير معرف
الغطاء النباتي حل جيد ولكن أحيانا يأتينا الغبار من إرتفاعات عالية جدا ما ينفع معاها غبار :)
أهلا بك في دار عزيزة :)
تحياتي :))

nikon 8 يقول...

Cr8ivia
زين لقيت وحدة معاي على نفس الخط :))

nikon 8 يقول...

قانونى كويتي
أؤيد كلامك لازم نوصل أكثر عدد من النساء للمجلس :)

Funny Q8i يقول...

لاااااااااااا

مابي غبار

والله ترا اهج من الديرة

ماي بحر ماي صليبي

ان بغى ماي مجاري

بس فكونا من الغبار

وان لزم الامر انه نسوي مظاهرات بالبر

وكل واحد اييب ابريجه وياه

ورششششششششش

ليما تصير نقعه p;

وتحيّاT

غير معرف يقول...

السلام ..

شووفي حبيبتي انا اقول الغباار والرطووبه الشوي اللي اييولنا بالسنه وايد وايد واايد احسن واهون من الاعااصير والبراكين والزلازل اللي قاعده اتصير بالدول الثاانيه !!

ليش احنا دايما نعترض على الاشياء الهينه اللي تصيرلنا ومانحمد ربنا على النعمه اللي احنا فيها ؟؟
ترى اللي يشووف مصيبة غيره تهون عليه مصيبته (( الحمدالله على كل حال واهم شي الصحه والعافيه ))

وعلى طااري مجلس الامه [ من وجهة نظري انه الكويتيتن بيظلون يتكلمون ويتكلمون والحجي كله راح يكون حجي فااضي تدرين ليش لانه ماافي افعال بس اقوال >> تحركو قومو سوو شي مو بس بالكلام ،،
الحين فلسطين وقفت مع العراق بالغزو يقوومون عيالنا يلبسوون اغترهم ويتمشوون فيهم جنهم يفتخرون بهالشي @@ لا حول الله .. تبون تلبسون اغتر لبسو غترة الكويت شفيها يعني افتخرو فيها افتخرو بديرتكم مو بالديره اللي وقفت ضدكم ] ترى جذي انتو تشجعونهم وتعطونهم قيمه اكبر من قيمتهم !!
(( ادري دشيت ابموضوع ثاني بس هذا الشي لازم نتكلم فيه بعد ))

بس شنقول لا حياة لمن تنادي والله كريم الله سبحانه اهوا الوحيد بايده يغير حاالنا والحمدالله ماافي اي اعتراض على حكمة ربنا .. وانتو بعد بايدكم تغيرون وتحسنون من وضعنا بس مو وانتو قاعدين ببيوتكم وتتحجون وبس !!

ويعطيج الف عافيه اختي :)

nikon 8 يقول...

Funny Q8i
خلاص خلينا نسوي حملة أباريج :)

nikon 8 يقول...

aShley
أهلا بك يا اشلي وفعلا نحمد الله على كل شي والغبار أهون من زلازل وأعاصير .
ما راح ننسى من وقف ضدنا وذبح عيالنا جدام عيونا ولكن الرحمة ما تنزع من قلوبنا على منظر الأطفال في فلسطين ، إرحموا من في الأرض يرحمكم من في السماء .
وبالنسبة للتغيير فكلامج عدل التغيير يأتي من داخل نفوسنا إلى الخارج .
وعزيزة يا أشلي :)

غير معرف يقول...

Nikon8

للقضاء على الغبار على الدولة وأحنا معاها فى حملة أن تزرع البر كله من أشجار الكيناكاربس الناجحه جدا مثل أول لما زرعوا الأثل , الفرق أشجار الكينا كاربس سريعة النمو .

فى الدول المتقدمة يتم تبادل القروض من الدول الغنية للدول المعسرة مثل البرازيل سابقا مقابل منع أقتطاع الأشجار من الغابات المطرية لمساحات شاسعة يتفق عليها ويددق على تنفيذ الأتفاقية

ولكن هل ممكن نطبق هذا المثال بأستزراع الأراضى المثيرة للغبار فى الدول المجاورة مقابل القروض السابقة ؟؟؟

أشك فى ذلك لأن اللى مافيه خير لأهله مافيه خير لغيرهم

Salah يقول...

فكرة عجيبة الصراحة

نرش البر ماي ونفتك من الغبار!

انا موافق!

:)

--------

هذول ما يمثلون الديمقراطية! نتحملهم لمه الشعب يتطور ويوصل ناس أحسن منهم.

لكن تعليق الدستور راح يمنع تطور الشعب وما راح نصير الا دولة دكتاتورية والامثلة وايد!

تحياتي

Manal يقول...

الله يطول بعمر فلكينا العجيري
ونستبشر خير
بعد شنسوي
واي واحد فيه ربو
لازم يستانس
علشان يلاقيها فرصة يسافر بعيد عن الغبار
من الحين جهزوا التذكرة
:)

nikon 8 يقول...

صلاح
صحيح راح نتحمل النواب حتى يتفتح الناخبين ويوصلون نواب أفضل .

: : : : :

متال
واللي ما يقدر علة تكاليف السفر شيسوي ؟
تحياتي :)

: : : : :

داجيرو
ما كو إلا نسحب لندن ونخليها جارة لنا
ونتمتع بالمطر والخضرة :)

Manal يقول...

افا عليج
انتي تامرين وغيرج بعد
البيت بيتكم
:)

حياكم

بس نبي دعاء

:)

nikon 8 يقول...

منال
ما تقصرين يا الغالية :)
خيرج سابق ... شكرا على كرم الضيافة
الله يوفقج ويعطيج اللي في بالج :)