الجمعة، 13 فبراير 2009

أبشركم

اليوم عزمت على مصالحة ريلي ( دلوعة أمة ... ودلوعتي )
إستحضرت بذهني كل الوسائل اللي أعرفها وسامعتها من الناصحين من معارفي
نبشت بعقلي وقعدت أتذكر كل كلمات الأسف ... والحب ... والندم
وأحمد ربي إن عندي حصيلة لا باس بها تحفظتها من المسلسل التركي الشهير نور
اليوم الجمعة ...يوم إجازة ... ريلي يتأخر قليلا في الاستيقاظ من النوم ... موعده إستيقاظه الساعة التاسعة صباحا .
الريال متعود في هذا اليوم إني أقصقص أظافرة قبل لا يروح المسجد لصلاة الجمعة ( أمة معودته على جذيه وأنا مكملة على العادة ) .
قمت من الصبح ... الحمد الله ما كو غبار .... الجو صحو وجميل ... وقررت .... الريوق بيكون بالحوش .
بمساعدة الشغالة غسلت الحوش ... وطاولات الحديقة .... رشيت الزرع ماي ... طلع لونه الأخضر .... وبرفق رشيت الزهور بالماي أيضا ... ألوانها تسر العين ... رتبت المكان وفرشت الطاولة بالمفرش الأحمر المبكر بالأبيض ( خطوط مستقيمة متقاطعة بلونين أحمر وأبيض تشكل مربعات ) وصفيت الأواني .
جهزت الريوق كما يحبه .... حليب وشاي على الطريقة الهندية .... بيض شكشوكة ( مع إن فيه أزمة بيض بس درت على الجمعيات لين لقيت كرتون ) وشوية زيتون وجبن أبيض ... والأهم خبز إيراني مسمسم .
رحت للحمام ( أعزكم الله ) وكتبت على المرايا بأحمر الشفاة : أنا آسفة ... إذا بتسامحني راح أستانس وأونسك ... وإذا بتظل زعلان بأزعل لأني ضايقتك .... إذا تبي نصيحتي إرضى .... ترا مجهزتلك ريوق ما صار . ( هالخطة تعلمتها من فيلم عربي ! )
الريال قعد من النوم ودخل للحمام وهو مقلدم ....... وطلع من الحمام والوجه مستبشر ... يصفر وهو..... منشكح ... وينادي ..... وين الريوق ؟
طرت من الفرحة ... بلحظة كنت جدامه ... نقز من الخرعة وقال : بسم الله ... ول .. مو مصدقة ؟!
أنا : طبعا مو مصدقة ... إنت منت شوية عندي ... يا الله تعال شوف شنو مجهزتلك .
طلعنا للحوش وأنا ماسكة إيده .... ولما شاف المنظر
هو : أوووه ... كل هذا لي .... عيل كله بأزعل ...( يضحك )
إعجبته القعده بالحوش أمام الحديقة تحت أشعة الشمس اللطيفة
تريقنا بعد ما تأكدت إنه ما في خاطره شي علي ... وبعد الريوق
قصقصت أظافره ( هالمره سويت له مثل مانيكير الصالونات ونقعت ريولة بالطشت لزوم الباديكير )
وأشوة إن إحنا في الشتا وريوله مخشوشة بالدلاغات طول اليوم ومحافظة على طراوتها وليونتها .... يعني ما كو تشققات وبطوط بالريل ..... وإلا جان تندمت :(
شفت إن الجو مناسب لأفضفض له ما دام إنه مرتاح وريوله ماسكتها بيدي :)
أنا : تصدق كنت أحاتي إنك ما ترضى بسرعة وأمك اليوم لي زرناها تشوف أظافرك طويلة وتزعل علي ... ذيك الساع حتى ماي البحر ما يطهرني من زعل خالتي ... لا وفوقها زعلك .
هو : تصدقين عاد ... فقدت هذرتج وسوالفج الثلاث أيام اللي فاتوا ... أمس مريت على أمي ... جابت طاريج ومدحتج ... وأنا بعد قلت لها ... الله خير أشهد إنها بنت ناس ... تصدقين يا يمة إن صار لي مدة ما هديتها شي ... لا زعلت ولا قالت شي ... صاير الأزمة الإقتصادية بادي يطلع تأثيرها شوي شوي .... والجيب مو مثل قبل .... آآآآآه ( يتنهد )
يكمل : بالي هالأيام مشغول عشان جذي كنت حساس وزعلت عليج ... وإلا الموقف بكبره ما يسوى ؟
ذهلت وأنا أسمع ولأول مرة هالإعتراف الكبير ... وكسر خاطري ... وأنا أتساءل بيني وبين نفسي ... أزمة إقتصادية ؟ !
وأنا أفكر بهدية ثمينة ؟ ومصدقة روحي بعد إني متنازلة عن عيادي العيد وسفرة راس السنة ؟
أنا مواسية : يوم كان جيبك مليان ما قصرت علي يا بعد عمري ... المهم وجودك بينا ورضاك يا نور بيتي .
لاطفته بالكلام وهونت عليه .... لين ضحك ... يا الله إرتحت عدل
بخرته للصلاة وطيبته بخلطة الشيخ سديس ( توني جايبتها من العمرة ) وذهب للمسجد .
بعدها زرنا بيت خالتي ( أم زوجي ) وإحنا متراضين كأننا معاريس فرحانين ببعض ....
صج هدية الفالنتين اللي في بالي راحت علي .... لكن عساها خيره ... يمكن يرخص ثمنها مستقبلا ... وإذا ما حصلت عليها ما هي آخرة الدنيا ... المهم راحة وسعادة ورضى زوجي .
وشكله هالمره ما كو هدية فالنتين ... لأن باله مشغول بالأزمة الإقتصادية وآثارها .... ولمح لي إن طالب لي وردة وحدة بس .... ونوعها مفاجأة .
أنا : كل ما يجي منك غالي علي يا نظر عيني
توني راجعة من الزوارة قبل ساعتين ... وحبيت أطمن كل من إنشغل باله علي ..... كنت ناوية انزل البوست باكر الصبح ولكن حجم التفاعل الصادق خلاني أنزله فورا ... شكرا لكم جميعا ، كلامكم أوحى لي بطريقة المصالحة ونور عقلي وبصيرتي ... شكرا لكم من القلب .
زوجي مر علي وأنا منهمكة بالطباعة وسألني : تكتبين قصتنا ؟
قلت له نعم وأنا منصفق وجهي خايفة إنه ما يرضى
إبتسم وقال : عاد زهلقيني ... طلعيني خوش ريال ... وفرك إيد بإيد وزاد ضاحكا : الله باكر يتهاوشون علي المعجبات حتى مانيكيرك وباديكرك ما يجيب نتيجة معاي ؟!
على فكرة ... فكرة الباديكير والمانيكير وايد عجبت زوجي ... وراح نسويها له مرة كل شهر ... أنصحكم فيها ... بس المهم تسوونها بكل حب ... يعني لا تجربونها وإنتوا فيكم حرة على الريل !!!!
كل فالنتين والجميع بألف خير

هناك 58 تعليقًا:

kuwaitawy يقول...

الحمدلله على كل حال




جان زين كل البنات اللي يتابعون الافلام يصيرون نفسج

هههههه


ويتعلمون الطرق اللي يستفيدون منها مثل ما سويتي بالحمام ( اجلكم الله )



:)

Manal يقول...

يا بعد جبدي انتي يالغالية
والله مو هينة
:)

الله لا يحرمكم من بعض

الله العالم اشكثر فرحت وانا اقر الكلمات المكتوبة

ونعم الزوجة

والله يرزقكم الذرية الصالحة
وهدية الزوجة رضى زوجها عنها
والعيشة الهنية
بالحب
والتفاهم

والله يديمها عليكم

:)

وسالفة المانيكير
بجربها

بس مو وانا معصبة
:)

غير معرف يقول...

الحمد لله على السلامة

قانونى كويتي يقول...

الحمد الله اخيرااا

ريحتينا بس طولتى بالزعل ليش عاد ثلاث ايام

وماشا ءالله عليج وعينى عليج باردة

يلا خوش طريقة صج يمكن كانت ما تمشى

بس على الاقل سويتى شى على الاقل


يعنى ما قلتى اشمعنه اهو ما يراضينى

ونتعلم منج صراحة ان الواحد لازم يسوى

شى على الاقل وما يقول انا لاء

والشى المهم اللى احييج عليه انج بينتى للكل انج طيبة وعلى نياتج وان زوجج يعرف ان عندج مدونة بس بشكل غير مباشر

وان الهدف من المدونة للاستفادة منها ومو لنشر الغسيل والكلام الفاضى


وما ابى اطول بس صراحة صج استانت لكم

واتمنى كل اسبوع اتسوين الريوق بالحديقة

:))

وتحياتى لكم

وقولى حق ريلج منو قدك :)))

Salah يقول...

الله يديم المحبة!

رجاء قبل لا تنصحين البنات بالبديكير تأكدي ان رياييلهم ما يغارون!

:)

Tekana يقول...

الله يتمم عليكم ان شاء الله

اهم شي انكم تراضيتوا وتصافيتوا وهذا اهم شي

bof-10 يقول...

وااااااو

عفيه عفيه عليييييج ولله
عاد اليوم طلعت مع خطيبتي ... وقاعد اقولها عنج ... وكنا اثنيناتنا قاعدين انحاتي بتصالحون ولا لأ ... بس اشوه ..الحمدلله انك تصاحتو .. وعفيه عليج والله ... والله يخليكم حق بعض ويبعد عنكم العين ... ويخليكم حق بعض ياربي ...

عاشو عاشو كتاكيتنا ..=)

اي عفيه عليج خليج امراضيته جذي دوووم ....


واحم احم بنات لا اتفكرون اتسوون منيكير حق رياييلكم وانتو فيكم حره مثل ماالت لكم ...ترا راح يصير الموقف دموي ...

ZooZ "3grbgr" يقول...

عساكم بهالحال واحلى يارب

إي هذي البوستات اللي تشرح

تبارك الرحمن

الله لا يحرمكم من بعض

اقولج شي؟

البوست هذا صج فالنتاين

:")

I7na 3shagnaha يقول...

دوم إنشاء الله متراضين :) عجبني ريوق الحديقة و شوقني المفرش الأحمر الكاروه أكثر من سالفة البديكير :) happy valentines

مركبنا يقول...

الله يتمم عليكم
وعسى دوم فرحتكم ببعضكم

ا

غير معرف يقول...

وانتى بخير

بس بسألج , الصوره اللى حاطتها , صورة بيتكم ؟؟ شكله صغير ويونس

فريج سعود يقول...

سؤال اشلون كفت الحمرة كل هالحجي على المرايا ؟

غير معرف يقول...

ناقص تحطين صورة الريوق شوقتينا:)

Manal يقول...

بعد اذنج اخيتي
بس ارد على صلاح

ترا لازم تتحمل
ما كو فكة

:)

Fahad Al Askr يقول...

كل عيد حب وأنتوا بخير وعسى الله يتمم عليكم ويحفظكم لبعض، ويتمم عليكم ويقربكم من بعض بحيل اللي ما تنام عينه

enter-q8 يقول...

عسى الله يحرسكم و يحفظكم من العين و يتمم عليكم سعادتكم
على مأظن انك انتي اهديتي زوجك الكريم اجمل هدية بهالمناسبة
نعم تأثير ما فعلتيه لزوجك الكريم له الاثر الكبير الكبير لدينا نحن معشر الرجال
فالحظة من هذه اللحظات و هدوء النفس و سعادتها و ببساطتها و عفويتها و تلقائيتها
لها اثر كبير كبير
بقى ان اقول لك شيئ ستنصدمين منه
نطري هدية مو طبيعية من الزوج الكريم
بس مو تحنين نطري على الراحة

قانونى كويتي يقول...

صباح الخير


زين اخيرا حطيتى التعقيبات

كل هذا رقابة على التعقيبات يعنى

يالله تستاهلين كل الخير

وبالتوفيق

Cr8ivia يقول...

الله يتمم عليكم يارب و لا يغير عليكم

ونسني بوستج جدا من الصبح

Sweet Revenge يقول...

ماشاء الله لا اله الا الله ,هذاالسنع الله يحفظج ويحق ريلج لج ويتمم عليكم بالصحة والعافية
وايد استانست لما قريت بوستج حده هادي ومن القلب ,يختي ما تعطين دورات لبنات هالايام جود يتعلمون اصول معامله الزوج والله تكسبين فيهم اجر
يحلي ايامج دوم بالايمان وطاعة الرحمن

بنات عبدالغني شربت يقول...

الحمدالله انج تصالحتي مع ريلج

والله لا يجيب الزعل بينكم مرة ثانية

*
حلا شربت

um.alzain يقول...

حبيناك من اسلوبك... من رواياتك.. من كتاباتك .. من رقيك في حواراتك معنا... حبينا روحك المرحه ...تواضعك.. واخلاقك ..

وبعد هل بوست حبيت ذكائك ودهائك :))
ادام الله عليكم المحبه والسعاده
وتقبلي مني باقه زهور تعبر عن حب وشعور .

Unknown يقول...

وااااي ونااااسه ماشاءالله الله يهنيكم ويجعل ايامكم كلها افراح... هذي الزوجه السنعه

ANGEL HEART يقول...

عسى دووم متصالحين ومستانسين وسعادتكم ويا بعض اغلى واثمن هديه :)

nanonano يقول...

والله ما شاء الله عليج

أنا وايد معجبه بهدوئج و تحكمك بالموقف

و بالنهايه..صارت نهايه سعيده من غير أي خسائر

Barrak يقول...

الله يخليلك ريلك

ولايحرمكم من بعض


اكو حريم عالايام يغسلون الحوش؟؟



يازينكم والله

مش انا يقول...

عفيه عليج والله
عندج اخت اتزوجها D;

مش انا يقول...

نصيحة لوجه الله
خوفا من العين والحسد الافضل انك ما تكتبين هالتفاصيل في البوست مع انها تمتعنا وتفرحنا نحن كقارئين
عسى الله يحفظكم ويخليكم لبعض ويبعد عنكم عين الحسد والحاسدين امين يا رب العالمين

غير معرف يقول...

Nikon8

Again , i missed that the story is about you ????

I am glad that it had a happy ending

شهرزاد يقول...

الله على هالأفكار .. والله شجعتيني أجرب طريقتك .. بس يبيلها هوشة بالأول! هههههههههههه
الله لا يغير عليكم و ينولك كل اللي تتمنيه

nikon 8 يقول...

kuwaitawy
صدقني راح يتعلمون ويطبع بذهنهم شي... بس خله مخزن بالعقل ويستخدم وقت الضرورة .... تحياتي :)

nikon 8 يقول...

منال
شكرا يا الغالية ... وتصدقين لي الحين تعبانة من شد الأعصاب اللي صار لي ... بس مرتاح بالي الحين :)
وما عليج من صلاح سوي له بدكيير حتى لو يغار ... ضحكوا إشفيها :))
الله يديم المحبة بينكم ولا يفرقكم .. آمين .

nikon 8 يقول...

صلاح
فيها يعني فيها ماكو فكة :)

nikon 8 يقول...

دروازة
شكرا لك من القلب ... كلماتك أعانتني كثيرا لحل مشكلة زعل زوجي وحسيت بصدق كلماتك لي
شكرا مرة اخرى :)

nikon 8 يقول...

قانوني كويتي
ما ادري ليش حسيت إنك قمت تحاتيني
عموما شكرا لك من القلب وشكرا على كلماتك الواقعية .
لو ماكانت الطريقة بتمشي جان إنتقلت لخطة أخرى الأياوييد ما قصروا عطوني خطط .. والريوق بالحوش يعتمد على الجو .
تحياتي :)

nikon 8 يقول...

تكانة
الله يسلمج .. تحياتي :)

nikon 8 يقول...

bof-10
الله يسلمج ...ودام إنج مخطوبة.. دائما حاولي يكون زوجك راضي عليك ... وشوفي المعزة وين تصير ... وأبدا لا تتزعلين لأن كثرة الزعل تنقص مقدارج في قلبه ... بالتوفيق :)

nikon 8 يقول...

ZooZ "3grbgr"
يا هلا ومسهلا بزووز
الله يسلمج :)

nikon 8 يقول...

I7na 3shagnaha
يا هلا ومسهلا في دار عزيزة
المفرش الأحمر معاه كشنات للكراسي .. وأطلعهم للمناسبات الخاصة فقط ... في الأيام العاديةأحط مفرش نايلون يا الله ألحق علي وسخ اليهال :)

nikon 8 يقول...

مركبنا
الله يسلمك .. وأنا أتمنى لك الشي نفسه :)

nikon 8 يقول...

غير معرف
الصورة من النت وهي قريبة جدا من شكل بيت أمي عزيزة :)

nikon 8 يقول...

فريج سعود
لووووول
دعاية الحمرة هذي الأيام إنها تسوي لك خط على طول عشرة كيلو متر :)
تحياتي

nikon 8 يقول...

غير معرف 2
وقتها كنت أفكر برضى زوجي وبس ... مع إني من النوع اللي كل شي أصوره .. بس ذاك اليوم كان غير :)

nikon 8 يقول...

فهد العسكر
الله يسلمك والفال لما تفرح باللي تسوي لك أكثر ... بس ها إشرط عليها البديكير :)

nikon 8 يقول...

Enter-Q8
صحيح كلامك وحسيت باللي تقوله .
أنا ماخذه بنصيحتك وناطره :)
تحياتي :))

nikon 8 يقول...

Cr8ivia
الله يسلمج ... وتتونسين بالعافية :)

nikon 8 يقول...

Sweet Revenge
الموضوع ما يبي دورات فقط تبعي إحساسك كأنثى تبي رضى زوجها وبعد ما يحتاي الله ذكرنا الكيد ... فأكيد ما نعدم من الحيلة ... إذا بغينا :)
تحياتي :)

nikon 8 يقول...

بنات عبدالغني شربت
شكرا يا حلا شربت .. خجلتوني بشعوركم
تحياتي :)

nikon 8 يقول...

أم الزين
الله هالله على الكلمات اللي ما أقدر أرد باحسن منها
تحياتي :)

nikon 8 يقول...

كويتية بحرينية
وناستج واصلة لي عندي .. شكرا :)

nikon 8 يقول...

ANGEL HEART
والله صدقتي ... يا هلا فيج في دار عزيزة :)

nikon 8 يقول...

nanonano
يا هلا ومسهلا بالزميلة وحياج الله بدار عزيزة :)

nikon 8 يقول...

براك
إي أكو ... ما في أحلى من أغسلة بيدي لأغلى شخص عندي :)
وحياك الله في دار عزيزة :)

nikon 8 يقول...

المجهول
قل لن يصيبنا إلا ما كتب الله لنا
من كثر ما نخاف من العين صرنا بس نذكر الأمراض وضيق الحال والمصايب :(
عموما شكرا على النصيحة :)
لو كان موضوع تزويج إختي لك بيدي جان عطيتك أياها :)

nikon 8 يقول...

داجيرو
الله يسلمك ... الثالثة ثابته ... أنا متأكدة إن في المرة الجاية ما راح تفوت عليك :)

nikon 8 يقول...

شهرزاد
إلا الهوشة ما نبي نجيب طاريها:)
الله ما كثر الزعل إلا في الحياة الزوجية :)
وجربي الطريقة وإدعي لي :)
تحياتي :)

om comment kuwait يقول...

ياي سوالفكم اتهبل

عسى الله يخليكم حق بعض :)

غير معرف يقول...

red tulip
لو كل الحريم مثلك والرياييل مثل ريلك جان احنا في بلد أفلاطون ، المشكله إن الحريم مو قاعدين يتحملون مع أن الاهل من قرابة 50 سنه شافوا الويلات ! وواعتقد إن الجدات مديم يتكلمون عن حياتهم السابقه للتدليل على أن المرأه المفروض تصبر على زوجها ، والصبر على الزوج يأتي بفوائد عظيمه أولها الجنه وبعدين التقدير من الزوج ، لان الرجل لحم ودم وأحساس .

nikon 8 يقول...

red tulip
الدنيا فيها الزين والشين
الرجل على واجبات كثيرة تجاه زوجته أما الزوجة فواجبها ( الطاعة ) للزوج وهذا امر كبير وثقيل للزوجة
الله يهدى الأزواج لبعضهم
شكرا للمشاركة :)