الأحد، 8 مارس 2009

كوني .... أجمل

قبل أيام ذهبت لعيادة الأسنان لمشكلة بسيطة بحشوة أحد الأسنان
وبعد أن فحص السن وقرر العلاج المناسب والسعر ( أقل من خمسين دينار ) عرج على موضوع آخر لم أتي علشانه
الدكتور : شنو رايج ... نسوي لج تجميل حق أسنانج الجداميين الأثنين ويصيرون صفة وحدة مثل المطربة أنغام
أنا : دكتور عاجبيني وما فيهم شي
الدكتور وهو يعرض صور لحالات قبل وبعد التجميل : شوفي ... اللي سوا قبلج إشلون صارت إبتسامتهم
أنا : تعتقد جذي يا دكتور
الدكتور : أي نعم يا الله توكلي على الله .... وعدليهم
كنت مترددة .... بس إلحاحه خلاني أعتقد إني فعلا بحاجة ... وما قال الدكتور إلا وهو صاج !!
حولني لدكتور آخر في عيادته ... كشف على أسناني .... هز راسه .... ونفخ
وقال : محتاجة لتجميل الأسنان الأربعة اللي جدام
أنا : بس الدكتور فلان بس أثنين .
الدكتور : هذا فيه إعوجاج ... واللي جنبه كبير جدا ... ولازم الأربعة يتعدلون
أنا على مضض : أوكي اللي تشوفه
بعد ما ضمن موافقتي صار يشرح مزايا التجميل .... وفي الأخير قال التكلفة 600 دينار
أنا : دكتور أنا مو عاملة حسابي ... ولا عندي ميزانية هالشهر ... أجي لك مرة ثانية
بصراحة ... إنحشت .... ما له داعي التجميل ... دام الأسنان سليمة
وإبتسامتي مثل يقولون الشباب شقاقية ..... وقاعدة تؤدي واجبها على أكمل وجه ... صحيح إنهم ما هم مثاليين ... بس ليش التجميل ؟؟
وفوق هذا ما عاقتني .... هذا أنا درست وعندي صديقات وتزوجت وإشتغلت !!
والحمد لله ثقتي بنفسي فوق السحاب ( ذكروا الله ) هههههههههههه
موقف آخر حصل لي قبل سنتين عندما حصل معي إلتهاب بالعين تعدز معه لبس العدسات اللاصقة
ذهبت لمستشفى خاص .... الدكتور وهو قاعد يكشف علي قال : ليه ما تعمليش عملية تصحيح النظر ؟
أنا : مو مقتنعة فيها
الدكتور : أنا أقنعك
أنا : معليش يا دكتور خلينا نخلص من الإلتهاب أول .
كتب وصفة العلاج وناولني إياها وهو يعدد مزايا عملية تصحيح النظر !!!
راجعته بعدها مرتين ... وفي كل مرة ... يتغزل بعملية تصحيح النظر ويطلب مني عملها بطريقة ملحة
ويغريني .... ما تخافيش أنا اللي حأعملهالك
إنزعجت من إلحاحه فقلت له : دكتور إذا كررت علي هالموضوع مرة ثانية راح أشكي عليك عند إدارة المستشفى .
في آخر مراجعة فضلت تغيير الدكتور وكان ناصحا جدا وطمأني إن الغبار وحرارة الجو هما سبب الجفاف والإلتهاب بالعين .... والعلاج كان قطرة بالإمكان الحصول عليها بأي صيدلية وبدون وصفة طبية !
وسألته : دكتور ما عندي مشكلة بالنظارات ولا العدسات ... بس تنصحني بعملية تصحيح النظر ؟
الدكتور : إذا شفتي إن كل دكاترة العيون تخلوا عن النظارات وسوا العملية ... سويها !
يظل الموضوع فيه جراحة ... وإحنا كدكاتره ما نفضل الجراحات إلا إذا ما لها بديل !
إجابته كانت مقنعة .... وإرتحت لها كثيرا ... وبخاصة وإني أخاف من العمليات اللي لها داعي ... هالمرة عملية ما لها داعي ... وتعتبر كمالية .
دكتور الأنف والأذن والحجرة أيضا عندما راجعته بسبب الحسياسية كشف على أنفي وقال :
عندك إعوجاج داخل الأنف خلينا نعملك أياه ... وبالمرة نعمل لك تجميل بسيط لمنخارك ونصغره .
أنا : الإعوجاج له علاقة بالتنفس
الدكتور : للأمانة هو موجود عند كل الناس ولكن درجات الإعوجاج مختلفة .... وعندك الحالة بسيطة ما تأثرش بالتنفس .
أنا : خلاص سيب منخاري بحاله .... أنا مبسوطة عليه ... وكمان ده ورثي من جدي وبيفكرني بيه ... أصلي شبه الله يرحمه .
وين ما نروح ... هناك من يداعب خيالنا ويعبث بأوهام الجمال الكامل تحت شعار كوني أجمل
صالون التجميل مثلا .... في كل زيارة تحاول بيعي كريم شكل
مرة تمسك خصلة من خصلات شعري وتشهق بخوف مصطنع : ليه مدام تاركة شعراتك هيك ... حرام عليكي ... بدهم تغذية .
ومرة تقول شعرج صار خفيف .... وأحيانا تخوفني من التقصف اللي بأطرافه
وطبعا الحل علب مغذيات وكريمات للشعر أشكال وألوان ... والله أعلم تبيعهم لحسابها أو لحساب الصالون
وطبعا كلشي ولا شعورنا .... هذا راس جمالنا ونقطة ضعفنا
وعندما أغير الصالون ألقى من تعتقد إني زبونة لقطة فتحييك شباكها حولي .... وتحوفني حوف ما صار ولا إستوى .... حتى تنفرد بي وتهمس لي : عارفة إن صاحبة الصالون جايبة نخاع مغذي للشعر ... ومش بتعلم الزباين عليه .... ده مخصوص لأصحابها وقرايبها .... إن كنت عاوزة حأقول لها إنه لأستعمالي الشخصي !!!!
أذهب لفرع التجميل بالجمعية لشراء أحمر شفايف فقط
تلتقطني خبيرة تجميل بسرعة وتبدأ بنقد بشرتي .... يا مدام إلحقي بشرتك .... مساماتك واسعة
وهي كريم ... راح تنبسطي عليه .... وفيه كولاجين بيعبي بشرتك .... وسعرو كتير كتير مناسب ( إكتشفت أن السعر فوق 100 دينار )
وكماني للسواد يا اللي تحت عينك ... هلأ هلأ جاينا كريم عامل ضجة كبيرة.... خديلك واحد قبل ما يخلص .
والكريم هيدا بيوحد لون بشرتك ... ويزيل البقع الداكنة .... خدي واحد منه
( تقول كلامها وكأن المنتجات التي تروج لها للتوزيع المجاني وليس بالسعر الفلاني )
وفوق هذا ما تستحي ما خلت شي شين وما طلعته ببشرتي... دون مراعاة لمشاعري ... اللي يسمعها وما شافني يقول منهي هالشيفه ؟؟؟؟
سواد وبقع ومسامات .... خلوه !!!
مع إني بعيون روحي وعيون غيري وحده بشرتي حلوة ...ومملوحة ... ومهضومة ... ولا فيني شي ينقط !!!
لا تقولون مداح نفسه يبيله ( .... ) بس هذا هو الواقع :))
لما سولفت حق صديقاتي وتذمرت إن المغريات حولنا كثيرة للإستحواذ على ما في جيوبنا بإسم الجمال وإني لا أستطيع عمل ضبط للميزانية لأني أروح لشغلة بسيطة أو بميزانية محددة وأخرج بالشيء الفلاني .... وليتي أداوم على الكريمات أو المغذيات أو ألقى النتيجة الباهرة مثل ما صورتها البائعة .... جان ما أتذمر !
قالت لي إحدى صديقاتي هذه الحكاية الطريفة :
تقول : قبل رجعة زوجي من السفر كمرافق لوالده المريض
حبيت أعالج بشرتي وأكتسب شوية نضارة ولون .... وهذا موضوع جدا بسيط يحتاج لكريم بالليل وكريم بالنهار وغسول للوجه مع نصيحة بعدم التعرض للشمس تقول هذا كان خبري بعلاج البشرة لأني عاملته قبل كم سنة .
تتابع صديقتي كلامها : أقنعني دكتور الجلدية بحل آخر ووافقت ... قلت الدكتور أدرى مني بعلاجي
قام بحقن جبهتي وأخفى علامات التعبير الواضحة على جبهتي .... ورفع حاجباي لأعلي بطريقة أبدو فيها إني متحفزة لهوشة من قلب !!!
تضحك وهي تكمل : إستقبلت زوجي بالمطار .... وبعد ما ركبنا السيارة عائدين لمنزلنا
عفس وجهة ....وأول كلمة قالها لي بحمق : إشصاير ؟
ليش رافعة حواجبج علي ؟
كذي الحريم يستقبلون رياييلهم ؟
وزعل ومد بوزه ...... وكأني دافعة فلوس للدكتور حتى أنزف ويزعل علي زوجي !

هناك 43 تعليقًا:

مش انا يقول...

مايخافون الله هالدكاترة وخصوصا لعاملين في المستشفيات الخاصة همهم الفلوس وشفط ما بالجيوب حتى لو كانت خردة ...
بس موقف صديقتك يضحك وزوجها معاه حق بالزفة .... لووووول

esTeKaNa يقول...

يا صباح الجمال الطبيعي
:)
كنت ممن يتأثرن بحديث الدكاتره وصالونات التجميل حتى انتبهت!!
اني ادفع مبالغ طائلة دون سبب مقنع
هناك امور تستحق
وهناك امور مبالغ فيها اكثر مما يجب
وتوصلت الى ان الامر يرجع لنظرتنا لنفسنا..لابد ان نقتنع بأنفسنا بمميزاتها وكل عيوبها ونحبها
!!
هناك من يعيش أزمة ثقه ومستعد لدفع عمره مقابل ان يكونون اجمل
اما بالنسبه للدكاتره
فهناك بعض ممن ينصحك بصدق،ويخيرك بين الامور اكثر،هؤلاء هم الذين اثق فيهم اكثر
:))
اما السالفه الاخيرة
فبصراحة...ضحكتني
:PP~

غير معرف يقول...

law ben6ee3 eldekatra eb kil shay yemde7ona chan meshaina 3ala arba3 3ogob kil hal 3amaliyat eli besawonha

الزين يقول...

للأسف كل شي بالكويت صار تجارة

حتى صحة الناس


خوش موضوع


شوفي على طاري قسم الكوزمتكس

لما ينصحوني بكريم على طول اسألها انتي تستخدمينه

الله يخليج شوفي ويها لما تسئلينها هالسؤال

يا تجذب وتقول لج ايه

يا تتدوده وتقول لج انا ما احتاج بس انتي تحتاجين

:)

lawyer يقول...

ههههههههههههههههه

هذولا جنهم ودهم يقولووووووون لنا كووووني اهول مووو اجمل !!




تسووووويق فاشل

تعالي شوفيني اذا يتني وحده تقولي بشرتج اقولها

الحمدلله انا راضيه عن نفسي


بسسسسسسس اجعم فيهم مالت عليهم



اشوة ان الي يسوقووووون حريم فازفهم
لو ريااااااايلل
الصرااااااحه جان اسيييييييح

:Pppp

Яeema يقول...

ولهت على بلوقج

تبين الصج كل شي طبيعي حلو
و الزايد ناقص

أمس رايحه عرس الله لا يوريج الحريم الكبار
يا هويله تهولي

المشكل بالجسم عندي أهم من الويه!!

فريج سعود يقول...

الحل بالتنفيس

Nostor Azzuro يقول...

كل حاجة دلوقتى بقت غلط
يعنى هى جت عليهم
!!!!!!!!!!!!!!!!!!

غير معرف يقول...

ديييري بااالك من تجميل الاسنان!!
خصوصا اذا ما كان فيهم شي لأن بيلعبون بحسبتهم! يبردون الضرس لين ما يبقى منه شي بعدين يلبسونه و تعالي عقب معانات مع الصمغ والمواد المستخدمة وبعد فترة عادي يقلب لون أخضر غير مشاكل الحساسية الزايدة باللثة والعصب
فالله احفظك من هلي يقولون عنه تجميل أسنان لانه صج تهويل

غير معرف يقول...

Nikon 8
نعلن تظامنا قلبا وقالبا مع مواقفكم الحازمة من شافطى وشافطات أموال النساء بالباطل

وبمناسبة اليوم العالمى للمرأة المصادف اليوم 8 مارس نهديكم هذه الأغنية القصيدة

http://www.youtube.com/watch?v=EtJoNj5zLlc&feature=related

um.alzain يقول...

:))
التجاره دخلت في كل مجال حتى الطب للاسف , وبأمكانا التملص برد ذرب وانتهينا.
الطامه الكبرى في التعليم الاساتذه يوهمون الاهل ان الطالب يحتان تقويه للطش المقسوم والويل للطالب اذا رفض سقووووووط لامحاله وكل بسبب الجشع والطمع
الناس اختربو ياجماعه

nikon 8 يقول...

المجهول
وإنت صاج ... وين اللي ينصحون بالأشياء الطبيعية ؟
كله يبون شفط فلوس وبس :)

nikon 8 يقول...

إستكانة
الدكاترة الناصحين صاروا قلة !
كل شي صار تجارة وشطارة !

nikon 8 يقول...

حمد
صح لسانك ... وحياك الله في دار عزيزة :)

nikon 8 يقول...

الزين
بحط في بالي هالسؤال مرة ثانية :)
تبين الصج وجوهم تلق لق من البياض والجمال ... وإلا إشلون يسون دعاية :)
سعيدة بتعليقك :))

nikon 8 يقول...

لوير
لو اللي يبيعون رياييل كان أنهار!!!
يقول فيج سواد وبقع وقشور ... وما أفتشل :))
أقعد في بيتي وأطيح دهن حل بشعري وروب بوجهي ولا أروح الكوزمتكس مرة ثانية !!!

nikon 8 يقول...

ريما
حياج الله يا ريما فقدتك ... بس معذورة أدري نزلة البيت تاخذ كل الوقت ... بالمبارك :)
أما الحريم الكبار ... مساكين صج مأساة ما شفت وحدة صارت جميلة كثر ما هي مشوهة من بعد التجميل !

nikon 8 يقول...

فريج سعود
بصراحة ما فهمت قصدك ... إعذرني وحياك الله :)

nikon 8 يقول...

Nostor Azzuro
أهلا بإبن النيل وحياك الله في دار عزيزة :)

nikon 8 يقول...

غير معرف
شكرا على النصيحة والمعلومات المفيدة
أسنان صفر ويا حيل الله من الشاي والقهوة ... أما الأسنان الخضر شنو بنقول عنهم ؟!!!

nikon 8 يقول...

daggero
شكرا على الهدية ... أول مرة أدري في مطربة إسمها أريام ... يا حليلها مستورة إهي والكومبارس :)
الله يستر باقي المطربات

nikon 8 يقول...

أم الزين
صاجة في كل كلمة قلتيها ... أما الرد الذرب فناس ينفع معاهم وناس الشكوى لله من أمثال دكتور العيون اللي رحت له !

مركبنا يقول...

موضوع عجيب كالعاده

للاسف تحول الطبيب الي بقال يعرض سلعه ويقنعك فيها
واطررنا ان نتغير من دكتور الى اخر
لنتاكد من سلامة المنتج قبل الاستخدام
يعني اذا قال هذا يبي عمليه دوري على جم واحد بعده عشان تاكدين
===
اما ملوت التجميل فانا ما اقتنع فيهم
كله بشرتج يحرام بهدها تموت !!
عشان جذية ما احب اروح اشتري مكياج
اشوف الشئ الى عند الي حولي واشتري مثله عشان ما يقرقون على راسي

وشكرا

Unknown يقول...

واااي الدكاتره صاروا تجاريين والله ان من جم شهر رحت لدكتور للاذن اخذ مني بس للفحص 270 دينار .... اشدعوا؟؟
ماخله فحص واجهزه غريبه يابهم لي وبالاخير عطاني دوا للكحه!!!!!!! والله العظيم هذا الصج امبي الدكاتره مو طبيعيين
nikon8 لى فكره ترى المواضيع ماتتحدث عندي يعني تكونين منزله الموضوع لكنه ما ينزل عندي الا بعد فتره؟؟؟؟

Sn3a يقول...

والله انا ان كنت بشتري شي اسوي حركه مو من اخلاقيات الزبون

امسكلج موباي وادق فيه على وحده قرقه واسولف
واخذ اللي ابيه
ووراي ناس يقولون مدام ومدام وانا طااف

اذا بالصالون
كل مايقولون شعرج في شي
شقمت اقول
وييه حتى انتي شكلج حارقه شعرج بالضبغ
فتكرهني
بس ها
متى اقولها
لما استلم راسي وبدفع الحساب;p
اما لما بسوي اي شي امسك مجله وابوز
فما اشجع الشخص يكلمني


بالطبيب هم طبيب الاسنان كله يقولي يابنتي لبسي اسنانك اللي عملتي فيهم عصب
وانا اي ان شاءالله
فاضيه انا البس
الله يخلي الكاتفلام حق اي عوار;p
ماعدا مره اضطريت لما انفجرت غده بشفايفي رحت وسويت جراحه


انتي بوزي
ومثلي انج ماتعطين ويه ومالج خلق
يخافون منج
;p

اما رفيجتج
كسرت خاطري والله لووول

mellow يقول...

ولد عمي يشتغل بشركة وساطة مالية يقول

HOLD YOUR CASH!!


أما عن إلي بأقسام التجميل فهذيله متعلمة لهم جم حركة من كتب ال BODY LANGUAGE علشان ما أتعب نفسي معاهم.
و ألحين الكريمات إلي أشتريهم كلهم من ماركات طبية بالصيدلية أهم شي ترطيب جيد و حماية جيدة من الشمس ما يسببون الحساسية.
أما عن الكريمات إلي تضيق المسام و تشد البشرة و تصنع العجب العجاب فهي عن خبرة طويييييييييييييييييلة مو موجودة إلا بالأحلام

@alhaidar يقول...

مساء الخير ..

للأسف مسألة الاستغلال التجاري وصلت حتى للأطباء .. فصحتنا سلعة يمكن اللعب عليها .. ليس في الأمثلة التي تفضلتي بها فقط .. ولكن في أمور أخرى كثيرة ..

أما في قضيتك الأساسية .. فكثير من التجار ومندوبيهم في العالم عرفوا أن المرأة هي أكثر فئة يمكن ترويج السلع عليها .. نظرا لتكوينها العاطفي أو الفكري .. ولا شيء أثمن عند الغالبية العظمى من النساء من جمالهن .. وبطبيعة الحال الناس أذواق ولا أحد كامل .. فهي فرصة تجارية " الشاطر " في نظرهم من ينتهزها ..

لا تزعلي من كلامي .. ولكن أعتقد أنهم على حق .. فالمرأة عامة هي من وضعت نفسها في هذا الركن .. ولا أنهم يجدون استجابة من معظم النساء لما استمر عملهم بل وازدهر وزاد ..

نهاية شكرا على الطرح المميز والموضوع القيم ..

تحياتي .. :)

أتيت متاخرة يقول...

اخاف اتعبث ببشرتي
عندي حساسية من التعبث اخاف تخترب
ولاااااااااا يهمني
لوتحجي سنه
بالاخير اقولها ثانكيوووو

nikon 8 يقول...

مركبنا
موبس التشخيص وطريقة العلاج تجعلنا نتأكد من أكثر من طبيب قبل التأكد من العلاج ... ترا حتى الدوا إكتشفت إن فيه أصلي ومغشوش !!!!

nikon 8 يقول...

كويتية بحرينية
هههههههههههههههههه
أما سؤالج عن الصفحة فأترك المجال حق اللي يعرفون أكثر مني يمكن عندهم الجواب :)

nikon 8 يقول...

سنعة
والله ما أنتي سهلة !!!
ههههههههههههههههه
راح أستفيد من حركاتج بالذات سالفة الموبايل وايد إعجبتني :)

nikon 8 يقول...

mellow
أما البودي لانكوج كلش ما دارت في بالي ... راح أطبقها :)
شكرا جزيلا :))

nikon 8 يقول...

أحمد الحيدر
بالعكس يا أخي كلامك ما يزعل لأنه حقيقة فالمرأة تبحث دائما عن الجمال
تدري ليش ؟
حتى ترضي نفسها بأنها جميلة وحتي ترضي الرجل !

nikon 8 يقول...

أتيت متأخرة
الله يهنيج على ثقتج بنفسك :)
وليت كل الناس تصير جذي

vancouver يقول...

موضوعج يشوق ويحر بنفس الوقت
يشوق لانه احنا الحريم فينا طبع عجيب
نبي كل شي يخلينا اجمل واحلى
نبي نعرف اسرار الجمال ومهما نقول انا معنوياتنا عاليه
وثقتنا بنفسنا كبيره
بس كلمه نقد من شخص ما نعرفة حتى ولا يهمنا
تاااااثر فينا
ما ادري لييييش
??

بس الموضوع يقهر لانه يبين لج انه حتى الاطباء صاروا تجار تسويق
تدرين لو هالاطبه في الحكومه جان يبي الفكككككككه من المريض
ويقوله كلش شيء تمام بس لا اشوف رقعة ويهك عندي ولا توطوط
بالمستشفى مره ثانيه
هاهاهاهاها
بس بالخاص
كل عيب في الدنيا موجود فيج
ههههه


والصالونات قمت اتبع سياسة وحده

جربت منتجاتكم بس ما نفعت
ينجعموووووووووون ماكو كلمه وحده يقولنها
اصلا الحمدلله شعورنا اسنع منهم الف مره
لا ويحرون اذا واهيه بتصبغ او تقص شعرج تسئلج وين اخر مره مسويته
طبعا عرفت القمنده انا
اذا قلتيلها اي مكان بالدنيا على طول تقولج
اووووووه مدام مخربينه وايد والقصة مش مزبووووطه
بس عرفت الرد
عندكم في صالونكم
!
على طوول

ماشاءالله حول كتييييير
ههههه


مو جني خذيت راحتي وكتبت بوست
مي سوري
مي سوري

:))))

-

على فكره مدونتج ماشااااءالله شرحة تينن

وخوش مواضيع اللي كاتبتها

Good luck
!

Manal يقول...

مساء العسل يا عسل

:)

شنو هذا
ما بقى الا تحطين صورتج
اتوقع الكل رسم صورة الحين حق نيكون
:)

بس اسمحيلي اقول
ان انتي مبدعة بالوصف
ومتميزة بالكتابة

ما شاء الله
لا اله الا الله

:)

ابدعتي


رسمت البسمة على وجوه الكل
وتطرقت الى مواضيع مهمة
تهم الكل

من الناحية الاجتماعية
ومن الناحية التجارية
ومن الناحية الاسرية

ما شاء الله عليج

:)

اتمنى لج التوفيق

وانا اقول اي احد يحاول يسوي دعاية على شي خليه يجربة اول

:)

التجارة شطارة

:)

تقبلي تحياتي يالغالية
:)

شهرزاد يقول...

و الله عجبني تعليقك يوم قلتي وارثاه عن جدك. صحيح تخيلي لو كل الناس عملوا تجميل وصاروا شبه بعض . الحمد لله على الصحة و العقل . احنا كل يوم نسمع عن حوادث التجميل غير اللي يموتون .الله يديم علينا جمالنا و عيوبنا و ميراثنا من اجدادنا .....و بالأخير لازم نرضى بخلقة ربنا عساه يرضى عننا جميعا..

enter-q8 يقول...

انا بس شفت بداية الموضوع عيادة اسنان ضروسي شبوا علي
ياااااااو

nikon 8 يقول...

vancouver
أهلا بك يا فانكوفر في دار عزيزة :)
هموم صالونات التجميل ما تنتهي والشاطرة اللي تسحب اللي في بوكج كله :))
سعيدة لمرورك:))

nikon 8 يقول...

منال
مساء الخير يا منال
بصراحة محد يعلى على وصف رحلاتج ... صج صج يونس :))
مشكورة جدا ... خليتيني أستحي :)

nikon 8 يقول...

شهرزاد
أحلى كلمة سمعتها اليوم
لازم نرضى بخلقة ربنا ... صاجة والله
عاد وين اللي يقتنع ؟؟
تحياتي :))

nikon 8 يقول...

Enter-Q8
هاااااااااااا
عيل لو مكمل الموضوع جان شنو يصير ؟؟
:))
أهلا بك دوما :))

thouq-m يقول...

هي والله ما ادري شو مستوي فيهم الدكانره .. اما بخصوص هذيلا اللي ايون ويحاولون يقنعوني ابضاعتهم اقولها انا يايه ااخذ غرض ومروحه .. واشكرها واخلص شغلي وامشي .. اما السالفه الاخيره .. صدق ضحكتني .. مسكينه يت بتكحلها عمتها ..

كتاباتج رووعه عزيزتي.. دمتي بخير ..