الأربعاء، 11 مارس 2009

الحوبة

ما أدري ليش قعدات الصفا وراحة البال والسوالف الحلوة تنقلب بقدرة قادر إلى مناجر !!!
مع نسمات الجو البديع ليلا في هذه الأيام لما يترسب الغبار ويصفى الجو
أحن لقعدة الكراسي خارج المنزل في المساحة الخضراء اللي سمح لنا به فريق الإزالة
نوعنا نحب العشا الخفيف .... وعشانا ما يختلف عن ريوقنا إلا نادرا
قعدت أسولف مع زوجي ونشرب الحليب بالشاي بيالة ورا الثانية
موحاسين بنفسنا من الهذرة والسوالف .... واللي ساعد إن زوجي كان مزاجة رايق ذاك اليوم
وسألني : فلانة ... ما تطري عليك سوالف أمج وأبوج وتتذكرينها .
الموضوع فرحني من أعماقي فما في شي في الدنيا أحلى علي من سوالف أمي وأبوي ومواقفهم
قلت : والله إمبلا والمواقف وايده .... وساعات في بعض المواقف أحس إنها كوبي من اللي مر فيه أمي وأبوي !
هو : خلي عنج هالحجي ..... ما في شي يتكرر
أنا بعد تفكير قصير : صحيح والله كلامك .... في مواقف لا يمكن تمر علي !
بفضول وبينما هو مسترخي ومضطجع على الكرسي الطويل على جنب سألني : وشنوه هذي المواقف ؟
أنا : مرة أبوي قال حق أمي جدامنا .... أم فلان بمر عليج يوم بتلاقيني شايل جنطتي ومسافر وقاط عليج كرت البنك وعندج السايق لي بغيتي شي يجيبه لك !
أمي : هو ليش ؟ وي عاد يحصل لك ؟
أبوي : يحصل لي ونص ... ما لكم شي عندي ... عيال وكبرنا ... وطلباتج في من يلبيها ... وصار دوري إني أهج وأصد لي كم يوم من غير إزعاج !!!
وفجأة تذكر ... ها وما راح أقول لكم وين رايح ولا راح أتصل لي سافرت ... خبركم فيني شايل الجنطة وقايل لكم مع السلامة !
ما صدقت أمي كلامه وأعتبرته نوع من الغشمرة
وما صار ذاك اليوم إلا وإحنا متجمعين كلنا بالصالة وإلا أبوي ساحب الجنطة وراه ويقول لنا مع السلامة .
طار عقل أمي وقامت تناديه ... بو فلان من صجك بتسويها ؟
وإحنا نصارخ وياها يبا ... يبا ... نبي نسلم عليه ... لكن الريال معزم ولا إلتفت علينا !
طلع من البيت ... لا إحنا ولا أمنا وقفنا بكي ....وكل دقيقة تقول جذي تسوي فيني ؟ أفا عليك يا بو فلان !
كانت حانقة عليه جدا .... وضايق خلقها .... إشلون يسوي فيها جذيه جدام عيالها !!!!
وبعد يومين بالضبط .... إتصل أبوي وإلا صايره مصادمات بين الشعب في البلد اللي سافر لها من أول يوم وصل ومنحبس بالفندق ما يقدر يطلع منه .... من كثر الطق والعنف بالشوارع .
وتم على هذا الوضع لمد عشرة أيام خايف ومرعوب من الأوضاع بره الفندق .... وأمي شبت صارت تحاتيه ومشغول بالها عليه ولا كأنها كانت زعلانة لأنه سافر من غير ما يقول لها !
وأخيرا نجح بالخروج من الفندق بمساعدة السفارة ووصل للمطار بسيارة أسعاف ومنها ركب الطيارة ورجع للكويت .
وأول كلمه قالها حق أمي لما دخل البيت وإستراح : أم فلان ... الله يا حوبتج حارة .... كذيه تشورين فيني ؟!
إستانس زوجي على القصة وضحك : صج والله .... عمي يخاف من حوبة عمتي ؟!
وزين إنج مو مثلها ....هههههههه !!!
في هذه اللحظة رن هاتف زوجي النقال ..... وأسمعه يقول بفرح جاي لكم طيران
هقيت في خبر زين ..... طلع الربع في الديوانية ناقصهم واحد للكوت بوسته وطالبين من زوجي يحضر حالا !!!
بصراحة إنبطت جبدي .... الحين في هالليل !!!
قاعدين ريلاكس وسوالف حلوة .... إش هالربع اللي ما يقدرون ريال قاعد مع زوجته
المهم إن زوجي ما همته إحتجاجاتي .... وهو قايم ويبي يمشي ركبته دعمت الطاولة وصرخ
آآآآآه
بغى يكمل مشيته وهو يعرج .... صبعه الصغير دعم رجل الطاولة
وصرخ مرة ثانية
آآآآآآآآآآآآه
وطاح على الأرض مو قادر يتحرك
طلبت له الأسعاف وظل مدة طويلة يعالج ركبته .... وصبعة الصغير بالجبس
لما حضروا أمي وأبوي ليتحمدوا له بالسلامة سألته أمي :
خير عسى ما شر يا وليدي ؟
زوجي : أي خير يا عمتي .... البنت بانت فيها أول إشارات الوراثة ... وصارت من نصيبي
ووجه كلامه لأبوي .... عمي عسانا الجنة أنا وياك !

هناك 50 تعليقًا:

AseeL يقول...

صاج ما ينلام

الانسان يحتاج الى مساحة ونوع من الحرية من وقت لى وقت


بس ما سوت عليه شكلها شورت فيه :)

um.alzain يقول...

:)))
يالله عساهم الجنه وعسى حوبتك ما تعداهم ولاتخطيج :)
والله انه ورث زين

Sn3a يقول...

لووول ضحكتيني على سالفه ابوج
وحوبتج بريلج فقير

ياحلو سوالفكم ربي يخليكم لبعض

الزين يقول...

هههههههه

يالله يانتي طلعتي قشره


بس ترى انا اصدق المثل اللي يقول


الحوبه تبطي بس ما تخطي

مركبنا يقول...

هههههههههههههههههههههههه

مت من الضحك

خوش تشور
وخوش وراثة

الحين مجال الوجة الصبوحة والشاي والحليب والخضرة والوجة الحسن

وبيروح حق الديوانية ،،،

ديري بالج خففي الحوابات لا يطيح الريال ولا يصير شئ وانتي تبتلشين


حفظة لج وحفظج له وخلاكم لبعض بدون حوبات

حسافتج يا كويت يقول...

إنتي وينج من زمان؟؟؟

وينج عن حكومتنا واللي تسويه فينا؟؟
وينج عن مجلسنا؟؟
وينج عن أحمد الفهد وعن على الخليفة

وينج عن وايد ناس؟؟


إنتي والوالدة الله يخليها لازم إستنساخ؟؟

ترى راح تفيدون البلد وايد

بالعكس أنا اشوف هالسي إيجابي لأن الحوبة ما تصير إلا للشخص المظلوم

ودامة مظلوم يعني على حق

ارجوج ربي يرزقج نسلج كلة بنات ويا خذون الجينات ويمسكون مناصب بالديرة

وهات يا حوبات

عشر بنات وأوعدج الكويت بتسنع على ايدج انتي والبنات

الرياييل بهالزمن مامنهم فايدة

enter-q8 يقول...

الـ D.N.A بيووور و قوي

لو انا من زوجكم المصون
كان قلبت السالفه و خليتها لصالحي بس ما عرف يلعبها عدل يبيله كورس عندي
شوفي اللي بيصير لو كنت بهالموقف
يرن التلفون : هلا فلان لا و الله صج و الله وناسه يبختكم ما عليه معليش اسمح لي و الله قاعد مع حرمنا المصون و الجو اشحلاته والا قعدتكم ما تتطوف يالغالي و ودي و الله لكن لها حق علينا راس مال

بذمتك مو احرجك و امسكها ذله عليك بعدين هههههههههه

mantovani يقول...

تحية طيبة و بعد

مواضيع جميلة

مانتوفاني

Manal يقول...

امووووت بسوالفج

:)

يا بعد جبدي انتي وامج ربي حافظها

والرياييل خلهم يتمنون الجنة

بس عاد

لي كنا راضين عنهم
:)

تحمدي لبو العيال بالسلامة

وفديتج على سوالفج الي ترسم فرح وسعادة على الوجه

انا وزوجي لي حبينا نسولف يبنا مواضيعج بالنص
:)

NewQ8 Bride يقول...

loooooool oboooch eyanin o salfat omich 3jeeba alaah ykhaleekom 7ag ba3aath enshalaah :)

tara a7san selaa7 3laa elzooj ehyaa salfat el7ooba ;)

Mr_CHoCoLaTe يقول...

هههههههههههههههههههههه

الحمدلله على سلامة الوالد و زوجج

صج ضحكتيني

mellow يقول...

إتعلميني بحوبة الإمهات؟

جم مرة آنا ويا أختي نطلع و أمي ما تكون راضية تبينا نقعد، لازم هالطلعة يصير فيها حوادث و شرطة ولا كلش كلش تصكنا زحمة و ما نوصل المكان إلي نبيه.

بنت الشاميه يقول...

ههههههههههه

اثاريج خطيره واحناااا ما ندري
تعتقدين انها وراثه...؟؟؟؟
====
ليش تسمينها حوبته
هذا القدر...هو اللى سوى فيهم
مو انتوا....والله برئيه انت وامج طول الله بعمرهاااااا وعمر ابوج
انا كله اقول حق عيالى اذا سويتوا شيئ انا مو راضيه عنه
الله مايبارك لكم فيه.....والله مساكين
يطيعووووني....بس مو ابوهم
هههههههههههههههه
ماااا يشوف شر ريلج
خل يحط باله زين من الطاولات والكراسي
مووووو ...... منج...انت تهبلين

Joonna يقول...

هاهاهاهاهاهاهاهاها يا حلوهم و يا حلو سوالفهم... كنتي المفروض اتركزين حوبتج بربعه الي نقزوووه من مكانه
الله يخليهم كلهم لج و يخليج لهم يا رب :)

غير معرف يقول...

Nikon8

ماشاء الله

طلعتنى من السادة بعد

وأنا أقول البلوغ هذا له هاله عجيبه

fatto يقول...

لووووووووول .. الصراحه مواقفج انتي وامج الله يخليها لكم عجيييبه .. شكلهم حرمو مايسمعون كلامكم :)

كبرياء وردة يقول...

تعالي عندنا يومين

في جم شخص قاهريني

خصوصا دكتور الجامعة:p

فريج سعود يقول...

ههههههههههههههههههههه


حرام عليج مو جذي



انزين باعرف راح لعب كوت ولا هون ؟

أتيت متاخرة يقول...

الحوبة
وخاصة حوبة الانسان المظلوم ما تخطي ابد

Paris يقول...

لوووول سوالفكم وايد حلوه صراحه

الله يخليكم لبعض و يطول بعمر الوالده و الوالد

و الوراثه تلعب دور عندكم

nikon 8 يقول...

أسيل
أنا معك تماما ... مساحة من الحرية مطلوبة أحيانا.... بس مسكين وقته كان غلط :)
ما تتخيلين فرحتي بمرورج :))

nikon 8 يقول...

أم الزين
أشوه إن ورث وما يتوزع...لوووول
صج نحيسه ما أبي أعطي أحد منه :)

nikon 8 يقول...

سنعة
يا هلا فيج ... وبشري بالسوالف الزينة والسنعة بعد :))

nikon 8 يقول...

الزين
يا هلا فيج يا الزين
عجبني المثل جدا :))

nikon 8 يقول...

مركبنا
شكرا على الدعاء يا مركبنا
والله يحفظج :))

nikon 8 يقول...

مبيوق
أخالفك بأن الرياييل بهالزمن مامنهم فايدة !!!
لوخليت خربت ....
وأعتذر لكل من قرأ هذه العبارة من إخواني الرجال
يظل الرجل هو الأب والأخ والزوج والإبن

nikon 8 يقول...

Enter-Q8
هههههههههههه
أشوة ما يعرف هالخطط

nikon 8 يقول...

mantovani
شكرا لك ويا هلا بك في دار عزيزة:)

nikon 8 يقول...

منال
يا هلا بالصديقة منال
وأكيد رضى أم العيال ضروري للريل .
سعيدة إن المواضيع سارتج ... والله يقدرنا على الإستمرار :)

nikon 8 يقول...

New Bride
لا والله مو أحسن سلاح .... أحسه صار يخاف لي صرت ما ني راضية :)

nikon 8 يقول...

Mr_CHoCoLaTe
الله يسلمك :)
ويا هلا فيك في دار عزيزة :)

nikon 8 يقول...

mellow
حوبة الأمهات أقوى ... صاجة :)

nikon 8 يقول...

بنت الشامية
ههههههههههه
إنتي الوحيدة اللي رفعت معنوياتي
وإلا الكل خاف مني
تسلمين يا الغالية
ما ننحرم من الكلام الحلو :)

nikon 8 يقول...

Joonna
إي والله صح !!!
هالمرة إفلتوا الربع منها!!!
المرة الجاية نركز عليهم
ههههههههههه
حياج الله :)

nikon 8 يقول...

daggero
شفت إشلون ؟؟؟
هههههههههه

nikon 8 يقول...

fatto
أكيد هذا بعد ما يبيله كلام :)
حياج الله في دار عزيزة :))

nikon 8 يقول...

كبرياء وردة
هههههههههههه
وكم تدفعين ؟؟؟؟
ترا العمولة على كل شخص نشور فيه :)

nikon 8 يقول...

فريج سعود
ههههههههههه
هذا اللي تحاتيه ؟؟؟
الربع صارت ديوانيتهم عندنا بالبيت حتى يونسون الزوج :))

nikon 8 يقول...

أتيت متاخرة
طبعا هذي ما تبي كلام !!!!
يعني السالفة مو على مزاجنا متى ما إشتهينا ؟؟؟
حياج الله :)

nikon 8 يقول...

باريس
تصدقين ما عرفت إن فيني هالشي إلا من بعد هالموقف !!!

lawyer يقول...

ههههههههههههههههههههههههههههههههههههههه
هههههههههههههههههههههههههههههههههههههه
هههههههههههههههههههههههههههههههههههههه

هاهاهاهاهاهاهاهاهاهاهاهاهاهاهاهاهاهاههاهاهاها


اببيييييييييييييييييييييييه مت مت مت ضحكككككككككككككككككك



عسانا الجنه انا ويااااااااااك

لوووووووووووووووووووووووووووووووول

لووووووووووووووووووووووووووووووووووول


حوبتج عجيبه حدهاا

بس البلوه ان الحوب وصلت علني بالجرايدههههههههههههههه



نيكووووووووووون انتي عجيييييييييبه

زووووووووووووووووقه

Haneen يقول...

Original and authentic post

you made me smile :)

غير معرف يقول...

بارك الله فيك

وكثر من امثالك

الرقي مالي مكانك

nikon 8 يقول...

لوير
دريت إنه منشور بالجريدة بالصدفة
كنت بالشاليه زايره جماعه وشفته منشور بالجريدة !!!!
قلت بقلبي زين إنهم ما يدرون إني صاحبة البلوغ والمقصودين بالموضوع أهم أقرب شخصين لي !!!!!

nikon 8 يقول...

حنين
شكرا بحرارة على الدعم المعنوي الكبير :)))

nikon 8 يقول...

غير معرف
الله يسلمكم
وحياكم الله بدار عزيزة .... تواصلكم المثمر يسعدنا :))

Selezya يقول...

هههههههههههههههههههههههههه

يمه تخرعين
هههههههههههه


عساها ا توصلنا حوبتج لوول

لا لا اتغشمر

قضاء وقدر لوول

يحليلكم:)
يقوم بالسلامة انشالله وعسا الله يخليكم لبعض ويديم هالاجواء الراقيه

أما الربع .. والله ما يقدرون يبطون الجبد لا وعادي يدقون الفير @@

ابتلشنا :)

Sweet Revenge يقول...

السلام عليكم شلونج نيكون
سبحان الله قصتج عجيبه عبره لليفكر بالظلم ويتساهل فيه
سلامت زوجج ومايشوف شر :)

nikon 8 يقول...

Selezya
ههههههههههههههه
لا تخافين ما أخرع ولا شي ... هالمرة بس صارت معاي وغلا كل مرة يطلع بوش
لوووووووووووول
وحياج الله في دار عزيزة :)

nikon 8 يقول...

Sweet Revenge
وعليكم السلام ...والله يسلمج من الشر :)