الأربعاء، 22 أبريل 2009

حدث في الكافيه

تجولت بنظري حول أرجاء الكافيه في إحدي الجمعيات التعاونية .... أبحث عن مكان مناسب
هناك مجموعة تضم خمس شباب مع لابتوبات مفتوحة وأوراق ومجموعة كتب ... يبدون في حالة تفكير .... يتناقشون أحيانا ... يتبادلون الأوراق في أحيان أخرى .... حديثهم دائما بصوت منخفض .... وعلامات الإرهاق والتعب بادية عليهم .....يتغلبون على تعبهم بأكواب كبيرة من القهوة .
فهمت من البائع إنهم مجموعة طلبة الجامعة .... وفي زاوية أخرى هناك شاب آخر يبدو أكبر عمرا من الطلبة الخمسة بقليل .....منكبا على اللاب توب .... يتفرس ... يبتسم .... يفكر ... وفي كل الأحوال ... لا أسمع غير ضربات أصابعه السريعة على الكي بورد ..... إبتسمت وقلت في قلبي ... يبدو أنه زميل مدون .... حاولت تشغيل حاسية ( بلاغة الشف ) لمعرفة هويته .... بإختيار مكان لجلوسي أستطيع من خلاله أرى ماذا يتصفح الزميل ( خليته زميل عصب مع أنه من الممكن أن يكون أي مستخدم آخر للكمبيوتر ) .
فشلت بإيجاد مكان يكشف محتويات اللاب توب ... وخجلت أن يكشفني البائع وأنا أدور حول الكراسي ثم أنقل نظري لصاحب اللاب توب علني أرى شيئا !!!!
صرفت الفكرة عن رأسي ... وإخترت مكان بعيد عن الطلبة وعن صاحب اللاب توب .... بجانب فتاتين تبدو عليهما الأناقة ..... منظرهم مريح ... سنهم كان ما بين الثلاثين ومنتصف الأربعين .
تشجعت وقلت لنفسي لأجلس بجانبهما ولا بأس إن سمعوا حديثي مع صديقتي ليقيني بأننا لن نتكلم بأسرار أو كلام خاص لا ينبغي الحديث عنه في مكان عام !!!
تبا لها من مقاهي لا تدع مجالا لخصوصية أحد فقرب الطاولات من بعضها كبير جدا .... كم من مرة وددت الرد على حديث يهمني وأملك معلومات عنه ......... يصل لمسامعي رغما عني !
جاءت صديقتي أخيرا .... ذهبنا فورا لطلب مشروبنا
تبادلنا الحديث وسط رشفات الموكا والكابتشينو ..... في فترات صمتنا المتقطع كانت تصل إلينا طرطشة حديث جارتينا ( رغما عنا ) ..... ما وصل لمسامعنا كان يكفي لنكف عن الحديث ( ونطرش الإذن بالكامل ) نحوهما ..... حديثهما مثير وغريب ....... وبدايته كانت عن الإنتخابات .... بواسطة النظرات إتفقنا على تطويل فترات الصمت ...... لأن فضولنا بلغ أطنابه !!!
تظاهرنا بتبادل الصور والمسجات بواسطة البلوتوث !!!
هناك حديث غير طبيعي يدور بين الفتاتين ...... وجريدة مفتوحة أمامهما .
الأولى : ها ... قررتي
الثانية : إي .... من زمان
الأولي : منو اللي إخترتيه
الثانية : مرشح الدائرة ( ..... ) فلان الفلاني
الأولى : عشتو ... بعد منتي سهلة فلان الفلاني ولا عنه
الثانية : إي إشفيني .... وكلمته بعد وعرضت خدماتي له كمفتاح إنتخابي .... .. خبرتي بانتخابات الجامعة وآخر إنتخابات تأهلني إني أكون أحسن مفتاح له .... وكل اللي أشتغل معاهم شرط يفوزون .... كونت سمعة حق نفسي وصرت أنا أختار اللي بأشتغل لهم
الأولى : وكم بيعطيج
الثانية : شرطت عليه مبلغ معين ..... ووافق فورا .... خبرج نايم هو وأهله على خير يغطي عين الشمس .... لا أزمة إقتصادية تأثر فيهم ولا شي .
الأولى : وليش مو فلان الفلاني .... يقولون أغنى منه .... وجربتيه المرة الماضية .... وعطاج خوش مبلغ !
الثانية : لا ويه ما أبيه .... يعطيج وعينه على فلوسه اللي عطاج إياها ... شريت بفلوس الإنتخابات سيارة وإحترقت ... ورحت فيهم لبنان وقامت الحرب .... وشريت شقة بدبي وكاهي طايحة بكبدي ... أفكر أعطيها شركة تسوقها لي بنظام التايم شير للأجانب ..... وهذا غير طيحات المرض من عيون أهله ... بوقت الإنتخابات ما أسمع منهم إلا كلمات : شوفي تركض ورا الحريم جنها خيل وتصيدهم مثل الشداخة !!!!
الأولى : عيل سمعي قراري .... أنا نظرتي بعيدة الأمد
الثانية : إشلون ؟ فهميني ؟
الأولى : صج الإنتخابات باب رزق حلو لنا .... وعمر المجلس قصير ... يعني كل سنتين إنتخابات تقريبا .... بس أنا لي رأي ثاني .
الثانية : شنهو .... علميني ؟
الأولى : حطيت الجرايد وقعدت أطالع صور المرشحين ... أشوف أشكالهم ... توجهاتهم .... أعمارهم ... وأختار من بينهم مجموعة تناسبني .... أعرض عليهم مبدئيا خدماتي للإنتخابات .... وبيني وبين نفسي أعمل تصفية بينهم .... لحد ما أختار واحد يناسبني .... وبالمواصفات اللي أبيها .
الثانية : يا حلوج ... مسوية ستار أكاديمي حق المرشحين ؟ بس ليش كل هالعبالة ؟
الأولي : مشكلتج إنج منتي فاهمة لحد الحين
الثانية : يا الله قولي ... ترا عيز حمار أبوي ؟
الأولي : أنا هدفي أعلق أحد المرشحين بسنارتي وأتزوجه
الثانية وقد فتحت فاها من التعجب : هااااااااااااااااااااااااااا
( حتى إحنا تعجبنا من سماع هذا الخبر ولولا خشية إفتضاح أمرنا كان صرخنا معاها هاااااا )
الأولي : إيه ....وليش العجب ؟ ... أنا أدور على الرزق المستمر ..... والزواج الحين مصالح ... إنا لي مصلحة عنده وهو عنده مصلحه معاي ..... وفوق هذا أكيد راح يكون فيه حب !
الثانية : من صجك .... وأكملت بأسى : يمديني أسوي جذيه مع اللي بأشتغل معاه ؟
الأولى : لا تعليق .... اللي بتشتغلين معاه لا هو ولا أهله .... ولا زوجته وأهلها سهلين ... إنتي ناسية إنهم سبب نجاحه .
الثانية : إنزين علميني إشلون بتكملين خطتج ؟ إذا نجحتي بأطبقها في الإنتخابات الجاية .
الأولى وهي تشير لصورة أحد المرشحين في الجريدة المفتوحة : وقع إختياري على هذا .... تقصيت عن أخباره ..... طلعت زوجته بيتوتية ما لها علاقة بالإنتخابات .... ما هي إجتماعية ... ولا تعرف الناس ... و من أصل عربي .... يعني ما وراها أصوات من صوب أهلها !
الثانية : يمة منج تخرعين !!!! من متي صرتي تفكرين جذيه ؟
الأولى : نطري خليني أكمل لج ..... الريال طموح .... وحلمه إنه يكون عضو في مجلس الأمة أو وزير .... وهذي أول إنتخابات له ..... أقنعته إنه إذا ما فاز هذي المره .... على الأقل نكون وجهنا الأنظار إليه كشخصية تصلح لحقيبة وزارية فهو مفكر... خلاق .... وإصلاحي .... وفوق هذا وطني .
عند هذي النقطة إتسعت عيوننا أنا وصديقي وشفايفنا إنزمت وصارت تفتر من أقصى اليمين إلى أقصى اليسار بسرعة وهذي الحركات بدال ما نقول : يمة منكم ! .
أكملت الأولى : وإذا نجح فهو محتاج لشخصية نسائية مثل مواصفاتي تسهل تواصلة مع المجتمع النسائي .... ومثل ما تعرفين أنا متفرغة تماما لهذا الدور وما عندي عيال تشغلني !
الثانية : فرضي إنه سقط وما ترشح للوزارة إشلون ؟
الأولى : أنا لي معارفي ولي قنوات أقدر من خلالها أوصل إسمه .... وإذا ماصار هذي المرة بيصير المرة اللي وراها .... عاد واللي يخليج الله ما كثر إلا الوزراء بالكويت .... أصلا من كثر ما يبدلون الوزارات كلنا بيحوشنا الدور !!!!!
لسبب غير معروف إلتفتت الثانية نحونا بصورة مفاجأة
كنا نبتسم على كلام صديقتها .... إرتبكنا قليلا :(
تداركت صديقتي الموقف وإبتسمت لها وهي تريني صورة ولدها بالموبايل وتقول لي : شوفي حمودي توه شاقين له أسنان .
أنا : الله يحفظه .... ذكرتيني بعيالي ... تأخرت عليهم ... نقوم نمشي ؟؟
صديقتي : يا الله
اضطررنا للخروج من الكافيه .... لأن جلوسنا زيادة معناه إفتضاح أمر ( تصوخنا ) :(
خرجنا غصبا علينا ..... وفكرنا وبالنا معلق مع الفتاتين ...... والمزعج في الأمر إننا ما قدرنا ( نطل ) بالجريدة ونعرف المرشح ( النومونية ) !
وأنا أسرد لكم ما حصل أفكر .... يا ترى ما هو شعور البائعين وهم يراقبوننا ؟؟؟
لست من هواة بلاغة الشف ( والتصوخ ) لكن لا أعلم لماذا تبرز هذه الصفة فجأة عندما أرى غموضا ما ؟
تغطية الوجه بنظارة شمسية كبيرة سوداء تثير فضولي ؟
مداراة شي ما من النظرات مثل صاحب اللاب توب أيضا تثير فضولي ؟
التلثم في جو جميل والتفرس في الوجوه أيضا يثير فضولي ؟
الكلام المبهم .... الغريب ... أيضا يثير فضولي .... وبخاصة إذا كان غير مفهوم لي أو يحمل معلومة خافية علي ..... أيضا يثير فضولي ؟
رغم أسفي وخجلي من نفسي على تصرفي ..... ورغم إلحاح الفضول في أعماق نفسي
إلا أن أكبر عقاب لي كان أن أخرج وأنا أحمل علامتان إستفهام ؟ واحده لصاحب اللاب توب والأخرى للفتاتين .
( وأدكر ) فضولي
ويا رب تخفف هذي الخصلة فيني

هناك 69 تعليقًا:

حياتي هدف مو عبث يقول...

ههههههه
حتى انا لما اسمع شي وأعرف عنه شن ودي أتكلم وأقول بس عييب مهما كان
ولا بعد تخيلي يقولون لي انتي شكووو
وين اودي ويهي
وعلى سالفة المدونين انا أفكر جذي
بعدين أقول لالا من صجي يعني اشفيني قمت أفكر جذي
بس هالثنتين مو صج يحليلهم ولا تبي تتزوجه ههههههههههههههههه خووش طموح وخوش انتخابات
وانا الحين فيني بلااغة شف بعرف منو هالمرشحين كلهم :p

apple.pie يقول...

7aram bit5arib 7ayat 3aylah 3ashan tabi floos

:(

o shino ya3ni morta baytootiya, yimkin ohwa yi7b inna itkoon chithi

i hope she fails in her home-wrecking plan

:)

nikon your blog is amazing

Yin مدام يقول...

يا لهوي !!!

وإنتي كل بوستاتج شوكنغ !!!!!!!!!!

شهالعقلية الخبيثة هذي !!!

مخططة ومضبطة نفسها ومسوية دراسة للشخص وأوضاعه وتاريخه وتاريخ اللي خلفوه !!
والله في ناس همها بس الفلوس والمركز وبايعين الدنيا والآخرة
أعوذ يالله
الله لا يبلينا

سؤالي : إنتي من وين تطيحين على ناس بدع جذي؟؟؟؟ لووول

فيني نوع من الفضول وأحاول أقمته فدائما أبحث عن طاولة زاوية وبعيدة عن الأصوات والأحداث والأشخاص
أتكتر على جنب وأجابل من أتيت بصحبته :))

وفي سبب ثاني ما أحب أسمع أسرار أحد ولا شي يفشل ما أدري ليش أنا أفتشل !!! جني صاحبة الموقف لووول

بس صج عفية حريم !! يما منهم
مو كاسرة خاطري إلا مرت اللي حاطة عينها عليه !!!

مخي إفتر وطار النوم !!

والله عندي سالفة بس ما أقدر أكتبها بوست
دارت بين حرمتين بصالون يا لهوي يا لهوي
شلت عمري وطلعت من المكان من قلة حياهم وفصاعتهم وعدم احترام كل اللي قاعدين :(((

دوري بنفس الجريدة جود تعرفين منو النومونيه طايح الحظ !!!!

:)))

غير معرف يقول...

هههههههههههههههههههاى وناسه

اي وايد بنات تزوجو بهالطريقة

لا تستغربين , وبعدين ليش ما عرفتى النومينيه , المرشحين اللى حريمهم مو كويتيات معروفين , طلعيهم وشوفى منو فيهم اول مره ينزل راح تعرفين الجواب على تووووووووول , ههههههاى تهبلين

Sn3a يقول...

بل عليهم
صج ان كيدهن عظيم

تقصت عن المره واصلها
شهالبنت!

الله يعينها على نفسها

enter-q8 يقول...

شعبنا فيه بلاغة شف مو طبيعية ولكن الامور اللي تضحك اني اكون متواعد مع كم واحد من الربع مدونيين
و نصادف مدونيين ثانيين ما يعرفونا و نلاقيهم يتكلمون ووو و خصوصا اذا كان في حديث قوي بالساحة و التفت على صاحبي و صاحبي يتبوسم و انا اتبوسم و اهم ينتبهون، لكن مرهه من المرات عرفت ان الامر تلقائي و خصوصا باحاديث قوية بفترة من التفرات كنا نبي نقعد بكافيه بعيد و ما ادري ليش هالبعيد يومها صار ابو الزحمة
و انا طبيعة نقاشي صوتي عالي مو مساسر
و الربع كذلك اشوي و الا اشوف الطولات اشوفها بحضنا و واحد من الربع يقول خلنا نمشي الكويت كلها عرفتنا بس الله يالبنات يقطون اذنهم قط مع اننا مو اللي تقولي راغب علامة و رشدي اباظه و حسين فهمي و مهند و وائل كفوري قاعدين علشان يتلصقون فينا
شكلي طولت بغيت اقولك لو انقلبت الاية و كانوا البنات رياييل و يتكلمون عن مرشحات...

Someday يقول...

وهقتيني!
ما ادري شقول شخلي
اولا بليز لا تكونين من الي يقعدون يطلون و يتسمعون
قولي ان هذا فكشن!
ثاني شي
من قلب يوما منها! ولا تفكر اخرب حيات انسانه اهدم بيتها و اضيع اسرتها! و لا حتى يخطر على بالها! شنو هالبشر اعوذ بالله!

Yang يقول...

موضوع غريب عجيب, ادري ان في سوالف مقاربة حق اللي قلتيه.


ولكن بهذا الشكل, الله يستر علينا.


تحياتي

Sweet Revenge يقول...

ما اجمل احاديث الكافيه
اغلب روايات محفوظ كتبها من ملاحظاته واهو قاعد في القهوة المصرية العتيقة
كل طاولة قصة وكل مجموعة وراها حكايات
اما قصة صاحبتكم فعجيبة ما اقدر اقول الله يوفقها بس بقول الله يعطيها علي قد نيتها

الحــــر يقول...

زين ألي عطو المرأة حق الترشيخ خل نشوووف شغلنا عيل!!!!
ويـــــــن الجراااااااايد يا ميـــــري........

:) :) :)

شكــــراً

الزين يقول...

اكو مثل ما اذكره زين

بس يقول الفضول ذبح مدري منو

@@



والإنتخابات صارت حداق

:$


لا حوووووول


!!

بالله قولي لي شلون بتعمر هالديره

chandal/danchal!! يقول...

LOOOOOOOOOOOOOOOOOL

تصدقين يا نيكون.. أنا من دخلت عالم المدونات يالله فطنت على اللي قاعدين بالقهاوي ومجابلين لابتوباتهم!

:)

بس سالفة المفاتيح الانتخابية عجيبة... وحركة زينات صدقي بزم البوز موتتني من الضحك

:)

الله يكافينا شرهم!... جان شريتي نفس الجريدة عشان تعرفين منو النومينيه لول!

والتصوخ ما وراه الا التحرمص!... ما غير تلقطين ربع السالفة والباجي معلق!... الله يهداها يوم انها افطنت والتفتت عليكم... مير انتو خاموووووش لا من تمكم ولا من كمكم!


الحين بعرف منو النومينيه!

رزنامــــــة يقول...

بهذه الصفة اثبتم انكم كويتيات D:

اما هالبنات يخرعون وشاقين الارض وطالعين
اسم الله علينا من هالاشكال بس

الجماعة تخطيط استراتيجي بطريقة صواريخ ارض جو وبعض الاحيان جو جو

الله يستر منهم بس انا لو منك الصق فيهم واروح معاهم البيت بعد

صراحة معلوماتهم تخوف لووول

بوست جميل ... شدني وشدهني من الصبح D:

lawyer يقول...

انااااااااااااااااااااااااااااا

علامه تعجب اشكبرهااااااااااااااااااااااا




ابيه ابيه ابيه مستحيل ينيشنون على الرياييل جذي



وهالبقره الي احترقت سيارتها من فلوس الحرام
و انعفست بلبنان
و طاحت بقلبها شقه دبي


مافهمت ان المره اليايه الفلوس تصير حق صحتها !!




الله ياخذهم هالحريم صج فشلوووونا



ليش صارو الكويتيات وايد مادياااااااات






انا بمووووووووووووووت حره بعرف منو

الحين من بلاقه الشف انا بنشد و بعرف منو هذا

esTeKaNa يقول...

صباح الكابتشينو والموكا:)
ذكرتيني بأمرين:
الأولى:
كنت في احد المقاهي وامر بجانب شخص فاتح اللاب توب واطل واشوف ذيج الاستكانة المرتزه
اكتشفت ان هذا الشخص قاعد يقرا بلوقي
صج صج صج
بغيت اروح اسلم اقول انا استكانة
Hehehehehe
الثانية:
بصحبة صديقه مدونة كنت في احد الأماكن
سوالفنا بدأت عند استجواب رئيس مجلس الوزرا،مرورا بسوالف اليهال والاهل والدنيا،ثم انتقلنا لفتوى دينية ناقشناها،
ثم عرجنا لمواضيع الحب وسوالف الخطبة والزواج،وانتهينا فصله ضحك مشترك
فأذا بالشابين الصاخين ورانا يكركرون
اكتشفنا انهم كانو يقضون وقت ممتع بالاستمتاع لأحاديثتنا
:)

اما بالنسبه لرقيه وسبيجة
!!
ففعلا امر مبهر
ياربي هالحريم دوابير وسوالف
شوفي اشلون راسمة الخطة ومفكرة بكل ابعادها
صج...يخروعون
:(

جنة الحواس يقول...

ضحكتيني

كل هذا و مو من هواة بلاغة الشف ( والتصوخ )

LOOOL

أما الفتايتن ..عفية خلق .. ما شاء الله عليهم .. متفرغين عدل حق السالفة و تخطيطهم مضبوط ..

يالله ارزقنا

:P

kuwaitawy يقول...

مساء الورد والياسمين



خوش عيل

خلاص

مادام جذي

ابيج تشوفين لي البنتين

احتمال انزل انتخابات وابيهم يكونون مفتاحي الانتخابي

لوووووول





تحياتي

Mr_CHoCoLaTe يقول...

انتي نقلتي المشهد الشائع في الكافيهات

طلبة جامعه يدرسون الله يوفقهم

و شخص سواء ذكر او انثى سواء شباب او كبير في السن مجابل لابتوبه يسوي شغله او يدردش بعيداً عن جو البيت او يكتب موضوع في بلوقه بمزاج رايق ، احياناً انا امثل هالمشهد لاني احب اقعد بكافيه اشوف الناس و استمتع بقراءة المواضيع و كتابتها

و اشخاص بطاوله قريبه يتبادلون الحديث و اذانينا و فضولنا يسبقنا إلى حديثهم

بس اللي كانوا يمج مو صج و كلامهم قوي اول مره اسمع عنه هي هي

fatto يقول...

امبييييه شو هذيل !!!!!

حدج صدمتيني ... هذي لفلوس الي معطيها شرتلها سياره وقدرت تسافر وشقه اولاااا جم يعطووون !!!
جني بشتغل مفتاح انتخابي لووول

والثانيه امخططه اتزوج !!!

لاتعلييييق ... والله ظاق خلقي ان في جذي ناس .

هل الفلوس صارت كلشي ؟؟ حتن على حساب نفسي ؟؟؟!!!!

daggero يقول...

Nikon8

كان عندى أمل أن بعض المرشحات سينجحن يعنى 1 أو 2 حيث الأغلبية من الأصوات نسائية ولكن بما أن المفتاحات الأنتخابيات لديهن مصالح قوية مع المرشحين الرجال بمافيها مواضيع زواج فأصبح الأمل عندى بصيصا بعد هذا البوست

الفضول من طبيعة المهندسين فما بالك أذا كانت مهندسة وكويتية أكيد ستتضاعف الجرعة

:)

um_alzain يقول...

الأولي : أنا هدفي أعلق أحد المرشحين بسنارتي وأتزوجه
الثانية وقد فتحت فاها من التعجب : هااااااااااااااااااااااااااا

( حتى إحنا تعجبنا من سماع هذا الخبر ولولا خشية إفتضاح أمرنا كان صرخنا معاها هاااااا
وانا بعد :هاااااااااااااااااااا
ول ول اشهل تخطيط اشهل تكتيك اشهل دهاء
عويض الله من شركم بواقين الازواج

غير معرف يقول...

هذى عقلية الكويتيات

I7na 3shagnaha يقول...

عجيبة سالفتهم :)

بس تدرين

ماراح ياخذها لو تنقز

ليش ان الكويتي اللي ياخذ غير كويتية يكون مخلص حتى النخاع

لا يفر و لا يزر

نأبها حيطلع على شووونة

Nikon 8 يقول...

حياتي هدف مو عبث
الإنتخابات حج وحاجة:)
وفي الفضول أشوة طلعت مو بروحي :)

Nikon 8 يقول...

apple.pie
أهلا بك عزيزة في دار عزيزة
وأعتقد الموضوع له علاقة بالسلطة والنفوذ أكثر من الفلوس .
وعند بعض الناس الغاية تبرر الوسيلة .

Nikon 8 يقول...

Yin مدام
موضوع الشوكنغ صار مصادفة :)
وبعدين نفس السؤال يدور في بالي : ليش أطيح بنوعيات كذيه ؟
الجريدة كانت مفتوحة وما قدرت أعرف إسمها ... يمكن من الخرعة :)

Nikon 8 يقول...

غير معرف
إذا لقيت وقت فاضي يسمحلي أدور في الجرايد راح أبحث عن النومينية :)
عموما يا خبر النهارده بفلوس بكره ببلاش !

Nikon 8 يقول...

Sn3a
وأنا معك أحسدها على مصادر معلوماتها وإشلون ما إنكشفت ؟
أنا بس تصوخ وطاح قلبي ببطني .... ومن الخرعة قبيت من الكافية فبل لا نكمل السالفة للنهاية :)

Nikon 8 يقول...

Enter-Q8

لو انقلبت الاية و كانوا البنات رياييل و يتكلمون عن مرشحات...
لووووووووووووووول
خلنا نفوز أول وبعدين لكل حادث حديث :)

Nikon 8 يقول...

Someday
عفوا إذا كنت صدمتك !
الطاولة كانت قريبة جدا منا .... والصوت كان عندنا ... أي غصبا علينا بنسمع ... واللي شجع هو غراية الحديث بالنسبة لنا .... لو كنت بمكانا لصار لج مثلنا ... والدليل على عدم إحترافنا لفن التصوخ هو رعبنا من إفتضاح أمرنا !
تحياتي لج :)

Nikon 8 يقول...

Yang
بعد نشر البوست علمت فعلا إن هناك حوادث مشابهة وخطط قريبة من اللي سمعته !
تحياتي :)

Nikon 8 يقول...

Sweet Revenge
بغض النظر عما حدث لي بالكافيه... فحقيقة إنج شجعتيني إني أخصص وقت للكافيه .... لأنه فعلا طلع خوش مكان للقصص !
بس هالمره ما أبي أتصوخ .... أبي أقعد والناس تجي تقص علي قصتها :)

Nikon 8 يقول...

الحــــٌر
لوووووووووووووول
أي ميري تقصد ؟
عندي حساسية من هالإسم وإرجع لبوست هواش خدام لتعرف السبب :)

Nikon 8 يقول...

الزين
حداق الرياييل ما يعرف مناسبة ولا مكان ولا زمان لأن السمكة الثمينه ما تدرين وين تطلع ؟
والحداق يبي شطارة ... هذا ما أكده زوجي لي ... ومن قال لي هالكلام وأنا راسي مفتر !
يبيلي جلسة أحقق معاه بهالموضوع :)

Nikon 8 يقول...

chandal/danchal!!
والله إنج صاجة :)
ما ورا التصوخ غير التحرمص :))
أما الجريدة فما عرفت إسمها ؟!
خفت أقط راسي داخل طاولتهم :))

Nikon 8 يقول...

رزنامة

لووووووووول
انا لو منك الصق فيهم واروح معاهم البيت بعد

صراحة معلوماتهم تخوف لووول

يمكن كنت أسويها لو ما كان عندي ريل !
:)
أتغشمر :))

Nikon 8 يقول...

لوير
والله حاسة بحرتج .... عيل لو كنتي بمكانا شنو كنتي تسوين ؟؟؟
انا بمووووووووووووووت حره بعرف منو

الحين من بلاقه الشف انا بنشد و بعرف منو هذا
بهالمقطع بردتي قلبي لووووووول
أشوة طلعت مو بروحي اللي عندي فضول :)

Nikon 8 يقول...

esTeKaNa
هاااااااااااااااااي
حتى إنتي تطلين بلاب توبات زباين الكافيهات لوووووووووووووول
ويعني حتى الشباب عندهم نفس خصلتنا ( التصوخ ) يعني طلعنا متعادلين !
كنت وايد ناقدة على روحي من هالتصرف بس ألاحظ الحين من التعليقات إنه تصرف مشترك للجنسين :))
ربي لك الحمد ... تطمنت ... يعني أنا طبيعية :)

Nikon 8 يقول...

Broke
لوووووووووووووووول
لا تفهميني غلط ... الطاولة كانت قريبة والصوت وايد واضح والموضوع جذاب ومشوق ... صحيح إنه صعقني من ناحية التخطيط .... ولكن فعلا أعجبت بكيفية التخطيط ودراسة الموضوع من كل جوانبه .
ما ني حابة غايتهم ولكني معجبة بوسيلتهم :)

Nikon 8 يقول...

kuwaitawy
لوووووووووووووووول
إذا نجحت خطتهم أكيد راح تعتمد وتعمم على الراغبين فيها :)
بس لازم تكون فل أوبشن :)

Nikon 8 يقول...

Mr_CHoCoLaTe

الله يطمنك بالخير .... طمنتني إن وضعي كان طبيعي :)
بالنسبة لي ما أقدر أركز في قراءة بوست أو كتابته وناس تتخطرف حوالي في كافيه (أتدوده )
:))

Nikon 8 يقول...

fatto
عطايا المرشحين لمفاتيحهم تكون على حسب دسامتهم وبريستيجهم وكمية الأصوات اللي يجلبونها للمرشح !!!
وسلامتج من الصدمة ... في هالدنيا يا ما بنشوف ؟!

Nikon 8 يقول...

daggero

الفضول من طبيعة المهندسين فما بالك أذا كانت مهندسة وكويتية أكيد ستتضاعف الجرعة

تعتقد جذيه ؟؟؟!!!!
عندي إحساس إنك زميل مهنة :))
اللي صار بالكافيه حالة فردية وليست تعميم .... ومع ذلك ( البصيص ) بوصول المرأة قوي .... بس قول آمين .

Nikon 8 يقول...

um_alzain
الله يحفظ لكم أزواجكم :)
وعينكم على حلالكم إدوا :))

Nikon 8 يقول...

غير معرف 2
التخطيط للوصول لهدف معين ما يعرف جنسية ... ويا ريت تلصق بنا ككويتيات صفة التخطيط السليم للوصول للأهداف ..... تحياتي

صبا يقول...

@@

يمه منهم ... صج مو هينين
حشا مو انتخابات
دفتر خطااابه
معقوله في حريم بهالمستوى ..
انا ادري انه في بس من نوع اخر
ناس تخطط على الرياييل بهالخباثه واللؤم .؟؟؟!!

أمرهم عجيب ...جدا ...

ما عليح بيطيحون فيها والله ما راح يوفقهم لانه نيتهم مو سليمه وكلها مصلحه مثل ما صار بالي احترقت سيارتها

:)

مسكينه ما تهنت

وعليه على الي ريلها بينزل انتخابااات ...صيده حق هالاشكال

ناااااس فاضيه
الحمد لله والشكر


ومدونه جميله
جدااا..

على فكره الصوره الي بالمدونه تشرح الصدر ...
ما دري ليش ... جنها صوره سينمائيه
:))


وتقبلي مروري الاول
:**

شقران يقول...

الغالية نيكون ودارها العزيزة


مساء الخير والنوير

كيف الحال زميلتنا المزدوجة
.
.


ترى قلت معاكم:هااااا
:)


المشكلة إن الموضوع ليس بحديث عابر بل تخطيط وتدبير وسين جيم عن الرجل وأهله

لكن اللي مستغرب منه قضية المبالغ المالية..يعني هل من المعقول أن المبلغ تستطيع أن تشتري به سيارة وشقة في دبي...أخاف كل وحده قاعد تعطي الثانية من هالصواريخ!؟


بس ترى ماعليك ذنب لأن هم صوتهم عالي
:))))


تقبلي مني أجمل تحايا المساء

عزوبي يقول...

والاهل يضغطون علي عشان اتزوج؟ يبا العزوبية راحة بال

Manal يقول...

احلى شي
انهم ما بين الثلاثين ومنتصف الاربعين
لول

:)

حبيبتي انتي

كل هذا من حريم الكويت
وركضة ورا الانتخابات او بالاصح الفلوس
ويمكن
وما خفي اعظم

الله يستر
بس صدمتيني
@@
-

عاد انا كنت ناطرة اعرف اذا الاخ الي كان قاعد بروحة مدون ولا لا
؟

:)

بحار يقول...

هههههه هذا حب التطلع للمجهول حب الاستطلاع المفرط.

بصراحه اعجبتني القصه واسلوبج كان في قمة الروعه في سرد الاحداث.
اما الانتخابات فأنا ما احبها ولا تشدني ولا التفتلها نهائياً بس اللهم اتابع رؤوس الاقلام عشان اكون بالصوره ولا انا ما انجذب لها.
تقبلي مروري
واتشرف بمرورك على مدونتي.

F A N D I يقول...

:#
يما منكم يالحرييم

بس والله بلاغة الشف لها فوايد ترا
اكتشفتي شخصيات جديده مامنها مافي منها الا بالافلام

Salah يقول...

يعني اذا رحت كافيه وشفت وحدة تطل بشاشتي ممكن تكون نيكون؟

:))

monshg | مُنْشَق يقول...
أزال المؤلف هذا التعليق.
Nikon 8 يقول...

صبا
يا هلا ومسهلا فيج يا صبافي دار عزيزة
تعليقجك أسعدني وإطرائك أسعدني أكثر
يا الله تساعدناعلى المحاظة على مستوى المدونة ونطويرها للأحسن :)
ويا صبا الحقيقة اللي قاعدين نتقبلها بمرارة إن معظم الأمور في هذه الدنيا مصالح بما فيها الإنتخابات موضوع الساعة ... والزواج !
ولا تقاطعينا :)

Nikon 8 يقول...

شـقـــــران
زميلي المزدوج .... صحيح وألف صحيح لأني هالمرة أنا اللي تقصيت عن قيمة المبالغ .... وعرفت إن الموضوع فيه إستمرارية وشغل لما بعد الإنتخابات عند بعض المرشحين ذوي النظرة البعيدة
ومقابل كل عمل فيه مبالغ ..... والمثل يقول لا يخدم بخيل
سعدت لمرورك يا زميلي
تحياتي :)

Nikon 8 يقول...

عزوبي
الموضوع ما يحتاج إلى ضغوط أهل :)
إذا صار النصيب إنت اللي راح تضغط عليكم :)
والله يبلغنا بهاليوم وإنت اللي تبشرنا
:)))
الله يطيحك في صالحاته ... آمين .

Nikon 8 يقول...

Manal
يا هلا بالغالية منال .... وسلامتج من الصدمة :)
هذا اللي صار جدامي وإحنا بعد إنصدمنا :)
أما صاحب اللاب توب فما عرفت إذا كان مدون وإلا لا ... للأسف .
وعلى قولة زميلتنا جندل ... ما ورا التصوخ غير التحرمص .... من الخرعة من إفتضاح أمرنا ما نلقط إلا نص السالفة !!!
تحياتي وجمعة مباركة :)

Nikon 8 يقول...

بحار مهموم
يا هلا فيك يا بحار وإنشاءالله ما تكون مهموم :)
شكرا على الدعوة وفرحتني لما دريت إن الموضوع إعجبك :))

Nikon 8 يقول...

F A N D I
يا هلا فيك يا أخي العزيز
وصدقني حكايا الأفلام ماهي إلا إنعكاس للواقع مع شوية فنتازيا لشد إنتباه المشاهدين .
ويمة من الحريم ... بس مو كلهم :)

Nikon 8 يقول...

Salah
ههههههههههه
لا مو يمكن :)
لإني أخاف تنصدم من حقيقة .... إن الكل يطل بطاولة الثاني نساء ورجال ... للأسف :)

Nikon 8 يقول...

monshg
ههههههههههههههههه
موقف طريف يعكس واقع نعيشه!!!!
بالنسبة لفضولي لمعرفة صاحب اللاب توب كان فضول في لحظته فقط ما عاد يهمني بس طلعت من الكافيه :)
يا هلا بك عزيز في دار عزيزة :)

نون النساء يقول...

ترا مو هينه هاذي ام خطط زواجيه @@
انزين واذا كان المرشح متزوج شلون يعني


واااااااي يالحرييييييييييم ينخاااف منهم



امبييييه ولا هاذي اللي صارتلها مصايب من ورى شغلة الفلووووووووس
حراااااااااااااااااااام
يابنت الحلال اليوم بأغراضج باجر فيج ولا بأهل بيتج

استغفرالله



ياربي لا تعاجبنا بهالنماين من الناس

@alhaidar يقول...

السلام عليكم أختنا العزيزة :)

جميل جدا الموضوع وتبدو فيه الواقعية إلى حد بعيد ..

لفتتني جدا نقطة " يدفع وعينه على الفلوس " ..

ما المبلغ الذي حصلت عليه لتشتري سيارة وشقة في دبي وسفرة إلى بيروت ؟ لا أعتقد أن أحدا من المرشحين يدفع لمفتاحه هذا المبلغ مهما كان شاطرا .. والله أعلم كل شيء جايز .. ولكن ربما هي تبالغ بعض الشيء :)

أما مسألة الزواج فهي شائعة هذه الأيام بين النساء .. وهو قعلا بات في كثير من الأوقات لتحقيق المصلحة فقط ..
ألم يقل الرحمن أن كيدكن عظيم ؟ ;p


بصراحة لم أقرأ ردود جميع الزملاء هنا .. ولكن أتمنى إن كان احد منكم هو من يكتب ويبتسم في المقهى المذكور فليكشف عن نفسه حتى نريح فضول أختنا العزيزة :)

تحياتي لإبداعك الدائم ..

ودمت بخير :)

غير معرف يقول...

اول مرة اشوف المدونة الصراحة عندك اسلوب جميل جدا للكتابة يشد القارئ، بالتوفيق انشاءالله.

Nikon 8 يقول...

نون النساء
شفتي إشلون الحريم ينخاف منهم :(
مو كلهم .... بس بعضهم :)

Nikon 8 يقول...

أحمد الحيدر
يا هلا بأخي العزيز :)
للأسف ولا واحد من المعلقين كان هو الجالس في الكافيه :(
أما بالنسبة للمبالغ فالرد تلقاه بردي على الأخ شقران :)

Nikon 8 يقول...

q8diet.com
أخي د. ضاري عيسى العون
يا هلا بك عزيز في دار عزيزة
وأتمنى دوام التواصل
مواضيع مدونتك جميلة ومفيدة ... أتمنى لك الإستمرار والتوفيق .

FaNo يقول...

ويي طفى طفى !! شهالناس شهالأوادم ! واعليه على مريته عسى ما تاخذه منها وتسوي اللي في راسها ! ياحرقة قلبها ذيج الساع ...

يالله سترك لووول

Nikon 8 يقول...

نورية
الأيام القادمة راح تبين لنا إذا مخططها نجح وإلا لا !
يا هلا فيج يا إخت نورية عزيزة في دار عزيزة :)