الأحد، 26 أبريل 2009

تشاورية حريم

أغلق باب الترشيحات .... أعداد كبيرة تقدمت للترشح وعدد لابأس به من النساء أيضا تقدم للترشح .
بما أن دار عزيزة صارت قبلة للمرشحين الطامحين للنجاح ... لعرض وجهات نظرهم أو نظرهن والتقرب أكثر من نفوس وعقول النساء لكسب أصواتهن .
ومع إغلاق باب الترشيحات ...... وبسبب صيت الدار بالإتفاق الذي عقدته مع روادها لمساندة العنصر النسائي في كافة الدوائر الخمسة .....جاءت من تهمس في إذن أمي عزيزة وتقنعها بعمل تشاورية في دار عزيزة وتصفية للمرشحات والتركيز على أفضلهمن حظا وقبولا من الناس لزيادة فرصتها للنجاح..... والرياييل مو أحسن منا يوم إختاروا وصفوا مرشحيهم .
كلمة تشاورية كانت كفيلة بإحداث رجفة بضلوع أمي عزيزة
وشهقت فورا : تشاورية ... أخاف ياخذوني أمن الدولة ؟؟؟ !
حاولت بعض الأخوات التخفيف من هلع أمي عزيزة ..... وإقناعها بأن التشاورية تختلف عن الفرعية التي جرمها القانون .... ودار عزيزة سوف تدخل التاريخ والسجل البطولي لكل من سلك هذا الطريق .... وإن هذه الطريقة وسوف تلفت الأنظار للمرشحات .... وبعدها سيكون فوزهن في الإنتخابات مضمون ..... وبعدين من يدري مسوين تشاورية ودار عزيزة الداخل فيها أكثر من الخارج ؟ ومنظر الإزدحام أمام الدار منظر طبيعي لا يلفت الأنظار !
سكتت أمي عزيزة قليلا لتفكر ..... وافقت بعدها على مضض وسط إلحاح الحاضرات وهي تقول : أول شي زهبوا لي جنطة ماركة أحط فيها ثيابي .... أبيها راهية حتى تكفي أدويتي وهدومي الوايدة ومخدتي ومفراكتي وصابونتي وكلاس طقم أسناني وسجادتي ومصحفي وكرسي الصلاة وبطل ماي المرقدوش ..... وأبي لويزا مرافقة لي وخلها تسوي لها جنطة وتحط فيها إطشوت الغسيل مع صابون ملابس .... وكيسوا لي زعتر وميرامية وشاي ورق وقوري داخله مشخال وجولة صغيرة !
أم سالم وهي تكتم ضحكة : أم مبارك إنتي رايحة سجن وتحقيق .... وين لج وقت تسووين شاي مخدر ؟ وتصوبنين ثيابج ؟ وإلا تتفركين ؟
أمي عزيزة وهي تكمل شروطها متجاهلة تساؤلات أم سالم : أبي سيارة كشخة عليها شعار عايلتنا ..... وأبي أحسن شباب العايلة معاي يوصلوني .... نقوا لي اللي يتكلمون إنجليزي حتى يردون على الصحافة العالمية ووكالات التلفزيونات ..... وأبي المرشحات سبب تلتي لأمن الدولة يوقفون عند باب بيتي وينوحون علي ويلومون نفسهم جدام الأعلام العالمي وكل وحده معلقة إسمها على صدرها بالعربي والإنجليزي .... وما أوصيكم بالتكشخ واللافتات ..... وأبي الشرطيات اللي خرجوهم من مدة أهم اللي ياخذوني بسيارة النجدة .... ما دام السالفة فيها تلفزيون وصحافة عالمية خل العالم كله يدري إن عندنا شرطيات .
إلتفتت علينا لتسألنا : عاد إمتى بتسوون التشاورية ؟؟؟
خلوني أزهب جنطة إيدي وأحط فيها نظارة التلفزيون ومفاتيح غرفتي وكبتي والتجوري ومفاتيح البيت .... وأجيل البيت حق الخدم حتى ما ينقصهم شي بغيابي ... و
لم نتمالك أنفسنا من الضحك .... ضحكنا جميعا بوقت واحد وقطعنا إسترسالها بشروطها
وقتها إكتشفت إن السالفة مقلب ظريف دبره الجميع لها
ضحكت وقالت : الله ياخذ إبليسكم ... سويتوها فيني :)

هناك 31 تعليقًا:

بحار مهموم يقول...

ههههههههههه استطراد كالعاده جميل ورائع لم استطع لفت عيني عن المقاله .

وشهقت فورا : تشاورية ... أخاف ياخذوني أمن الدولة ؟؟؟ !

ههههههه الله يرحم الحال:-)

الله يخليها لج ويحفظها ,ولا يحرمنا من إبداعج الرائع.
وشكرا

Mr_CHoCoLaTe يقول...

ههههههههههههههه

يحليلها والله ربي يحفظها لكم

بس والله فكره حلوه ليش لأ

انا أؤيد حرمه ادش المجلس بس نبيها على وزن نوريه الصبيح علشان تهزهم

في امان الله

Yin مدام يقول...

لوووووووووووول

والله حبيتها أمكم عزيزة ومن كل قلبي

الله يحفظها

والا بتسوون تشاورية ها؟!؟

زين وين إعلانكم المشفر...؟؟؟
وشنو كلمة السر؟

بوست يهبل
:))

حافظكم الرحمن

مركبنا يقول...

ياحلوها (=

fatto يقول...

لوووووووووووول وااي امج عسل .. الله يخليها لكم :)

الزين يقول...

يا زينها زيناااه

:))))


المره منظمة وتبي شغلها معاها شلون يعني

يا حليلها ما خلت شي من التفاصيل ما غطته


يا صباح البوستات العجيبة

:)

lawyer يقول...

هههههههههههههههههههههههههههههه

لووووووووووووووووووول


اهم شي بتفررررررررررررك

ماخذه ليفتها امن الدوووووله

عبالهااااااااااا رويال بالم ريزوووورت


وااااي حبيتها



اشسالفه الحريم ويا المفاتييييييح
ليش الجنطه 6 كيلو من المفاتيح


يازتلي جنطه الجيييييييييل الي بتاخذها قولولها امن الدوله مو بالزمااالك



يا حلوووووو هالمقالب

اهم شي يبووو الي يعرفون يتكلمون عنجليزي تبي تكشششششششششششخ بالسي ان ان هههههههههههههه

صبا يقول...

يا حلاااتها والله

مسكينه خبصتو قلبها
واهم شي تبي البيت كله بلي فيه باغراضه واثاثه يروح معاها امن الدوله

:**

بعد قلبي
حوار عائلي سياسي جميل بين ماما عزيزه واهلها وضيوفها
الله يحفظها ويطول بعمرها يارب

امتعتينا بهالمقال الفكاهي الاجتماعي ..

تسلمين
:**

Manal يقول...

حلوة تشاورية

اترقبها بانتخابات الطلبة في بريطانيا

:)

chandal/danchal!! يقول...

looooooooooooooooooool

يا رب يحفظها ويعطيها الصحة والعافية

:)

travel light LOL


والحب يطلع على بذره


:)

عبدالرحمن يقول...

الله يحفظ لكم الوالده ويطول بعمرها

بس لا تنسون الشموع على غرار اعتصامات بورميه

بس شموع حريم لازم الشموع المعطرة هههههه

مقلب جميل استغليتو طيبه ونية الوالده الصافيه

ربي يحفظها

Q8EL5AIR يقول...

مسكينه بقت تروح فيها واخرتها مقلب !!!

عاد شيفككم من العيايز ألحين .. على قولتهم " عند العيايز كل شي يايز "!!


وتحياتي ..
ويسلمواااااااااااااااااااااا :)

Enter-Q8 يقول...

بلغي ام مبارك
ترى تصاميم الفزعه مجهزها بعد ههههههههههه
الله يطولكم بعمرها و يخليها لكم

FANDI يقول...

يحليلها الله يخليها لكم ويبارك بعمرها
ياحلوهم العيايز اعشقهم كلهم

نهــــــــــار يقول...

السلام عليكم......
ماشاء الله على دمها الخفيف ....
صراحه صدقها دام فيها إعلام غربي ...
وحتى محلي لازم تكشخ....
والشنطه الماركه موضه هالأيام...
بس أهم شي إتجيل البيت للخدم...
.......
الله يحفظها من كل شر يارب ..
...
دمتِ بخير

4 يقول...

تشاورية دار عزيزة ...

لحق لا تلحق

حتى الأنتربول وصلوا

Nikon 8 يقول...

بحار مهموم
الله يسلمك يا أخي
وشكرا على التعليق :)

Nikon 8 يقول...

Mr_CHoCoLaTe
زين اللي أشوف فيه واحد معجب بالوزيرة الفاضلة نورية الصبيح :)
أنا أيضا معجبة بها وبشخصيتها:))

Nikon 8 يقول...

Yin مدام
حبتك العافية يا الغالية
لو السالفة صج جان نشرنا الإعلان المشفر بالمدونة :)

Nikon 8 يقول...

مركبنا
حلت دنياك :))

Nikon 8 يقول...

fatto
الله يسلمج يا الغالية :))

Nikon 8 يقول...

الزين
يا مسا الزين كله يا الزين :)
أما أمي عزيزة منظمة... فهي فعلا منظمة :)

Nikon 8 يقول...

lawyer

يازتلي جنطه الجيييييييييل الي بتاخذها قولولها امن الدوله مو بالزمااالك

لووووووووووووول صج ضحكتيني :))
أثاري عندنا وعندكم خير مع المفاتيح
!!!!
هالطبع بادي فيني من الحين ... الله يستر :)

Nikon 8 يقول...

صبا
الله يسلمج يا صبا:)
لي الحين اللي يدخل عليها تقص عليه سالفة خبصة القلب !!!

Nikon 8 يقول...

Manal
الله يسهل عليكم إنتخابات الطلبة في بريطانيا مثل ما يسهل علينا إنتخاباتنا إنشاء الله :)

Nikon 8 يقول...

chandal/danchal!!
ما أدري ليش تذكرت شرط والدكم العزيز بخصوص جنطة السفر ... أشوة ما شاف جنطة أمي عزيزة :))

Nikon 8 يقول...

Q8EL5AIR
مسكينة والله كسرت خاطري ... سوينا فيها مقلب الكاميرا الخفية :))

Nikon 8 يقول...

عبدالرحمن
الله يسلمك يا عبد الرحمن
والله فاتت عليها الشموع :)
أصلا ما تعرف ما الهدف من هذه الحركة :)

Nikon 8 يقول...

FANDI
الله يسلمك ... وما نستغني عن تعليقاتك الجميلة :)

Nikon 8 يقول...

نهــــــــــار
أهم شي بالدنيا عند أمي عزيزة الكشخة ورعاية الخدم وتدليلهم :))

Nikon 8 يقول...

4
أشوة السالفة غشمرة وإنتهت قبل وصول أمن الدولة والإنتربول :))
ويا هلا بك في دار عزيزة :)