السبت، 20 يونيو 2009

حلي لسانك

بعدما قرأت البوست السابق لأمي عزيزة ثأترت وسرحت قليلا وقالت :
ذكرتيني في أم رقية الله يرحمها ويغمد روحها الجنة
لسانها الحلو وكلماتها الطالعة من قلب رجعت لها ريلها بعد ما كان شعره ويطير منها
وأستطردت تحكي لي قصتها وهي تمد بصرها بعيدا لتذكر ماضي كأنها تشاهد فيلما سينمائيا بشخوصه وأحداثة .
أم رقية لم ترزق إلا بإبنتها رقية من زوجها التاجر ... في زمن كان عدم إنجاب الذكور نقيصة بحق الرجل .
طال إنتظار بو رقية لسماع خبر حمل زوجته التي يحبها وتتفانى بحبه وخدمته وإسماعه معسول الكلام مع بسمة مشرقة لا تفارق ثغرها .
كل شهر كانت أمه تتحرى إجابة من كنتها تبرد قلبها وتفرحها
ودائما يكون جواب الكنة بكاء صامت حزين .... يكفي لتعرف الخالة إن كنتها غير حامل :(
صارت أم رقية محور نقاش لأحاديث جلسات شاي الضحي بين جارات الفريج .... وليش ما حملت ؟
مسكينة ما طلعت على أمها وخالاتها كل سنة عندهم ياهل ؟
وليش ما تقرون عليها ؟
ووصفات أشكال وألوان يطلبن منها غليها وشربها أو لهمها ( بلعها دفعة واحده )
كل هذا يصير أمام عيون ومسامع أم رقية ... مسكينة صارت من تشوف وحده حامل تصيح وتبكي لين تدوخ وتنام !
الرياييل أيضا لم يتركوا بو رقية في حاله ...اللي يعايره إنه ما فيه عيال ... واللي يعايره إن ما عنده ولد يارثه ويحمل إسمه ويساعده في شيخوخته
واللي يهمس بإذنه إن الدين حلل أربع وعذره وياه .... ما عليه إلا إنه يعزم ويختار العروس اللي يبي .
أمه نفس الشي شارت عليه بالزواج بمره ثانية وثالثة بعد إن أراد لأنها تبي تكحل عينها بشوفة أحفاده الذكور قبل لا تموت .... وعلى قولتها مو شرط تحب المرة الثانية مثل أم رقية ... عدها دوا لك حتى تجيب لك عيال !!!
أم رقية صارت ما تدري وين تروح كل مكان وكل شخص يذكرها بعجزها عن الحمل والولادة وإنجاب الذكر بالذات وبخاصة لي شافت وحده حامل !!!
ما كانت تنسى همومها إلا مع ريلها بورقية اللي كان يحبها .... وجاره طيبة كبيرة بالسن تدعى أم نعمة .... فكانت كل ما ضاقت فيها الدنيا تروح لأم نعمة اللي توصيها بأحلى الوصايا لرعاية زوجها ووضعه ما بين عيونها .... وتهون عليها مصيبتها وتقول لها ما تنفرج إلا من بعد ضيق :)

أهم ما كانت تقوله لها أم نعمة : ديري بالج تنكدين على ريلج ... تري الرياييل ما تهج إلا من الحنة والرنة والنكد ... يا كافي الشر .... وأم رقية بنت ناس وكفو تسمع الكلام وتدفن حزنها بقلبها وتراوي ريلها الوجه السفر .
أما بورقية فكانت شوفة وجه أم رقية البشوش وهي قابلة عليه تشيل له بشته بكل حيا تاخذ قلبه أخاذ .... ويحلفون اللي معاهم بالبيت إنهم عمرهم ما سمعوهم يتهاوشون ... ما يسمعون غير كعكعة بورقية على سوالف مرته لي كانوا بروحهم بدارهم :))

ولكن ....حلم إنجاب الذكر ... معاياة الرياييل لبورقية ... إلحاح أمه .... جعله يوافق ويوفض أمه لتبحث له عن عروس .
تمت الخطبة بتكتم ... ومع ذلك علمت أم رقية بذلك عن طريق إحساسها الذي لا يخطيء :\
في يوم الخطبة تحاشى بورقية الكلام مع أم رقية أو النظر إليها كانت نظراته في الأرض وظل كذلك حتى يوم الملجة ....تقول: مو ذاك الريال اللي خابرته :(
غرفة جديدة في البيت العربي الكبير تجهز للعروس بعذر إنها لحماها الصغير لأنه على نية زواج !!!
نادتها خالتها أم زوجها قبل الملجه بيوم وقالت لها :
ريلج باكر عنده عزيمة رياييل كبيرة ...... وباكر الصبح ورانا تنظيف وطباخ ذبايح ومن اليوم بنظف العيش حق باكر .
هزت راسها المسكينة وهي تدري إن العزيمة إهي زواج ريلها عليها وإهي اللي راح تطبخ له بيدها بمناسبة دخول شريكة على رأسها في نفس البيت لتنجب الولد !!!
تأكد لها خبر خطبة ريلها وموعد زواجه أيضا من الجارة الطيبة أم نعمة
طمنتها ووصتها شنو تسوى :)
في يوم الملجة قامت أم رقية الصبح ونظفت وطبخت وهي تغني وتشيل بهالسامريات الغزلية لريلها ..... وكانت أم زوجها معاها بالمطبخ ألوانها تتقلب إشمعني اليوم تغني السامريات ومستانسة ؟

:(
وأم رقية تدعي بأن الله يكثر خير ريلها .... كل ما فاحت اللحم الراهي أو غسلت العيش الكثير .... وتدعي بأن الله يبلغه برقية ويرزقه بإخوان لرقية ويسوي لهم أكبر من هالعزيمة :))
خلصت طباخها ... والخالة ولا حجوة ..... دخلت الحمام وتغسلت وتعطرت قريب موعد رجعة ريلها
طلعت بشته وملابسه ... وقامت تطيب وتبخر فيهم .... ورشت طيب وبخور على الفراش
حضر زوجها وعينه بالأرض وهو يشوف حوف مرته اللي تحبه وهو ناوي يعرس عليها
فزت لشوفته وقامت تدعيله وتقول
يا علي ما أبكيك من حره
الله لا يغير علينا يا بو رقية
من ترك داره قل مقداره
ما تعرف قديري لين تجرب غيري
تقول هذا وهي ترشرش عليه بالطيب وماي الورد
وترش على الفراش وتقول :
طيبته لك مثل ما تحب ... ناطرتك لين تخلص عزيمتك
وتكمل :
قول آمين عساك تبلغ برقية ويرزقك بإخوان لرقية وتسوي لهم ضيفة أكبر من جذيه وأنا اللي أطبخ
عساني ما أفقد نورك بهالبيت
يا عل يومي قبل يومك
كل هذا وبورقية ساكت وهي تدعي وتتحرك بالغرفة بشكل طبيعي مو مبين عليها شي ... لين أخذ بشته وطلع من الدار
وهو طالع قالته :
عساني ما أكون شماته لغيري من شيّن ناويه علي يا بعد طوايف أهلي وأنا غافلة
بعدها صاحت وبكت وهي تحاول محد يسمعها ....
شرط الخالة كان ما تبي يباب بعد الملجة ... حتى لا تحس أم رقية
المهم حطوا العشا .... شالوا العشا .... لا حس ولا خبر
وأم رقية حالتها حاله ... ما غير مره تدعي ربها على سيادتها ومره تصيح ومره تفكر
وظلت على هالحالة لحد ما سمعت صوت خطوات بورقية جاي صوب الغرفة
ما صدقت أذانها .... تأكدت مره أخرى .... نعم خطواته
وهمهة نساء بالخارج ... لا تعرف ما هي ؟
جففت دموعها بسرعة .... وفزت واقفة لدخول ريلها وعينها بالأرض من الإحترام والحيا من الريل .
دخل وصك الباب وراه
قامت بواجبها مثل كل مره .... خذت بشته وعلقت دشداشته وناولته وزاره
وطلبت له بالصحة والعافية
وسألته عسى الطباخ كان زين ويبيض الوجه ؟
وقعدت جدامه تسولف ولا كأنها تدري عن شي
وفعلا كانت ما تدري شنو صار بالضبط.... المهم إن زوجها رجع لها في يوم عرسه !
وجاها الجواب من باكر..... من شكل وجه خالتها أم ريلها ... ووجوه من في البيت المصدومة التي تنظر إليها بخوف وإستغراب !!!
أما الجواب الصريح فأتاها من أم نعمة وبشرتها إن ريلها هون عن الزواج فجأة وبدون أسباب !
بورقية تعتذر من أبو البنت اللي المفروض يتزوجها وتنازل له عن المهر ورفض يعقد القران وأعلن جدام الناس كلهم وشهدهم إنه راضي باللي الله يقسمه له وحمد الله على عطاياه من الذرية المهم إن الله يطرح فيهم البركة .... وتعشوا ومشوا .
الخبر صدم خالة رقية ... وزعلت من ولدها ... وصدم كل من في البيت
ومحد عارف شنو السر ؟
فيه ناس أساءت الظن بأم رقية وقالت : ما أدري شنو بخرته فيه وعفست الريال ؟؟؟!
وزادوا على الكلام وقالوا الله يا هي دخاخين كانت تعجل بالدار ... أشوه ما ضرتنا
وفيه ناس قالت رابطه الريال ( أي مربوط بسبب سحر )
وفيه ناس قالوا تحذروا منها ترى حجيها يسحركم ويقلب راسكم
المهم إن بعد عشر شهورعلى هذي الحادثة الله رزق أم رقية بولد سموه عبدالرزاق
وعقبها ما وقفت حمال ... ما شاء الله كل سنتين تحمل وتجيب ولد .... لحد ما ختمتها ببنت ووقفت حمال .
كل هالسنين ما صارحت الريال عن أحداث هذيج الليلة أوإستفسرت شنوصار لأن المهم عندنا إن خطة أم نعمة نجحت وهي طبقتها من بكل إحساس صادق فيها
وبورقية أيضا طوى صفحة هذيج الليلة أيضا وما عاد يحب يذكر منها إلا حب مرته له وقراره الصائب بعدم الزواج .... والرضى بما كتبه الله له ... خوفا من أن يعالج شيء ويجيب على عمره أشياء أخرى هو في غنى عنها ... كما برر لأمه بذلك لاحقا وراضاها
وفي الحقيقة أم رقية رضت من بعد ما بشروها بحمل أم رقية .... وقالت لها ضاحكة :
ليتنا مخرعينج من زمان حتى تحملين :)
واللي إتهموا أم رقية بأنها ساحرة ورابطه الريال ... صاروا يترجونها تعلمهم شنو سوت اللي خلت الريال يرجع بكلمة عطاها أبو البنت ويتنازل عن المهر ويهون جدام الرياييل كلبوهم ويتمسك بمرته ويامن بقضاء الله وقدره .
تمسكت أم رقية بسرها إلى مات زوجها وماتت أم نعمة
وصارت توصي بناتها وحفيداتها بوصايا أم نعمة ألف رحمة عليها .

هناك 43 تعليقًا:

غير معرف يقول...

Hii!
i really enjoy reading your blogs ;)) keep up the good work ;D

مركبنا يقول...

انتي عسل (=

Someday يقول...

مشاء الله عليج تبارك الرحمن اصلا ماكو مجال اعلق على حزايتج
سردج ممتع رائع جد بدعتي ربي يحفظج من كل شر :**

esTeKaNa يقول...

أنتي رائعه
:)
صج لي قالو الملافظ سعد
وفعلا ..الريال شنو يبي غير المبسم الحلو والكلمه الطيبة
امج عزيزه ذكرتي بيدتي يوم انها توصينا:
لو يطقج ويسوي اللي يسويه ويحذفج اتي واغراضج عند باب السكة
بسكات شيلي اغراضج ودشي من الباب الثاني
!!
واضحك اقولها منو يتحمل ينحذف لي الباب ويرد؟
تقول الريال يبيله صبر
فعلا صبر...وكلمه حلوة...وحكمة
.
.
قصة رائعه ذكرتنا بحريم قبل يا زينهم
عسى ربي يحفظهم
ويطرح البركة فينا وبجيلنا
:))
استمتع وانا بدار عزيزه
الله لا يحرمنا منج

بحار يقول...

مساء الخير:
الله يرحم ام نعيمه ويرزقنا المره الصالحه اللي مثل ام رقيه ويرزقنا منها الذريه الصالحه.

شكرا على القصه الرائعه.

فريج سعود يقول...

لو كل وحدة تقرأ هالبوست او تسمع نصايح ام نعمة قبل الزواج

جان ما صار طلاق بهالديرة

غير معرف يقول...

بارك لله فيها ...

ياحي الحريم السنعه ...

لو ياخذون هالسالفة وغيرها من امهاتنا الطيبات وسوالفهم السنعه

ويسونها مسلسل عتيج مو أبرك ... هذا الشي الي نحتاج نشوفه من اعلامنا

تدرين نسبة الطلاق بالكويت 53%
لو متربين على ايد ام رقية و امهاتنا الطيبات ... جان حالنا ابرك

لله المستعان

NewQ8 Bride يقول...

واااي يحلوهم مشالله حكمة و رزانة لو علينا الحين جان عفسه

و انا مثال حي حق جيل اللوية كله احن على زوجي اقوله اذا ناوي تتزوج علي عشان اني ما حملت مو تطول تزوج الحين مو تنطرني معاك عشر سنين قول من الحين خل اهدك و اروح استانس بشبابي دام توني صغيرة
P:

طبعا الرد حقران من امه :)


يا حلو سوالفج و الله

lawyer يقول...

جان بخت اني اقدر اسوي ربع الي تسويه ام رقيه في الحكمه

و السنع

زمن الحين المره تقدر تكون فيه حكيمه بهالطريقه؟


او الرياييل صج رياييل و يبين فيهم الطيب و تنكسر عيونهم ؟؟

Sweet Revenge يقول...

عجيبه القصة الله يعطيج العافية
وقالوها من قبل
"السحر سحر هين زين النفس والكلام اللين"
بس من يقدر علي انه يمسك اعصابه في هالموقف بس حريم قبل لا اله الا الله سنع

جدا استمتعت بالقصة :)

رزنامــــــة يقول...

الله يرحم ايام قبل
وحب ايام قبل
وسنع ايام قبل
وبراءة ايام قبل

ولا اعتقد ان كل شئ انقرض في زماننا هذا
ولكن من يعمل بما كان يحصل ايام قبل يا بخت من لم ينسى هالصفات الحميدة

بوست جميل ذكرني بزمان درب الزلق

بو سعد يقول...

الله يا السنع

الله يا الاخلاق

و الله يا مرات اتمنى اني انولدت مع يدي الله يرحمه ..

ميمة السبيت يقول...

يا متلف الروح لما تنظر لحالي الناس نامت و انا عيني سهيره ...

اشق يبيي إلا منه طراني ...

موحافظة الباجي

Yang يقول...

حريم أول ورياييل أول .....

الله عليهم, إحنا وين الحين ؟!؟!؟!؟

I7na 3shagnaha يقول...

خوش نهاية :)

بس مو كل مرة يطلع الريال مثل بو رقية..


اهو exception

ARTFUL يقول...

بدز هالبوست حق مرتي بعد اذنج


D;

بس والله خووووووش قصه استمتعت بقراءتها

:)

ARTFUL يقول...

لوير
-------

ايي يبا اييي يبين فيهم الطيب لا تحاتييين

p;

om comment kuwait يقول...

ريحة الطيب و البخور تفوح من البوست

الله يحفظج و يحفظ اميمتج :)

Mr_CHoCoLaTe يقول...

الله يكثر من أمثال أم نعمه و يثبت الحريم و يصبرهم مثل أم رقيه ^_^

يعطيج العافيه سوالفج تخلينا نقصها حق اهلنا هي هي ^_^

بــــدرا يقول...

مساء الخير

الصراحة أنا وايد استانس على قصصج و كل بوست اقراه لازم اقولا حق أمي و عقب كل بوست تقولي أمي حرام خل تيمع القصص و تحطهم بكتاب

غير معرف يقول...

الله يحفظج ويحفظ أمي عزيزة
كثري من هالحزايات الطيبة :)

والله يرزقنا طيب المعشر

chandal/danchal!! يقول...

بديت أشك انج حياة الفهد

:)


خوش قصة يا نيكون... واللي ما يحتكم على حجي حلو و حجي منمق؟

Nikon 8 يقول...

مركبنا
شكرا ... إنتي العسل والله :)



Someday
شكرا يا عزيزتي ويحفظج إنشاء الله :))

Nikon 8 يقول...

esTeKaNa

كل شي في هذه الدنيا يبيله صبر واوله الريل :))
كلام جدتك نفس كلام أمي عزيزة :)
وحبيت دعائج بأن الله يطرح البركة بأبناء وبنات جيلنا
بارك الله فيج يا إستكانة :)


:::::::::::


بحار مهموم

آمين يارب وطالعة من كل قلبي
الله يطيحك بالمر الصالحه :))


:::::::::

فريج سعود

ولو كل من ينصح نصيحة خالصة لوجه الله ما رواها أهداف خبيثة أو هدام بيوت جان ما كان الطلاق بهذه النسبة العالية :)


:::::::::

4

الله يحييك ويبارك فيك :)
التعامل مع الزوج يحتاج لخبره أمهاتنا اللي سبقونا .... لاوم نسمع خلاصة تجاربهم :)

Nikon 8 يقول...

New Bride
عزيزتي ... إذا الريال ساكت وقانع ليش تحنين عليه وتدخلين الفكرة غصب في راسه ؟؟؟
الله يرزقك إنشاء الله بالذرية الصالحة وإنتي اللي بتبشرينا :)


::::::::

lawyer

تصدقين يا لوير إن فعلا التعمل مع الوزج يأتي بنائج إيجابية من واقع التجارب الكثيرة اللي حولي واللي أنشر لكم بعضها ولكن تحتاج إلي أعصاب حديدية وطولة بال
أما بالنسبة لكسر العين ففعل الطيب يكسر العين غصب بس يبيله مداومة :)


:::::::::::

Sweet Revenge

عليج بالعافية وعجبتني المقولة جدا ةإسمحي لي إني أستخدمها إذا دعت الحاجة ... شكرا على الراي القيم :))



:::::::::::

رزنامـــــة

أعشق درب الزلق وحوارته ... وشكرا على المشاركة :))


::::::::
بو سعد
تمني الأخلاقيات السائدة أيام جدك فقط ولا تتمني العيشة لأنها فعلا صعبة ... تمسكك باللي يشوره عليك الكبار وجدك راح يعيشك روحيا بزمنهم ... يا هلا فيك :)

Nikon 8 يقول...

ميمة السبيت
كأنج تعاديتي من أك رقية وقمتي تغنين معاها سامري .... الله يحفظج


:::::::::::

Yang
والله ما يندرى :))
الله يعينا على زماننا:)


::::::::::

I7na 3shagnaha
وإنتي الصاجة .... يا ما سووها وما قلدوا بأحد :(

::::::::::
ARTFUL

إذنك معاك ...وعليك بالعافية :))


:::::::::::

om comment kuwait
عليكم بالعافية ويا هلا فيكم :))

Nikon 8 يقول...

Mr_CHoCoLaTe

الله يسلمك ويعافيك :))

:::::::::

بدرا

هذي راح تكون الخطوة القادمة إذا الله أراد ... أو أكتفي بالتدوين ... الله اعلم :)
يا هلا فيج بدار عزيزة :))

::::::::

غير معرف 1 و 2

شكرا من كل قلبي

::::::::::

chandal/danchal!!

لا ما ني حياة الفهد :)
الله يهطيها ألف عافية على الأقل فكتنا من مسلسلات الطراقات برمضان :)
اللي ما يحتكم بالحجي الحلو والمنمق أهو الخسران ... الله قارده !

غير معرف يقول...

نيكون



اكثر شئ عجبني بالمره انها تحليقها مو على حساب كرامتها

المشكله عندنا يامره رافعه نفسها على ريلها !
او وحدة حاطه نفسها بالقاع

وقليل الى بذكائها وسنعها ولسانها الى تخلي الريال يرفعها او فوق راسه (=

مركبنا

Sn3a يقول...

فقيره بعد شهالناس اللي موراضين بكتبه الله
تلاقين الزوج والزوجه راضيين
الناس اهم اللي مو عاجبهم!

كسرت خاطري العروسه اللي هونو عنها
احس فشله بحقها فقيره

غير معرف يقول...

بتزوج وحده جذي ولا بتم عزوبي

Nikon 8 يقول...

مركبنا( غير معرف 3 )
هذه هي العبرة... حسن التصرف والحيلة اللي ما فيها مكر ممكن تحل مواقف عديدة
وتاريخ أهلنا يزخر بهذه النماذج لأن الحيلة البريئة كانت جزء من حياتهم اليومية ... ولنا مواضيع قادمة بإذن الله عن هذا الموضوع :)


::::::::::

سنعة

كل شي خيره من رب العالمين ويمكن هونوا عنها أفضل من زوجة لإنجاب أولاد فقط .... وعلى فكره كانت البنت قبل يملجون عليها وهي ما تدري فتلاقين اللي تأثر هم أهلها !


::::::::

غير معرف 4

الله يعطيك على نيتك :)
والدنيا ما تخلى ... حياك الله :))

Sweet Revenge يقول...

حبيبتي تسلمين نتعلم منج والله والجملة وصاحبة الجمله تحت امرج :)

Nikon 8 يقول...

Sweet Revenge
شكرا عزيزتي :))

المقوع الشرقي يقول...

تسلم أيدج قصة رائعه
كانو قبل يتحلون بالصبر ووحده تركد الثانية..
الريال بالفعل يبيله صبر..كونى له جاريه يكن لكى عبدا
تحياتى

Nikon 8 يقول...

المقوع الشرقي
الله يسلمج يا الغالية :)
فعلا الزوج يحتاج صبر والزوجة تحتاج من ينصحها وينورها :))

ReLaaaX يقول...

مادري ليش قعدت ابجي

الظاهر دموع الفرح :)



آنا لو مكانها اذبح الخالة عقب واصك على ريا وسكينة :p


يعني الخاله التعبانه لو كانت مكانها بترضى ياخذ عليها عشان الولد يعلها الحين اقول !

Nikon 8 يقول...

ReLaaaX
في سبيل إستمرار والنسل وإنجاب الذكر كل شي يصير حتى في وقتنا هذا !!!
ودموعك الغالية لأنها نجحت في إمتحان صعب أدته أم رقية بكل أحاسيسها ونجحت :))

Fishah يقول...

يا حلو سوالفج :)
الصراحه مافي مجال اني اعلق .. عجبتني القصه واااايد وعجبني اسلوبج في طرحها.. استمتعت في قرايتها :)
يسلموو حبوبه :)

um_alzain يقول...

ما احلا وصية ام رقيه
وما احلا كتاباتك
استمتعت بكل كلمه من القصه ونقلتينا الي ماضي جميل بالاحداث وكأني معهم بفرحهم وحزنهم
شكرا nikon8

Nikon 8 يقول...

Fishah
الله يسلمج يا الغاليه :)
وأهلا بك ضيفة عزيزة في دار عزيزة :))

Nikon 8 يقول...

um_alzain
الله يسلمك يا أم الزين :))
ويا هلا فيك دوم :))

moloniz يقول...

نبي نصايح ام نعيمة

علقتينا ترى ويعطيج العافية شي مميز

Nikon 8 يقول...

moloniz
إسمها أم نعمة :)
ونعمة إسم رجل .... وقريبا راح ننزل لك بعض من النصائح ولكن ليس بالضرورة من أم نعمة بالذات ... لأن دار عزيزة مليئة بالحريم اللي صبروا ونالوا .... بس على سنع :)
وأهلا بكم في دار عزيزة :))