الاثنين، 6 يوليو 2009

حسبه غلط

تقول عاليه : يا ما حلمت بقصة حب لطيفة الله يتممها علي بالزواج
قصة أستطيع حكايتها لأبنائي وأحفادي .... قصة أستطيع من خلالها أن أتعرف على شاب شهم ...متربي .... ولد عايلة منغنغة فلوس .... يتقبلني كما أنا وأتقبله كما هو وأتزوجه وأفتك من سالفة كل كم أسبوع متزينة ومتعدلة ليشاهدني خطيب .....أبي أرتاح من أعذار الرفض اللي صارت تزعزع ثقتي بنفسي
طويلة ... قصيرة ... سمرا ... متينة .... تشتغل مع الرياييل !!!
من أكثر القصص التي تلهب خيالي وتشغل فكري هي حكاية بنشر السيارة والفارس الشهم المنقذ الذي سيصلحه لي ويضبط قلبي معاه
ولي في محيطي أمثلة حية
فقريبتي حصل لها بنشر بالشارع ..... وقف لها شاب وأصلح سيارتها
ولم تعرف كيف تشكره سوى بتقديم علبة بيبسي بارد له من ثلاجة سيارتها
وبعدها بشهور صارت زوجته
أما صديقة أختي فحصل لها نفس الشيء وخجلت كثيرا عندما رأت العرق والسواد على وجه وذراع الشاب المنقذ .... بعد تصليحه لبنشر سيارتها ....... فقامت بتقديم مناديل رطبة معطرة له ليمسح بها يده من أثار تصليح البنشر وينعش وجهه من العرق والحر
وبعدها أيضا بفترة صار زوجها !
من سمعت هالقصتين وأنا متأثرة فيهم أكثر من أي قصص حب وزواج ثانية
صرت أتمنى من كل قلبي إنه يصير لي حادث بنشر !
صرت أطلب من ربي أن يحقق لي هذا الأمر كل ما طرا علي حلم الزواج !
وإستعديت نفسيا وماديا لهذا الموقف
فالماء والمرطبات البارده متوفرة دائما بثلاجة سيارتي والمناديل الرطبة معطرة لا تختفي من حقيبة يدي ..... واللوك طبعا على سنجة عشرة .... حتى الكلام صففته وحفظته ..... بس أبي البنشر يصير وأنا جاهزة عال العال ....!
ذاك اليوم إنعزمنا على شالية قريبتنا في الجليعة
وبالطريق إتصلت علينا صاحبة الشالية وطلبت منا على طريقنا أن نحضر لها شوية أغراض من جمعية أم الهيمان .
دخلنا أم الهيمان وأخذنا الأغراض .... ما أدري إشطرا على الوالده تبي تاخذ لفة على أم الهيمان لتتفرج عليها ؟!!
في محاولة خروجنا من أم الهيمان حصل ما كنت أتمناه طويلا
أخيرا طق التاير بنشر ..... يا فرحتي .... كشرتي من هالإذن لي هالإذن :))
أمي حبيبتي لا تعرف عن خطتي وأحلامي أي شي
فكانت مستغربة من فرحتي بالبنشر !!!
نزلت من السيارة أتفقد التاير المبنشر ..... طايره من الفرحة ....... وإلا شطالع ؟
سيارتي الجيب متروسة لي عينها أغراض ... وقواري اليهال ... وجدور أكل .... وأكياس ... وحقائب !!!!
آآآآآآآآآآآآخ ...... راح عن بالي إني أحط خطة حق بنشر لطريق الشالية !
واليهال صفقة بالسيارة فرحانين على البنشر:)
وأنا حدي ضايق خلقي :(
يعني اللي بشوفني جذيه مع كل هالكش ما يصدق إنهم مو لي ؟ واليهال مو عيالي ؟
وين البنشر الرومانسي اللي حلمت فيه ؟ .... ووين الواقع اللي أنا فيه ؟
شتان ما بينهما .... حظ الله يكافيكم شره !
وبداية غير موفقة ... تنبأ عن موقف غير عن اللي حلمت فيه
وقفنا ننطر أنا وأمي واليهال يمكن الله ورحمته .... يشرف الفارس المنتظر
ظلينا ربع ساعة ..... سيارة تقترب من بعيد .... جديدة وتلمع من النظافة
دقات قلبي تتسارع ..... مبين خوش واحد داخلها ..... والله أم الهيمان فيها ناس كشخة ؟
وقف بسيارته بجانبنا وكلم الوالده وهو بداخل سيارته :
الله بالخير ....عسى ما شر تحتاجون مساعده ؟
أمي : إي والله يا وليدي ... سيارتنا طاقة بنشر
هو : إخذي عندج .... هذا رقم بنشرجي ... دقي عليه ويجيلكم بالحال
أخذنا الرقم وشكرنا الرجل .... خاب أملي .....تصرف ما حسبت حسابه
هو : عذروني اليوم جمعة وأبي ألحق على الصلاة .... متأكدين أموركم زينة ؟
فاجأتني معلومة إن اليوم جمعة .... والشوارع شبه فاضية .... علامة أخرى لفشل خطة التاير
إستدرك هو وسأل : وين ريالكم ؟ إتصلوا عليه يجيكم ؟
أمي : جزاك الله ألف خير .... الله يتقبل طاعتك .... وريالنا والله بالبيت ما نبي نزعجة على بنشر وأهل الخير ما يقصرون !
هو سمع هالجملة الأخيرة وما شفنا غير غبرة سيارته .... سلم وداس بنزين ومشى !!!
رد الوالده الله يحفظها ( الغير مدروس ) نحش الريال ...... الريال كاشخ للمسجد .... وقلبة مع الصلاة ..... معقولة بيوسخ نفسة ببنشرنا .... وريالنا بالبيت مرتاح ما يدري عن شي ؟!!!
ولأن الموقف بكبره فاشل فلازم الفشل يكون من كل صوب
البنشرجي ما يرد ..... خطه مغلق ...... إما يكون بصلاة الجمعة أو لا يريد أزعاج أحد بيوم راحته .
لم ينقذنا من موقفنا غير سايق قريبتنا أم الشالية إتصلنا عليها وبعثت سائقها لنا
جلست داخل سيارتي والدمعة بعيني ....كسرت خاطر روحي ..... أثاري البنشر كسافة وبهدلة ووقفة بالشمس !
أثاري مو كل بنشر .... على ما قالوا بنشر ووراه .... ريل
وين الموقف الرومانسي اللي حلمت فيه .... وين الموقف اللي أنا فيه والحظ اللي معاكسني :(
وإش هالحظ ؟
وليش كل حسبتي طلعت غلط ؟
يطق لي بنشر بمنطقة خالية الدسم ( تعبير عن ذوي الدخل المحدود )
وبيوم جمعة ؟
معقولة الماء بارد ومناديل المعطره ما يستاهلون واحد ( حليوه ) يستاهلهم ؟
كسر خاطري السايق المنقذ .... قدمت له الماء البارد وشكرته وطلبت له بالصحة والعافية .
أكملنا طريقنا للشاليه وأنا سرحانة أفكر وأتحسر:\
آخ يا فارس أحلامي راح عليك دلالي ..... كانت فرصة لك لا تعوض بثمن ..... وإنت الخسران .
أو
حاول مرة أخرى ... الماء البارد والمناديل المعطرة بإنتظارك :)

هناك 43 تعليقًا:

ميمة السبيت يقول...

مسكينه ما سوت عليها هالبنجر

نون النساء يقول...

هههههههههههههههههههههههههه
ياربي ضحكت لين قلت بس


الله يهديها ما لقت إلا ام الهيمان تبي يتحقق الحلم مالها فيها
ترا مافيها غير القطاوة وسايق المامات

esTeKaNa يقول...

يا صباح البنشر الرومانسي
:)
في هذا الجو المغبر والسموم
لو أضمن وصول اجمل فارس لأحلامي
لن اتمنى مع ذلك الوقوف
:))
قصة جميلة
شعرت بقرب البطلة مني ومن كثيرات ممن اعرفهن ممن اذا تشرقد حظهم بالارض تشرقد وما وراه وقوف
:)
الله يحفظك ويسعد قليبك ويكبر حظوظ كل هالبنات
صباح شوق
من قلب استكانة لشيخة بنات دار عزيزة
:*

الزين يقول...

مسكييييييييينة

كسرت خاطري


كل هذا عشان الريل

يا قلبي عليها

على بالها الحياة رياااال

مادرت ان ساعات وجود الريال بحياتج يعني الشقا

:))

سوالفج نااااطعة

وصباحج كلش مو غبار

:)

ARTFUL يقول...

لووووووووووووووووووووول

كاااااااااااااااااك

والله قصه فظيييعه .. أهم شي تارسة الثلاجة ماااي ومضبطة اموورج

D;

بعد ليش رايحين ام الهيمان عندكم الادعمي او مركز السلطان جليعه D;

على الأقل يكون لج نصيب بواحد عنده شاليه

D;

بعد اذا حكج الدهر مالج الا السايق ما يازلج

والا طلع متزوج؟؟

p;

ومشالله على تفاؤلج الله يزيدج ليلحين مزهبه شغلج

دام الامل موجود لا بد يوم يعود

تسلمين

D;

Sweet Revenge يقول...

الله ينولها الي في بالها وبدون بنشر واذيه :)

بو سعد يقول...

هههههههههههههههههه

و السايق المسكين مو ريال ؟ D:

شر البلية ما يضحك !

أتيت متاخرة يقول...

ضحكت من قلب

صج صج مع البنجر ريل ؟؟؟؟
أول مرة آعرف


ربي يعوض على عالية ببنجر سنع
بس المشكلة مو بالبنجر
المشكلة براعي البنجر يكون متزوج ومعيل

lawyer يقول...

لوووووووووووووووووووووووووووووووول



لووووووووووووووووووووووووووول


لوووووووووووووووووووووووووووول



خف طيييييييييييينه


هذي خبله مو صاحيه

والله محد ودر حريمنا غييييييير مرايم بنت عبدالغني شربت يوم سوت خطه البنجر

لووووووووووووووول








هارد لك

RoOra يقول...

واي ذكرتيني بحالتي ذاك اليوم
ما بقى احد ما طق على الدريشه و انا متنحره ماني فاجه حق احد ما اعرفه لوول
ناطره الانقاذ ;P~

Alia يقول...

يا حظي :(((

يوم كتبتي قصة البطله على أسمي طلعت مالها حظ حتى بالقصيص يا حافظ

على الأقل جبر خواطر وسويها أم الحظ والبخت جود ترتفع أسهم صاحبات الأسم خو ألحين كل وحده على أسم بطله يقوم حظها إلا أنا القصه البطله فيها أنقص ويهها :(((( مو قبووووول تكفين عيديها الله يعافيج و سوي البطله عاليه أسم على مسمى عالية الحظ والبخت والنصيب السنع آااااامين .. ناطرين يتبع للقصة فيه رد اعتبار على اصوله

زهرة الرمان يقول...

:))

مو كل بنشر بنشر :)))))))))

..

بوست خفيف دم ..

Sn3a يقول...

هذي ماتحلم بزواج
تحلم بعرس
والفرق شاسع!


انا اخاف يحوشني بنشر واخاف اسوي حادث
لان اخاف احد يوقف ويكلمني
الله لا اييب هاليوم!

بس صج ضحكتني شلون انها مزهبه الحجي بعد

um_alzain يقول...

خيرها بغيرها
ولا يأس مع الحياة
المره اليايه انشالله تصيب وتحصل النصيب

Mamloo7a Q8ia يقول...

ههههههههههه
يا خف طينتها هالعاليه

الله يهداها جان طلبت الزوج بطريقه اسهل
شلي حادها على البنجر
كلش مو رومانطيقي
:)

Manal يقول...

:)

ههههههههههه

عجيبة القصة
الله يرزقها على قدر نيتها
:)

غير معرف يقول...

الله يشرح صدرك ويونسك دنيا وآخره

مثل ما تونسينا بقصصك الحلوه

بنجر في ام الهيمان يوم الجمعه الظهر في عز الصيف @@

جبريت يقول...

ههههههههههههههههههههههههههههههههههه

الصراحه شي مضحك ومبكي بنفس الوقت المضحك اصرارها على البنشر الرومانسي

المبكي اسباب الرفض الي مالها داعي قصيره وتشتغل مع رياييل شنو المشكله اذا تشتغل مع رياييل ؟؟؟

بس اذا بنشر عليها التيار مره ثانيه قولي لها تدق على 777 يمكن اييلها الشرطي الرومانسي لووووووول

مشكووووره على القصه الروعه

Nikon 8 يقول...

ميمة السبيت
هذا حظها بعد شتسوي ؟
:)
المرة الثانية يكون حظها أفضل إنشاء الله

Nikon 8 يقول...

نون النساء
الحظ لي بغي يبتسم تبنشر السيارة باحسن مكان ... ولي كشر الحظ ... علوم :))

Nikon 8 يقول...

esTeKaNa
يا صباح الشاي المهيل مع دربيلة حلوة :))
الله يسلمج يا الغالية
وعلى قولة الأغنية
حظ وقعد يا مسعده ولا لا لا لاولا :))

Nikon 8 يقول...

الزين
يا صباح الهنا
مع هالمنازل المكيفة يا الله من فضلك وين نحس بالغبار ؟
الله يكون بعون اللي يشتغلون بالهواء الطلق ... عوينتي

Nikon 8 يقول...

ARTFUL
الخظ لو هو عدل جان بنشرت السيارة بمركز سلطان :))
لوووووووووول
صباحك فل وعسل

فريج سعود يقول...

كرتون مسامير وشارع الحب

وهي تتنقى وتتشرط وبدون لا ماي ولا مناديل معطرة

لا والمنة عليهم بعد

وخل تحط لها الكرسي الي يتسفط علشان تحط ريل على ريل

تسلم ايدج كالعادة مبدعة

The.One يقول...

سبحـان الله دايما الشي الي نركض وراه ما يصير من نصيبنـا

وإن نسينـاه طلع لنا فجأة




يمكـن من تأثير قانون الجـذب
والتفكيـر السلبي واليأس حول أنتظار فارس الاحلام ..


بس اذا هدينـا وصرنا رايئيـن :)..
وبعدّنـا التفكير السلبـي بعـدم تقدمه وفقد الأمـل

بيي يعني بيي ! وراح يكون من نصيبج
مشكورة :)

Nikon 8 يقول...

فريج سعود
لووووووووووووووول
يا خف طينتك :)

Nikon 8 يقول...

The.One
أكيد حنا واثقين إنه راح يجي لكن مو بكيفنا ولا الطريقة اللي نبيها:)
تسلمين يا الغالية :))

Nikon 8 يقول...

Sweet Revenge
آميييييييييييييين
:))

Nikon 8 يقول...

بو سعد
بلي رجل .... لكن مو نفس اللي بالبال :))

Nikon 8 يقول...

أتيت متاخرة
الله يسمع منج :))
لووووووووووووول

Nikon 8 يقول...

lawyer
لوووووووووووووووول
وين طلعتي بنات عبد الغني شربت :))

Nikon 8 يقول...

RoOra
لووووووووووووووول
عسى عاد في شارع كشخة :)

Nikon 8 يقول...

Alia
ولا يصير خاطرج إلا طيب
راح أسمي بطلة بإسمج وتكون خظ وبخت ودلال :)
بس تدللي :))
وشخصيا أحب الأسماء اللي تدل على والعال والعلياء والعز :)
ويمكن من حبي للإسم سميت عليه .... وعسى حظج بالدنيا والآخرة عالي مثل إسمج :))

Nikon 8 يقول...

زهرة الرمان
شايفة ؟
حتى البنشر مقامات !!!
حياك الله يا الغالية :)

Nikon 8 يقول...

Sn3a
الله يكافيج شر الحوادث والباجر
والناس ترا تخطط لكل شي حتى الحجي :)

Nikon 8 يقول...

um_alzain
الله يسمع منج :)
وبنشر يخيب وبنشر يصيب :))

Nikon 8 يقول...

Mamloo7a Q8ia
بعد شدتقولين ؟
هذا اللي شوقها ... قصة البنشر :))

Nikon 8 يقول...

Manal
لوووووووووووول
هلا بالغالية
الله يسمع منج :)

Nikon 8 يقول...

غير معرف
حاضرين .... بس تابعونا :))

Nikon 8 يقول...

عنيف
ما أدري ليش ما طرا على بالها الثلاث سبعات ؟
يمكن ما تبي شرطي ؟
:))

@alhaidar يقول...

خو مو كل حملة بولد ;p

وبعدين معقولة في أحد يفكر جذي ؟

كل شي يجوز مع بنات حوا ;p

تحياتي المتجددة للإبداع :)

Nikon 8 يقول...

أحمد الحيدر
يا هلا بالعائد بعد غياب :)

رورو الشخبوطه يقول...

وي قت الحزينه تفرح مالاقت لها مطرح..


كسرت خاطري ..

قالوها الناس حظوظ :)

يالله مو نصيبها الله يرزقها يارب :)

مرسو..