الأربعاء، 22 يوليو 2009

نمل

اللوك الجديد إهداء من الرائعة أسيل بمناسبة مرور عام على المدونة ..... شكرا جزيلا يا أسيل ولولاك لما كتب للمدونة الظهور :))
كما أشكر العزيزة بيربل لإشرافها على اللوك الجديد وذوقها الرائع في إختيار القالب الجديد للمدونة ولتعليمها لي عن بعد بكيفية إعادة تنسيق وترتيب الدار .... كلك ذوق يا بيربل :)
وفي الحقيقة تعبتج معاي وايد لحد ما إخترت القالب .... وإنتي دلعتيني وايد :))
موضوع اليوم قررت أن يكون خفيفا ..... هدية مني لكم لتلطيف أجواء الصيف
مع تمنياتي بعطلة نهاية إسبوع ممتعة ..... وكل إسراء ومعراج والجميع بخير
.

ساعات الدوام الطويلة على كرسى وثير .... وطريقة معيشتنا الحديثة ( متعلقين ) فوق القنفات و ( مدندلين ريولنا ) إلى تحت تجعلني أشتاق للجلوس على الأرض ...... أسند ظهري وأمدد رويلاتي حينا وأتربع أحيانا أخرى :)
ولا يضايقني بالتمتع بهذه الجلسة سوى طابور النمل اللي (يدبي ) في هذه الأيام الحاره نحو غنيمة عبارة عن فتفوته بسكوت من مخلفات أطفالي أو(نثاثير) سكر أبوهم الذي لا يعرف كيف يحلي كوب الحليب بالشاي دون بعثرة السكر يمينا وشمالا !
في أوقات المزاج الرايق أحب أن أراقب النمل وهو يتعاون ويحمل أكلا يفوقه وزنا ويسير بهدوء وبدون ضجيج بنسق مرتب نحو غيرانه
أما إذا كنت متربعة بالأرض .... وأتصفح الجريدة (فأطفر) من النمل وهو ( يتخطرف ) جدامي ويحجب عليّ الحروف والنقط و ( ينقص ) علي إستمتاعي بالجلسة والقراءة :(
ولا وسيلة لطرده آمن من أني أنفخ عليه عدة مرات عله يرحل .... ولا فائدة ... هناك ما يغريه للتمشي فوق الصفحة ومعاكستي !
أقلب الصفحة الكبيرة لأقرأ الصفحة التي تليها فيطير النمل عاليا في الهواء مع حركة التقليب وهو يرافس بريوله ليسقط بعيدا عني !!
أستقر مع صفحتي الجديدة ..... فيأتي نمل جديد ليعاكسني !!
شخصيا .... لا أحب قتل النمل... وأعتبره مفيد جدا لأنه يكشف لي عن خداع الشغالات بأنها كنست الأرض وهي في الحقيقة هي لم تفعل ....... سوى تنظيف من فوق لفوق !!!
ومفيد أيضا لأنه يكشف لي شقاوة ومكر الصغار..... يأكلون الآيس كريم والشوكولاته خفية و(يدعسون ) الأكياس بين ثنايا القنفات وأماكن أخرى لا تخطر على بال !!!
صغاري لجأوا لحيلة إخفاء بقايا أكياس الشوكولاته والآيسكريم
منذ أن إكتشفوا إني أطيح على سرقاتهم الصغيرة من سلة المهملات .... من يومها صاروا يخفون أكياس الحلويات بعيدا عن أماكنها المعتاده !
ولا دار على بالهم الصغير إن النمل سوف يشي بهم ويدليني على كل ذرة أكل يخفونها عني !
جلست يوما على النت أستكشف عن طرق للتخلص من النمل غير المبيدات الحشرية المعروفة
فخرجت بمحصلة لا بأس بها..... بعضها طريف والبعض الآخريستحق التجربة وإليكم بعضا منها :
رسم خط بالطباشير على الأرض يمنع النمل من عبوره !
رش غيران النمل وحوش المنزل بالماء والملح طريقة فعالة للقضاء عليه
رش غيران النمل بالماء والملح وخل التفاح يبيده تماما
وطريقة أخرى أقرب للنكته منها كوصفة تقول :
عليك برش سكر ومن بعده فلفل أسود ورخام وكسر .... تعتقدون لماذا ؟
السكر سوف يجمع النمل والفلفل سيجعله يعطس ليرتطم راس النملة بالرخام وتموت !!
لم تعجبني هذه الطريقة رغم أن المقصود فيها هو الطرافة
لأني ببساطة لا أحب الإستدراج بالحلاوة التي تخفي وراءها مكرا وغدرا !!!

أما عجبني شخصيا وأنوي تطبيقه هي طريقة جارة أمي عزيزة ( حجية ) التي تقول :
يا بنيتي النمل ما طلع من غيرانه في هالحر واللواهيب إلا علشان يجمع أكل في غيرانه لموسم الشتاء !
وإنتي بدال ما تخلينه يطلع يدور الأكل على كبر بيتج .... روحي لحد غيرانهم ورشي جدامهم الشكر وحاجيهم كأنج تحاجين أوادم وقولي لهم :
السلام عليكم يا نملاتي
هذا أنا جبت لكم الأكل لحد مكانكم .... إخذوا منه اللي تبون وإذا ما كفاكم أجيب لكم زود
وحذريهم
بس هاااااااااااااه ديروا بالكم تطلعون
وردي حذريهم مره ثانية بالكلام وهزي لهم إصبع التشهد قولي لهم :
سمعتوني ؟ إياني وإياكم تطلعون بره .... هذا أنا حذرتكم !
وشوفي إشلون يسمعون الكلام ......... أحسن من عيالج اللي تقول لهم لا تسوون كذا وكذا وما توعين إلا مسوين اللي نهيتيهم عنه !!!
بصراحة راقت لي نصيحتها جدا مع إنها ضحكتني
بعيدا عن عين زوجي حتى لا يتهمني بالجنون ..... سأجرب طريقة خالة حجية وأحاكي النمل ..... لدواعي كثيرة ..... منها إنها طريقة آمنة ولا تقتل النمل وفيها الكثير من المنطقية والمساعدة للنمل ..... ولسبب آخر مهم
يقرقع بقلبي .... ويجعلني أسرع بتجربة الطريقة
كلي فضول أن أعرف من يسمع الكلام ويطيع الأوامر أكثر من الآخر النمل أم عيالي !!!

هناك 31 تعليقًا:

غير معرف يقول...

يا نيكون بتحازين حتي النمل ( :

عزه الله بيبصطون عندج

علمينا عن النتيجه ((:

حياتي هدف مو عبث يقول...

صباح النمل والسكر :)
طريقة أمي وجدتي للقضاء على النمل
رشي كمون على الأرض وخليه يوم
بعدها ما تشوفين نمل ..
بس ديربالج بعض المرات الريحة اتغث
:)
وأنا كنت أكلم لاب توبي يوم علّق
أمي قالت عسى ماشر لطيفة؟
قلت لا يمه ترى أي شي اتكلمينة يسمع
ويحس P:
فأكيد النمل راح يفهم لأنه كائن حي

استمتعي :*

ARTFUL يقول...

صباح الخير

والله اذا ريلج ما شافج حنا بنقول مينونه!!!


هذا الحر وما يسوي عيل النمل يغازل، والحين بتروح تسولف معاه


الحمدالله على نعمة العقل يالله ثبت عقولنا

p;

استانست من البوست تحياتي

~ هند ~ يقول...

:)
:)
:)
:)
:)

صبااااااااااح الخير ،،

رزنامــــــة يقول...

اقتباس من كلامك ""صغاري لجأوا لحيلة إخفاء بقايا أكياس الشوكولاته والآيسكريم
منذ أن إكتشفوا إني أطيح على سرقاتهم الصغيرة من سلة المهملات .... من يومها صاروا يخفون أكياس الحلويات بعيدا عن أماكنها المعتاده !""

لوووووووووووول
لوووووووووووول

بوست اليوم فانتاستك فعلا خفيف دم ويعوض الانقطاع الوقتي

بانتظار مفعول المداهن مع النمل
جود ينفع ونطبقها في البيت

ومنكم نستفيد لووول

Deema يقول...

كل سنة و انتي طيبة..

و شحلو اللووك

بس نيكون شيلي عنوان مدونتج اللي انتي كاتبته على شان ما تكون كلمة دار عزيزة مكررة لانها كاتبتة بالصورة

:) يوم سعيد

نون النساء يقول...

عادي يا نيكون
أنا احاجي الزرع هههههههههه



والله هقوتي يا بنت عزيزة ان لا عيالج ولا النمل راح يسمعون الكلام ..



اكو شغله مادري من وين سامعتها
ان النمل ينحط له كمون بس مادري صج لو لا


احنا بالبيت بعد ما نرش النمل.. مادري حرام يكسرون بخاطري ههههههههه
مرات حتى وانا ابي اطلع ولا شي اقعد اطالع ريولي وين تدوس عشان لا ادوسهم ..

Mohammad Al-Yousifi يقول...

و ليش هالدوخة

حطي جدام حفرتهم صورة واحد من نوابنا الافاضل اراهنج يقبون من البيت خير شر

NewQ8 Bride يقول...

صباح الخير :)

واااي صج صج النمل ما ينذبحون :)

يالله جربي الطريقة و عطينا النتيجة

Purplecious يقول...

اذا تبين صج لووك يديد عندي و انا ام هندي


الصوره نفسها و الالوان نفسها شنو اليديد بالموضوع؟؟؟


راح ادزلج تصاميم عشان اعرف ذوقج و اسويلج من عيوني :**



و على النمل انا كنت مثلج ما أحب اقتلهم .. اخرعهم اي .. انفخ عليهم اي.. بس ما اذبحهم الا اذا مصخوها


كل ما اتذكر قصتهم مع سيدنا سليمان اقول سبحان الله!

enter-q8 يقول...

عند غيرانهم حطي خيار
و اذا ما تبين تعورين راسك
انا مجربها بالحوش الداخلي اللي الكل يشتكي منه لأني زارع فيه مزروعاتي الخاصة
فالكل مطنش حتى الخدامة اللي قررت تسافر معاهم
بما اني عزوبي اخذيها طال عمرك فلفل اسود مو مطحون و نثريه مع النفتالين بزوايا البيت و هالشي ما انصحك فيه الا اذا كنتم مسافرين او الاماكن اللي تخزنين فيها وما عليها حركة
الخلاصة
بودر بايجون و لاتعورين راسك

star يقول...

النمل قثيث .. شوفي ترا سالفه أنك تكلمين النمل أنا بعد سامعتها بس بدون رشاوي وتقديم المؤنه الشتوية لهم .. اعرف وحده تقول أعلي النبرة يعني معصبة و أهددهم ثلاث مرات طلعوا من بيتي لا تشوفون شي ما يسركم تقول ويختفون لانهم مسالمين و يخافون من التهديد .. عجايب غرايب

bokeh of magic * يقول...

لووووووول , أحسـن طريقه عجبتني :)
انزين انتي جـربيها و قوليلنا النتيجه

Fishah يقول...

والله يمكن تكون سالفة الحجيه صج .. ترا سوالف اول نستفيد منها :)

بس اختاري وقت حتى الخادمه لا تطيح عليج وانتي تهددينهم هههههههههههه

عاد انا حاسه تهديدج ذرب وحنون :)

fatto يقول...

اتصدقين عمي يحاجي النمل وقولهم دشو مكانكم وعلى قولته يروحون .. بس انا ماصدقته .. قلت النمل تفهمنه !!!
انا ماجربت .. لأن احس شكلي راح يضحك وانه اكلم النمل .. واخاف احد يطيح علي وقول عني مسكينه استخفت لووول


بس مدام بتجربين الطريقه .. تكفين اذا فادت قوليلنه :) ناطرين حوارج مع النمل :) good luck

غير معرف يقول...

نوعيلهم الأكل علشان الدايت

غير معرف يقول...

LOOOOOOOOOOOOOOOOOOOOOL
I'll wait for the result. just keep up updated.

Altaf

Yin مدام يقول...

تعالي شوفي الإبداع في اكتشاف مخبأ أكياس الكاوكاو عند ولدي ... عبقريتهم مضيعينها على سوالف عجيبة :))


بانتظار قراءة الحوار مع النمل والنتائج :))



مقال ممتع

يعطيج العافية
:)

مركبنا يقول...

ينكون


سلمي لي على اسيل وحبي لي اياها وقولي لها مركبنا تسلم عليج وتقول ما قصرتي ...

انج وصلتي لنا نيكون العجيبه

ربي يحفظكم ويخليكم لبعض

ايه يا نيكون ...

غير التمدد على الارض احيانا اشتهي مشي حافيه على الرخام متعه من بعد الحر (=

سلمي لي بعد على نملكم وقوي لهم اذا ساز لهم العرض خل يكلمون نملنا واحنا حاضرين

جبريت يقول...

والله العظيم فطست من الظحك حسستيني انه النمل مثل البشر مو يا اخيتي العزيزه النمل اذا شاف جذي راح يتكاثر وتخربين طبعه الي خلق علشانه البحث والتحري خليه يتحرى عن عيالج مو احسن؟؟

أتيت متاخرة يقول...

آنه بنتي اسميها النملة >>>> وربي لو اخش الشكر في عيوني تطلعه

وعلى سالفة التخشش في القنفات

بلاااااوي اهيا بقايا اكل وقراطيس وكاكاو منسي والنمل ذابحنننننننننني
معشش في بيتي

شوفاااااااااي بحاول احاجيهم من بعيد لبعيد جود يفهمون

Sn3a يقول...

انا اجتلهم بالماي الحار;p
اكرههم شسوي

Daggero يقول...

Nikon8

لحقى

النمل أكل أسم مدونتك من قائمة الصفاة

safatblog

فريج سعود يقول...

ودج بعد ما تكلمينهم تشوفينهم يبوسون ايدهم ويحطونها على جبهتهم ويقولون

الحمدلله والشكر

Purplecious يقول...

عدل عدل عدل

اش هالكشخة اش هالزيييييييين

ملبووووووووس العافية

و حياج الله أي وقت بالعكس ما تعبتيني مشاءالله عليج كنتي تلميذة شاطره

:)))))))

Nikon 8 يقول...

غير معرف
:)
كل من له نصيب حتى النمل :))



:::::::::::

حياتي هدف مو عبث

راح أجرب طريقة الكمون بغار نمل والسكر بغار ثاني وأشوف من الأفضل :))


:::::::::::

ARTFUL

حياك الله
لو أدري إنك بتعلق علي مثل زوجنا المصون جان ما علمتك :)
أثاريكم يا الرياييل طريقة تفكيركم وحده !!

:::::::::

~ هند ~

مسا الأنوار يا الغالية :))

::::::::

رزنامـــــة

أكيد راح أعلمكم بعد ما أجربها
حياك الله :))

Nikon 8 يقول...

Deema
يا هلا بديمة :)
سوينا مثل ما تبين .... تعبت على ما طلعت المدونة جذيه وتعبت معاي بيربل الله يعافيها :)

::::::::

نون النساء

أنا مثلج إحساسي وايد مرهف مع النمل
وغبرة إذا عيالي والنمل ما يسمعون الكلام !
راح يطلع أبوهم هو الوحيد اللي يسمع كلامي !!

::::::::

ma6goog

لووووووووووووووووول
وحياك الله بأول مشاركة في التعليق :))

:::::::

New Bride

مسا الخيرات
أكيد راح نعلمج بالنتايج :))

::::::::

Enter-Q8
بودرة البايجون وايد فتاكة وموتتهم بالحال وصاروا نقط .... كسروا خاطري
الخيار ولفلفل الأسود مع النفتالين راح نجربه إنشاء الله
شكرا على النصايح القيمة :))

::::::::

star
طريقتج بعد طلعت أرخص من طريقتي وأنظف .... راح أجربها :))
شكرا :)

::::::

*Being One

خلكم متابعينا وراح تعرفون بالنتايج
حياكم الله :))

Nikon 8 يقول...

Fishah

ههههههههههههههههه
ذكرتيني بالخدامة ما حسبت حسابها!
الله يذكرج بالشهادة :)

::::::::

fatto
زين اللي عرفت إن في ناس فعلا كلمت النمل من قبل .... شي حلو
النتيجة راح نعلمكم فيها :)

::::::::

غير معرف 2
لو أضمن يحبون شي أكثر من السكر جان حطيته لهم !
عموما إقتراح في محله :)

:::::::

ألطاف

أفا عليج تامرين أمر :)

::::::::

Yin مدام

الله يعافيج :)
النتايج بنقول لكم عنها إنشاء الله
طلع ولدج عنده نفس هواية عيالي :))

::::::::
مركبنا

الله يسلمج .... راح نوصل السلام إنشاء الله :)
والمشي على الرخام البارد ممتع لكنه يجيب لي عوار بلاعيم تصدقين ؟

:::::::::


عنيف

والله فكرة ليش لأ !
يا هلا فيك :))

::::::::

Nikon 8 يقول...

أتيت متاخرة

تصدقين نبهتيني حق شغله ؟
أخاف عيالي ينافسون النمل على السكر اللي بحطه لهم ؟
هذا اللي ما خطر على بالي :)

::::::::

Sn3a

لا يا سنعة هذا عنف على كائنات صغيرة لا حول ولا قوة لهم ؟
حاولي تحبينهم :)

:::::::
Daggero

صج خرعتني وخليتني ألحق وشفتها صافة بالدور مع زمايلها وزميلاتها مثل طابور النمل :)

:::::::
فريج سعود
لووووووووووووووول
لوووووووووووووووووووووول
لوووووووووووووووووووووووووول
إن صارت بقول لهم كان معاكم برنامج الكاميرا الخفية :))

::::::::

Purplecious
يا هلا بالمنقذة
وشكرا على التعب والمجهود:))

may يقول...

اول شي مبروك اللوك الجديد ، وايد حلو ويشرح النفس.. ومع كتاباتج المميزة صار أحلى وأحلى..

ثاني شي .. عجبتني رقتج مع النمل ...
ياحلوج والله.. ما استغرب هالشي منج :)

Nikon 8 يقول...

مـي
يا هلا بالزميلة العزيزة مي
وتصدقين الرقة مفعولها أقوى من العنف :)
يا هلا فيج ضيفة عزيزة في دار عزيزة :)