الجمعة، 28 أغسطس 2009

إنطباع غلط

قبل سنتين تقريبا ( قبل الأزمة مع الدانمرك ) حضرت مؤتمرا هندسيا في الدانمرك مع زميلة لي في العمل
الحضور العربي كان قليلا جدا ولا يصل إلى عشرة أشخاص .... جميعهم ذكور عداي أنا وزميلتي !
منظمو الحفل كانوا غاية في الدقة والإحترام لدرجة أنهم سألونا قبل الدخول للقاعة في يوم الإفتتاح إن كانت هناك أصنافا من الطعام محظورة علينا لأسباب صحية أو دينية أو لا نستسيغها ؟
أجبنا طبعا أننا نريد أكلا حلالا وخالي من الكحول لأننا مسلمين
كنت وزميلتي خلال أول ثلاث أيام بالمؤتمر مأخوذتان بحسن الترتيب والتنسيق للمؤتمر .... فلا شيء متروك للصدف ...كل شيء محسوب حسابه ... حتى الشمسية لجوهم الماطر كانت من ضمن محتويات الحقيبة الهدية مع الأوراق والأقلام وأجندة المؤتمر ... لذا لم ننتبه لأخينا الخليجي الوحيد الذي يحضر للمؤتمر معنا ولم نستغرب عدم سلامه علينا أو عرضه لتقديم خدماته ومساعدته إن إحتجنا لشيء ..... ولو من باب المجاملة ؟
وبالذات وإن باقي العرب توافدوا علينا تباعا للسلام وتعريف أنفسهم ... أما غير العرب فكانوا حريصين على إلتقاط الصور التذكارية معنا !
وعرفنا لاحقا أن سر إعجاب الأجانب بنا يكمن في لون بشرتنا السمراء وشعرنا الأسود وعيوننا الداكنة !!!
الحضور كان يغلب عليه الحضور الإسكندنافي ذوي البشرة الفاتحة جدا والشعر الأشقر الفاتح .... والملفت للنظر هو أدب وغنى سكان تلك الدول !
كنا مجموعة كبيرة وننتقل بواسطة الباصات من مكان لآخر .... فكنا نحن الأقلية العرب نستقل نفس الباص ونتفقد بعضنا البعض ما عدا أخونا الخليجي الذي يبتعد عنا نحن الإثنتين بالذات !
لم نستغرب منه هذا التصرف لأسباب إجتماعية نتميز بها في الخليج ونتفهمها جيدا
إلى أن جمعته معنا طاولة الطعام الحلال في اليوم الأخير للمؤتمر ... وعرفنا السبب ؟
حفل الختام كان في مطعم قريب من حديقة تيفولي جمعونا نحن العرب المسلمين على طاولة مستديرة واحدة وصرنا كحلقة ملتفة حول المائدة
من عادة الدانمركيين أن يكون الجلوس في المطاعم لمدة طويل تصل لأربع ساعات أحيانا !!
يتناولون الطعام على مهل ويتحادثون وفاصل زمني يفصل كل كورس طعام عن الآخر ... لا شيء يدعو للعجلة فلا زبائن تنتظر مغادرتنا لتحل مكاننا .... ولا خدمة ( فوقة فوقة ) حتى نغادر بسرعة كسبا لزبون آخر .... ولا نأكل كأننا ( ملحوقين ) كما هي عادتنا !
في البداية كان يراقب حديثنا مع إخواننا العرب .... والوضع كان هم يسألوننا عن أحوالنا في الكويت ونحن نجيب ... كنا سعيدتان بلعب دور السفيرات
أما هو فظل ساكتا يستمع ويراقب ويأكل ويحادث أحيانا جاره الآخر دون أن يتدخل بالحديث معنا ...لم نرغب في إحراجه والحديث معه ... ربما هو من النوع الذي لا يكلم الإناث ؟
أمامنا وقت طويل نمضيه معا حول الطاولة الحلال فكان لا بد من كلام أخينا الخليجي معنا وخاصة وإن نصيبه أن يكون جارا لزميلتي على المائدة !
بعد كورس المقبلات سألنا أخونا الخليجي بدون مقدمات : أنتم متأكدين إنكم كويتيات ؟
نحن بإستغراب : نعم ... من وين جاك الإيحاء بأننا غير كويتيات ؟
هو : طريقة لبسكم .. مكياجكم ... كلامكم .... ما تبين إنكم كويتيات ؟
نحن بإستغراب : إحنا كذيه كما ترانا داخل الكويت وخارجها ... وين شفت كويتيات من قبل ؟ ومن وين جاك هذا الإنطباع ؟
هو : إنتم غير عن اللي نشوفهم بمسلسلاتكم ؟
نحن : ومن قال لك إن مسلسلاتنا تصورنا كما نحن ؟
هو : كيف ما تصوركم مثل ما إنتو ؟ وكتاب المسلسلات يوم سألت عنهم قالوا لي إنهم كويتيين !
صمتنا من صدمة الإجابة .... الحديث كان جماعي وعلى مسمع ومرأى من باقي الأخوة العرب
سألناه : شنهي فكرتك عن البيت الكويتي ؟
وليتنا ما سألنا !
هو : الأب سكير راعي حريم ... والولد صاحب قعدات وتافه والحياة عنده سيارات فخمة وكل همه يطلع فلوس من أبوه .... وبناتكم كلهم يكلمون شباب بالتلفونات وبعضهم بويات وبعضهم يروحون شقق للشباب ويسكرون معاهم ويسوون المنكر .... والأمهات تتستر على فساد بناتها وأولادها ويدخنون السجاير بالصالونات وكل همها إن ريلها ما يتزوج عليها وتدور على أحد يسوي لها عمل تسحر رجلها فيه وطول نهارها كياجها ترس وجها وتكشخ بدراعة يوصل طول كمها للقاع ... أتعجب وأنا أشوفها وأقول هذي إشلون تجلس ؟ وإلا بتنجب الغدا ؟ وإلا بتشتغل بالبيت ؟
اللهم ساتر بيوتكم كلها فساد بفساد ..... شخصيات معقدة .... خمر ومخدرات وطراقات وصراخ ورقص خليطي الحريم مع الرياجيل وكلام هابط ولغة تخاطب بين الأهل خالية من الإحترام .... ما في أحد سنع في بيوتكم إلا الخبلان المجانين والمعاقين !
هذا اللي نشوفه عنكم في مسلسلاتكم !
وتساءل بضيق :
وين راحوا شخصيات درب الزلق وخالتي قماشة وأم عليوي وغيرها من شخصيات المسلسلات والمسرحيات اللي حبيناها وحبيناكم منها ؟
نحن : بصراحة كلامك صح .... لكن هذي المسلسلات ما تصورنا ....وفيها الكثير من المبالغات لزوم جذب المشاهدين والربح المادي ..... حنا مجتمع حالنا حالكم فينا الطيب وفينا الخبيث ..... وفينا الآفات اللي ذكرتها ولكنها ليست صفة عامة لكل المجتمع .... وليست بهذا التركز المغيث ... بيوتنا غير جذيه تماما ... وهذا إنتا شفتنا تنقد علينا بشي ؟
هو : حشا والله .... وقاعد أتفكر بيني وبين نفسي معقولة هذيله كويتيات ؟ بالأول كنت أتجنبكم وقاعد قد ما أقدر أهمل وجودكم ... وحتى المشكلة اللي صارت لكم بأول يوم مؤتمر ( جهة عملنا تأخرت بدفع رسوم المؤتمر ) كنت أدري عنها وتعمدت إني ما أساعدكم ... قلت قربي منكم شبهة !
ولكن سلوككم المحترم وتعاملكم مع زملائكم العرب والأجانب وحرصكم على توفر مكان لأداء الصلاة وإجابتكم لمنظمي المؤتمر أول ما سجلتوا بعدم تواجد أي محرمات على مائدتكم .... خلتني غصب أراقبكم وأنبهر من أخلاقكم العالية .... وخلتني أنا وغيري نقلدكم ونطلب طعام حلال مثلكم مع إني عمري ما شرطت هالشرط في المؤتمرات اللي أحضرها ... أنقي السمك والخضار وأترك الباقي وأمشي حالي
سكت قليلا ونحن بحالة صدمة .... ثم أكمل :
كنت أقول بنفسي يا ساتر منهم الكويتيات داخل بلدهم وبين أهلهم ولا أحد رادهم عن المناكر ... عيل وش يسوون بره بلدهم وبدون رقابة أهلهم ؟
لكن إن تبون الحق ما شفت إلا كل شي زين منكم
طبعا صعقنا من سماع هذا الإنطباع عن البيت الكويتي على مستوى الخليج ومع إنه مدحنا لكن ضاق خلقنا على الإنطباع السيء عن بلدنا وعيال بلدنا بالذات !!!
وكلامه فسر لنا سر تصرفاته اللي حنا بالأساس مو ماخذين بالنا منها !
مراقبته من بعيد لبعيد لنا كم يوم كانت كفيلة بإحداث خلخلة بوجهة نظرة عن الكويتيات بالذات وبدون أدنى مجهود منا .... كنا نتصرف على طبيعتنا بدون تعمد لترك إنطباع معين لغيرنا !
مهما قلنا ومدحنا أنفسنا ما راح نمحي صورة المسلسلات عن عقله لذا رأينا أن نوجه له دعوة هو وعائلته لزيارة الكويت ويحل ضيفا علينا نحن الثنتين ليرى البيت الكويتي على حقيقته بعينه وقلبه .... شكرنا ورفض الدعوة بلطف وقال :
أنا مصدقكم .... لكن من سيقنع آلاف المشاهدين غيري ؟
تضايقت جدا لأني لم أستطع أن أجيب على سؤاله حول لماذا الكاتب الكويتي أو المنتج الكويتي يقبل هذا المستوى من المسلسلات بحق المجتمع الكويتي ؟
لا ندعي فضيلة المجتمع الكويتي .... لكننا نرفض أن تلصق بنا هذا الكم من الصفات وبصورة مركزة في العائلة الواحدة ؟
فهل يعقل أن تكون كل الشخصيات في المسلسل شاذة ومنحرفة ؟
وما يبعث على المرارة بالنفس أن تلك المسلسلات تعرض في الشهر الفضيل بالذات ...شهر الطاعة والعبادة
و28 حلقة فساد وكلام بايخ يحفظونه الأطفال بغير فهم وتأتي التوبة مسلوقة ومالقة وما لها طعم وغير مقنعة بالمرة في آخر حلقة .... ولا تخرج عن الإحتمالات التالية إما سجن أوجلطة أو مرض قاتل مثل السرطان أو الكلية !!!
ونحن في هذا الشهر الكريم .... ومع زحمة المسلسلات .... مع إنها أرحم بكثير من مسلسلات السنوات الماضية
إلا أني تذكرت ما حصل لي شخصيا ورأيت ذكره لكم
لأنه جعلني أتحلطم أنا وزميلتي طوال رحلة العودة للكويت !
ولا حول ولا قوة إلا بالله

هناك 20 تعليقًا:

ma6goog يقول...

لأخينا الخليجي الوحيد الذي يحضر للمؤتمر معنا ولم نستغرب عدم سلامه علينا أو عرضه لتقديم خدماته ومساعدته

مو البنات ثقل دم , ان كلمتهم و سلمت عليهم عبالهم ميت عليهم و تبي تغازلهم

:)

عموما اي شخص يحكم من مسلسلات و افلام اعتبره جاهل

reemas يقول...

عيزنا و احنا نتحلطم و ننتقد و نسب المسلسلات الخليجية
و مؤلفينها و مخرجينها و ممثلينها و ممثلاتها و القنوات اللي تعرضها
ندري ان هذي هي النتيجه
و المشكله مو بس في انطباع هذا الشخص
المشكله ان عيالنا صار عندهم نفس الانطباع
صار الشاب حاط في باله ان البنت الكويتيه صيده سهله
عشان جذي قمنا نشوف الوقاحه و الجرأه في المغازل و جدام الكل
و غيره و غيره
انا عن نفسي قاطعت مشاهدة هذه المسلسلات الهابطه
اللي ما تحترمني و لا تحترم عقلي

لكن للاسف جم واحد قاطع

تحياتي لج سفيرتنا العزيزه
بيض الله ويهج

Enter-Q8 يقول...

الله ياخذك يا فجر

moodless يقول...

اذا كان المنتج تاجر (يبحث عن فائدة مادية)
وطاقم العمل غير كويتيين يحتاجون للعمل لأكل عيشهم
والممثلين غير كويتيين
شلون نبي احد يوقف قبل ان يصور البرنامج ويقول ان انعكاس البرنامج على صورة هذا المجتمع سيكون سيء سيء سيء؟

الكل اصبحوا تجار.. يعملون بطريقة انا ومن بعدي الطوفان
مو مهم النتيجة طالما ان هناك مبلغ سيدخل في جيبي
بالاضافة الى جهل وقلة ادب القائمين على القنوات التي تشتري وتمول هذه المسلسلات
..
مع الملاحظة انه بعد كل شهر رمضان تبدأ الصحف في موجة انتقاد لاذعة للمسلسلات.. ولكن من ان يقترب رمضان جديد حتى تتسابق في تغطية عدد من المسلسلات والتسويق لها
.
الشق عود.. يحتاج حكومة فيها وزارة اعلام فيها ادارة رقابة تعرف تقيم الاعمال
..
في البحرين اوقف مسلسل من الحلقة الثانية او الثالثة بعد عرضه لأن مستواه يقارب مستوى مسلسلات الانحطاط اللي عندنا!
نحتاج مثل هالقرارات

دمتِ بود

مركبنا يقول...

تيكون

ايه القصة هذي تذبح

لي صارت معاج بالحرم
!!!!!!!!!!!!!!!!!!!

اذكر السنة الة فاتت عيدنا في المدينه

ابيه عوار قلب كل شوي اغير مكاني
لان الناس تقول انتي كويتية زي المسلسلات وهات ساعه شرح وبعدها تقومين وبعينج الدمعه )=

حسبي الله عليهم شلون خربوا سمعتنا

لاوحدة من اهلنا من سعودية ما يجونا على طول قعدت عندنا 15 يوم بعدها قالت مو معقوله الي اشوفة وين بنات المسلسلات !

معقولة كل وحدة سيرتها وموبايلها عندها ورايحة ورادة وماعندها سوالف !

اخاف خاشين عني !

انطقت ! وانطقعت معنويا (=

كبرياء وردة يقول...

انا اشهد

حتى انا اتضايق من المسلسلات لان هذا شي يمس كثير من صديقاتي وخواتي :(

Daddy's Girl يقول...

إنزين هالأخ الخليجي لا يكون يعني ياي من يوتوبيا و إحنا ما ندري؟

الريال الخليجي متشابه في كافة الخليج... ربع و سياسير و حالة و يتزوجون 3 و 4

لكن إحنا مجتمعنا صار فاسد و إهو مجتمعه مثالي و السبة الحريم...؟

و حريمهم ما يتلبسون و يكشخون بالدراريع؟؟؟

ما عنده سالفة! و نص هالأبني اللي بالمسلسلات خليجيات أصلا! و هم انا ماني شايفة انه الكم مسلسل اللي يطلعونه بالسنة راقي و ونيس و القصة عن مجموعة من الناس أشباه الملائكة طايحة على السجادة و اتصلي!!!!

و الله بط جبدي...! يا مال الزناط!

و على العموم انا السنة مو عاجبني التلفزيون بتاتا... اللهم الهدامة بس! غير جذي ما يسوى من يقلب التلفيزيون ...

om comment kuwait يقول...

واي حدج حريتيني هذا تفكيرهم عنا !!
جذي احنا اب نظرهم
بس ما ينلامون الحلقات شي مهول من كل الل قاله
----------
بس مثل ما اتفضلتي الغلط بالكاتب الكويتي اللي يحط كل استثناءات المجتمع في بيت واحد و كأن الله سبحانه ناقم عليهم
--------------
انا اعتقد يجب تفعيل الدور الرقابي للمسلسلات الكويتية مو بس اللي يخدش الحياء هم اللي يخدش النظر من كثر الالوان اللي في ويهم حتى لما يقمون مكياج !!!!!!!!!!!

الله يجزيج خير انشاء الله انج رديتي عليه

t.q8 يقول...

حطيتي ايدج على الجرح
والي يضحك بالموضوع تشوفين مجمعاتنا تارسينها اماراتين ولي سالتيهم شجايبكم
يقولج جاين نغازل لان انتو بناتكم عادي!!

وااااي حره

esTeKaNa يقول...

تدرين وين المشكلة؟
اذا ما كان عند ابنائنا وبناتنا هذا الاحساس بالمسؤولية بالخارج ،والقناعه بأنهم سفراء وطنهم
انتي وزميلتك مثال مشرف
عسى ربي يحفظكم ويبيض ويوهكم يارب
بس غيركم للأسف يرسخ الفكرة اكثر دون ادنى احساس بالمسؤولية

يعطيج العافيه على هالبوست
رائعه دائما في توصيل افكارك الله يحفظك

عنيف يقول...

انتي صادفيه بره الكويت انا صادفت منه العشرات بالكويت من الخليجيين عادي شنو المشكله اشوه بسمعة بنات الكوي واترس جيبي بالرقص على شرف الكويتيات

Sn3a يقول...

هذي نتيجه المسلسلات

والله كلامه مع اني عارفته
الا ان يعور قلبي

الاعلام اداه قويه وصارت جزء من ثقافه الدول
حتى اللي مايقتنع باللي يشوفه
ماراح يقدر يبني اراء صحيحه

الحل شنو؟
مانقدر نمنع مسلسلات لانها من حريه الراي
ولا بنقدر نسكر قنوات
الكتاب يحتاجون قرصه اذن
مانبي عالم مثالي
نبي بيت كويتي بمشاكله وبحلوله

مو مثل ماقلتي 28 حلقه خرابيط واخر شي توبه ماتقنع حتى الياهل

Daggero يقول...

Nikon8

والأخ مهندس ورايح الدنمارك لحضور دورة فى الهندسة وهذا مستوى تفكيره ويراقب الوفد الكويتى من بعيد لبعيد .يامعود أخذ شهادتك ونقعها .

ودام أن المسلسلات الكويتية فيها كل هالبلاوى حضرة المهندس الفاهم قاعد مجابل المسلسلات ليش. لايصدق المسلسلات التركية بعد والمكسيكية

للعلم يالحبيب أخر واحد تعرض للعوائل الكويتية هو أصديم فى غزو الكويت ونهايته تعلق مثل الديرفه.

و يقولون ليش العرب متخلفين أذا هذا مستوى المهندسين فكيف حال غيرهم

غير معرف يقول...

وانا اقول خل باجي رياييل دول الخليج يشوفون بناتهم بره شسوون وشنو يلبسون والخ الخ قبل لا يتكلمون على الكويتيات ..ع الاقل احنا شايفين خير وبديرتنا وبره حالنا واحد لبسنا واحد ما نقلب الموجه ...مو اهما مسترين بديرهم وبره مشافيح على الفجور والتفسخ .....طبعا فاهميني وماراح اعمم على كل البنات الخليجيات التعميم جهل ..

والصراحه ملينا احنا يالكويتيات من مسلسل الاستشراف عند الرياييل الكويتين
وبشكل عام
انا اشوف الخليجين وايد شادين حيلهم ع الكويتيات وحتى رياييل الكويت انفسهم شادين حيلهم على البنت الكويتيه ومع اجنبيه وغيرها لو دايره على حل شعرها واااااي حلو على قلبه خياسها وعفنها وحتى بعد انعدام عذريتها من مراهقتها ..
ماقول الا ما...على هيك رجال نافشين الريش على ناس وناس
اما بالنسبه للمتخلف الخليجي اللي معاكم في المؤتمر
فحرام في هاالريال الجاهل "ولوان يحمل اي مسمى علمي "اللي رايح اخر الدنيا الدنمارك ومشارك بمؤتمر علمي هندسي يصدر احكام على الشعوب والتاس من خلال فلم او مسلسل تلفزيوني
عقووووووول لو تروح القمر ترد مثل ما اهيا على الخيم والبعارين اصلها مافي مخ ..ويقولون ليش احنا متخلفين شوفوا بس نظرته وتعرفون طريقة تفكيره جاههههههل حفيد ابوجهل ..

ويا اخ مطقوق مو كلنا تفكيرنا جذي يالبنات لا تعمم يا مثقف ..ومدام قلتها عيل يمكن هذا الصج وموجود بعقولكم كل من سلم فيكم يال الرياييل علينا يا البنات يبي يغازلنا ...حاله والله حاله شقيتو الكويتيات شق مو الكويتيه مو امكم اللي يابتكم وربتكم ولا اختكم اللي تحبكم وتخاف عليكم ..نظرتكم لنا للاسف بايخه ولاعزاء لبنات ديرتي

اختكم /كويتيه والنعم بدون لف ودوران

غير معرف يقول...

اختي دار عزيزه اطالبج من باب الذوق واحترام الراي الثاني تحطين رايي اللي كتبته قبل شوي بدون تقطيع لاوصاله و مشكوره

الزين يقول...

نظرة العزيز جارنا الخليجي فيها الكثير من التخلف والجهل والإسفاف في حق الكويتيات

هل كل ما يكتب يصدق!!

وكل ما يعرض على التلفزيون صج!!!

عيل خل نصدق افلام الرعب اللي نشوفها

ونقول ان في فامبايرز

!!

ومهندس بعد

يااا سلام

وبعدين اللي مفكر ان بناتنا رخاص فهذا انعكاس لرايه في بناته

عمري ما سافرت وشفت بنات كويتيات استحي اقول اني منهم

الحمدالله احنا نملك الحرية الكافية لممارسه حياتنا بدون اقنعه ورياء اجتماعي

وما ننتظر تطير الطياره ونقط العبي عشان نحس ان احنا طبيعيات

خلي الكلام والباجي على اللي عايشين دبل لايف

بديرتهم شي

وبره ديرتهم يبي لهم الستر

الأخ خلى كل شي حكم علينا من خلال دراما كويتية فاشله تجارية بحته تسعي للفرقعه الإعلامية لحصد ربح تجاري

استغفر الله


وايد اشتطيت ادري

بس هذا وامثاله مو اكثر من قشور

الله يساعده على طريقة تفكيره

وصباحج خير يارب

ARTFUL يقول...

اول شي البنسبة حق البنات الخليجيات وخاصة الكويتيات

ان سلمت عليهم او ابتسمت بويهم قالوا يبي يغزلنا ويتلصق فينا قطيعه وان طنشتهم قلتوا ما يستحي!!!

ما عرفنالكم

بس على كلام اخينا والله ما ينلام من اللي يشوفه وخاصه اللي ما ايي الكويت وال عنده اهل من الكويت

لاااااااااا صج ما ينلام

!!!

Nikon 8 يقول...

ma6goog
يعتمد على طريقة السلام :)


:::::::::::

reemas

إنتقاء اللي تشوفه وايد مهم
والحمدالله إن الخيارات الجيدة متوفرة أمامنا:)
أما جرأة المغازل العلانية فهذي موضوع ثاني الله يقدرنا على كتابته
تحياتي :)


:::::::::::::::::

Enter-Q8

إذا كنت تعتقد إنها السبب فغيرها للأسف وايدين !!!

::::::::::::::

moodless

ملاحظة إعلانات الصحف عن المسلسلات اللي تذمها ملاحظ ممتازة
وأهلا بك بدار عزيزة :)

:::::::::::::

Nikon 8 يقول...

مركبنا

الله يعينج على هالمواقف
محد يحسدج عليهم
والشكوى لله

:::::::::::::

كبرياء وردة

مقاطعه تلك المسلسلات أحسن حل وبالتالي المحطات ما راح تشتريهم !

::::::::::::::::

Daddy's Girl

يا هلا بالمشتطه :)
ليتج كنتي معاي ... وكلامج صحيح
:))

:::::::::::::

om comment kuwait

اللي يحر إنهم يبررون مسلسلاتهم بجرأة في الطرح !!!

The.One يقول...

اهو معاج حق المسلسلات وايد تبالغ بطريقة عرض والتفنن بقضايا الفساد


بس مومعقولة انه تكون المسلسلات مشاهد مثاليه وخاليه من امورر الفساد


بس صج شي يحز بالنفس الموقف الي صار معاج