الأحد، 30 أغسطس 2009

إفلونزا الخنازير

الخوف من داء إفلونزا الخنازير يجعلنا نصدق كل ما نسمعه ونقراه عن علاجات لهذا المرض
المسجات الهاتفية والإيميلات التي تحثنا على عمل كذا وكذاك لمقاومة إفلونزا الخنازير نصدقها بدون تردد وننشرها لكل أصحابنا المسجلين في هواتفنا وكمبيوتراتنا
والسبب أنها تذيل بكلمة أنشر !
هل هذا الأمر كافي لننشر رسائل مجهولة المصدر وغير متأكدين من جدوى العلاج الذي ننشره ؟
في رمضان هذه السنة صار من الطبيعي أن يقدم شاي الينسون بجانب الشاي الأحمر والشاي الأخضر وشاي النعناع كضيافة !
والسبب هو إنتشار معلومة مقاومته لإنفلونزا الخنازير وإن الدواء المصنوع طبيا لمقاومته مركب أساسا من الينسون !!!
في مجلس دار عزيزة دارت صينية المشروبات الساخنة
وإختارت أم عبدالله ( السيدة البسيطة ) إستكانة شاي الينسون وهي تقول :
هاه أثاري جذيه يقدمونه ؟
الحضور : إيه عيل إنتي شتسوين فيه ؟
أم عبدالله وهي تضحك :
بغيت أروح السوق أول أمسات وقلت السوق فيه ناس وزحمة ولا أعرف من اللي يكح بوجهي أو يعطس جنبي ويعاديني .... فخلني آخذ لي شي ضد الإنفلونزا
وطرت علي المسج اللي جتني علي النقال عن فايدة الينسون فقمت ولهمت خمطة ينسون وحطيتها بحلجي وطلعت من البيت !
الله وكيلكم رحت السوق وخذت اللي أبيه وهالينسون بحلجي ما غير أعلج فيه وأمص مايه
والناس أكلمهم بالإشارة لا ني قادرة أبلع الينسون دفعة وحده أخاف أشرق ولا قادره أتفله جدام الناس !
فصرت أبلع الينسون شوي شوي لين خلص
جود أنا خلصت وأخذت كل أغراضي اللي أبيها .... ويوم ثاني تعالوا شوفوني جرت علي حاله ما غير أهيس شي يقزز بجبدي من هالينسون !
تضحك ونضحك معها
وتتساءل : عاد الله يهديهم يوم إنهم دزوا لنا المسجات جان علمونا سنشوي ؟
الحضور : يا أم عبدالله الحمامات بالسوق إشكثرها ... جان دخلتي واحد وغسلتي حلجج ؟
أم عبدالله : ويه ... قاعدة أدور بالشويخ بين محلات الجملة والمكسرات حق الكركيعان ... ما خبرت عندهم حمامات للحريم .... وأخاف أفتح حلجي جدام الناس والكوده بحلجي ؟
هههههههههههه ( تضحك ) ونضحك معها مرة ثانية

هناك 11 تعليقًا:

chandal/danchal!! يقول...

LOOOOOOOOOOOOOOOOOOOOOOOL


مصائب قوم عند قوم فوائد


محد مستفيد غير الحواي واليمني مال العسل


تعالي شوفينا عقب الفطور... نسطر اليهال ونزقبهم ينسون بالعسل... واعليا غصب يبلعونه


بس محد سوا سواة ام عبدالله... عاد عسى سبعت الينسون قبل لا تلهمده؟

:)

reemas يقول...

والله عيزت و انا اتكلم بموضوع نشر المواضيع و لاكاذيب و الاشاعات بدون التأكد من المصدر
و خصوصا اللي تذيل بكلمة انشر
مو كل شي يبدي بكلمة اثبتت الدراسات و قال العلماء يعني قران
الله عطانا العقل و هذي صحة ناس مو لعب
والله موضوعج بدون مبالغه فيه توارد خواطر
امس انا كاتب موضوع في منتدى عن النقل بدون وعي
و طبعا ما عجبهم كلامي لاني قتلهم بسكم نشر للجهل و رحمو عقولنا
من هالخزعبلات
الله المستعان

غير معرف يقول...

الوعي عندنا بالمقلوب :)

The.One يقول...

ياحلو ام عبدالله وياحلو سواليفهــا
الله يطول بعمرها ويوفق دربها


ضحكتني والله
مشكورة

الزين يقول...

لوووووول


شر البلية ما يضحك

يختج صار هالمرض هاجس ولو تقولين لهم لهموا تراب عشان يعطيكم مناعه سووها اللوادم


يعين الله وربج خير حافظ


صباحج طيب بعد قلبي

enter-q8 يقول...

ممممممممم
الصراحة ودي كل الحريم يطبقون ما سوته ام عبدالله مو بس بالسوق حتى بالبيت

:P

Nikon 8 يقول...

chandal/danchal!!
يا مسا الأنوار :)
عاد ليتنا نستمر ؟
نهب بالشي وتالي ننساه وتتم أكياس الأعشاب لين تنتهي مدتها ؟!!


:::::::::::::::

reemas

يا هلا بالأخ ريماس
الموضوع جدا مهم وحساس ويا ريت تكتب عنها بإسهاب
أكيد إضافتك للموضوع فيها جوانب جيده :)
إكتب ولا يهمك ومهما صار توارد للخواطر يظل الإسلوب غير والزوايا مختلفة
حياك الله يا أخي :)

::::::::::::::

4
ليس الوعي وإنما الفهامية تختلف من شخص لآخر :))

Nikon 8 يقول...

The.One

العفو وشكرا للدعاء لأم عبدالله .... ترا هذا إسمها الصجي حطيته تحية لها ولسوالفها خفيفة الظل :)

::::::::::::::

الزين

أكيد ربنا خير حافظ
لكن اللي يدور على الصحة كلشي يسوي
لووووووووووول
:))

:::::::::::::::::::

Enter-Q8

لووووووووووووووووووول
ههههههههههههههههه
ةالله إنك أخف دم من أم عبدالله :)
ترا أم عبدالله كان من صجها تعتقد هذي الطريقة الصحيحة للإستفادة من الينسون :)
عندي فكرةإذا تبي يصير اللي في بالك حط طريقة إستعمال الينسون مثل ما سوت أم عبدالله كطريقة مجربة للعلاج ودزه إيميلات للناس وآخر شي قول أنشر
مع إرفاق ملاحظة إنه كل ما تم مضغة وبقاءع مده طويلة بالفم كل ما زاردت فايدته !!!

fatto يقول...

لوووووووووووول واي يحليلها اتهبل .. امبين قعدتها ماتنمل .. الله يعطيها الصحه والعافيه

ويعطينه احنه الصحه والعافيه ويبعدنه يارب من هالمرض .. وتشفي كل من حاشه هالمرض .. امين :)

غير معرف يقول...

مساءج سُكر

ومبارك عليج الشهر ( اللي بقى منه :) )

وتقبل الله منا ومنج صالح الأعمال

ويازين سوالفج زينــــاه

وبالنسبه للينسون...وصلني نفس المسج وصراحه انا ماعرف فوائده لأفلونزا الخنازير بس اهو مفيد كلهوم أو كشراب بوايد أشياء منها
أنه يساعد على النوم ووشربه كشراب دافيء قبل النوم يساعد على الاسترخاء ويمنع الأرق
ومفيد لحالات أمراض الصدر من بلغم تكرمين و التهابات..وايد مفيد للكحه
ولحالات ا لبرد.....هذي معلوماتي العنونه:)

ولج أنتي شـــــــــكر بكبر الكره الأرضيه:)


محبتي

Nikon 8 يقول...

fatto

ويعافيج إنشاءالله :)
وأردد معاك آمين إن الله يشافي المرضى
أما أم عبدالله فعفوتها في فهم الأمور هي اللي تخلي سوالفها ما تنمل :)
يسعد صباحج الجميل :))


::::::::::::::::::::

سلة ميوّه

صباحج عسل يا عسل :)
والمبارطة بباقي الشهر علينا وعليج
شكرا للمعلومات المفيدة عن الينسون
راح أنقلها لأم عبدالله وأقول لها إشعليه صار عندج معجبات :))

شكر خاص بطعم الإيمان وطاعة الرحمن :))
تحياتي الحارة