الاثنين، 7 سبتمبر 2009

أبونا ... ورمضان

دخلنا على الثلث الأخير من رمضان أعاده الله علينا عليكم ونحن بأتم حال
بإقترابنا على العشر الأواخر تهدأ قليلا وتيرة حركتنا ( ولويتنا ) اللهم إلا الإستعداد للعيد والمدارس ... الله يعجل بفتح أبوابها .
فلا فائدة من تعطيل المدارس أكثر من ذلك .... وعذر تأجيل الدراسة بحجة سهولة إنتقال إنفلونزا الخنازير بسبب تجمع الطلبة بمكان واحد وسهولة العدوى حجة برأيي واهية والسبب أن التجمعات حاصلة سواء داخل أسوار المدارس أو خارجها .... وما أراه عندي وعند غيري أن معظم الطلبة والتلاميذ يقضون نهارهم نياما وليلهم سهر وقز بالمجمعات وتفرفر على الغبقات والديوانيات !
وتمديد مدة الإجازة لن يمنعنا من الإحتكاك بالمرضى ولن تجعلنا ( نهجع ) ببيوتنا !!!
في الثلث الأخير من رمضان
( أبونا ) أخذ على الصيام وتعود عليه من بعد ما كان يأتي من الدوام ويحط راسه وينام إلى وقت الفطور ... يخاف يتكلم عن لا ينشف ريجه !
ومع تعوده على الصيام والذي يتزامن مع وقت القرقيعان .... يدخل للمطبخ ويحوس بينا ....ويبدي السين والجيم ... وحشر الأنف بكل ما لا يعنيه ....ليش تسوون كذيه ؟ وليش هذا كذيه ؟
يطل بالجدور ... ويشمشم ريحه الطباخ اللي بالفرن ؟
وبعد ما يتطمن على منيو الفطور ... ويلجنا على طلباته
يتحفنا بأوامره الفجائية ....ويسأل : أقول عسى مسوين تشريب باجه اليوم جاري بوفلان صادفته بالمسجد ويقول مشتهي تشريبتنا
طرشوا له على قده يقول لا تكثرون ترى محد ياكلها غيري ... وإذا التشريب راهي طرشوا لجاري بوفلنتان لأنه كان واقف يسمعنا وأخاف إنا صار بخاطره ومستحي يقول !
ثم يتلفت بالمطبخ يدور على شي ... تالي يسأل : اليوم ما سويتوا صب القفشة ؟
أنا : بلى ... بعد شوي بنصبها ... عاد إطلع لا تصبغ فيك ريحة القلاي ؟
هو : أمي تحبها وأبي أودي لها بعد الفطور ....وسهم أمي صبوا عليها شيرة السكرين ( شيرة مرضى السكر )
أنا : حاضر كل شي تبيه بنسويه .... بس واللي يسلمك إطلع من الطبخ لا تدوكرنا ؟
وكله يهون ولا إنه يروح الجمعية بعد الدوام وهو صايم .... يخم الجمعية باللي فيها !
نكون حنا بالبيت مقررين من قبل يوم شنو بنسوي للفطور ويجي أبونا الله يحفظه يعفسنا بطلباته الفجائية وأوامره بإرسال نقصاته لجيرانه من غير ما يعلمنا لنحسب حساب ذلك !
ويخلينا على وقفة وحده بالمطبخ لحد قبل الفطور بوقت قليل ... وما أفطر إلا وأنا بقمة التعب !!!
ويحرني لما يقعد بين أهله ويفتخر إنه خلص ختمتين قرآن ....وإن الصيام هذي السنة سهالة لا عطش ولا جوع !!!
من سنوات العشرة معه عرفت نظامه وتعرفت على جاراتي زوجات أصحاب زوجي في المسجد ... وعرفت شنو يحبون .... فصرت أطرش لحبايبه من جيرانه حسب ذوقهم .
وأعزل صب القفشة لأمة وأخواته إذا عرفت إنه راح يمرهم
أما الجمعية فصرت ما أوصيه على شي يجيبه منها ... وزيادة على ذلك صرت أتصل عليه قبل إنتهاء دوامه وأقول له كل شي متوفر بالبيت تعال بس حق البراد والراحة بالبيت ولا تتعب روحك بهالحر
وبهذه الطريقة صار عندي وقت كافي قبل الفطور هذه السنة أقعد وأقرأ قرآن وأتابع كم برنامج
وقمت أقول مثله لي قعدت جدام أمه وخواته وإخوانه وأقول : رمضان هذه السنه خفيف طار ولا حسينا فيه
عسى الله يتمم علينا صيامنا ويتقبل طاعتنا

هناك 25 تعليقًا:

Яeema يقول...

عجيييييب أبوكم الله يحفظه
هالسنة أنا عشتوا صرت ربه بيت سنعه من بعد ما نتقلت بيت بروحي

المشكلة أبونا ما ياكل هريس و تشريب مثل باجي البيوت
يبي ريوق و إلا سندويتشات

تعالي عابلي
ههههههههههههه

كل يوم مديل بس الله يعافي ربيعي ضبطوني بكتاب المطاحن

و ختمنه صب القفشه عشتوا

أبوي كل يوم يتحلى على أكل بيتنا الله يحفظه

والله السنة صج غير

بس ياحافظ فيريجنا مافيه يهال قرقعون

ولهت على فريجنا القبلي الله يردنا عليه بصحة و عافيه

غير معرف يقول...

الله يتمم عليج هالسنع ويباركلج بريلج وبحياتج الأسرية

يارب أمين

مـغـاتيــــــــــــر يقول...

كل الرياييل برمضان جذي من الفضاوة :-)

وبالنسبة لانفلونزا الخنازير ،
أنا ودي تتأجل المدارس
على الأقل لغاية وصول التطعيم

اللي بيودي عياله أماكن تجمعات بكيفه
بس المدرسة اجباري عالكل

تحياتي :-)

Daddy's Girl يقول...

عندنا و عندكم خير...

الفرق إنه ريلي يبرح بالمطبخ و يغير الأكل على كيفه

عادي تلاقين الشوربة فيها لومية تسبح.... من وين يات؟ و الله انا اشوف انها راح اتصير احلى

و لا المعكرونة فجأة صارت كأنها يص... ليش؟ الأخ إمفرغ من كيفه قوطي معجون طماط و كوشة روسماري و زعتر بو سمسم عليها ....

هذا غير التأليف بطرق الطبخ و الحنة إلى ان تسوين اللي اهو يعتقد انه صح و تكنييك عظيم...على سبيل المثال يعتقد الأخ الشيف رمزي انه خليط الكيك أول لازم تضربينه بييدج لين يصير خليط و عقب ما تتكسر اييدج ذيج الساع اتشغلين المكينة عليه تضربه لأقل من دقيقة! بعد اشحقه انشغلها انخليها زينة احسن! و ان حقرتيه يقعد طول اليوم يتقرطم... ايييه لو ضاربته بييدج أول كان صار أحلى...!

يعني حلاته نايم و ما يقعد إلا حق الفطور!!!!

chandal/danchal!! يقول...

الله يخليلكم ابوكم ويبارك لكم فيه

وعساكم عالقوة ومن عواده



تشريبة باجة!... احب الكراعين بس الباجة استاحش منها!

Nikon 8 يقول...

ريما

يا حلو بيت الحمولة وبيت الأهل ننزل للفطور إيد ورا وإيد جدام :)
مشكلتي ربعنا شعبيين والأكل الثقيل الشعبي علينا والخفيف والفناتق على الجيران
والحمدالله فريجنا فيه يهال لكن مومثل خرشة المناطق القيمة :)
والله يحفظ لكم راعي بيتكم أبوكم
آمين

Nikon 8 يقول...

4

شكرا على الدعاء الجميل ويحفظ لك كل غالي آمين

Sweet Revenge يقول...

الله يخليه لكم ,اهو يطلب بس مايعرف يمكن المجهود المبذول من بعلته الكريمة
الله يعطيج الف عافية :)

Nikon 8 يقول...

مـغـاتيــــــــــــر

:)
بالنسبة للإفلونزا الخنازير فلك وجهة نظر معقولة ... والله خير حافظ
تحياتي :)

Nikon 8 يقول...
أزال المؤلف هذا التعليق.
Nikon 8 يقول...

Daddy's Girl

عاد كل شي ولا التأليف في الأكل على جوع وعدم خبره ... كارثة .. راس مالنا هالوجبة :)
الله يحفظ ابوكم مشكلة أبونا إنه شبع نوم ... ما كو إلا أقول له يروح المشاتل ويزرع حديقتنا :)

Nikon 8 يقول...

chandal/danchal!!
تشريبتنا بس كراعين
وخبرج الراس والعيون واللسانات ماكو لأني ما أتقبلهم .. الله يديم النعمة .

ARTFUL يقول...

هذا طبع من طبايع الرياييل يحبون يدشون المطبخ للتحلطم والتشمشم


D;

بس زين سويتي فيه دام مأخرج

:)

أعادكم الله على أمثاله

Nikon 8 يقول...

ARTFUL
الله يسلمك
عندي إحساس إنك من نفس فصيلة أبونا
:))

Nikon 8 يقول...

Sweet Revenge

بالضبط :)
يشوفني متعدلة وكاشخة للفطور على باله كل شي سهالة !!!
وإن الشغالات كل شي يسونه من كيفهم من غير إشراف
الله يسلمج ويحفظ لكم كل غالي

غير معرف يقول...

مساءك سُكر


الله يخليلكم ابوكم :)


ويخليج لنا بهالطله الحلوه والسوالف الخفيفه...


ودي

Mamloo7a Q8ia يقول...

يحليله ابوكم
عسى الله يحفظه ويخليه لكم

الله يتقبل منا ومنكم صالح الاعمال
ويعوده علينا وعليكم من السالمين

Nikon 8 يقول...

سلة ميوّه

الله يسلمج ويخليج :)
خليت السوالف الخفيفة لرمضان
وبعده إنشاء الله بنرجع للسوالف الثقيلة والقصص .... حياج الله :)

Nikon 8 يقول...

Mamloo7a Q8ia

آمين يا عزيزتي ويحفظ لج كل غالي وعزيز :)

N.Rhythm يقول...

الله يحفظ أبوكم ويطول بعمره

أبوي وقته قبل الفطور صيحه وعفسه امي تعابل بصوب الخدم بصوب
حتى السايق يدخل وينكرف
بس ماكو فايده ><
صوتنا يوصل لراس العاير لووول

عساكم من عواده

المقوع الشرقي يقول...

عسى الله لا يحرمكم من حسه
وغلطة استهلاكية الواحد يشتري وهو يوعان
يخم الاولى والتالى
وتعودونه..بصحة وعافية
تحياتى

ميمة السبيت يقول...

** يحليله الله يخليه و يديمه على راسكم تراه نور البيت ديروا بالكم عليه ..

Nikon 8 يقول...

xname
لووووووووووووول
طلعنا كلنا بالهوا سوا :))

Nikon 8 يقول...

المقوع الشرقي
شكرا عزيزتي وحنا وياك بخير وسلامة
صاير اليوع هو اللي يخلي أبونا يدبي لي الجمعية :))

Nikon 8 يقول...

ميمة السبيت

لا توصين حريص كلشي ولا نور البيت مثل ما قلتي
نعوده إنشاء الله وياك بخير وسلامة :)