الخميس، 29 أكتوبر 2009

كرت البنك

كلمة (عطنا فلوس ) تحتل المرتبة الأولي في قائمة أكره الكلمات عند بعلنا العزيز
راودته فكرة معينة للتخلص من سماع هذه الكلمة .... صارحني بالفكرة ولم أتصور أنه سيطبقها بهذه السرعة !!
في خطوة تحتاج لقلب ( جامد ) على رأي أهل مصر
سلمني بعلنا العزيز كرت بنك مودع بحسابه مبلغ محترم وهو يقول :
هذا الكرت حق مصروفج إنتي واليهال ونثريات البيت ... فيه حساب راهي يكفيج وبزيادة حق خمس شهور ... وإياني وإياج أسمع كلمة عطني فلوس ( ردد الجملة بنبرة تهديد جادة )
طرت من الفرحة وأنا أستلم الكرت ورقمه السري ... دعيت له بطولة العمر والصحة وإن الله يخليه لنا .... بصراحة كنت خجلانة شوي من نفسي لأن لولا (حنتي ) على الفلوس ما كان طلع بهذ الفكرة !
وفور خروجه من البيت إتصلت على البنك وتأكدت من المبلغ المودع في الكرت ... ضميت الكرت لقلبي ووضعته في محفظتي بعناية وأنا أنظر بإستخفاف ( وموقة ) لسطره الكروت المصففة ( على الهبني ) !
أحسست براحة كبيرة من هذا الحل ... فكلمة عطني فلوس أيضا صعبة علي :(
مع إستكانات شاي المغربيات هذه الأيام أهذر على زوجي عن سوالف الدوام وغير الدوام و( أزحلق ) بين السوالف خططي للخروج هذا المساء .... من عادتي إبلاغه بأماكن خروجي مثلما إتفقنا منذ أول يوم زواج .... لكن زيادة طلعاتي لأداء الواجبات الإجتماعية في السنوات الأخيرة تجعلني أخجل أحيانا من نفسي وأخشى سماع ملاحظة مثل ( ترا خفت ريلج على الطلعات هذي الأيام )
وهذا ما يجعلني أذكر ( طلعاتي ) بشكل عابر وسريع !!!
أول إستعمال للكرت كان لدفع فاتورة مطعم تعشيت فيه مع مجموعة من صديقاتي
وأنا أودع صديقاتي عند مواقف السيارات إستلمت رسالة من زوجي المتواجد في الديوانية يقول لي فيها :
هني وعافية
رددت عليه بالله يعافيك
تجاوزت هذا الموقف وأعتبرته بادره لطيفة من زوجي أمام صديقاتي ... مع إنه ما كان يسويها من قبل !
ظللت أستعمل الكرت لمدة شهر تقريبا ... كنت خلالها أستلم أحيانا رسائل من زوجي مثل عسى شريتي الإيدام ؟ أو جبتي الهدوم من المصبغة ؟ أو حسبوني معاكم في أوردر المطعم الياباني وجيبوه معاكم تيك أوي .
بدون أن أشعر بشيء أو أربط بين توقيت سحبي من الكرت ورسائل زوجي المباشرة بعدها !
حتى جاء ذاك اليوم الذي ذهبت فيه لسوق الأقمشة لتنفيذ ما إتفقنا عليه أنا وصديقاتي لبدء مشروع وعمل فساتين ودراريع نسائية إستعدادا لمعرض سوف نقيمة قريبا
لا أعلم لماذا لم أذكر موضوع المشروع لزوجي وأبلغته فقط بخروجي لسوق الأقمشة
إتقفت مع صديقاتي بأنني سأشتري الأقمشة وأحسابهم لاحقا بعد تحول معاشاتهم للبنوك
وطبعا كان في بالي كرت زوجي العزيز ... والنية كانت إيداع المبلغ المصروف من الكرت بعد أن أجمعه من صديقاتي
بدأت جولة التسوق بكل همة يرافقني سائق بيت أهلي وإحدى صديقاتي .... كنت أنتقل من محل لآخر أختار ما أريد وأسلم الكرت للسحب بكل ثقة
السوق كان ياخذ العقل من جمال الأقمشة المعروضة .... بطريقة أثارت خيالي للتصاميم
فكنت أختار بلا تردد... ولما التردد أصلا طالما الفلوس موجودة والقريحة متفتحة على الآخر للشراء والذوق والإبداع !
أما صديقتي فكانت تحثي لأخذ ربطات قماش ( طاقات ) كاملة عندما يعجبها أحد الأقمشة لنحتكره لنا فقط أسوة بكل المصممين المعروفين !
ولولا إن السايق كسر خاطري من ثقل الأقمشة التي كان ينقلها للسيارة ... ولولا أن السيارة إمتلأت بالأقمشة لأكملت جولتي !
رجعت للمنزل وأنا مسرورة بحصيلة الأقمشة .... مسرورة بذوقي .... مسرورة بأننا إنتهينا من أول خطوة في مشروعنا
بينما كنت أفرد الأقمشة وأجرب تناسقها مع بعض ودخل زوجي مبكرا عن كل يوم وملامح خوف وغضب بادية عليه بطريقة طيرت ما كنت أحس به من سرور وأنا بين أكوام الأقمشة ... صرت أقرأ بقلبي كل ما يخطر على بالي من آيات !
رآني فتلاشى خوفه وإستمر غضبه وهو يرى ما لم تصدقه عيناه من كمية أقمشه !
قلبي أنبأني بأن غضبه بسببي .... لا أذكر أنني غلطت بشيء ... إذا ما السبب ؟
سبقني بالكلام وسأل بكل غيض : ما تفهميني إشصاير ... في أحد يحرق الكرت على أقمشة هالكثر ؟
بلعت ريقي وأنا أطلب منه الهدوء والتعوذ من إبليس
عقلي كان يبحث عن السبب بسرعة ....لحظتها فقط فهمت وربطت في بالي ما كان يحدث معي !
مع كل عملية سحب من الكرت كانت تصل رسالة لزوجي تبلغه بالمبلغ المسحوب !!!
ومع ما فعلته في سوق الأقمشة فمن المؤكد أن الرسائل كانت تصل إليه تباعا بطريقة جعلت هاتفه النقال يغرد من سيل الرسائل !!!
تابعت محاولة تخفيف غضب زوجي
ومع شوية كلام حلو وهدوء من ناحيتي وتقبل كل أنواع سهام الكلام اللاذع الغاضب منه
إستطعت بمجهود جبار أن أنزع فتيل غضبه وإفهامه بخطة مشروعنا أنا وصديقاتي
وشرحت له نيتي منذ البداية برد كل المبالغ المسحوبة من أجل هذا المشروع وهذا ما جعلني أشعر بأنه لاداعي لإخباره لأن المبلغ سيسدد خلال أيام
ولم يدر في بالي أن خدمة رسائل الهاتفية للبنوك ممكن أن تفضحني .... غابت عن ذهني تماما
سكت فترة .... زفر بعدها بقوة .... ثم لامني لدعم مكاشفتي له بخططي :
ما تخلين سالفة ما تصفصفينها لي .... ويوم بغيتي تصيرين تاجرة ومصممة بتخشين عليّ ؟!
بصراحة ما كان عندي رد وما أدري إشلون أصلا نسيت أعلمه بإهتماماتي الجديدة!!!
بعدما هدأ تماما
ضحك على السالفة وقال : من كثر الرسايل الربع في الديوانية على بالهم أن بوراشد ( خدمة أخبارية ) عنده أخبار ما توصل لهم .... ولما عرفوا إنها رسايل سحب من الرصيد خافوا وخفت معاهم إشصاير ؟ خل ألحق أكيد الكرت إنباق ؟
أدخل البيت وإلا المدام دافنة روحها بالأقمشة وفجأة بدون إنذار تبي تصير إيلي صعب ؟!
وشايفة شوية رصيد بالكرت وصايره خاشقجي حق صديقاتها !!!
أضحك وياه على الموقف لأن غصين عليّ لازم أضحك
مو وقته أتزعل .... فوق شيني قواة عيني ؟
وهذي نوبة وتوبة أسوي شي من غير علم زوجي
وكرت فيه إنشاءالله إمية دينار أفسفسهم على كيفي وبمزاجي
أبرك لي من رصيد مراقب!

هناك 47 تعليقًا:

مـي يقول...

لووووول
والله دقة!!!
أتخيل ويه الريال وهو بالديوانية وكل شوي يرن عنده مسج..
ويطالع كل شوي مقصوص من الرصيد..
هههههه
أي مشروع أي مصرف..!!

الزين يقول...

ايه والله ابرك من رصيد مراقب

وطلبة الفلوس ترى صعبه من اي كان


:)

صباح الأقمشه

عندي لج سالفة على طاري الأقمشه من افضى بدزها لج ايميل

ما تنقال ها هناااا

:*

غير معرف يقول...

اشدعوااااااا !! شهالتأليف ،،، وليش الريال ما دق تلفون عليج بالاول دامه حس ان الكرت انباق ومادام التلفون كان بايده والمسجات توصله !!! هالمره خيالج الواسع ما كان محبوك خيرها بغيرها (:

سلة ميوّه يقول...

ياصباح البوستات الزينه

ذكرتيني بامي الله يحفظها
مسوية جذي مع خواتي الصغار لما يكونون معانا بالسوق
وانتسوق الإخت اطلع كرتها اطقه على الاولي والتالي وعقب ربع ساعه
الوالدة داقة وبنزره عطيني فلانه...

ماخليتي شي بالسوق؟؟؟
وإلا مرات
شنو هالقطعه اللي ماخذتها من زاره اب 200 جينار يالظالمه
واتفهمها إختي إن كلنا حاسبنا معاها مالنا خلق نصف كذا دور فمرّه وحده:)
وإنتي رايحه عاد من هالسوالف:)


عساج على القوة
وصباحج تفاح أخضر مقطّع مع رشة ملح


حبي

:) وانتي رايحه

نون النساء يقول...

لوووووووووووووووووووووووول
واااي يا عيارة الحريم


:P~



صراحه
ماشاء الله عليج


والله والله لو مكانج ما تآمن على كرت أبدااا...

لو كنت مكانج الكرت بحرقه خلال فترة وقدرها اسبوع

:)


كلش مو عملية مع الفلوس وشغلات المصروف


الشغله اللي بتخليني اتطلق اهيه هاذي هههههههههههههههههههههههههه

Someday يقول...

من فتره حضرت زفاف
اكثر شي لفت انتباهي و ظليت فتره افكر فيه
ان كيف العروس قبلت انها تستقيل من عملها و تترك الكويت عشان تعيش مع زوجها الي عايش بالخارج بحكم طبيعة عمله
في فترات متقطعه من حياتي انا جربت الحياه و العمل بالخارج فماكان هذا سبب الي اثارني
الشي الي فعلا استصعبت اني اتخيله
ان هذا الرجل راح يكون معيلها الوحيد
حياتها راح تتلخص بوجوده و رغبته
قراراتها كلها راح تمر عليه, الفرق ان لو الوضع كان طبيعي كانت مسأله مصارحته شي لها مطلق الحريه فيه
لكن هالوضع بهالتركيبته مالها الخيار
she just have to
إمية دينار أفسفسهم على كيفي وبمزاجي أبرك لي من رصيد مراقب!
I agree bel ten b3d

نون النساء يقول...

@@

والله مادري انا سويت كومنت
ونسيت اذا طقيت ببلش ولا لأ


زهايمر اللهم ياكافي

anonymous the great يقول...

خوش فكرة اى بنك حساب زوجج؟
التمويل يدز كل المسجات الساعه 12 بالليل ولايذكر المكان المصروفة فيه الفلوس :P

Sweet Revenge يقول...

صباح الخيرات والليرات نيكون
ياحلو سوالفج
انت الحين مو قلتي عقب وجبة السمج توبة
تغبين عنه شي
اااااي انسان من النسيان ;)
عسل والله يانيكون
والله يحفظ ابو العيال

bent el deera يقول...

الحمدالله جات سليمه :>
ماحد يقدر يزعل منج اصلا :>

أتيت متاخرة يقول...

وه وه وه
وانتي يا غافلين لكم الله !!!! وتتشرين
وبالاخير انتي تاكلين واهوا يعد الطعام


شوفي حبيبتي .... ريلج ربي يخليه فوق راسج ويحفظه
بس انتي لازم تخبرينه بتحركات الفلوس مادام اهيا من عنده

ذكرتيني بروحي لما ارجع من الشوبنج وآنه شايلة اجياس اجياس ارد بسرعة البيت قبل ردته وآدعسهم بالكبت واقفل عليهم ،، ولا كأني سويت شي

مو أحسن من يشوف المول شايلته بيديني ويقولي بسج تفلسف بالبيزات

رزنامـــــة يقول...

تذكرين متحركة "في قصص الشعوب" لا اعرف ليش تذكرتها وانا اقرأ قصتك اليوم
يمكن لأن خلف كل قصصهم عبرة وحكمة بنهايتها نفس ما حصل معاج

دمتي بخيـــر تحت ظل بعلك الكريم

om comment kuwait يقول...

نيكون

صج سوالج صادوه :)

------------------------
كل الرياييل ما ايحبون هالسالفة و اكره مكان في العالم عندهم السوق ز خاصة اذا امسافرين

يحبون التمشي و بعدين كله تمشي نبي نشتري لووووول

---------------------------
المهم لازم اتعلمينا على المعرض علشان نشتري منه

Fantaseyah يقول...

صااجة طلب الفلوس صعب شوي تنحرجين...

بس الموقف حده موشي اشوه ان عده على خير وزوجج تفهم الوضع....
موفقه :)

ARTFUL يقول...

على هالسالفة مره عطيت مرتي كرت البنك


وكنا مسافرين وكانت قايلتلي بتنزل السوق بتشتري شغله وترجع وهالشغله شفناها البارحه وانا شايف سعرها

قلتلها عليج بالعافيه روحي

وصلني مسج انها شرت دبل السعر تقريبا

لما ردت خذتني بمشراع وميداف شوف البدله ومادري شنهو

جان اقولها وشخذيتي بعد!! اسكتت

والا فقيرة شارتلي هديه من فلوسي كالعاده
p;

وخربت المفاجأة


بس والله ما ينلام

وبيني وبينج الحريم ما ينحط بيدهم الكرت المفروض حق 6 شهور تصرفونه بشهر


!!!

يعطيج العافيه

متى المعرض خنقول حق ام العيال

:)

New Bride يقول...

واااي اينن الموقف

تصدقين كلمة عطنا فلوس صج صعبه تطلع من المره

انا وايد استحي اطلب مع انه وايد سمعت انه من حق المره انها تطلب

مادري انا صارلي 3 سنين ووايد استحي :)

bo shnan يقول...

يا جماعة الخير ذبحني القهر .. بقولكم السالفة و ابيكم تشورون علي .. من الاخر توني طالع من مخفر خيطان الساعة وحدة الظهر يوم الخميس 29-10 بالضبط والله العظيم ان صوت الطق و البجي طالع لي برة المخفر .. قاعدين يعذبون واحد صعيدي و قاعد يصرخ من قمة راسه و يبجي من العوار جنه ياهل .. و الوضع طبيعي بالمخفر .. جنه الموضوع روتيني .. طلعت دقيت على الجمعية الكويتية لحقوق الانسان قتلهم السالفة .. قالولي راح نوصل شكوتك حق رئيس اللجنة و ندز كتاب حق وزارة الداخلية .. اقولهم تعذيب اشكرة جنة سجون صدام يقولي ندز كتاب .. حسيت ان الكويتين كلهم فروخ شارون .. شالحل ؟؟؟

دمعة المقهور يقول...

والله صاجة انا مثلج ما أحب اطلب الفلوس وريلي لاحظ هالشي يعطيني المصروف وبين فترة وفترة لما يسألني كلا اقوله الحمدالله عندي مشكور وماتقصر

:)

واقترح من نفسة انا يحط المصروف كل شهر في حسابي

:)

بس يمة من ابوكم ليش حاط خدمة المسج والمراقبة طلع مو هين وانتي ياحياتي غافلة :)

t.q8 يقول...

ههههه
تصدقين زوجج رايق يحليله لو واحد غيره
جان سوا فيج جريمه

الله يخليكم لبعض

Enter-Q8 يقول...

انا سويتها و حرمت تماما
قلت لها كم يكفيك حددنا المبلغ زدت عليه بعد بس الايداع شهرياما مدى نص الشهر اي نص الشهر الا ربع الشهر
و الا طاله بويهي بتلفوني و تقول و انت راد البيت ييب كذا و كذا و كذا و كذا
انا قلت بحسن نية لأني بره البيت و الوقت متأخر بس الكمية و المبلغ اللي بيندفع محترم مو مهم يمكن نست بنت الحلال
ما دار نص الشهر الا لا بانت فيلجا و عرفت المستخبي على قولتهم و توبه من هالنوبة
اي الفلوس طارت على مشتريات الانترنت
الله يلعن ebay
كرهته و السبب اني انا اللي مدليها عليه

هالحـــــزة يقول...

يمعودة ماتسوي بغي ينخرب بيتج انتي نظامج ما ترتاحين الا لما تسمعين كلمة انتي - طالق - ..

بس صراحة خوووش مغامرة بغيتي تروحين وطي ..

دمتي ودامت مغامراتج

Nikon 8 يقول...

مـي
لو تشوفينه يا مي إشلون إطلعت زيرانه ما تصدقين صج لي قالوا المال عديل الروح وأنا ألعب عمني مو تعبانة فيه :)

Nikon 8 يقول...

الزين
ترا ناطرة السالفة
ترا ما فيني صبر :)
مسا الفل :))

Nikon 8 يقول...

غير معرف 1
موقف وصار لي وأنت حر تصدق من عدمة!
ردود فعل الناس ليست واحدة هناك من يفكر بتسلسل منطقي وهناك من يطق سيارته ويركض مثل بعلي العزيز:)
هذا موقف وليس قصة بولسية أو جريمة محبكة !

Nikon 8 يقول...

سلة ميوّه
يا هلا بالميوة كلها:)
البطاقات صايرة زينة وشينة وزين اللي لقيت فيه ناس عندها كروت مراقبة مثلي
أي بنك هذا اللي يطلع إسم المحل ؟
مسا الفراولة يا فراولة :)

Nikon 8 يقول...

نون النساء

يا مسا الأنوار يا نون :)
عاد تصدقين ماني من المسرفات لكن أحيانا تجيني موجات إسراف الله يستر منها
وحظي إنا صارت هالمرة جدام ريلي ولأول مرة يشوف هالعادة فيني ما كان مصدق .... لوووووووووووول
:))

Nikon 8 يقول...

Someday
يا مسا الأنوار يا الغالية
فعلا أنا مثلك لا أتخيل نفسي بدون إستقلاليتي المادية
شي صعب جدا أطلب فلوس من أي كائن كان
تحياتي :)

Nikon 8 يقول...

anonymous the great
البنك هو بيت التمويل يرسل مسجات فورية حال السحب تبين المبلغ المسحوب ووالوقت والرصيد المتبقي
وعليك مراجعة فرعك بخصوص تأخر وصول المسجات لك ... بصراة وقتها غريب !
والمسج لا يبين محل السحب للأسف ولكن ابونا يعلم إني رايحة لسوق الأقمشة
تحياتي :)

Nikon 8 يقول...

Sweet Revenge
يا هلا باغالية
ما كان عندي نية أخش على ريلي سالفة المشروع لكن ما أدري إشلون راح عن بالي أفاتحه بالموضوع مع إني قايلته إني رايحة للسوق باشترى أقمشة يمكن من كثر ما ني متحمسة للموضوع فكرت إني معلمته !!!
يا مسا العسل :)

Nikon 8 يقول...

bent el deera
حبيبتي إنتي
مشكورة ما قصرتي
الزعل لابد منه وإن كان غير مقصود
المهم النية طيبة
:)
يا هلا فيج يا الغالية:))

Nikon 8 يقول...

أتيت متاخرة
إي والله يا غافلين لكم الله
تصدقين إني حاطة هالخدمة لي ولكن راح عن بالي إن البعل العزيز حاطها لكرت مصروفي !!!
ولا وبعد لوتدرين شنو قايل وهو معصب
هذا ما ذكرته .... ياختي كلام المعصب ما ينتواخذ عليه :)
يا مسا العسل يا عسل :)

Nikon 8 يقول...

رزنامـــــة
يا هلا بأخي الغالي رزنامة
أتابع مدونتك ومواضيعها المفيدة وبالذات موضوع كارلوس غصن والقطار
وما أدري ليش عندي مشكلة بالتعليق على مواضيعك ... مربع التعليق ما يطلع عندي ؟
شكرا على الإطراء
وتأكد يا أخي إن كل ما يحدث لنا في هذه الحياة وراه إستفادة وعلم
:)
حياك الله يا أخي الكريم :))

Nikon 8 يقول...

om comment kuwait
بلا جدال ههههههههههه
أكره سالفة عند الرياييل هي المصروف
ولو ينترك لنا الحبل جان نصرف بلا وجع قلب !!!
تحياتي يا الغالية ومسا الأنوار:))

Nikon 8 يقول...

Fantaseyah
الله يوفقج يا الغالية :)
وزين لقيت وحده تؤيدني إن طلب الفلوس صعب :)
تحياتي يا الغالية ويا هلا فيج عزيزة في دار عزيزة :)

Nikon 8 يقول...

ARTFUL
موقفك صك على موقفي
لووووووووووول
أم شيخة طلعت عكسي بريئة أما أنا فمتلبستي التهمة من راي لي كرياسي
لووووووووول
أما يبنحط بإيدنا كرت فأوافقك ألف بالمية وبالذات لما يكون مو من تعبنا
!!!
إذا تحقق المشروع راح نعلمك
سلامي للمدام :)

Nikon 8 يقول...

New Bride
الحيا طبيعي يا أوخيتي
لكم اللي موطبيعي ( اتكلم عن نفسي ) إن من تنحط بإيدي القلوس أمردها مراد
لووووووووووول
يا مسا الحيا يا عروسة :)

Nikon 8 يقول...

دمعة المقهور
حل زوجك خوش حل مع إن في رياييل تبيها من الله إن المرة ما تطلب لكن
الحمدالله ريلج خوش واحد الله يخليه لكم
أما عن ريلي فأنا عندي الخدمة وهو عنده بعد بس ما تخيلت إنه بيحطها لكرت مصروفنا !!!
محد سهل يا عزيزتي
الله يكون بعونا يا حريم :)
مسا الخيرات :)

Nikon 8 يقول...

t.q8

الموقف نقلته لكم بعد حذف قاذفاته الكلامية
!!!!
الحمد الله ردود فعل أبونا مقبولة نوعا ما عندما يعصب وبعدين له حق اللي سويته زين ما وقف قلبه !!!
الله يسلمج ويحفظ لج كل غالي :)

Nikon 8 يقول...

Enter-Q8

الحمد الله لا زال زوجي مقتنع بضرورة وجود كرت مصروف البيت عندي
وخاصة بعد طمنته وعرف إن المبالغ اللي سحبتها راح ترجع لما تطلع معاشات صديقاتي !
وما لك إلا تسوي مثل ما سوى بعلنا العزيز ... مسجات تعلمك
لوووووووووول
مسا الأنوار :)

Nikon 8 يقول...

هالحـــــزة

يا حافظ فالك ما قبلناه إش هالفال؟
والله هي ما كانت مغامرة كثر ما هي سوء تقدير من ناحيتي تداخلت مع النسيان والعياذ بالله منه
يا هلا فيك يا أخي الكريم :)

Nikon 8 يقول...

bo shnan
أخي الكريم
غذا كان قصدك نشر الموقف فها نحن نشرناه
وإن كان قصدك أتحرك وأسوي لك شي فما بيدي حيلة !!!
عموما كان موقفا إنسانيا مؤثرا شكرا لشعورك .

ولد الديرة يقول...

مسجات الكي نت تقهر

هذا قدرنا

اهيء اهيء اهيء

Nikon 8 يقول...

ولد الديرة
عساكم على القوة يا رجال
الأصل عند المباركة في الزواج
هي مقولة :
منك المال ومنها العيال
:)
يا هلا فيك يا ولد لديرة
:))

flaanh يقول...

صدق من اصعب الكلمات عطني فلوس وهات فلوس ..

بس عجبني المشرووع ..بديتو ولا لا ..

لنا نزله للكويت..خلينا نشوف جلابياتكم ..

بالتوووفيق..

Nikon 8 يقول...

flaanh
حيا الله أهل الإمارات
لازلنا في معمعة المشروع
وحياكم الله بالكويت
:)

أُمْ حَــسَـــنْ يقول...

ههههه نيكون مو قلتي توبة ما تغبين عنه شي

يلا مو مشكلهتكبرون و تنسون :)

Nikon 8 يقول...

أُمْ حَــسَـــنْ

والله ما كان قصدي أخش عنه لكن إبليس لي قعد لنا والعياذ بالله
الله يكافينا شره
يا هلا فيج يا الغالية طولتي الغيبة :))