الأربعاء، 3 فبراير 2010

إعلانات هاتفية

صبايا دار عزيزة يتجمعن يوما بالأسبوع على الغداء في دار عزيزة
بعدها تتمدد كل واحدة منهن على قنفة ... تلتحف بعباءتها .... وتغفو
ومن تريد أن ( تلين ظهرها ) فقط .... تستلقي وتسولف بصوت خافت إما مع صاحبتها
أو بالهاتف للإطمئنان على عيالها وأهل بيتها .... أو تتابع الحلقة المعادة من المسلسل التركي وكأنها تراه للمرة الأولى !
في نفس الوقت كل مرة .... وقت الراحة والتمدد والإندماج مع المسلسل التركي .... يرن هاتف إحداهن النقال أو هاتف خط المنزل الأرضي ليقطع علينا خلوتنا مع أنفسنا ويكون على الطرف الآخر مندوبة من إحدى الشركات تروج لمنتجات شركتها أو تطلب موعدا لزيارة المنزل وعرض منتجاتها !
وجودي بينهن في تلك اللحظات أتاح لي رصد ردود أفعالهن المختلفة على مدى فترة ليست بالقصيرة لأخرج حصيلة لا بأس بها .... لكني سأكتفي بثلاثة نماذج فقط
فإحداهن تغضب بشدة وتنهر المتصلة على ( قلة ذوقها ) وإزعاجها بأمور لا تهمها وبوقت غير مناسب !
وأخرى تغلق الخط بلا تردد وبدون أي رد على المتصلة اللهم إلا تحلطمها بعد قطع الخط بجملة
صج ما عندج سالفة !
على بالي البنك متصل عليّ !
وثالثة يكون مزاجها عالي العال بعد أن ملأت بطنها وهدأ جسدها على القنفة الوثيرة وصارت بعالم آخر أخر... تتغشمر ... وتفرفش مع من هي بالطرف الآخر من الهاتف وتروج لمنتجات شركاتها
تجيبها بكل طولة بال ومزاج : شنو ؟ فزت بجلسة تنظيف بشرة مجانا ؟
تسكت لتسمع رد مندوبة الشركة ثم تجيبها بضحكة ناعسة :
قولي لا إله إلا الله .... بشرتي تبارك الرحمن تضوي من اللمعة ولحد الحين التجاعيد خايفة من غزو بشرتي .... هي هي هي ( تضحك ) وتكمل :
وخدّي ( تف تف تف ... تتفل عن النضلة ) لي ضحكت ورّد وتسمّت تقولين بنت أم أربع تعش سنة
وبشرتي ناعمة .... أخاف عليها حتى من غبارنا عن لا يجرحها ... عاد أنا شسوي ؟
أغطي ويهي بالبوشية ... تعرفينها ؟
تتستمع لرد المندوبة وتكمل :
إيه وي حاضر ما طلبتي شي
سري هو ماي الورد والفازلين ... وخلي عنج خرابيط شركتج ... ولا تحورفين بويوه الناس وتخربينها ... ترا ورا الناس غير الدعاوي عليج
هاه ... سمعتي يمه شقول لج ؟
تسكت لتسمع رد المندوبة ثم تجيبها :
لا والله ما أحتاج تنظيف بشرة ؟
صابون الرقي وإشعلامه ؟ كاهو محافظ على شبابي
وإهي هي هي ( تضحك ) ومثل ما تقول الدعاية ما خذلني ولا مرة
مشكورة وما قصرتي
وقولي آمين عقبال عندج بشرة مثل بشرتي !
تنتهي المكالمة بعد إستنفار جميع الصبايا لمعرفة من المتصلة
حتى النايمة تفز على حيلها لمعرفة من المتصلة ؟
محاولات متنوعة من الصبايا لمعرفة من هي المتصلة ما بين حركات باليد وسؤال بصوت مسموع : من تحاجين ؟
يالله سدي الخط وعن الربربه ؟
أما الحجية أم مزاج صاحي فما غير تعض على برطم وتغمز بالعين ... تدعوهن للتمهل عليها لتكمل سوالفها ... ومزاحها مع المندوبة .
:)
قد يكون هذا النموذج هو أظرف مثال وأخفهن ظلا ومهضوم بالنسبة للمندوبة
ولكن هل ردود الأفعال دوما على هذه الشاكلة ؟
لا أظن أبدا
حقا أزعل على من تعمل بهذه المهنة
:(
فلا أوقات إتصالهن مريحة ... ولا طريقة إتصالهن على الناس مقبولة ... ولا ردود فعل الناس لهذه الطريقة بالغالب مشجعة !!!
الدعاية والإعلان مجال كبير وواسع
فلماذا الإستمرار بطريقة لا يتقبلها الناس وفيها الكثير من الإزعاج للطرفين ؟

هناك 29 تعليقًا:

غير معرف يقول...

هاهاهاهاهاي
ضحكتني
دمها عســــل

زين تسوي فيها ..
ماظنّتي بادق على أحد اسبوع:)

بيني وبنيج

حنّنننننه....يعلّون


ياخف طينت صبايا الدار...


خوش بوست عقب الخفاره

تصبحين على خير :**

اقصوصه يقول...

فعلا

اشاركك الراي في هذا المجال

انا بعد احس ان موقفهم يكون بغايى الحرج

صدقتي الله يعين اللي يشتغلون هالشغله

بس عن نفسي افضل عدم التصرف بقسوه

في مثل هذه الحالات.

لان اول ع اخر ما نقدر ننسى ان هذا

رزقهم، يعني هم مجبورين :(

chandal/danchal!! يقول...

LOOOOOOOOOOOOOOOOOOOOOOL


واي مت من الضحك عالفازلين... انزين والكريم اللي فوقه قصدير ليش ماله طرية!... وه نسيت اسمه احمر ومسكر بقصدير!... حق الكيعان والركب لوووووووووووووووووووووووووول


يا حلوهم ويا حلو سوالفهم ويا زين الناقل الرسمي لسوالفهم

:)

ARTFUL يقول...

صباح الخير

تركي عنج يا نيكون ، لا تشوفين شلون تدق بنفس خايسه وتنزرك جنك انت اللي تبي منها شي

انا تنرفزني مالت مطعم ساكورا ، وتسويقهم حق كرت مطاعم كراون بلازا

اتييك فلبينيه او مصريه بس انا تضحكن الفلبينيه واهي اتكلم عربي
D;

جنة الحواس يقول...

لوول .. صاجة الحجية ما على ماي الورد
أما هالنوعية من الدعايات .. صج صج تنرفزني .. مرة من المرات ... دقت علي مندوبة أكثر من 4 مرات إلى أن رضخت لها .. قلت يالله خليني أجرب تنظيف البشرة ..آخر شي .. يتني البيت تعلمني شلون أغسل ويهي بالغسول و أنظفه بالتونيك ! مادري اش شايفتني !

bent el deera يقول...

عدل كلامج
واهم شي
الوقت
ما يختارون وقت عدل

ومت من الضحك على جمله " سري هو ماي الورد والفازلين ... وخلي عنج خرابيط شركتج ... ولا تحورفين بويوه الناس وتخربينها ... ترا ورا الناس غير الدعاوي عليج
هاه ... سمعتي يمه شقول لج ؟ "

يعطيج العافيه :>

Sami يقول...

انا من النوع الي يغلق الهاتف على طول ..لكن بدون تحلطم :)

Engineer A يقول...

اي والله صاجه ..

انا شخصياً أكره لما يتصلون فيني .. وابساطه اقولها ميخالف اختي انا مشغولة الحين ياريت تتصلين بوقت ثاني واهي تفهم الرسالة وماترد تتصل!!

صج مهنة متعبة وان شاءالله يلاقون حل :)

المحامي يقول...

بالفعل مزعجين ملوت الاعلانات لأبعد الحدود ، حتى لو الواحد كان يبي يشتري راح يهون بسبتهم..

بس على فكرة عندج قدرة رهيبة بشرح الموقف بصورة تصويرية خاصة الي بطنها متروس .. عجيبة هذي :)

Nikon 8 يقول...

سلة ميوّه

عساج على الصحة والعافية يا دكتورتنا الغالية :)
أمها دمها عسل فصج عسل الله يخليها لنا
دمتي بألف خير :)

Nikon 8 يقول...

اقصوصه

فعلا هذا هو عملهم وهم مجبورين عليه
ولكن ليتحلوا قليلا باللباقة بإختيار الوقت المناسب .... عموما الله يكون بعونهم على مهنتهم .
حياج الله يا الغالية :)

Nikon 8 يقول...

chandal/danchal

قصدج الجلسرين ؟
لا تخافين هذا من ضمن العدة هو مع كريم بوند القديم :)
حلت دنياج يا الغالية :)
إلا إشلون الصغيرة ؟

Nikon 8 يقول...

ARTFUL

مسكينة المندوبة لي طاحت بشلة الإنس ... شلة الصبايا وكل وحدة من راسها صوت شي يفككها المسكينة ؟
:)
لو تدري الفليبينية إنك تعرف إنكليزي جان ما قعدت تأتأ بالعربي
لووووووول
تلاقيها على بالها كل الناس مثل اللي تشوفهم بالفروانية !

Nikon 8 يقول...

جنة الحواس

يا حيا الله من زارنا اليوم :)
إشلونج وإشلون أحوالج ؟
طمنينا عليج ... ترا حدنا ولهانين على بوستاتك ومزاج الأغاني :)
ما أقول إلا الله يسامحها هالمندوبة وإلا ما لقت إلا الحجية تسوي لها تنظيف بشرة ؟
حياتي إنتي لا تقاطعينا :)
موفقة دوم إنشاء الله

Nikon 8 يقول...

bent el deera

الله يعافيج عزيزتي وعسى أيامج كلها ضحك وسرور :)

Nikon 8 يقول...

Sami

ما شاء الله عليك ... أنا ما أقدر ما أتحلطم :)

Nikon 8 يقول...

Engineer A

فعلا مهنة متعبة ... من فترة فابلت وحدة إضطرت لهذه المهنة وتقول إنها جدا تنحرج من الناس وردود أفعالهم لكنها لو كانت مكانهم جان أكيد تسوي مثلهم !
حياج الله يا مهندستنا الغالية :)

Nikon 8 يقول...

المحامي

أم بطن متروس على قولتك حدها نكته الله يطول بعمرها :)

may يقول...

إييييي ..
صج الاعلانات تضايق..
والأكثر المسجات ..!!

may يقول...

ابيه
صدفة ولابالبال!!

توني اعتمدت الرد والا يدق التلفون
مندوبة شركة (.....)
قلت لها تدرين توني كاتبة رد في بوست عن مدى ازعاج الاتصالات الاعلانية !!

مسكينة توهقت..
قالت اكلمج بوقت ثاني !!

ReLaaaX يقول...

واااااااااااي ياحلووووووهم وياحلو قعدتهم والله حبيتهم وآنا مااعرفهم :)))


الله يخلي بشرتكم ويبارك فيها ولا يحوشها اي تجعوده ;)

مهرة سالم يقول...

السلام عليكم....
ماشاء الله عليها
صحيح الدعايه والإعلان فن وليس عمل فقط..
...
دمتم بخير ..

غير معرف يقول...

يعني شهذكاء الزايد اللي فيكم تشوفون الرقم يبتدي 8 اكيد شركه أعلانات ولا شالتفلسف اللي ماله معني اا ماتبون تردون لا تردون محط طقكم علي ايدكم وقالوكم ردوو: )

Nikon 8 يقول...

مـي

يا هلا بالعزيزة مي
:)
ضحكت وأنا أقرأ ردج ... هذا قانون الجذب اللي يقولون عنه :)

Nikon 8 يقول...

ReLaaaX

حلت دنياج يا ريلاكس
والتجاعيد جايتهم لا محالة :)
يا هلا فيج يا الغالية
على فكرة أمس الجمعة مريت على مدونتج وقريت تفسير سورة الكهف وكانت في مكانها
شكرا على الإفادة :)

Nikon 8 يقول...

ReLaaaX

حلت دنياج يا ريلاكس
والتجاعيد جايتهم لا محالة :)
يا هلا فيج يا الغالية
على فكرة أمس الجمعة مريت على مدونتج وقريت تفسير سورة الكهف وكانت في مكانها
شكرا على الإفادة :)

Nikon 8 يقول...

نهــــــــــار

النقد كان ليس لمن يبحث عن مهنة شريفة ولكن لمن يجبر المحتاج على إمتهان شغلة خالية من الذوق !!
الله يكون بعون الجميع ويا هلا فيج يا العزيزة :)

Nikon 8 يقول...

غير معرف 1

لا ذكاء ولا تفلسف زايد لأن الأرقام تكون بالغالب خطوط أرضية عادية .

غير معرف يقول...

حسيت روحي قاعدة وياكم يوم قريت البوست خخخخ
الي بالتلفون شغلتهم اهون من المندوبين الي في فيس تو فيس
عندنه في مجمع البحرين شلة مندوبين مصاروة . يروجون حق رحلة سفر خخخ
محد معطهم ويه .. يكسرون الخاطر لكن ككك XD