السبت، 6 فبراير 2010

مسابقات هلا فبراير

في هذه الأيام من أيام فبراير العامرة بأفراح بلدنا الحبيب الكويت
تجمعن الصبايا أمام شاشة التلفاز الكبيرة مساءا يتابعن برامج المسابقات التي تقام في المجمعات التجارية لجمهور مهرجان هلا فبراير
المذيع يقف ويسأل أسئلة بسيطة ويمنح الجوائز العديدة للمتسابقين والمتسابقات
وبينما كان المذيع يسأل إحدى المتسابقات المنقبات صرخت إحدى الصبايا :
هذي ما جنها أم يعقوب ؟
ليسود الهرج والصراخ والمطالبة برفع صوت التلفزيون
!!!
أصوات تنكر :
حرام عليكم مشبهين عليها ... لا تظلمون المرة
وأصوات أكثر تأكد :
بلى ... بلى ... هذا صوتها ... وهذي ضحكتها ... وهذي نفس نظرة عيونها
لي توهقت بالرد طالعت لي فوق !
ومن شدة إندماج الصبايا بتحليل حركات المتسابقة وإثبات إنها أم يعقوب بعينها
لم نسمع ما هي الأسئلة ولا الجوائز التي حصلت عليها أم يعقوب
أنهت فقرتها وشاهدنا وجهة أم يعقوب بكل وضوح وعلى كبر الشاشة وهي تحمل أكثر من كيس بفرح واضح من نظراتها وإرتباك من الجمهور والمصورين .... كانت محتارة ولا تعرف من أين تنصرف ؟ !
أم طلال بصوتها العالي والحاد : ما شاء الله عليها هالأم يعقوب .... ما تخلي بقلبها شي ؟
كل مكان تروح له .... وهاج حتى المسابقات تشترك فيها !
وحنا يا خلاف ما غير باركين على هالقنفات ودردع من هالجيهان !
وإن سألناها الحين هذي إنتي اللي طلعتي بالمسابقة ؟
بتقولج لا أكيد مشبهين عليّ !
أمي عزيزة : ما ني خابرة أم يعقوب منقبة ؟
أم سالم مؤكدة : بلي .... تتنقب لي بغت محد يعرفها ... جم مرة أطيح عليها بالعروس وبالسوقة ؟
أمي عزيزة : هو ... وليش ما تبي أحد يعرفها ؟
أم سالم : تخاف من العين والحسد !
كله تقول الناس مطالعيني على طلعتي ... وأنا خلف الله عليّ أقضي أشغال البيت !
ولي طلعت من البيت وأحد أتصل عليها توصي خدامها يقولون ماما راحت الطبيب !
أمي عزيزة : أحد يفاول على عمره ؟ عيل شدقولج لي عرفتيها بالعروس ؟
أم سالم : جواب واحد ما غيره .... جارتي لزمت عليّ وقالت لي إمشي معاي وسعي صدرج قعدج بالبيت بتجيب لج الخراف .... عاد كل شي ولا الخرف ... توني صغيرة عليه !
أمي عزيزة : وإن شفتيها بالسوق ؟
أم سالم : عذرها إن الطبيب ناصحها بالمشي لعلاج إركبها ... وتتنقب لأنها ما تبي تمشي وتسلم !
لا ... ولي شافتني قامت تعرج علشان أصدق ... وإن وخرت عنها مشت عدل
أحسن مني ومنج !!!
أمي عزيزة : علام الناس خايفة تقول جايه أستانس ؟
في تلك الأثناء إتصلت إحدى فتيات دار عزيزة وأبلغت الصبايا أنها هنأت الخالة أم يعقوب على فوزها بالمسابقة وإنها علمت بذلك بعد أن رأت بنات الخالة أم يعقوب وهن يشجعن والدتهن !
لم تفوت أم سالم هذه الفرصة وطلبت من فتاتنا أن تكلم أم يعقوب لتبارك لها
أم سالم : يا هلا أم يعقوب ... بالمبارك ... شفناج بالتلفزيون ... وتعايينا ... ناس تقول إنتي وناس تقول مشبهين عليها !
أم يعقوب : واي يمه منكم ؟ ... صج ما يغباكم شي ؟
والله لوما بنيتي لزمت علي ّ أجي أشوف البدلة اللي تبي تشتريها وإلا أنا خبرج ما لي سالفة بالسوق ؟
أم سالم : يا الحمدالله ... جيتج فيها فايدة هذا إنتي فزتي بالمسابقة
أم يعقوب : واي .. واي .. واي ... تف ... تف ... تف ... قل أعوذ برب الفلق ... من شر ما خلق
حتى على جواب مغششيني إياه تبون تطالعوني ؟
!

هناك 23 تعليقًا:

Hope يقول...

لوووووووول
يحليلها ام يعقوب
انتيكه المره

بس تبين الصج !!
زين تسوي
والله الدنيا صايره تخرع و الناس مبطلين عينهم على كل شي تسوينه
يحسدون الواحد ع اللي يسوى و اللي ما يسوى الله يكافينا الشر

المقوع الشرقي يقول...

هاهاها
لا تناشبونها
خايفة من العيين
:)

غير معرف يقول...

هالايام الناس وايد تخاف من الحسد:)



وماشالله كالعادة سردج يعطي نكهه للسوالف


ياحلو سوالف هالدار

الله لايحرمنا منها

( ماشالله تبارك الله:) )

عن الحسد:P


حبي:*

نبضُ الأدب يقول...

العين حق .. بس مو جذي عاد !

يصير الواحد ما يطلع من بيته على بو خايف من العين ؟!!
عيل كل الناس بيقعدون بطالية في البيت ولا يطلعون ولا شي !!

الإنسان العاقل .. يحصـّـن نفسه بالأذكار و المعوذات .. و يطلع و يمارس حياته بشكل طبيعي .. !

الله سبحانه الحافظ =")

عسى الله يحفظج نايكون =>

الزين يقول...

لووووووول

والله هالأم يعقوب ماهي هينه

وبيني وبينج اللي مثلها وااايدين

ويا صباح الخير

:*

ARTFUL يقول...

الحريم يخافون من العين بشكل مو طبيعي

D;

BookMark يقول...

لوول يحليلها أم يعقوب
عيل حاسدينها على جواب مغششينها ياه P;

العين حق وانا اختج المرة اتلاحق على عمرها قبل لايحوشها شي D;

why me يقول...

loool


ا يحسد المال الا صحابه .. على قولة المصريين


لي هدرجه خايفه من العين
!


يا حليلها

Seema* يقول...

لكل شخص الحق في أن يعيش حياته على الرغم من أن الناس في مجتمعنا يثبتون عكس ذلك بتدخلهم حتى بأصغر الأمور وأتفهها بتعليقاتهم ونصائحهم التي يعرفون مسبقاً أننا لسنا بحاجة لها.

حين تأتي الشخص فرصة لأن يفرح ولو قليلاً. عليه أن لا يضيعها فالخوف أن نموت قبل أن يأتينا فرحٌ أكبر. ليست بحاجة للأعذار!

عليها بالعافية : )

bu-saad يقول...

كااااااااك
حريم هذي عوايدهم ! ؛)

iCoNzZz يقول...

والله المرة شاطرة صراحة
هالأيام الحريم يشهقون على كل شي

Nikon 8 يقول...

Hope

الحسد والعين حق لكن المبالغة فيه مزعجة
يا هلا فيج يا هوب :)

Nikon 8 يقول...

المقوع الشرقي

المناشب كان بسبب حبهم لها ومن الميانة بينهم :)

Nikon 8 يقول...

سلة ميوّه

الله يسلمج يا سلتنا ويحميج إنتي بعد من الحسد
ما شاء الله عليج ترا متابعين ومعاج مع تفاصيل القصة الممتعة :)
قواك الله يا عزيزتي :))

Nikon 8 يقول...

نبضُ الأدب

الله يسلمك ويحفظ بعينه اللي ما تنام إنشاءالله :)

Nikon 8 يقول...

الزين

يا مسا الأنوار يا الزين كله
:)
من يدري باكر يمكن نصير مثلها :)

Nikon 8 يقول...

ARTFUL

ما أدري ليش ؟
يمكن لأن الرياييل عيونهم حاره أكثر فعلشان جذيه ما يخافون من العين :)

Nikon 8 يقول...

BookMark

لا تخافين عليها :)
حياج الله يا الغالية :))

Nikon 8 يقول...

why me

وايد ترا مثل أم يعقوب :)
بس على فكرة طينتها خفيفة وما تزعل :)

Nikon 8 يقول...

Seema*

الفرح حق مشروع لجميع ومشاركة الفرح تزيد بالفرحة أيضا إن كانت صادرة من قلوب نقية تحب الفرح لغيرها:)
وعليها بالعافية أم يعقوب :)
أسعدني ردك ففيه وجهة نظر من زاوية أخرى .
يا هلا فيك يا عزيزتي :)

Nikon 8 يقول...

bu-saad

ترا حنا يا الحريم ما نرضى على بعضنا :)

Nikon 8 يقول...

iCoNzZz

لووووووووووووول
ضحكت على يشهقون على كل شي :)
القصد كان مداعبة أم يعقوب لأنهم يعرفون بخوفها من العين ولولا الميانة جان ما سووا جذيه :)
يا هلا :))

غير معرف يقول...

ههههههه أمبيه لا موو صج !!
لكن السالفة واقعية و تصير وايد !
يعني أعرف وايد نا يخشوون كلشي في حياتهم بس خوفا من الحسدد
انزين حرية شخصية
بس الي يبطون جبي اهمة الي يخشون اخبارهم و يتقصون على الناس و يلاحقون اخبارهم :O !!
هذول الي صج يبي لهم طراقات XD
حبيت اسلوبج في الكتابة و السرد :)
هنيئا لأم يعقوب هداياها !! و الله يطمن خوفها من الحسد كككك