السبت، 10 أبريل 2010

منجة



مع تباشير المنجة الهندية اللذيذة ( الفونسو )

تحلقنا بعد الغداء حول كرتون المنجة الباردة كل يختار منجته

ودارت الأحاديث حولها

حكت لنا أمي عزيزة حادثة طريفة حدثت لها مع المنجة

تقول فيها :

بعد دخول المدنية للمجتمع الكويتي وإقامة الحفلات المختلطة

صارت ترافق جدي وبخاصة عندما يكون هناك ضيوفا عربا مع زوجاتهم

تقول كنت أذهب بكامل كشختي أساور الذهب تحلي معصمي

ويدي وشعري مخضبان بالحناء

أرتدي بالغالب فستانا بلا أكمام وقصيرا كما هي الموضة في تلك الأيام

وأرتدي فوقهم العباءة !

بعد السلام والتعرف على بعض نتنحى بالنساء الضيوف بمجلس منفصل عن الرجال

ونتحادث ونأكل لحين أن ينادي كل زوج على زوجته للمغادرة

تضحك وهي تذكر الحادثة وتكمل :

كنا في مناسبة أقامها أحد الأقارب في وقت مثل وقتنا هذا ( موسم المنجة ) وكانت صينية الفاكهة في العشاء عامرة بما لذ وطاب من الفاكهة الجميلة

والفاكهة في ذلك الوقت لم تكن بذلك التنوع والتوفر مثل وقتنا هذا

طاحت عيني على همبة ( منجة ) شوقتني بحجمها ولونها

إلتقطتها وبديت أمرد وأمصمص عصارتها وأنا أتلذذ بطعمها

محركة راسي لليمين واليسار من شدة ( النطاعة )

أطل جدكم الله يرحمه برأسه ليناديني ووقع بصره عليّ وأنا ممسكة ( بطعامة ) المنجة

أفركها بأسناني لإستخلاص ما بها وعصيرها متسربا ما بين أصابعي !

طار صوابه من منظري لما رفعت رأسي وشاهد بعض آثار المنجة على جوانب فمي !!!

بسرعة مسحت يدي وما بين أصابعي بالمنديل وغسلت يدي بالماء والصابون

وضعت عباءتي على رأسي وخرجت مسرعة

كان جالسا في السيارة ينتظرني وهذه إشارة تعني أني أقدمت على فعل لا يرضيه

وما إن أغلقت باب السيارة حتى إنطلق بالسيارة وأطلق شتى العبارات الغاضبة عليّ :

فشلتينا ... ما شفتي خير .... على بالج في بيتكم تتعافرين مع طعامة المنجة

قواطير الهمبة تصبصب من بين أصابعج ... هذا منظر تراوينه الضيوف لوعتي جبدهم

وغيرها من العبارات الغاضبة

وختم حديثة عندما وصلنا للبيت حالفا علي أن لا آكل المنجة ولا البرتقالة في العزايم

سألنا : المنجة وعرفنا سببها ... البرتقالة شنو ذنبها ؟

أمي عزيزة : يقول ريحتها فضيحة لي أكلتها وتالي سلمت على الناس !

وبعد هذه الحادثة علمني جدكم أن أقطع المنجة بالعرض لنصفين وألفهم عكس إتجاه بعض

وآكل ما بداخل كل نصف بالملعقة

لكن تبون الصج ما أعرف أتنطع فيها إلا لما آكلها مثل ما أحب وليس بالملعقة !

عقبت أصغر خالاتي على الحديث قائلة :

عندما عقدت قرانها قبل عشرين سنة زارهم زوجها ليتغدى عندهم

وبعد الغداء قطعت له حبة منجة كما علمهم والدها وقدمتها للزوج مع الملعقة

وعندما رجع لبيت أهله سألته والدته عن غداه وأنسبائه

فرد عليها بإنبهار :

يمه تقولين عنهم شعبيين بس تراهم طلعوا كشخة !

أمه : إشلون وشنو شفت ؟

الزوج : ياكلون المنجة بقفشه !

بداية أسبوع رائعة أتمناها لكم كروعة المنجة
:))


 

هناك 31 تعليقًا:

Seema* يقول...

ههههه
عليكم بالعافية!

المحامي يقول...

يا سلام .. والله لما قريت البوست فرحت وانا كنت متضايق :)

(((فشلتينا ... ما شفتي خير .... على بالج في بيتكم تتعافرين مع طعامة المنجة)))

يحليله الشايب عصب من أكل المنجا بدفاشه :)
-------
طريقة الأكل تكون على حسب راحة الواحد ، مو شرط عشان اكون ذرب آكل المنجا بقفشه ، بس هذا كله ما يعني اني اخلي المنقه تحوش شاربي وايدي تقطر ماي المنقه ..؟! اشدعوه ذابح خروف؟ ؛) .. بالمناسبه اعرف واحد كل ما ياكل يكون اثر الاكل على خده ، يعني عادي ينسى فخذ ديايه كامل على خده .. قلت له أنت الظاهر لحم خدك ميت نفس لحم كعبك :)

محمد يقول...

ياااااه على ذيك الأيام..
براءة فعلاً : ( ..

مدونة رائعة، متابع وبشدة :(

فريج سعود يقول...

عيل ما مر عليج الي يمصمص بطعامة المنجة وتفلت منه وتطيح على الارض وتلقينه حاير مو عارف يقطها ولا يكمل عليها

حياتي هدف مو عبث يقول...

صباح الفواكة:)

مره سمعت خالتي تقول حق بنتها
فشلتينا جنج مو شايفة خير
عشانها كلت المانجا في العزيمة..
أثاري الكل له هالنظرة
وأنا الصراحة أحب أشوف اللي ياكلون المانجا.. أحسهم يشعرون بلذة ههههه :)
مع إني ما أحب المنجا:)

سلة ميوّة يقول...

والله ضحكت وانا أقرى البوست
والسالفه
..الله يسلمج أنا طول عمري آكل المنجة

بالقفشة ..وبالطريقة الي تلفين طرف عن طرف...
ويوم كبرت شوي قمت اقصصها مثل الصورة
الي حاطتها عشتو مربعات...

بعدين...
وفي إحدى المرات..:) شفت صورة بنت خالتي على شيرة وبيدها منجايه و اتعضعض فيها وكانت الصورة بالهند

يعني منجة شد بلاده:P


في قلت لازم اجرب هالطريقة...

وحياتج
وصلت منجتي لي كوعي...

ومن عقبها وانا ماكل منجة الا خشيشي:)

لزوووم البورستيييج:)



يازين سوالفج من صباح الله خير

ياصباح المنجة

الزين يقول...

لووووول

عجبتني سالفة المنجا

والنسيب اللي انبهر من حركة قصها

خوش سوالف يانيكون

:*

صباح الفل يا فلة المدونات كلها

Sweet Revenge يقول...

العافية عليكم المنجا اللذيذة , اما سالفة امنا عزيزة الصراحة عجيبة غشيت من الضحك , لغتج التعبيرية رهيبة يوم توصفين شلون تاكل المنجا .
اضحك الله سنج ودامت دار عزيزة بكل محبينها امين :)

Faisal يقول...

منجا بلدي

Sn3a يقول...

انا كنت احب المنجا
بس احسها ثقيله
وطريقه اكلها فوضوي شوي
فقمت اكلها لما تكون بالكيك او بالحلويات بس

لووول اهم شي رده فعل ريل خالتج

chandal/danchal!! يقول...

حبيت بوستك اكثر من محبتي للمنجة


غشيت من الضحك على تنطعها والزفة اللي حصلتها من زوجها

:))))

والله تو تل يو ذا ترووث: انا احبها بالقفشة وما اواطن البرابيس واتغبط اللي ياكلونها بالطريقة اللي ذكرتيها بس الوسواس من القواطير لاعب بحسبتي وحسبة عيالي يا عمري عمرهم... شسوي يا نيكون ما احب ادممر هدومي!

Hope يقول...

لووول
عليهم بأف عافيه يا رب
عاد مافي احلى من المنجا.. احبها.. غرامي المنجا
يعني الحين طلعوا اللي ياكلون المنجا بالقفشه كشخة??!! حلو حلو
p=

يعطيج العافيه و كثري من السوالف اللي تضحك

ARTFUL يقول...

انا عندي حلاة الهمبه بالبربسه

اذا ما تاخها وتعض طرفها تالي تقعد تمصمص مافيها تالي تشيل قشرها وتقول فيها وتختمها بالطعامه وتقطر على كياعينك والا ما كليت همبه


D;

@alhaidar يقول...

هههههههه موضوع منجاوي جميل :))

وانا من أنصار جدتج الله يحفظها .. إذا ما أخبص بالمنجا ما احس بطعمها ..

والله يعين اللي تلوع جبودهم ;)

NewQ8 Bride يقول...

ها ها ها يا حلوها و الله

يا حلوهم الكشخة اللي ياكلون المانجا بقفشة

للأسف يمكن انا الوحيدة اللي بالعالم ما تحب المانجا

Nikon 8 يقول...

Seema*

الله يعافيج عزيزتي
:)

Nikon 8 يقول...

المحامي

:))

والله تعليقك أهو اللي يونس
وقول آمين عسى الكدر ما يعرف دربك
يا هلا فيك
:)

Nikon 8 يقول...

محمد

يا هلا فيك أخي محمد عزيزفي دار عزيزة
:)

Nikon 8 يقول...

فريج سعود

لووووووووووووول
اشوةإنها ما صارت في أمي عزيزة جان يمكن حياتها أخذت منحنى ثاني مع جدي
:)

Nikon 8 يقول...

حياتي هدف مو عبث

مس المنجة يا عزيزتي
:)
أنا مع خالتك المنجة مثل أكل الصبور تبي مزاج :)

Nikon 8 يقول...

سلة ميوّة

مسا المنجة يا منجة :)
المنجة الهنديةالفونسو من ألذ الأنواع وماألوم اللي ياكل حتى قشورها
:)
وبصراحة تعضض المنجة لها لذة مثل لذة الأكل باليد :)

Nikon 8 يقول...

الزين

مسا النور يا زينة المدونات كلبوهم
:)
النسيب لي الحين يعيايرون بهذي السالفة
:)
وتصدقين من صجة قعد يفكر عسى العروس ما تكون حيل كشخة عليه ولا هو قد بريستيجها !

Nikon 8 يقول...

Sweet Revenge

مشكورة على الدعاء ياعزيزتي
:)
وياهلا فيك بدارعزيزة

Nikon 8 يقول...

Faisal

ياليت عندنا منجة بلدي جان زرعتها بحوشنا
:)
المنجة هندية اصلية

Nikon 8 يقول...

Sn3a

عليج بالعافية إشلون ما أكلتي المنجة وبأي طريقة
والبساطة حلوة والله يعافي الماي والصابون نتغسل فيهم بعد حوسة المنجة
:)

Nikon 8 يقول...

chandal/danchal!!

إذا ما تحبين الفوضى فيه منجة صغار من مصر يسمونها فص كل حبة تنوكل بعصره واحده وطعمها لذيذ جربيها :)

Nikon 8 يقول...

Hope

الله يعافيج يا عزيزتي وحاضرين
حياج الله ياالغالية في دار عزيزة
:)

Nikon 8 يقول...

ARTFUL

عدل ياأصلي :)
طلعت من ربع أمي عزيزة
:)
الله يا هي بتفرح فيك
:))

Nikon 8 يقول...

أحمد الحيدر

يا هلا بأخوي أحمد بوالبنات
الله يحفظهم
:)
زادوا أنصار أمي عزيزة
بأقترح عليها تسوي رابطة لحفظ حقوق أكلة المنجة بتلذذ
:)

Nikon 8 يقول...

New Bride

حلت دنياج يا عروسة
:)
ترا في مثلج وايد ما يحبون المنجة
والناس أذواق
:)

فيلسوف يقول...

طلعنا احنا كشحه بعد ناكل الهمبه بقفشه

هذا نفس واحد من ربع الوالد يقول شوفوا الذرابه ياكلون الهمبه بقفشه مو احنا نتعافر معاها

عليك بالف عافيه بس صج اشتهيت الهمبه من بعد هالبوست