الأربعاء، 26 نوفمبر 2008

حداق الحريم

خبر خفيف يناسب أجواء نهاية الإسبوع

هبه جديدة دايره على الحريم مؤخرا

التجمع والسفر إلى سلطنة عمان للحداق !!!

صاحبات الهبه الجديدة مستانسين وايد :))

ويقولون إيدام غداهم من صيدهم ... والصيد يا الله من فضلك ما والي

كل يوم الطباخ علي وحدة منهم ..... ويقولون بعد هاجت ذكرياتهم القديمة

وتذكروا أيامهم لما كانوا في بيت حمولة كبير يتناوبون على أعمال المنزل والطباخ

وحلاب البقرة .... :(

المهم ... إن الحريم من تنتهي رحلة حداقهم ويرجعون الديرة

يسولفون على ربيعاتهم وين راحوا ومن وين جو :)

ومن كذي الهبه صارت تنتشر بين أوساط عاشقات الحداق

وأحيانا يصير سدهم غزير وما يعلمون أحد حتى لاينترس بحر العرب من حريم الكويت :(
ويضطرون يصارخون على بعض بالبحر الله بالخير مع رفع اليد اليمنى عند السلام على طريقة البحارة
والله مو قصدي أفتن .... بس النية عندهم إنهم ما يعلمون أحد على المكان ... والسبب ؟؟؟
مثل ما عرفت إنهم علموا غيرهم على الهايدبارك وبحيرة جنيف وماربيا من قبلها علموهم على القاهرة وبحمدون والزبداني ...!!!
وفي النهاية سبقوهم على الروحة لهذه الأماكن ؟؟؟

ودام إن زلق لساني .... بأكمل الفتنة ...... أستغر الله .... ربي لا تحاسبني مو قصدي أفتن ....
يـــاااا جــمــــاااااعـــــة إذا رحتوا أي بيت وشفتوا ؟؟؟

طاسة حلوى عمانية مرتزه جنب قواري الشاي والحليب على الدوة عرفوا إنهم راحوا للحداق من غير ما يعلمونكم !

وإن سألتوا وينكم من زمان ما شفناكم ... فقدناكم ؟

مو يقصون عليكم ويقولون كنا في العمرة !!!

هناك 10 تعليقات:

جنة الحواس يقول...

أمنيتي

daggero يقول...

Nikon8

بحر عمان هو أخر بحر غير ملوث وأسماكه غريبة لأنها أسماك المحيط الهندى

وعلى فكرة فى واحد حاط بوست عن حوداث الأرهاب فى بمباى اللى بدت أمس يقول أن فى 8 حريم كويتيات محتجزات رهائن ؟؟؟

البوست فى Safat Blogs

وهذا الرابط

http://www.4thringroad.com/?p=851

اللهم فك قيدهم وأرجعهم الى أهاليهم سالمات غانمات

Unknown يقول...

وي وي وي اشوف ذاك اليوم امي يايبه حلوى عمانيه... اثاري امي حداقه هههههههههههههههههههههههههههههه

nikon 8 يقول...

broke
الله يحققها لك إنشاء الله ... وهالله هالله بالصحبة السنعة حتى تكمل الوناسة :)

:::

daggero
شكرا على المعلومة عن الكويتيات المحجوزات والله يفك عوقهم ويرجعهم بالسلامة.
آآآآميييين

:::

كويتية بحرينية

ها ها هاي
وإشفيها الحلوى البحرينية ؟؟
هونتوا عنها ؟؟

علي حيدر النويسندي يقول...

اشوف انا الوالده بطلت تروح سوق السمج
ويارتنا يوميه يا بالول يا هامور
باجر الصبح بطيح عليهم بشمشم حلوه عمانية مني مناك
لووووووووول يسونها !!!

Deema يقول...

و الله غميضة كنا نروح الحداق قبل مع ابوي
بس باقوا طرادنا، و هونا عن هالطلعات

um.alzain يقول...

nikon8 عشان جذي كاثره نقصات السمك والمطبق والمطفي والخثره وانااقول اشهل سمك الزين ,ولاتنسين ترا يزرقون بعد الصيد للجبال ترا فيها علوم زينه بعد :))))

nikon 8 يقول...

Q8 Q8

على فكرة ممنوع عمان تمنع تصدير سمكها ... يعني الحداق للوناسة فقط :)

: : :

DEEMA

ما طافكم شي رجعوا إشتروا طراد ثاني ... السالفة تسوى :)

: : :

UM ALZAIN
سوالف التزرق للجبال بخليها عليك !
نورينا بالمعلومات إذا تعرفين شي ؟
وإلا تدرين ؟
ودي أجرب بنفسي :)

daggero يقول...

Nikon8

أهل بمباى ردوا بالسلامة والحمدلله والحين باقى أهل تايلاند أن شاء الله كلهم يردون بالسلامة

سكت عن الموضوع المعروف عن عمان حتى لاحد يقول متحامل وقلت الموضوع (حداق وحلوى)

ولكن أم الزين لمحت له جزاها الله خير

مرة شفت برنامج سياحى عن جزيرة عدال مسقط موجود فيها تماثيل كبيرة الحجم لقطط وحيوانات أخرى ,المذيع قال عنها هذى من صنع الطبيعة ؟؟؟؟ علينا يالطيب !!!

على الرجال الأنتباه لأى رحلة حداق نسائية الى عمان الشقيقة من الحين ورايح

um.alzain يقول...

nikon8 اشزين فيلكا والصيد فيها حلالي ولاخاطرج بالجبال "تبين تطيرين بسعفه" الله يهداج ويخليج لحبايبج عقلي وبلا لغابه بالجبال محنا قد سحر الطبيعه وجمالها.