الأحد، 5 أبريل 2009

الوفرة




جملة قالتها أم طارق وما هقت إنها بتكون السبب لإقتناع الصبايا والذهاب لمزرعتهم في الوفرة والمبيت فيها ليلتين !
جاءت أم طارق بعد غيبة طويلة .... كانت بمزرعتهم بالوفرة .... كانت دوما تدعوا صبايا دار عزيزة لزيارتها بالوفرة والمبيت عندها وبخاصة بأيام الربيع الجميلة .... ولكن لأسباب غير مفهومة كانت الروحة للمزرعة بالنسبة للصبايا غير متلبية !!!
وكنوع من الترغيب والتشويق بالمزرعة قامت أم طارق تعدد وتوصف لهم جمال المكان والجو بهذه الأيام والهدوء ولون الخضار والبساطة في العيش وراحة البال وصفاء الجو وإنعاش النسمة الندية والمشي بين الأشجار ...... عل وعسى يقتنعون بالوفرة !!!!
كانوا يوافقونها الراي ويأيدونها ... وزين ما سويتوا .... والله خوش .... ويا زين المكان شوقتينا ..... ولكن بدون ما تكون عندهم رغبة حقيقية للذهاب !
لحد ما قالت الله يا زين البيض بومحاحتين اللي بالوفرة ... إهي نطاعة ... إهي لذة .... ويا زين البيض بوعيون ....لي صبيناه بالمقلة وجاك بالصحن مقلي وكل بيضة لها عينتين .... بس يقول وين الحلج اللي يستاهلني ؟؟؟!!!!
لا أعرف ما السر في هذه الكلمات والوصف البسيط .... ولكنه كان له مفعول السحر في شد إنتباه الرواد الصبايا .... والإتفاق فيما بينهن بسرعة البرق وبالإجماع للذهاب للوفرة والسبب هو البيض بومحاحتين !!!!
ومن باكر إنطلقت السيارة حاملة الصبايا وسيارة وانيت أخرى فاضية تتبعهم متجهين جميعا نحو مزرعة بوطارق .
الوقت لم يكن نهاية الأسبوع .... ولكن في شي طق براس الصبايا وشلعهم من أماكنهم إلى الوفرة .... وفي الوداع قالوا إذا إستانسوا من المكان وياز لهم راح يباتون جمن يوم !!!
وهذا ما صار .... خبرنا فيهم قالوا حنا وصلنا بالسلامة .... وتالي لا حس ولا خبر !!
إتصالاتنا كانوا يردون عيلها بإختصار حنا زينين وبس ... ومشغولين بحياة المزرعة .... نسولف عليكم لي ردينا .
وفي اليوم الثالث إتصلوا قالوا حنا حادرين اليوم قبل المسيان .... ومعانا صوغة الوفرة !
وطبعا الصوغة كانت كراتين من البيض بو محاحتين .... مع خضرة طازجة من المزرعة .
رجعوا حدهم مستانين ووجوهم فرقت علينا ... الخدود موردة ومسمته .... وعلى كلامهم قالوا كأنا قاعدين فى مصح .... ناكل من الأرض ونشرب حليب من الغنم ونشم هواء نظيف كله أوكسجين ... ونطبخ ويبتنا بإيدنا .... وأهم شي لا غثا ولا أذى ولا أخبار مزعجة !
من الصبح بعد الصلاة يتمشون حول المزرعة ويختارون السخلة ( الماعز ) اللي بيحلبونها !
وينقون البيض الطازج ويقطعون شوية خضرة وطماط وخيار .... ويطلعون بطاط وبصل أخصر وجزر من تحت التراب ...على قد إحتياج ريوقهم وغداهم .
يخبزون خبزهم بإيدهم ... كل يوم مرتين ... مرة صباحا للريوق ومرة مساءا للعشا
وبعد الريوق يرجعون يتمشون بالمزرعة قبل لا تمحمى الشمس وبعدين يطبخون غداهم .



وبعد الغدا ينامون وبعد شاي العصر ينطلقون لشبرة الوفرة يتطمشون على إنتاج المزارع الثانية ويمرون على مزرعة دواجن متخصصة في بيع البيض ويشترون البيض بو محاحتين على دفعات كل يوم شوية .
الجماعة طقوها صحبة مع البياع وخذوا رقم موبايلة وصاروا يدوقون عليه تليفون يوصونه على إعداد الكراتين اللي يبونها كل يوم .
من الطرائف كما يقولون إن بياع البيض ما كأنه عايش في مزرعة وبين مزارعين ودواجن ومقطوع عن الحياة المدنية .... الريال مملوح وشكله كأنه أحد مطربي هذي الأيام والجيل بالشعر ... والقمصان ألوانها زاهية وأحيانا فاتح الصدر !!!
يعني اللي يحب الزين ويبي يونس روحه ما يعوقه المكان !!!
البياع كان حده مستانس على الصبايا ولي تأخروا إتصل عليهم يتفقدهم وطبعا يجرها معاهم كم سالفة ..... وما يخفى عليكم خفة دم إخوانا المصريين وكعكعة صبايانا واللي تكلمه تكركر وتنقل حق رفيجاتها إشقال فورا ويتكركرون معاها .... والريال ماغير يقطط عليهم الألقاب وهم مستانسين ..... مرة يا ماما .... ومرة يا ست الكل .... ومرة يا حاجة .... ومرة يا أميرة .... ومرة هانم .... ومرة ست الستات .
الله يسامحه من بياع خفف الصبايا بكلامه الحلو واللطيف معاهم :\
أم سامي تقول لولا الحياء كان ودها يقول لها يا قشطة .... مشتهية أحد يناديها كذيه لكن باقي الصبايا إنهروها وقالوا لها يا خزياه لا ينقد علينا الريال !!!
أما في الليل فيسولفون مع بعض أو يتفرجون على مسلسل عربي في روتانا زمان
أم طارق وايد إستانست إهي وزوجها من ضيوف دار عزيزة :))
والصبايا قالوا قميضة وين كنا كل هالأيام تعزمينا ولا نجي .... عرفنا الدرب الحين وبشروا بتخف ريولنا على الجية لكم كل مرة :)
والله يعافي البيض بومحاحتين .... ويا سبحان الله كم من سبب بسيط مو بالعين شي ولكنه له أثر كبير في نفوس غيرنا ... وقوة إقناعة فوق ما نتصور !

هناك 33 تعليقًا:

@alhaidar يقول...

مساء الخير ..

دائما أحب قراءة الموضوعات القيمة مرتين أو أكثر ..

لذا لن أعلق اليوم وسأمكتفي بإلقاء التحية :)

إلى الأمام دائما ..

enter-q8 يقول...

يوميات من دار عزيزة

توكلي على الله و انشريه

ماني معلق زيادة
بس بهمس لك بشغله لما اقعد اقرى كتاباتك ترى احس اني قاعد معاكم بالدار و بينكم يمكن حتى نبرة الصوت قاعد اتخيل صوتها من الشخصيات اللي تذكرينها،،،، ها تبيني اعلق بعد

غير معرف يقول...

رحلة موفقة

اهي جذي الطلعات الحلوة

بعفوية ... وبدون مقدمات

احلى طلعة بحياتي

كانت طلعة مع ناس موحيل اعرفهم
ومو مرتبة

وكثر طلعة تهلق ... بس جمييييييلة

تقبلي مروري الأول

مركبنا يقول...

شوقتيني ... مع اني ما اواطن الوفرة والعبدلي !!!

بس بصراحة اسلوبج ... طيرني

عليهم بالعافيه

كبرياء وردة يقول...

عاد انا لو مكانهم وقررت اروح بس تييبلي سيرة البيض اهون

ياختج ماحبه ولا احب ريحته
استغفر الله

عليهم بالعافية

اهم شي استانسوا

ومن وصفج للبياع مادري ليش تخيلته عصام كاريوكا :p

الزين يقول...

الله يمتعهم بالصحة والعافية

ولا يغير عليهم يارب

:)

وبهالجو الوفرة ما تنعاف
خصوصا اذا توفرت الصحبة الطيبه
والسالفه الونيسه
والضحكة الشقاقية


صباحج خير وفرح

chandal/danchal!! يقول...

صباح البيض المقلي بزيت الزيتون مع بصل أخضر وبقدونس وشوية كزبر وجرجير... ولي نضا تبشرين عليه بارمزان فريش وينوكل بالمقلى!
:)
.
.


الله يونسهم بالعافية

الوفرة حتى جرجيرهم وبربيرهم غير شكل

:)

عطينا رقم بو محاحتين :)

أتغشمر:)
.
.
.
يا خف طينتهم!... وإلا ودها أحد يناديها يا قشطة!
.
.
.
أنا ودي ينادوني يا ست اخواتها أو ست أبوها!

lawyer يقول...

عليهم بالف عااااااافيه

والله زين ما سوووووووو


انشاؤ الله رفيجتي ما تقرا بوستج

الله يعينا بتذكرينهااااااا في بلوتي


من جم اسبوع
طق براسي اروح الوفره
و طق براسي اكثر اسمع اغنيه كلك نظر بالطريج
لفيت السالميه عشان احصل سيدي الحفله الي ابيها
و قظبنا الطريج لي الوفره

و تمشيناااااااااا
و ظيعنااااااااااا


و اقولها جمعيه الوفره اتييييييين

قصدي الجبره و الخضرا
و يووووووووم وصلنا
قالت هذي الجعيه الي اتشرقييييييييييين فيها !!

قلت لها اي طبعا يالله نزلاي نزلاي و ومعانا الريال و عربانته و ترست الدبه و حدرناااااااا



بس كانت متعه عجييييييييبه

جنة الحواس يقول...

على الوصف اللي وصفتيه

هذي أحلى عيشة

lawyer يقول...

جننننننننننندل


جندددددددددددددل


لحظه لحظه

توج هنااااااااااااك تقولين ماااااااا احب اطبخ و لا اعرف اطبببببببببببخ

الحين صاااااااااار

صباح البيض المقلي بزيت الزيتون مع بصل أخضر وبقدونس وشوية كزبر وجرجير... ولي نضا تبشرين عليه بارمزان فريش وينوكل بالمقلى!



يمااااااااااااااا منج

:pPPP

مت يوع من البارميزان

Salah يقول...

بالعافية

اليوم بتغدى بيض :)

chandal/danchal!! يقول...

عزيزتنا بعد اذنك

:)

لوير

لووووووووووووووووووول

هذا مزاج:)))... ويا ليت معاه شاي سماور بالهيل اللي ما يحلى الا من المهري اللي بسوق دبي وزعفران أسباني من بو استفان
.
.
.
سكر أليل سكر أليل

:)))

Nikon 8 يقول...

أحمد الحيدر
مسا الأنوار والخيرات :)
حياك الله دوم :)

Nikon 8 يقول...

Enter-Q8
حياك الله أيها الزميل .... وما تنحرمون إنشاء الله من يوميات دار عزيزة :)
شكرا على التعليق ... أسعدني كثيرا وأسعد الصبايا :)

Nikon 8 يقول...

حجر كريم
فعلا يا عزيزتي الطلعات الغير مخطط لها تتميز بنكهة خاصة :)

Nikon 8 يقول...

مركبنا
في هذا الوقت بالذات لا تفوتين عليج جو المزارع :)

Nikon 8 يقول...

كبرياء وردة
الناس أذواق :)
لكن فعلا البيض كان لذيذ:)
لووووووووووووول
عصام كاريوكا :)
وين طرا عليج :))

Nikon 8 يقول...

الزين
الله يسلمج يا عزيزتي الزين :)
فرصة لا تعوض إنا نستغل جمال الجو بالكشتات والطلعات الحلوة :))

Nikon 8 يقول...

Broke
تصدقين بورك كثر ما إستانسوا بيون يعيدونها هذا الأسبوع ولكن هالمرة بنشرط عليهم بدون صوغة !
:)

Nikon 8 يقول...

Salah
صحتين وعافية :)
عند وصفة الإخت جندل ما تتفوت :))

Nikon 8 يقول...

chandal/danchal!!
عزيزتي جندل ... دنجل ... مدام شربت ... أم التوت
لوووووووووول
أكثر وحده عندها أسامي :)
أشوف جينات حبايبنا الزبارة طلعت ... من هالوصف اللي يشهي
أمممممممممممم
:)
صج شوقتيني :))

Nikon 8 يقول...

lawyer
جمعية الوفرة ( الشبرة ) تجنن ؟؟؟؟
:)
مو لي هالدرجة .... لكنها حليوه
لووووووووووووول
مشوارج ما هو حسافة على الأقل شميتوا نسمة نظيفة :))

Nikon 8 يقول...

جندل .. دنجل
لوير

المكان مكانكم إخذوا راحتكم :))

um_alzain يقول...

عزيزتي nikon8

والله شوقتينا للوفره مع الجو الحلو هل ايام ماتطوف
الخضره والصحبه الطيبه والمصري بووجه الحسن اكملت :))

ماشالله عليهم يخبزون

ومن الصبح يحلبون

ومن الخضرا يقطفون

وبيض بومحاحتين يقلون

والغدا يطبخون

ياحظهم

الله يهنيهم

شوقتييييييييييييييييييييني

Manal يقول...

هلا والله بالغالية وسوالفج الحلوة

:)

يا حلو ايام الوفرة

انا احب الطلعات الي من هالنوع

عليكم بالعافية

:)
وصج ترالما نقرا كتاباتج
احس اني معاكم

lawyer يقول...

السمووووووووحه يااااااااا دار عزيزه



جندل لحظه لحظه

عمى بعيييييينه بوستيفان عطااااااكم العلبه هالسنه بجم؟؟

200 يوروووو؟؟؟


اذا اقل بوصييييييج انتي اتيبيلي و انا انشاء الله هالويك اند بكون في دبي اذاااااااااا توصين شي بلغيني وين هذا الشااي المهيل خنييييبه عشتو انا اموت على الجويهااااااا




وبالمره انتنقص عن دار عزيزه عشااااان ياخذونه الوفره





خوووووووووووووش تشوق على الصبح

Nikon 8 يقول...

منال
اللع يعافيج :)
فرحت لج لما قلتي إنج تحسين كأنج معانا .... المهم نخفف شعور الغربة عليكم :)
ولو إن خضار إنجلترا لا يقارن مع كل خضار مزارع الوفرة بكبرها :))

Nikon 8 يقول...

أم الزين
هالله ... هالله
هذا من الوصف صرتي شاعرة ؟
الله يعين لو كنتي مع الصبايا بالوفرة :))
الخضار والنسمة الحلوة تهيج المشاعر ... ما تنلامين :))

Sn3a يقول...

لووول الله يخليلكم هالصبايا ويطولكم باعمارهم

والله جنهم جدامي ماجنه بوست اقراه من لاب توب ماشاءالله عليج

شفتي البيض بو محاحتين ورد خدودهم
والله مايندرا اهو البيض بومحاحتين ولا المصري وقمصانه الملونه


يعطيج العافيه

Nikon 8 يقول...

Sn3a
الله يعافيج يا سنعة:)
تورد الخدود كان من كل شي الهوا والمنظر والصحبةالحلوه والبعد عن الهم ..... ومن كلمات مجاملة أخونا المصري لصبايانا :))

chandal/danchal!! يقول...

nikon 8

مساج الله بالخير اختي :)

بس برد على لويرنا

لووووووووووووووووووووووول


تعرفين بو ستفان!!!!... اقووول ترى ما اذكر بجم بالضبط.... اللي اذكره ان يعطينا علبة فيها 10 باكيتات صغار.... العلبة الكاملة ب300 وكسور يورو لوووووووووووووووووول

والله الكويت صغيرة.... وافا عليج نصيرلك زعفران يا لويرنا... ما طلبتي شي

ومشكورة وما قصرتي يا بعد عمري عمرج... لا خلا ولا عدم.... تروحين وتردين بالسلامة وانشاءالله تتونسين بالعافية

:))

سوق دبي قصدت فيه سوق بالكويت جبال البنك المركزي.... مشهور ببيع اقمشة بالجملة ومعظم اللي يبيعون فيه مهارة.... وهم في مهري يبسط ببسطات ومن عرض بضاعته يبيع هيل:)))))

بس ريحة الهيل ماله تفوتح... صج خنين

ما كنت اقصد دبي العامرة:)

نأسف على اللبس اللي حصل:)

Unknown يقول...

خوش طلعة بس أفضل العبدلي أبرد وأنا قاعد أقري يعت :(

Nikon 8 يقول...

مشاري
ما جربنا العبدلي ... يقولون جوها أبرد ... المرة الثانية إنشاء الله
وحياك الله دوم بدار عزيزة :)