الجمعة، 2 أكتوبر 2009

نار الأب

تقول وداد :
من هو الأسهل للإستعانة به عند حدوث المشاكل هل هو الأب أم الزوج أم الأخ ؟
إليكم قصتنا التي حدثت قبل سنوات قليلة وإنتو حكموا؟
نحن ثلاث أخوات متزوجات ورابعة في سن زواج ولكن لم يأتها النصيب بعد
نزور بيت أهلنا يوم الجمعة من كل أسبوع من السابعة صباحا حتى ما بعد صلاة العشاء مباشرة نتعشى مع إخوانا الذكور ونذهب لمنازلنا ونحمم عيالنا ونراجع لهم دروسهم إستعداد لبداية أسبوع دراسي جديد
طوال الأسبوع نكون ( لاهين ) بمسؤوليات البيت والزوج والعيال ولا نخرج إلا للضرورة
ونترك مشاوير الخياط والسوق والمواجيب السريعة ليوم زوارتنا لبيت أهلنا عندما نتجمع أنا وأخواتي
أمي لا يعجبها تصرفنا ودائمة ( التحلطم ) علينا
وحنا نساحلها بكم كلمة ( ونهج ) ونتركها لوحدها مع عيالنا !
من الأمور اللي نعشقها أنا وأخواتي هي قراءة الفنجان
ما خلينا وحدة بالكويت وما جربنا قرايتها
ومن يصادف أن وحدة كلامها يتحقق معنا ( نجلب ) فيها وكل أسبوع نزورها
في إحدى الزوارات مدحت أختي الكبيرة قارئة الفنجان ( أم عبود ) وقالت إن بنات الدوام يمدحونها وقرايتها وحدة بوحدة :)
شجعنا إختنا الصغيرة ( المتدينة ) للذهاب معنا ووافقت على غير عادتها !
( فرينا ) راسها ثلاثتنا بكلامنا وأقنعناها بأن هذا مجرد تسلية وبتعرف من خلاله وين نصيبها ( مخشوش ) ومتى بيصير ؟
مسكينة صدقتنا لأنها كانت وقتها ( ميتة ) على الزواج !
المهم طلعنا وخلينا القرعة ترعى ( لعب عيالنا وشطانتهم ) في بيت أهلنا وأمي ( تاكل حنايج ) علينا نسمعها لين صكينا باب السيارة ومشينا إلى ميدان حولى حيث شقة أم عبود
دخلنا وإستقبلتنا أم عبود من دون موعد ولا يحزنون
جلست أمامنا في صالون شقتها الصغيرة وأمامها طاولة عليها موقد صغير وفناجين قهوة جاهزة للإستعمال
ومع السوالف الخفيفة وكيف عرفتوا عني ؟ ومين دلاكم علي ؟
دفعنا أجرتها مقدما خمسة دنانير لكل وحدة
وصبت لنا فناجين القهوة وهي تتفحصنا لتعرف طلب كل واحدة فينا
ركزت على إختنا الصغيرة وأرادت البدء بفنجانها ربما لأنها شعرت بالتحدي بسبب ترددها وعدم تشجيعها لأم عبود للكلام معها
حملت فنجان أختي وأخذت تنظر بداخله وتلفه يمين ثم شمال وهي ( تعفس ) ويهها مرة ومرة تنظر لأختنا بحزن :(
سكون المكان وعلامات ويهها أرعبتنا
وزاد رعبنا طرقات عنيفة على الباب بنفس الوقت وصياح رجل خارج الشقة يأمر بفتح الباب وإلا كسره !
بخوف فتحت أم عبود الباب لتمتلأ الشقة برجال باللباس الوطني وأوامر بعدم التحرك
أخذونا جميعا بباص مع أم عبود إلى المخفر
لنكتشف إنها كانت كبسة المباحث لأم عبود المتهمة بالنصب والشعوذة ونحن كنا الزبائن !!!
لا تسالوا عن حالنا وقتها ... كنا مذهولين ... وفشلانين من الموقف ... وخايفين أحد يعرفنا !
طلب منا الضابط حضور أولياء أمورنا لتسريحنا
عندها إحترنا ... من ننادي ؟
بصراحة خفنا جدا من إبلاغ أزواجنا بما حدث ... لأننا متأكدين من ردود أفعالهم ... والإحراج والفضيحة الذي سنسببه لأهلنا وحمولتنا !
فكرنا بإخواننا ... وتراجعنا ... لأن هذا يعني أن عقابهم سيكون أكثر ما يكون على إختنا الغير متزوجة ... وإن رايهم سيتغير بأختهم الملتزمة وترددها على أماكن مراقبة من المباحث !!
لجأنا مضطرين لوالدنا العتيج العصبي ... فهو ستر وغطا لنا ويظل هو أبونا وأرحم لنا من نيران إخوانا وأزواجنا !
أتانا مسرعا وأخرجنا من المخفر وسط مسباته ( النقوص ) التي يرميها علينا وتفافيله وتلسب العقال على ظهورنا
أمام كل من في المخفر ... والضباط يحاولون تهدئته ... والوقوف بيننا وبينه
ركبنا السيارة جميعا في الخلف خوفا منه !
وطوال الطريق وهو يسب ويصرخ علينا ويلتف علينا ويتفل بوجوهنا كل ما تذكر الموقف المشين اللي حطيناه فيه !
وصلنا بيت أهلنا .... طبعا ما لنا قعدة بعد اللي حصل ... وقعدتنا معناها مزيدا من ( تسبع الويه من تفافيل أبوي )
حطينا عيالنا بسياراتنا وطرنا فيهم لبيوتنا
وعيالنا مستغربين يسألون إشفيه بابا عود إمعصب عليكم ؟
وإخوانا الذكور إستغربوا طلعتنا السريعة من البيت وأمي بررت لهم إنها بسبة هوشة يهال !
من عقبها كرهت شي إسمه قراية فنجان
أما إختنا اللي تسببنا عليها فالحمدلله جاها خوش نصيب بعد هذه الحادثة بأربع أشهر
لكنها كانت وايد متأزمة خلال هالأربع أشهر بسبة إهتزاز ثقة أبوي فيها وزعله عليها :(
وحنا تبنا تركنا الطردي وصرنا ننثبر يوم الزوارة في بيت أبونا وما نطلع إلا لبيوتنا
وكان هذا شرط أبوي ( الله يرحمه ) وإلا راح يعلم أزواجنا علينا
وأحس إن هذا الشرط هو إنتصار أبي لأمي أكثر من كونه عقاب لنا لأن أمي
الوحيدة اللي كسبت من هذا الموقف
وقالت : قلعة ليت صاير فيكم جذي من زمان ... لكن هالمسكينة اللي مالها ذنب ( تقصد إختنا الصغيرة ) اللي قصيتوا عليها :(
طبعا أزواجنا حاليا يدرون بالموقف ويضحكون عليه لأن أبونا الله يرحمه قام بالواجب وأكثر معانا
ويتخيلون ( عفرته ) فينا !
ولكن ما أظن إنهم بيذكرون الموقف بنفس الراحة ويضحكون عليه كما يحدث الآن لو أنا إستعنا فيهم بذاك الوقت !

هناك 49 تعليقًا:

t.q8 يقول...

هههههههههههههههه


لا مو صج !!!

وبعدين من صجج في احد يضيع وقته الحين بقراية الفنجان وتدرون ان كل جذب بجذب

غير معرف يقول...
أزال أحد مشرفي المدونة هذا التعليق.
غير معرف يقول...

واي انتي اتينين شعبيه بكل شي ..يبتي موضوع بيني وبين نفسي دايماافكرفيه شنو في الام والاب تحديدا اللي يخلينا نتحمل انهم ((يشقونا شق))لما نلجألهم في اي مصيبه ومشكله بس ما نلجأ لغيرهم مهما كانت درجة قرب الغير ...انا وحده مالجأ لصديقاتي ولا خواتي الا ع الخفيف
تعرفين انا كل فضايحي (بلاوي السوده والزرأه بالنسبه لامي طبعا)وسوالفي اقولها لامي ..لو اسكت شهر 6 اشهر سنه او سنتين بعدها ابدي افتح الجربه لامي واسولفها عن كل شي صارلي بحياتي
امي تسمعني وتسكت ..لان
امي ما تطق ولا تتفل ههههههه بس شوي تعاير على الخفيف وتنصح فيني وساعات تطنقر علي وهذا الشي اللي يذبحني ..بس اقولهاانا ادري كلامج كله صح صح وانا غلط غلط واني ساعات اسوي عكس ما تنصحني فيه ..لان ياربي زمن امي وابوي غير عن زمنا فانا مواكبه الزمنين بطريقتي ياربي امي مسكينه شكثر عارفه وسامعه وساكته وتقول لا تقولين لابوج ..عاد انا ابوي الله وكيلج جبريت مولع من غير شي مالي الا عصاية المخمه جان غلطت بشي وانا ماتحمل بس ياما كليت وانا صغيره بس طق بسبيل العلم ههههههههههههههههاي وتره يابت المخمه نتيجه انا باذن واحد احد في طريقي للحصول على اعلى مرتبه علميه ... ولله الحمد
واي بطيت الجربه اسمحي لي :)

chandal/danchal!! يقول...

الابو وايد ارحم من الزوج

:)


عسى الله يفكنا من هالشكولة اللي تارسة الديرة ويثبت عقول هالحريم!

المقوع الشرقي يقول...

نيكون
اعتقد لجوؤهم للأب كان افضل خيار
مهما بيعصب بس سترهم وغطاهم
الأخ يختلف من شخص للثانى
فيه أخ جدا متفهم ..وهذا قليل
وفيه اللي ما ينتحاجى
وفيه اللي نص ونص
ونظرة الأخ لأخته تختلف عن نظرة الأب
..
قراءة الفنجان ..على قولت حريمنا الكبار
لو فيهم خير سروا عمرهم
بس كونهم يروحون لها فى مكانها
وايد خطر..من عدة نواحى
فيه بنات ..عن طيب نية يقطون عمرهم بالتهلكة

جبريت يقول...

ههههههههههههههههههههههههههههههههههههههههههههههههههههههههههههههههههههههه


شهالحظ النحس الي رحتوا لها وصارت كبسه لووووووووووووول


لا لا مو صج هالسالفه

خخخخخخخخخخخخخخخخخخخخخخ

الله يرحم الوالد ويذكركم بعقاله الي المفروض تبروزونه بوسط الصاله عشان يكون العبره لمن لا يعتبر

صوت الكويت يقول...

هالموقف يصلح حق تمثيلية أم البنات

Hope يقول...

ماكو احن من الابو على عياله
الابو لو مهما يسوي .. كله حق مصلحه عياله

ولد الديرة يقول...

تدرين شاللي يغثني

محد فكر ان لو قارئة هالفنجان فيها خير جان عرفت متى راح ينكبس عليها :)

كلت حنايج :q

SHOOSH يقول...

يبيلكم عبدالحليم

غير معرف يقول...

يبا اي شعوذه اي شي ...

قراءة الفنجان صارت من الشعوذه ؟

يا امه ظحكت من جهلها الأمم .

lawyer يقول...

واااااااااااااااي الله يعيييييييييييينكم

هههههههههههههههههههههههه


واي انا اموت خوف من هالسوالف

احس كلا بيطلعون ينانوه و اشبااااح و يدخلون فيني و استحرم الصراحه هذاااااا شرك

بس حزتها الانسان ياخذه على ضحك



شخبااااااااارج يالغاليه

غير معرف يقول...

بسج تأليف قصص ... !

الاوركيده يقول...

اكييييييييييييد اختيار الاب وايد احسن لان مهما راح يسوي راح يصير ارحم من الزوج والاخو

:)

بس بصراحة عفيه عليها اللي قدرت تقول حق ريلها السالفة المفروض ماتقول وتنسى السالفة الله يرحم الواحد بواسع رحمته

:)

NewQ8 Bride يقول...

بعد قلبي الأم و الأبو ماكو مثلهم لو شنو نسوي لو نكبر و نصير عند ريايلنا ماكو فايده عند المشاكللازم نرجعلهم و يتحملون

N.Rhythm يقول...

يماااااااااااااااه

وااي حطيت ايدي على قلبي
على كثر ما اظحكت على كثرما خفت

هههههههههههههههههههههههههه
انا كاسره خاطري اختهم الثالثه


الله يهداهم اشوله رايحين جان متصلين على وحده ماتسوى كبسات عليهم :p

والله بعد قلبي قلب ابيهم
صج الابو غير ...

على طاري جمعاتهم حت احنا جمعتنا يوم الجمعه بس نجتمع ساعه ساعتين ونطلع للسوق ويا خالاتي !!
لين زفتنا يدتي قالت اسمها جمعه فصلوا طلعتكم عن جمعتكم
ناس طاعو وناس ماطاعوا =)

Nikon 8 يقول...

t.q8
الحادثة حصلت منذ سنوات ووقتها كانت قراءة الفنجان تجارة رابحة وصج المجتمع من خزعبلاتها!!
ولا تزال قراءة الفنجان موجودة حتى في الدوامات ويا شفنا فناجين مقلوبة جاهزة للقراءة !
وصباحج سكر وخير يا عزيزتي :))

Nikon 8 يقول...

غير معرف 1

ما بعد الطراق إلا تعلوم
وطراق الحبيب مثل أكل الزبيب
وما كو أحلى من زبيب الوالدين :)
بعد كل التجارب الخاطئة والإستفادة منها لا بد بتصيرين أحسن البنات
وأنا متأكدة إن أخطائج تقدر تسكت عليها الأم وتخشها عن الأب الحنون :)
صباح الورد الندي في هذا الصباح الجميل :)

Nikon 8 يقول...

جندل

يا صباح الأبهات الرحيمة يا الغالية:)
الله يتفبل دعائج
سمعت إن حتى أثار اللبن في الكلاس يقرونها بدال القهوة !
تصدقين عاد
يعنى هذا النسخة الخليجية لقراءة الفنجان !!

Nikon 8 يقول...

المقوع الشرقي
يا هلا بميميش :)
أكيد الأبو أرحم وأستر على بناته وعياله .. وين الواحد يطلع من جزا الوالدين ؟
وفعلا لوفيها خير وتعلم الغيب كان عرفت عن الكبسة !
ولكن في ناس تدمن قراءة الفنجان وتمشي على هوا شنو تقول لها قراية الفنجان !!
الله يثبتنا بعقولنا .

Nikon 8 يقول...

جبريت

هههههههههههههه
يا حبكم يا الرياييل للشماته
في أشياء وايده من ممتلكات الأب تستسحق التبروز يعني جت على العقال اللي إنطقوا فيه ؟
لوووووووووول
صباح خفة الطينة يا أخي :)

Nikon 8 يقول...

صوت الكويت

مسلسل أم البنات كان النسخة الحديثة لموقف البنات اللي يدخلون بيوت مجهولة الأصحاب وتتستر بغطاء بيع ملابس أو صالون أو قراءة فنجان كما هو حاصل لصاحبة القصة منذ سنوات قليلة !
ويا هلا فيك ضيف غالي في دار عزيزة :)

Nikon 8 يقول...

هوب

ما في شك في هذا الكلام
وتعليق إختي المقوع الشرقي على البوست فيه إثراء للموضوع يمكنك الرجوع له :)
ويا هلا فيج يا الغالية :))
صباحج قيمر وقشطة :))

Nikon 8 يقول...

ولد الديرة

فعلا وهذا يثبت إنها جاهلة بأمور الغيب عكس ما تدعيه لزبائنها بأن الحجاب مرفوع عنها !
هل من متعظ ؟
صباحك عسل :)

Nikon 8 يقول...

شوش

:)
صباح نسمات أكتوبر الجميلة يا الغالية :)

Nikon 8 يقول...

غير معرف 2

قراءة الفنجان عند المتاجرات بهذ المهنة غالبا ما تقود إلى أعمال نصب وشعوذة ودجل .... غير إنها من الأمور المحرمة .
وهذا شي معروف للجميع !
ويا هلا فيكم :)

Nikon 8 يقول...

لوير

وايييييييييييي
أخيرا بينتي :)
صار لي فترة فاقدج وأمس كنت مقررة أحط لج تعليق وسبقتيني
ما تتصورين إشكثر فرحت لما شفت إسمج :))
أنا بخير والحمد لله
نصوم الأيام البيض هذه الأيام
رجعنا رمضان من جديد :)
أنا معاج بأن هذي الأمور مرعبة جدا
لما تكون من ناس متمرسة فيه
الله يبعدنا وحبايبنا عن هذا الطريق ولا يولع أحد فيه لأن فيه خراب بيوت وزراعة أوهام بالروس !

Nikon 8 يقول...

غير معرف 3

تأليف قصص !
يبدو إنك \ إنج لا تعيشين الواقع !
عموما لستم مجبورين لقراءة شي ما يعجبكم .

Nikon 8 يقول...

دمعة المقهور

هذي السالفة حدث منذ سنوات مثل ما ذكرت ووقتها كان فيه كم وحده مشهورين بقراءة الفنجان وكونوا ثروات لا تصدق من خزعبلاتهم اللي باعوها للناس
والزوج عرف وعلمته زوجته من بعد وفاة الأب وبرود السالفة
وشر البلية ما يضحك
مع إن بوقتها كانت كارثة والكل يطمطم عليها .

Nikon 8 يقول...

نيو برايد

يا هلا بالعروس الجديدة وصباحج عسل وهنا إنشاء الله :)

سبحان اللي يعطي الوالدين وساعة الصدر لتحمل أخطاءنا
والمثل يقول ما يطلع راس لين يشيب راس .

Nikon 8 يقول...

xname

كانت من ضمن المشهورات في هذا المجال بذاك الوقت وحبوا يجربون قرايتها !
والأخت الرابعة قصدج صج مسكينة لأنها ساكنة مع الأم والأبو بنفس البيت وشوفي نفسيتها إشلون صارت !
والخوات الأربع كل وحد في بيتها .
وسالفة الطلعة في يوم الزوارة لازم نتخلص منها أنا مع جدتكم الغالية
وسلام خاص لها
وصباحكم سكر :)

نون النساء يقول...

هههههههههههههههههههه

هاذي قرصه قوية عشان لا يسوون مثل هالسوات مرة ثانيه ولا يروحون اماكن السيكيوريتي مالها لج عليه ...


بس والله تخيلت المنظر ضحكت ضحك
وبنفس الوقت عورني قلبي عليهم




وعلى قولة اللبنانيين
تنزكر ماتنعاد

:P~

الزين يقول...

ايييه يا نيكون

الأبو ويا غيبة الأبو


تصدقين عاد طراق من الأبو

ولا كلمة صغيرة من الزوج



ولا يقولون لي النصيب والرزق كله عند قراية فنجان ما اجبلت عليها

اعوذ بالله

الله لا يبلينا



تعالي بقول لج شي على كتر

شسالفه الغير معرفين هاليومين عندي وعندج

من حارق خبزتهم

:)

Nikon 8 يقول...

الزين

يا هلا بشهرزاد المدونات
ويا هلا بشيخة الرومانسية
الرزق والنصيب من رب العالمين
والأقدار مكتوبة ولا يغيرها غير الدعاء
ولكن هناك من تعتقد بالفنجان وأسراره وهناك من تأخذه على سبيل التسلية
ولا تقولين طراق ولأبو ولا تفلته
والله إنها ماي ورد :)
أما الرياييل فالشكوى لله من يتطوف لهم موقف تعودوا !

Nikon 8 يقول...

نون النسوة

راكز الله وكيلج راكز:)
لو تشوفينهم شنو يسوون مع بناتهم الحين ستين ألف سؤال لي بغوا يروحون لمعرض أو بضاعة معروضة في منزل :)
الحرص حلو
يا هلا فيج يا الغالية
مسائج ورد وهيل :)

غير معرف يقول...

للامانه انا ضحكت من كل قلبي وتذكرت مغامرات قبل الغزو لما انا ورفيجتي الغبيه بس طردي ورا اللي يقروون الفنجان ورفيجتي هاذي من قارئه الى الثانيه وكلهم كذابين وانصحها بس مافي فايده ومن كثر ما كنت اخاف عليها تطيح بالتهلكه مثل الحادثه هاذي كنت اغامر واروح وياها والله لايوريكم الاشكال اللي نشوفها والخرابيط اللي نسمعها لا وتشوفي ن البنات أشكال وأرناق وشيبون كله عشان هالزواج!!!ولما كنا نروح احط إيدي على قلبي لان اهلي يحذروني من هالمواقف بس الجرأه ، ودايما البصارات ( قارئة الفنجان ) يقولون لي ما بدك تشوفي حظك ؟؟ أقول لهم كذب المنجمون ولو صدقوا وأنصح رفيجتي بس ماكو فايده عمك اصمخ !ولما قرأت المقال غشيت من الضحك لانه داس على الجرح ، وذكرني في تفاهة تفكير البنات والحمدلله الف مرة اللي ستر علينا وما انطقينا بعد والا كان التلسب بالعقال أقل القليل !!!!!هي هي هي هي !

Salah يقول...

مسكينة المرأة

لو كانت وداد ذكر ومن معها في هذه المصيبة اخوانها وليس أخواتها لاختلف حال الاب ولما استغل ضعفهم

قصة فكاهية بس تقهر على حال المرأه في مجتمعنا!

ARTFUL يقول...

شوفوا مع اني ادري باني غير عصبي

بس هم اتوقع ان ابو مرتي ارحم مني على بنته ليش؟!؟!

وتبون الصج الحريم ما يعجبهم العجب

ان قلت ما يخالف وطوفت قالت انت ما تخاف علي ولا تغار علي ولا تحس

وانا عصبت وتنرفزت قالت شفيك كبرت الموضوع شدعوه عادي

!!!

أشق هدوومي!!

p;

رزنامــــــة يقول...

القصة عجيبة وينج ما كتبتيها من زمان
الله حفظكم من البهدلة الخارجية

بهدلة محلية وفي البيت وخصوصا بيت بابا عود
مو مشكلة وتتغطى وتنحل

بس موضوع قراءة الفنجان والتصديق فيه
او حتى التسلية فيه سمعت انه لاتقبل صلاة اربعين يوم ، وتقدرين تبحثين بالموضوع

ولكن تدرج القصة والاحداث اللي فيها كأنها قصة مسلسل ... كملي الحبكة وزهبيها لمسلسل حق رمضان الياي لوول

Sn3a يقول...

loooooool
امبيه جنه مسلسل
خطاكم السو

امبيه شلون فيكم الجرأه تدشون بيوت ناس ماتعرفونهم
وغير ندفع فلوس حق شي حرام

بس اشوه ربي ستر والوالد كان موجود
الله يحفظكم ان شاءالله

walah 7alaah يقول...

ما شاء الله تبارك الرحمن طريقة الكتابه ولا أروع
مع اني ريال وسوالفنا حيل غير عنكم
بس حيل شدني اسلوب الكتابة
يعطيج العافيه

Nikon 8 يقول...

walah 7alaah

الله يعافيك يا أخي الكريم
وحياك الله دوم ضيف عزيز على دار عزيزة :)

Nikon 8 يقول...

سنعة
خطاج اللاش يا عزيزتي
الحادثة مرت عليها سنوات والآن صارت من النوادر اللي الواحد يتعض منها
أحيانا شدة الرغبة لمعرفة شي ما تجعل الواحد يتغاضى عن الحرام
هذا اللي حصل :)
مسائج ورد يا ورد :)

Nikon 8 يقول...

رزنامة

يا هلا بأخي الكريم :)
تصدق ما لي نفس على القصص الطويلة يمكن لأن يبيلها تفرغ وهذا مو حاصل لي حاليا
فعلا أنا سامعة مثلك أن قراءة الفنجان لا تقبل معاه صلاة لمدة أربعين يوما حاله حال الكف والفال
في فترة كان الفنجان هوس جماعي والناس غاضة النظر عنها ومعتبرتها تسلية
يا هلا فيك في دار عزيزة :)

Nikon 8 يقول...

ARTFUL

فعلا يا أخي العزيز نحن معشر النساء محيرين قليلا ومحد يعرف لنا غير الأبهات :))
مسائك عسل :)

Nikon 8 يقول...

صلاح

حي الله صديقنا الغالي صلاح :)
القصة حدثت بالفعل منذ سنوات
وأعتقد أن الأب في دخلة المخافر ما يفرق بين ولد وبنت وإن كانت البنت وضعها حساس أكثر أمام زوجها وإخوانها وأهل زوجها
زين اللي عوفنا إنك من مناصري المرأة
أنت مكسب لدار عزيزة يا أخي الكريم
تحياتي لمنال :)

Nikon 8 يقول...

غير معرف 4

من كلامك أتوقع إنك بنت
شفتي اليراعة وين تودي البنات بالرغم من تحذيرات الأهل ... لكن ما كو فايدة :)
الله ستر عليكم وسلمكم
والحين لازلتوا تروحون وإلا كل وحده تزوجت وإنتهى الغرض من البصارات ؟
:)

ميمة السبيت يقول...

** لووووووووووووول الله يرحمه زين اسوي فيهم ، الوحده لازم ماتدخل اي مكان وخصوصا البنات و هالشعوذة ماوراها إلا المصايب الحمدالله عدت بخير و صارت سوالف يضحكون عليها

Nikon 8 يقول...

ميمة السبيت

يا هلا بميمة :)
طلعتي من مشجعي الأب :)
تهقين ما هي حوبة الأم اللي يزورونها ويطلعون يتمشورون ؟