الثلاثاء، 9 مارس 2010

يمه منهم :)

حقيقة ما كنت أنوي أن أتطرق لهذا الموضوع علانية !
لأنه موضوع يخصنا نحن النساء تحديدا
ولكن موقف حدث أمامي بالعمل أقنعني على مضض للتحدث عنه ( وبط الجربة )
هل هواجسنا تجاه من يتعامل معهم أزواجنا وبالذات مع العنصر النسائي مبالغ فيها ؟
وهل إخفاء الأزواج لحقيقة بعض الأمور التي تحدث معهم وبالذات فيما يخص عملهم مع النساء والمواقف التي تحدث لهم معهن يريح بالهم وخاصة إذا كانوا واثقين من إستقامتهم ؟
وما في داعي لإثارة خيال الزوجه لهواجس لا وجود لها ؟
إليكم ما أجبرني للتطرق لهذا الحديث ومناقشته علانية
كنا في ورشة عمل وبعد الإنتهاء منها أخذنا كعادتنا بإلتقاط الصور التذكارية
وبعدها ذهب كل لحال سبيله
أحد الزملاء الوسيمين والمتزوج منذ ثمان سنوات تقريبا حضر لمكتبي وطلب مني صورة معينة إلتقطتها بعدستي
دونا عن باقي الصور !
بدافع الفضول تمعنت بالصورة التي سأل عنها لأتفحص سر إختيارها من قبل هذا الزميل
لم أر غير زميلاتي الجدات وكل واحدة منهن من جنسية مختلفة شعورهن مسرحة بتسريحة قديمة جدا متماشية مع موديلات ملابسها ومكياجها أيام عزها وصباها
أرسلت الصورة له بالإيميل وأنا أسألة :
في صور أحلى من هذي الصورة كلنا نبين معاكم ... تبي أطرشها لك ؟
رد ضاحكا : يا معودة لا تفتحين لنا أبواب مصككة ههههههههههه
المدام كله تقول لي أنا أخاف عليك من بنات الدوام !!!
أنا قاصد هذي الصورة بالذات لأن البنات اللي ممكن يثيرون غيرة المدام مو باينين
سكتت قليلا وقال بصوت منخفض وكأنه ( يتحلطم )
هذي وعسانا نسلم !
الزميل أراد أن يوهم زوجته إن الدوام لا يوجد به غير موظفات على تلك الشاكلة وما عليها
غير إنها ترقد وتأمن على حلالها ( أي عليه )
ضحكت وقلت له : يمه منكم يا الرياييل ... عموما هذا موقف راح أبتزك فيه إذا يوم طاوعت نفسك وسمحت لها تمشي جذيه وإلا جذاك !
هذا الموقف ذكرني بقريبتي عندما جاء زوجها المدرس من الدرسة وإصبع يده مربوط بشاش طبي
وقص عليها بصدق وإمتنان والكثير من كلمات الله يعطيها العافية وما قصرت وجزاها الله خير
عن أم هيثم ممرضة المدرسة وكيف تولت مهمة تطبيب جرح يده
تقول لا شعوريا صرخت غريزة الأنثى بداخلي منذرة من خطر أم هيثم على زوجي وقلت
له وأنا أرفع حاجبا وأضع يدا على خصري :
هالله .. هالله ... وإنت قاعد حق أم هيثم على قولتك على أبو إنه جرح ؟؟؟
ما صدقت تنجرح وتعالجك مره ؟
لا بارك الله باليوم اللي حطوا فيه حريم بمدارس الأولاد
ونظرت له بغضب وسألته :
وليش ما رحت المستوصف حق المضمدين الرجال ؟
تقول تفاجأ من ردة فعلي العنيفة وقال :
يبه ... إشفيج ؟
أم هيثم مرة كبيرة ... هذا جزاها معالجتني ؟
تقول إبتعدت عنه وأنا أدمدم :
علينا هالحجي ؟
اليوم تمدحون ... وباكر تعجبون وحنا خلف الله علينا مثل المدمغين ... نصدقكم
وتالي ما أوعى إلا حاطها على راسي مرة ثانية !!
لا يوبا حنا عارفين شغلكم زيييييييييين إنتو يا الرياييل !
تقول سكت زوجي تماما بعدها ولم يعد يطري إسم أم هيثم على لسانه
وصرت أرافقه للمستوصف أو ( أدز ) العيال ليذهبوا معه عند تغيير الضماد
حتى صار ذاك اليوم وكنا ليلا في الجمعية التعاونية نتسوق أغراض البيت
فإذا بي أسمع صوت زوجي العالي وهو يرحب بأهم هيثم
إشتغلوا كل عفاريت الدنيا بداخل رأسي
وذزيت العربانة الثقيلة أمامي وظهرت لزوجي بحركة مباغتة من الجهة الأخرى
لأستطلع أم هيثم هذه اللي ما أدري من وين إطلعت لنا ؟
تتغير نبرة قريبتي وتخف حدتها وتكمل حديثها لنا وتقول :
صوت أم هيثم العجوز وهي ترد على زوجي وقامتها القصيرة والدقيقة المختفية خلف ضخامة زوجي جعلني أخجل من حالي وأحب هذه الإنسانة وطريقة كلامها العتيقة قبل أن أراها
أقبلت عليها وأنا أسلم وأقبل رأسها وأشكرها على ما فعلت مع زوجي
نظر لي زوجي بنظرة أفهمها جيدا وهو يقول :
هذي أم هيثم اللي سولفت لج عنها
ورديت عليه نظرة شقاوة ورضى وأنا أقول لأم هيثم
هو ... عرفتها من وصفك لها .... وإلتفت عليها وقلت لها :
الله يعافيج هذا زوجي عندكم طول اليوم بالمدرسة وأمانة ترى ما أأمن إلا من علاجك إنتي بالذات وإنشاءالله تربطينه من راسها لي صبع رجله ... حلال عليج
:)

هناك 43 تعليقًا:

Seema* يقول...

حلوة الثقة
ما تستدعي أي شي من هذا!
: )

غير معرف يقول...

يازين سوالف هالدار الي ما نمل منها


عاد هالموضوع بالذات انا راح اسكت وماي معلقه:)


لاني لو علقت راح اكتب بوست اهني


بس على قولتج..يمه يمممه منهم الريااييييل



ربي يحرسج ويحميج والدار


حبي:*

Tekana يقول...

بصراحه فيه حريم يمصخونها بهالسالفه وعبالهم ازواجهم دنجوانات عصرهم. وزمانهم حتي لو كان الزوج مافيه اي ذرة جمال وماكو وحدة تفكر تطالعه... بصراحه انا اؤمن بنظرية ان الريال مدام اهوه من داخله زين ونظيف حتي لو تصادفه ملكة جمال ماراح يفكر يسوي شي مو زين صج لكل قاعدة شواذ لكن المفروض يكون فيه حسن نية وثقه بين الازواج. وما ينلامون الرياييل اللي حريمهم من هالنوعيه اذا جذبوا او حرفوا بسوالفهم مع الجنس الناعم

Nikon 8 يقول...

Seema*

هناك فريق يرى أن الثقة وحدها لا تكفي
ولابد من فتح العين ...
هذا رأيهم
مع إني لست منهم

Nikon 8 يقول...

سلة ميوّه

يا هلا بسلة ميوتنا
سوالفنا لا تعلى على قصصك المسلسلة الجميلة
تراني متابعة ... متى الحلقة الأخيرة ؟
دار عزيزة كلها تحت أمرك
وكتبي التعليق اللي يعجبج وإنشاءالله يطلع أطول من بوستي
لأنه في النهاية يظل وجهة نظر وفيه إثراء للموضوع وبخاصة من شخص مثلك
تحياتي يا الغالية
:)

Nikon 8 يقول...

Tekana

أنا معك في كل كلمة قلتيها
ولكن المثل يقول
عينك على حلالك دوا
:)
يا هلا فيج يا الغالية

Mohammad Al-Yousifi يقول...

مع احترامي حق زميلج

بس ما لازم يجاري زوجته بهالخرابيط

لازم ما يعطيها ويه و يحاول يرقع الوضع بالدوام عشان ست الحسن ما تغار

ما اقدر اكمل اخاف المدام تقرا

ARTFUL يقول...

صباح الخير

الريال ما ينلام لما اختار هالصوره من بد كل الصور ، الريال ما يحب القرقه والدندره وعوار الراس

قال انا شلي بالطلايب وليش ما ليش..

ومرات افكار البنت توصلها ليييي موزمبيييييق وتردها زبير تالي الكويت مثل صاحبتنا ، كلها صوره عقب ورشه وفرق بينك وبينها 12 متر ، لو قاعده بحضنه اقول ما تنلام

فسياسة التغبي وايد ريايل يستخدمونها مهو خوفا لكن ابتعادا عن المشاكل والصيحه اللي مالها داعي

تحياتي

نصير الرجال

p;

chandal/danchal!! يقول...

يمه منهم وبررييييه منهم اولهم على آخرهم


لكن

استهلق واسمتلق واستنكر الغيرة على غير معنى... سبايب وجر شَكَل

NewQ8 Bride يقول...

تدرين الوحده لما تكون فاضية و ماكو شغل و ما عندها اي هواية او اي علاقات اجتماعية هذا همها الوحيد بالدنيا و الله يعينها على نفسها الصراحة

الثقة بالنفس وايد حلوه و لازم كل زوجة تثقف بنفسها اول شي و ثاني شي تثق بالريال و بس لاتقعد تفتح حق نفسها بيبان مسكره :) و تحسس زوجها انها صديقته و بس ، و الزواج لازم الواحد يغض النظر شوي عشان يمشي المركب :)

امبيه ادري وايد قرقت بس هم عندي شغله النضوج و العمر من اهم اسباب الزواج الناجح

Sn3a يقول...

من صج
يكسرون خاطري الرياييل
الله يعينهم

جايز لو المره ماتاخذ الامور بهالحساسيه الرياييل ماراح تكون عينهم زايغه
لانهم يشوفون الموظفه موظفه وزميله

لكن حريمهم يوعونهم انها موظفه ويحسسونهم بالتاء المربوطه عدل

reemas يقول...

واحد من الربع يا نيكون انا ملاحظ ان يخاف من غيرة مرته
كانت راح تمره الدوام عندنا عشان يسويلها تحليل
و هو يمشي و يوصي السسترات يتكلمون معاه رسمي و عينهم بالارض جدامها
ههههه قتله شدعوه عاد هي تدري انت تشتغل هني و هذيلي زيملاتنا
جان يقولي ..شتقول انت
اثناء الولاده و هي تطلق كنت اسار السستر و اسال عن حالتها
نادتي بين صرخات الطلق تقولي شعندك وياها !!!!!
شرايج ؟
لازم مرات نوخر عن عوار الراس
:))
.....
نيكون فيه تحديث للبوست الاخير لايطوفج .. حياج

Nikon 8 يقول...

ma6goog

لووووووووووول
خايف من المدام ؟
لا أتغشمر أدري خايف على مشاعرها :)
عموما إقرا تعليق ريماس .

Nikon 8 يقول...

ARTFUL

مسا الأنوار يا أخي العزيز يا نصير الرجال
D:
والله طلعت حمش ومنت سهل ومن مؤيدي التغبي عن الزوجات !!!
الله يعين أم شيخة
أضحك معاك ترا :)

Nikon 8 يقول...

chandal/danchal!!

:)
أنا معك حرام الوحده تضيق على الرجل بغيرة ما لها معنى
ولكن هناك فريق قال لي إنها من باب
الوقاية خير من العلاج
!
مسا الأنوار
:)

Nikon 8 يقول...

New Bride

صاجة ومشكلة لما الريال تطلع مرته من هذا النوع
حبيبتي تكلمي وعلقي مثل ما تبين
والدار دارج يا الغالية
:)

Nikon 8 يقول...

Sn3a

أتفق معك بأن تبتعد المرأة عن إثارة إهتمام الرجل بزميلته
وتخيلي لو كان الموضوع بالعكس والرجل هو اللي يخاف على مرته من زمايل زوجته بالدوام وبخاصة إذا كانوا أفضل منه !!!
مشكلة !

Nikon 8 يقول...

reemas

لووووووووووووووووول
والله ضحكتني
الظاهر زميلكم يتقمص شخصية الواد الثقيل بحضور زوجته !!!
على العموم
شهد شاهد من أهله
وأشوة ذكرت هذا الموقف
مسا الأنوار
:)

غير معرف يقول...

هاي عزيزة :
أول مرة أقرا لك بوست ,,, أعتقد
بس بصراحة عجبني البلوق بقوة
وحبيت أشاركك بهالموضوع
زميلك بالدوام عجبني ,,
يعني بيختصر المشاكل وعوار القلب
وياليت بعد يعزم زوجته يوم عالدوام بس شرط أنك بإجازة أنتي وأي وحده صغيرة
بكذا راح يضمن راحة البال للأبد
بصراحة بعض الحريم تزودها حبتين بسالفة الغيرة وهذا الشي ينفره منها مو يقربة
دمتي يود عزيزتي عزيزة

XOXO

may يقول...

خخخخخخ

ياليت كل الحريم مثل أم هيثم

^_^

نون النساء يقول...

انا مع إن المرة تكون مثل الذيب


تغمض عين عنه وتفتح عين عليه


:)


لأن الثقة بروحها ما يمشي حالها..

وعلى قولت المثل مال باب الحارة
يا مئامنه بالرجال متل اللي مئامنه المي بالغربال


:P~

ARTFUL يقول...

نيكون
--------

انا اعاني من أمر ، لما أقول قناعتي الشخصيه ما اعني اني انا اطبقها!!

انا اقول ان الشخص اللي مرته ما تعطيه فجه أبد من حقه ومن الضروري يغبي على مرته علشان اهو يرتاح وهي ترتاح!!

بس انا ما قلت ان مرتي مضيجه علي

:)

مقبوله لا تحاتين

:)

Sami يقول...

العكس صحيح ..هم غيرة الرجل لا تقل عن غيرة المراه ..بس الفرق ان الرجل يكمت

عثماني يقول...

خوووووش موضوع ..

انا اشوف الموضوع ان المسألة مسألة ثقة بالنفس

متى ما كانت الزوجة واثقة من نفسها فما راح يكون عندها مشكلة

لو ان شالله زوجها محاط بمليون بنت من فصيلة هيفا بنت وهبي او نانسي بنت عجرم

مشكلتنا بالكويت ان الكثير من سيداتنا الفاضلات تنقصهم الثقة

ومن ناحية ثانية .. هم بعض الرياييل ما يقصرون بعد .. تلقينه مطيح الميانة مع زميلاته بالدوام .. وجنة وحدة منهم ...لا

حلاة الريال تكانه شوية .. ويحط بعتبارة ان دايما اكو خط احمر بينه و بين زميلاته .. ما يتجاوزه

enter-q8 يقول...

الحمدلله انا حليت هالمشكله ببداية زواجي

اول شي اقولها انتي حلال و هذي حرام
ترد لكن تقدر تخليها حلال قلت اقدر
لكن الفلوس اللي بصرفها بالحلال عيالي اولى فيها بعد
و انا مو تاجر
لكن اوعدك اذا ربحت المليون بتزوج عليك و اضحك وامشي
و اهي تطنقر
ارد اراضيها واقولها انتي تعرفين طبعي و تعرفين اسلوبي و صدقيني الرجل لو بيلعب ما تقدرين تصيدين عليه اي شي
الواحد فينا طول اليوم بره البيت
غير هذا يا عزيزتي
انا مو من النوع اللي اكرر الغلطه مرتين
و اهدها و امشي
هذي نصيحة لأخواني اللي على وجه زواج طبقوها و خلاص

fatto يقول...

لووووووول مسكين كسر خاطري .. اثاريه صاج من اول :)

Antonio يقول...

مواضيع العزيزة دائما عزيزة

موضوع جميل جدا ، طبعا الغيرة موجودة في كل انثى ، وهي ملح العلاقة الزوجية ، لكن الملح لازم يكون معتدل عشان الطبخة ما ترفع الضغط :)

دام ابداعك

وبانتظارك دائما

اعزاء في دار العزيزة دائما


احترامي

المقوع الشرقي يقول...

الصدة حلوة

ما يلحقون راس

:)

فريج سعود يقول...

تراهنين ان العيوز هي ام ام هيثم وان ام هيثم بنتها شمحوطة وارملة على صغر

قرمت يقول...

ماسكين الريايل والله، صج إني عزوبي ولكن هالسوالف لازم نسمعها مقرر ما بين كل فترة و فترة، الغيرة حلوة في حدود المعقول، ولكن أن تتحول إلى هوس، هذا الشيء مرفروض، ولكن يبقى السؤال لماذا هذه الغيرة؟

أنا كنت خابر أول أن الرجل يحب التملك، ولكن هل هذا الأمر أصبح في النساء أيضا؟ أم له دوافع أخرى، وهل الشك و الغيرة سوف تحمي الرجل من الزواج بثانية و ثالثة؟

Nikon 8 يقول...

Lady lulu

يا هلا بزميلتي الجديدة

يا فرحة زميلنا لي درى إن لها مؤيدين
:))
يا هلا فيج عزيزة في دار عزيزة :)

Nikon 8 يقول...

مـي

الله يسمع منج
لوووووووووووووووول
:)

Nikon 8 يقول...

نون النساء

لووووووووووووول
ما هقيتج جايده
:))

Nikon 8 يقول...

ARTFUL

والله فاهمه قصدك بس حبيت أتغشمر معاك
تحياتي لأم شيخة
يا هلا فيك عزيز يا خوي :)

Nikon 8 يقول...

عثماني

وانا أيضا من مؤيدي الخط الأحمر بين العلاقة بين الزملاء والزميلات
يا هلا فيك يا خوي :)

Nikon 8 يقول...

Sami

أتوقع بموضوع الغيرة تكون بحسب طباع الواحد يعني ما له علاقة بالرجل أو المرأة
يا هلا فيك يا أخي العزيز وبرايك :)

Nikon 8 يقول...

Enter-Q8

يا هلا بأخي العزيز
من زمان ما طليت علينا
يا أخي خوفتني بتعليقك صج حمش
بس تدري الصج خوش نصيحة:)

Nikon 8 يقول...

fatt

شفتي عاد وين اللي يصدق ؟
:)

Nikon 8 يقول...

Antonio

يا هلا بك أخي الكريم عزيز في دار عزيزة
ويا هلا برأيك
وشكرا على إطرائك الجميل
لأتمنى التواصل
:)

Nikon 8 يقول...

المقوع الشرقي

في هذا أنا معك إميه بالإميه :)

Nikon 8 يقول...

فريج سعود

ههههههههههههههه
تعليق طريف
لا تقرأ بس قريبتي ويحوشها وسواس :))

Nikon 8 يقول...

قرمت

يا هلا بزميلي الجديد
عمر الغيرة ما منعت الزوج من الإقدام على الزواج الثاني أو الثالث أو الرابع
ولكن عذر النساء بمراقبة الرجال هو من باب عينك على حلالك دوا
يا هلا بك عزيز في دار عزيزة :)

just freedom freedom يقول...

هههههههههههه

ضحكتني سالفة ام هيثم^^

عالعموم الغيره الزايده مالها داعي
بس ترا الشكوك احيانا كثيره تكون بمحلها^^