الثلاثاء، 27 يوليو 2010

خوش سرية :)

بداية أعتذر عن عدم قدرتي على الرد على تعليقاتكم الجميلة
في آخر بوستين
وشكر خاص للعزيزة
الزين
على رعايتها للوك المدونة الجديد
وننتقل الآن لبوست اليوم

لي عادة أن أفرش الجرائد وآكل عليها السمك المشوي

أفتح السمكة المشوية وأحط راسي فيها أنتف من لحمها الأبيض الطري اللذيذ

المتبل بالصبار والبهارات والليمون المنعش

لا يشغلني عنها إلا زوغان نظري على خبر بائت منشور بالجردة التي أفترشها

ويا ما قريت خبر نفعني ولم أكن مركزة عليه في وقته عندما نشر

بالأمس كان غدانا ميد مشوي

ذاك الشوي اللي يحبه قلبكم
أممممممممممممم
:)

هالمرة أبونا قرأ خبر طاحت عينه عليه وإهتم فيه

وسألني إشرايك ؟ قريتي هذا الإعلان ؟

بصراحة شرقت من كثر ما ضحكت عليه

هههههههههههه

الخبر كان عبارة عن إعلان لمنتج ينبت الشعر الغزير للصلعان !

وفيه صور لقبل وبعد إستخدام المنتج

والطريف إن الإعلان يقول

نتعامل مع الحالات بسرية تامة !!!

أي سرية الله يهديكم

والريال يدخل أصلع

ويطلع بشعر غزير !!!

حتى العمي يلاحظ الفرق

الدعاية وإسم الشركة والمنتج منشورين بالجريدة جدام الله وخلقه

يبقى إن ما دروا الناس إن الشعر نبت بسبب علاج

الحل البديهي اللي راح يتبادر لأذهانهم

إن الشخص لابس باروكة وهذا ألعن برأيي

ما طرا علي غير خياطنا محبوب

رجع من إجازة طويلة في بلده وشكله متغير

والكل يقول له فيك شي متغير

أثاري الريال لاصق ربع باروكة على فروة راسه

ونازله لي جدام على شكل قذله طويلة

تطز عيونه كل ما بغى يقص قماش أو يكتب القياس !

ومع هذا فرحان فيها ولا همه ضحك الحريم عليه

وعلى شكلها الغزير المضحك في بقعة وحدة براسه والأجناب طبيعية بشعر خفيف !

كارثة كيف يهتم الرجل كثيرا بمسألة الصلع

ويصرف مبالغ ويقتنع بأي دعاية تعطي أمل بعودة الشعر لرأسه

بيني وبينكم أبونا كان مقتنع بالإعلان

وضحكي عليها كان أكثر إقناعا له بالعدول عن الفكرة

عزيزي أبونا

وعزيزي كل أصلع

يا زينك ويا زين صلعتك

الطبيعي أحلى

:)



هناك 33 تعليقًا:

Seema* يقول...

لا مشاكل للشعر مع الصلع.. بعد شيبون؟ ;P

Someday يقول...

ذكرتيني بالسايق الأولي يا حليلة
يوم وهو موديني الدوام اطالعه ياربي فيه شي و- الابتسامة شاقه الويه
أثري حاط باروكة سكت عنه قلت خل يستانس فيها بس هم تعجبت أقول فقلبي تقص على منو؟ يا ماما يعني بيوم وليلة راسك كل شعر وبعدين
شكلك بالصلعة لايق عليك وطبيعي بس شتفهمين

reemas يقول...

هههههههههه
شفيكم هالايام تتحرشون بالصلعان
شسالفه
انا بسوي حملة انا اصلع و افتخر :)
و لا لزراعة الشعر او الباروكة
***
عاد اقولج سالفة تضحك
من شهر تقريبا رحت السالميه عند المحلات اللي يبيعون ادوات الحلاقه و مستحضرات الصالونات.. كنت ابي اشتري موس حلاقه اللي يستخدمونه الحلاقين
المهم صفطت السياره عند الرصيف و الله لا يسامحه ياني شرطي و كلبش سيارتي مع اني ما اخذت اكثر من 5 دقايق
المهم ظلت سيارتي موجوده لثاني يوم
عاد ولدي مر يم السياره يشوف شالوا الكابح و الا لا
و عقب ما رد البيت يقولي جدام امه.. يبا ما لقيت توقف الا عند هالمحلات و انت ما فيك شعر
شنو كنت ناوي تشتري باروكه ؟؟ طبعا قالها ويا ضحكته السخيفه

عيال اخر زمن
:)
شكرا علي البوست الطريف
فعلا الطبيعي احلى و ابرد مع الحر :))

سلة ميوّة يقول...

خوش لووووك

عجيييب


علينا بالعافيه شكل المدونة :)اليديد

وعليج بالعافيه

السمج:*

خوش بوست

وترا ولهنا عليج وايد

وايد..

وايد:*

Deema يقول...

و الله مع الزمن، لاحظت إن المسألة يا نيكون وايد حساسة بالنسبة للشبان، لا تستهينين فيها :)

الاوركيده يقول...

الغاليه نيكون شلونج ؟

مبروك النيولوك وتسلم ايد الزين كله عليج بالعافية الميد في هالوقت الرياييل يهتمون بمسالة الشكل اكثر من الحريم بس صج الطبيعي احلى على الاقل موفر فلوس الحلاق؟

reemas يقول...

اي صج نيكون
نسيت اباركلج علي النيو لووك
نيولوك زين من الزين و حق الزين

مبروك

:)

Manal يقول...

:)

معاج يا خيتي

الطبيهي احلى
واضبط
:)

esTeKaNa يقول...

يا صباح الوله كله
:**
ولهنا عليج من غير شر
واللوك..شراحة الدنيا
ما توافقيني ان الزين ما يطلع منها الا كل زين؟
:))
بالنسبه للأكل على الجريدة،هذا سبب من الاسباب اللي كانت تخطر في بالي في كل مناسبه تقرب منا كاميرات الجرايد
!!
كله اخاف تنحط صورتي على جريدة ينوكل عليها او يمشون فيها الدرايش
:P
وبالنسبه للصلع:
كنت حاضره احد الافلام الهنديه المشهورة في الموسم اللي فات،احد المشاهد شاروخان يلعب بشعره ولا شعوريا تنهدت وقلت:
اللللللللللللللللله
فإذا بمعرسنا يخزني خزه يتطاير بها الشرر من عينيه
ههههههه
هذا والموضوع مشروع صلعه مو صلعه رسمي ،بس الموضوع جد حساس
:P

ARTFUL يقول...

صباح الخير

شكله البيت كله يحب يجرب سوالف الجرايد


D;


دائما الطبيعي أحلى بس من يصدق

:)

Sweet Revenge يقول...

ماشاء الله ياعساه منزل مبارك :)
اللوك وايد حلو ذرب الصراحة ماكو خبه
اما السر ففعلا في سر نيكون عندي وصفة جربتها علي نفسي وكان عندي فراغات علي منابت الشعر من الشد وغيره واستخدمت هالوصفة المنزلية
وزّرعت المنطقة مرة ثانية
بس عاد ما ادري تصلح حقا الرياييل الصلعان من مدة طويلة ولا لأ
اقولج اياها علي الايميل وانت عاد عطيها لابو العيال باعلي سعر ;)

may يقول...

خخخخخخ
ذكرتيني بوحدة زوجها أصلع
أقنعته زوجته ان شكله أحلى بالصلعة
تقول عشان ما يطالعونه البنات

^_^

Sami يقول...

الزين ما يطلع الا من الزين ..و عليج بالعافيه :)

الليوان يقول...

عليج بالعافية السمج
عاد الميد هالايام يودر..(:

والصلع ابرد بالصيف...(:

لاتطولين الغيبات....
سوالفج تونس ونوله عليها..
مساج خير وسعادة يارب

Nikon 8 يقول...

Seema*

هههههههههههههه
وجهة نظر ذكية ما فكرت فيها
:)

Nikon 8 يقول...

Someday

فرحان بالباروكة
:)
يمكن فاقد الشعور بالشعر من زمان ؟
بس شوفيه إشكثر راح يستمر ؟
لأن خياطنا شالها بعد مدة تدرين ليش ؟
مسكين خاست على راسه
:(

Nikon 8 يقول...

reemas

لوووووووووووووووول
عوينتي والله أم العيال
ما في مثلها وعلى ما يقولون
ستر وغطا
ومنظر الصلعة
الطبيعي أحلى وأبرد ويلمع بعد
يعني صج نظافة
:)
والله يبارك عليك على اللوك الجديد
شكرا

Nikon 8 يقول...

سلة ميوّة

الله يعايج بالعفو والعافية
وتوله عليك الصحة والعافية
وأنا بعد ولهت على التدوين وربعه
الغياب المتقطع الفترة السابقة
كان بسبب مشاغل العطلة وسفر صغير
:)

Nikon 8 يقول...

Deema

حشا والله يا ديمة ما ني قاعدة أستهين فيها
وأدرى إنها شي حساس جدا بالنسبة لهم
القصد مواساتهم بمنظر الصلعة وقبولها
لأن عفلا ومن صجي الطبيعي أحلى
:)

Nikon 8 يقول...

الاوركيده

هلا وغلا بالأوركيدة الجميلة
:)
تصدقين عاد إن فلوس الحلاق ما تطلع شي جدام المبالغ اللي يصرفونها على كريمات وشامبو تنبت الشعر ؟
هذا البسيط
أما الزراعة فأيضا مصاريفها كثيرة
والله يبارك فيك يا عزيزتي
:)

Nikon 8 يقول...

Manal

يا هلا بالغالية منال
والله يعافي الصلعة اللي خلتك تمرين علينا
يا هلا فيك دوم
:)

Basma يقول...

جربي رولات الجرايد, تحصلينهم من مطابع الجرايد اللي بالشويخ

بدون حبر و تقصينهم بالحجم اللي تبينه D:
--

دايما, كل أصلع تكانة و جميل فلا يخربون هالنظرة مع الباروكة و الزراعة

--

lovely blog :)

مجرد قارئة يقول...

والله أنا مثلج مشتهية ميد مشوي أو صبور مشوي وقعدة أرضيةمن الاكلات اللي ودي أكلها قبل السفرة
أن شاء الله اتلذ مثلج
عليج بالعافية
وانا جدا معجبة بكتابتج

Nikon 8 يقول...

Basma

يا هلا فيج يا بسمة
ولكن أرجو التوضيح إشلون أستخدم رولات الجرائد علشان تنبت الشعر ؟
وخليني أزيدج كل أصلع تكانة ودمة خفيف :)

Nikon 8 يقول...

esTeKaNa

يا هلا بعروس المدونات
:)
صحيح والله الزين ما يطلع منها إلا الزين
وتصدقين إن من أول بروفة عجبني بدون ملاحظات
أستغرب إشلون في ناس قادرة تفهم شخصيات وأذواق ناس أخرى بدون ما تشوفها وجها لوجه
مثل حالتنا نحن المدونين والمدونات
؟
شعور جميل ويفرح :)
لووووووووووووووووول
إشلون توضحين إعجابك بأي شخص وبخاصة وأنتي عروس
والأدهى إن الإعجاب بشعر وهذا أفظع
ههههههههههههه
الله يتمم عليكم بالخير
:)

Nikon 8 يقول...

ARTFUL

شايف عاد ؟
وهالمرة أنا اللي طلعت فطينة وخليته يهون :)
كل إطراق بتعلوم :)
مبروك عليك دلولة توني أدري
:)

Nikon 8 يقول...

Sweet Revenge

ناطرة الوصفة والإيميل على أحر من الجمر
ناوية نية قشرة
إبي أساوم على الوصفة للصلعان :)

Nikon 8 يقول...

مـي

عاد تصدقين إن الصلع يزيد الوسامة
وبالذات إذا كان الشعر الأصلي مثل وايرات التلفون
هههههههههههه

Nikon 8 يقول...

Sami

الله يعافيك
وعليك إنت بعد بالعافية على الغزلان والمناظر الحلوة
:)

Nikon 8 يقول...

الليوان

ولهت عليج العافية
والغياب كان بسبب سفر وإجازة الصيف
والله يعافيك يا عزيزتي :)

Nikon 8 يقول...

مجرد قارئة

بالعافية وأكلي اللي تشتهينه قبل رمضان
الصيام والسمك المشوي لا يلتقيان عندي
لأنه السمك يعطش !
وشكرا على الإعجاب وإنشاءالله تكونين من الرواد الدائمين لدار عزيزة :)

Antonio يقول...

بالعافيه الميد :)

ساعات الواحد يمل من الغترة

ويمل من الكاب

وده يطلع شعره ويسوق سياره كشف

باجواء الكويت الحلو وشعره يغطي على عيونه

ويطوف الاشاره الحمرا واهوا مستانس ويقول

ما شفتها شعري مغطي على اعيوني

( احلام اصلع متفائل )


:)

دمتي بالف خير :)

Nikon 8 يقول...

Antonio

الله يعافيك
حلوة سالفة الشعر بالسيارة الكشف
لوووووووووووو
:))